mcrb-bessonovka.penz.muzkult.ru сайтри сӑн

Паянхи кун тӗлне Чӑваш Енре тепӗр 58 ҫын кӑшӑлвируспа чирленине тупса палӑртнӑ. Ҫапла майпа республикӑра чирекенсен йышӗ 1 пин ҫывхарса пырать: 950 ҫыннӑн инфекци пур.

Вилнисен йышӗ ҫаплипех: 8 ҫын. 175 ҫын кӑшӑлвирусран сывалнӑ. Вӗсенчен 40-шӗ килте сипленнӗ.

Раҫҫейре вара пӗр талӑкра 11232 ҫын кӑшӑлвируспа чирленине тупса палӑртнӑ. Кунашкалли ку таранччен пулман-ха. Пӗтӗмпе пирӗн ҫӗршывра 177160 ҫын чирленӗ, 32809 ҫын сывалнӑ. Вилнисен йышӗ – 1625.

cheltv.ru сайтран илнӗ сӑн

Кӑшӑлвируса пула карантинра ларакан ҫынсем е пур. Вӗсем урӑх регионтан килнӗ е чирлӗ ҫынпа хутшӑннӑ.

Анчах пурте йӗркене пӑхӑнмаҫҫӗ-мӗн. 47 ҫын килте лармалли режима пӑснӑ. Вӗсене геолокаци пулӑшнипе тупса палӑртнӑ. ЧР сывлӑх сыхлавӗн министрӗ Владимир Степанов каланӑ тӑрӑх, ҫав ҫынсем хӑйсем чире ҫӑмӑллӑн ирттерме, анчах аслӑрах ӳсӗмрисене, хавшак иммунитетлисене чирлеттерсе яма пултараҫҫӗ. Унашкаллисем вара вӑйлах аптӑраҫҫӗ.

Сӑмах май, ку таранччен карантина пӑснӑ 300 ытла ҫынна тупса палӑртнӑ. Йӗркене пӑснӑ ҫынсене 15-40 пин тенкӗ штраф тӳлеттерме пултараҫҫӗ. Министр палӑртнӑ тӑрӑх, кӑшӑлвируспа чирлекенсен 80 проценчӗ чире симптомсемсӗр ирттерет.

yandex.ru сайтри сӑн

Паянхи кун тӗлне Чӑваш Енре 731 ҫын кӑшӑлвируспа чирлине палӑртнӑ. Пӗр талӑкра 55 ҫын инфекциленнӗ. Ку республикӑшӑн – рекорд.

Ку таранччен 134 ҫын сывалнӑ, вӗсенчен 28-шӗ килте сипленнӗ. Вилнисен йышӗ унчченхи пекех: 8 ҫын. Халӗ тепӗр 64 ҫыннӑн анализне кӗтеҫҫӗ.

Ҫу уйӑхӗн 3-мӗшӗ тӗлне 1393 ҫынна тухтӑрсем сӑнаса тӑраҫҫӗ. Кӑҫал пӗтӗмпе 4780 ҫынна тухтӑрсем пӑхса тӑнӑ.

Сӑмах май, паян Раҫҫейре 10 пин ытла ҫыннӑн кӑшӑлвирус пуррине палӑртнӑ. Кун пекки унччен пулман, ку – рекорд

Шупашкарти васкавлӑ медицина пулӑшӑвӗн пульницинче кӑшӑлвирус ернӗ, пӳре чирӗпе аптӑракан ҫынна операци тунӑ.

Пациента вӗсен кӑткӑс тата вӑрах вӑхӑта пыракан операци тума тивнӗ. Операцие асӑннӑ учрежденире ӗҫлекен Михаил Доброхотов тухтӑр пурнӑҫланӑ. Кӑткӑс сиплев 20 сехет ытла тӑсӑлнӑ. Чирлӗ ҫынна ҫав вӑхӑтра тухтӑрсем кирлӗ пулӑшу парса тӑнӑ. Специалистсем операцие хӳтлӗх костюмӗпе, кӑшӑлвирус ересрен асӑрханмалли мӗнпур инструкцие пӑхӑнса пурнӑҫланӑ. Операци ӑнӑҫлӑ иртнӗ тесе пӗлтернӗ Чӑваш Ен Сывлӑх сыхлав министерствин сайтӗнче.

Халӗ пациент кӑшӑлвирус чирӗнчен малалла сипленет.

zen.yandex.ru сайтри сӑн

Чӑваш Енре хальлӗхе кӑшӑлвируспа чирлекенсен йышӗ чакса пымасть-ха. Пачах тепӗр май – паян инфекциленнисен хисепӗ татах ӳснӗ: 627 ҫынна ҫитнӗ. Талӑкра тепӗр 41 ҫыннӑн кӑшӑлвирус пуррине тупса палӑртнӑ.

627 ҫынран 117-шӗ сывалнӑ. Эппин, паянхи кун 502 ҫын сипленет. Вилнисен хисепӗ ҫаплипех юлнӑ: 8 ҫын пурнӑҫран уйрӑлнӑ.

Раҫҫейре паян, Стопкоронавирус.рф сайт пӗлтернӗ тӑрӑх, 7933 ҫын чирленӗ. Инфекциленнисен йышӗ 114431 ҫынна ҫитнӗ. 1169 ҫын вилнӗ, 13220 ҫын сывалнӑ.

mk.tula.ru сайтри сӑн

Паянхи кун тӗлне Чӑваш Республикинче кӑшӑлвируспа чирлисен йышӗ 586 ҫынна ҫитнӗ. Талӑкра тепӗр 47 ҫын инфекциленни палӑрнӑ.

Ку таранччен 97 ҫын кӑшӑлвирусран сывалнӑ, вӗсене пульницӑран киле янӑ. Ӗнертенпе сыввисен йышӗ 27 ҫын хушӑннӑ. Вилнисен йышӗ унчченхи пекех: 8 ҫын кӑшӑлвируса парӑнтарайман.

Раҫҫейре талӑкра 7099 ҫын инфекциленнине палӑртнӑ. Ӗнерхи кун тӗлне 11619 ҫын сывалнӑ, 1073 ҫын вилнӗ. Пӗтӗмпе ку таранччен ҫӗршывра 106498 ҫын кӑшӑлвируспа чирленӗ. Сӑмах май, ку кӑтартупа эпир Китайран иртсе кайнӑ – унта 87 пин ытла ҫын инфекциленнӗ.

multilisting.su сӑнӳкерчӗкӗ

Ҫу уйӑхӗн 1-мӗшӗнче Чӑваш Ен ҫыннисене дачӑна муниципалитетсем хушшинчи автобуссемпе кайма ирӗк панӑ. Анчах салона лӑк туллм тултарма юрамӗ. Ҫур автобус ҫеҫ . Ҫакӑ —ҫынсем ҫывӑх ларасран тунӑ йышӑну. Мӗнпур пассажирӑн, ҫавӑн пекех водительсен маска тӑхӑнмалла. Автобуссене вӑхӑтра дезинфекцилемелле, водительсен аллинче ятарлӑ электрон ирӗк пулмалла.

Билет туянма пассажирсен кассӑна каймасан та. Шупашкарта автовокзал сайтӗнче билета онлайн туянма май пур.

Республика ертӳҫисем дачӑна каякансене уйрӑм ҫын машинипе усӑ курма сӗнеҫҫӗ. Кун пек тусан ют ҫынсемпе хутшӑнмӑн, чирлес хӑрушлӑх пулмӗ. Апла пулин те санитарипе эпидемиологи нормисене пӑхӑнса маска тӑхӑнмалла.

Транспорта мӗнпур муниципалитерах тӗрӗслӗҫ. Полици ӗҫченӗсем те, ятарласа йӗркеленӗ 20 ытла мобильлӗ бригада та. Шупашкартан тухнӑ ҫӗрте 12 пост ӗҫлӗ.

yandex.by сӑнӳкерчӗкӗ

Чӑваш Енри пульницӑсене кӑшӑлвируслисене йышӑнма хатӗрлесе ҫитернӗ. Кун пирки паян Чӑваш Ен Элтеперӗн Администрацийӗн пресс-службинче хыпарланӑ. Асӑннӑ амакпа чирлисем валли унччен те вырӑнсем йӗркеленӗ-ха. Кайран та тӗрлӗ ҫӗрте ҫӗнӗ вырӑнсем уйӑрма тытӑнчӗҫ. Ҫӳлтен, Мускавран, регионсене ҫавӑн пек хушу килнипе те ӗҫе хӑвӑртлатма, майсене тупма тиврӗ.

Халӗ пирӗн республикӑра кӑшӑлвируслисем валли 607 койка вырӑнӗ пӑхса хӑварнӑ.

«Федераци центрӗ пире шӑпах ҫавӑн чухлӗ койка-вырӑн хатӗрлеме хушнӑччӗ«», — пытарман Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев. «Лару-тӑру япӑхсан та пирӗн тӑрӑхра никам та пулӑшусӑр юлмӗ», — тенӗ республика ертӳҫи.

Шупашкарта вырнаҫнӑ Федерацин травматологи, ортопеди тата эндопротезировани центрӗ те кӑшӑлвируспа чирлекен пациентсене йышӑнассине Чӑваш халӑх сайчӗ пӗлтернӗччӗ. Аса илтерер: унти вырӑнсем ҫу уйӑхӗн 14-мӗшӗ хыҫҫӑн хатӗр пулӗҫ.

yandex.com сайтри сӑн

Паян Чӑваш Енре кӑшӑлвируспа чирлисен йышӗ 463 ҫынна ҫитнӗ. Паянхи кун тӗлне 44 пациент сывалса киле кайнӑ. 8 ҫын вилнӗ. 8-мӗш вилнӗ ҫын – 90 ҫулта.

Халӗ республикӑра 1522 ҫынна тухтӑрсем сӑнаса тӑраҫҫӗ. Паян Раҫҫейре 6198 ҫын кӑшӑлвируспа чирленине палӑртнӑ. Ку таранччен пӗтӗмпе 87 пин ытла ҫын инфекциленнӗ.

Кӳршӗ регионсенче лару-тӑру мӗнлерех? Мари Элте 462 ҫын чирленӗ, 3 ҫын вилнӗ. Тутарстанра 46 пациент сывалнӑ, пӗтӗмпе 632 ҫын чирленӗ. Чулхула облаҫӗнче 1574 ҫын кӑшӑлвируспа чирленӗ, 109-шӗ сывалнӑ, 9-ӑн вилнӗ.

iz.ru сайтри сӑн

РФ премьер-министрӗ Михаил Мишустин регионсенче кӑшӑлвируспа кӗрешмешкӗн медицина организацийӗсен малтанлӑхри списокне хатӗрленӗ. Списока Чӑваш Ен те лекнӗ.

Раҫҫей правительстви йышӑннӑ документра палӑртнӑ тӑрӑх, Шупашкарти Травматологи, ортопеди тата эндопротезировани федераци центрӗ те кӑшӑлвируспа чирлекен пациентсене йышӑнӗ. Хальлӗхе палӑртнӑ тӑрӑх, ку улшӑну ҫу уйӑхӗн 14-мӗшӗнче пулӗ.

Ҫапла майпа Чӑваш Енре ку инфекципе чирлекен 90 ҫын валли вырӑн пулӗ.