Васкавлӑ пулӑшу паракан службӑн тухтӑрӗсене смс-ҫыру ярса чӗнсе илме пулать. Анчах ку пулӑшупа врача телефонпа чӗнсе илейменнисем ҫеҫ усӑ кураяҫҫӗ. Сӑмах хӑлха илтменнисемпе чӗлхесӗррисем пирки пырать.

Смс-ҫырура чирлӗ ҫыннӑн тулли адресне, хушаматне, тухтӑра мӗн сӑлтавпа чӗннине пӗлтермелле. Чир паллисене те кӑтартма ыйтаҫҫӗ. Ун пек тусан оперативлӑ пай ӗҫченне ҫӑмӑл пулӗ, мӗншӗн тесен хӑш бригадӑна чӗнсе илесси унран килет-ҫке.

Смс-ҫыру ямалли номере пур ҫынна каламаҫҫӗ. Ӑна социллӑ учрежденисем е ҫавӑн пек службӑсем хӑйсем пӑхса тӑракансене пӗлтереҫҫӗ.

Хӑлха илтменнисемпе чӗлхесӗррисем валли васкавлӑ пулӑшӑва унчченхилле йӗркепе те (васкавлӑ медицина пулӑшӑвӑн телефонӗпе шӑнкӑравласа) чӗнме май пур.

Кӑшӑлвирус алхасма тытӑнсан чикӗ леш енчен килекенсене икӗ эрне карантинта лармалли хушу тухрӗ. Палӑртар: каярах пӗр регионтан тепӗр региона каякансен те ик эрне ниҫта тухмасӑр лармалла теме тытӑнчӗҫ. Ку йӗркене пурте пӑхӑннипе пӑхӑнманни пирки ҫирӗплетсе калаймӑпӑр-ха (вӑл урӑх тема тейӗпӗр). Халӗ вара ҫӗршыв шайӗнче ҫӗнӗ йышӑну кӑларнӑ.

Ют ҫӗршывран килекенсен хӑйсем кӑшӑлвируспа чирлеменнине е вӗсем чирлесе сывалнине ҫирӗплетекен справка пулмалла. Ӑна вӗсен чикӗ урлӑ каҫиччен виҫӗ кун маларах илмелле. Ун пек справка ҫуккисен чикӗ урлӑ каҫсан виҫӗ кунта анализ памалла. Чирлӗ пулсан килте сипленмелле, сывӑ ҫынсемпе ҫав вӑхӑтра хутшӑнма юрамӗ.

tverlife.ru сайтри сӑн

Ку талӑкра 56 ҫын кӑшӑлвируспа чирленӗ. Пӗтӗмпе ку таранччен 5886 ҫын инфекциленнӗ.

3205 ҫын кӑшӑлвируса парӑнтарнӑ, юлашки талӑкра 21 ҫын сывалнӑ. Ҫак куна илес тӗк, 2635 ҫын ҫак вирусран сипленет.

Ку таранччен 46 ҫын кӑшӑлвируса пула вилнӗ. Юлашки талӑкра пурнӑҫран уйрӑлнӑ тӗслӗх пулман.

Республикӑра кӑшӑлвирус сарӑлнин индексӗ 1-рен пӗчӗкрех. Халӗ ку хисеп 0,85-пе танлашнӑ. Чарусене пӑрахӑҫламалли иккӗмӗш тапхӑра кӗме ку кӑтарту 0,8-тан пысӑкрах пулмалла мар.

Утӑ уйӑхӗн 11-мӗшӗ тӗлне Чӑваш Енре кӑшӑлвируспа вилнисен йышӗ тата ӳснӗ. Тепӗр 3 ҫын инфекцие пула пурнӑҫран уйрӑлнӑ. Пӗтӗмпе 46 ҫын вилнӗ.

Пӗр талӑкра 57 ҫын чирленӗ. Ку таранччен кӑшӑлвируспа инфекциленнисен йышӗ 5775 ҫынна ҫитнӗ. Юлашки талӑкра 27 ҫын сывалнӑ, пӗтӗмпе ку таранччен – 3159 ҫын.

Оперативлӑ штаб ӗнер иртнӗ ларура пӗлтернӗ тӑрӑх, чарусене пӑрахӑҫламалли иккӗмӗш тапхӑра куҫасси пирки хальлӗхе сӑмах та ҫук.

like29.ru сайтри сӑн

Кӑшӑлвируспа чирлекенсен йышӗ сахалланса пымасть. Юлашки талӑкра Чӑваш Енре тепӗр 61 ҫын чирленине анализсем ҫирӗплетнӗ.

Ку таранччен 5718 ҫын инфекциленнӗ, вӗсенчен 3132-шӗ сывалнӑ. Юлашки талӑкра 25 пациент инфекцие парӑнтарнӑ.

Аса илтерер: утӑ уйӑхӗн пуҫламӑшӗнче кӑшӑлвируспа чирлекенсен йышӗ тӑрук нумайланнӑ. Хальччен республикӑри 43 ҫын вируса парӑнтарайман.

Паян республикӑн Правительство ҫуртӗнче кӑшӑлвирус сарӑлнипе кӗрешекен оперштабӑн черетлӗ ларӑвӗ иртнӗ. Республикӑн сывлӑх сыхлав министрӗ Владимир Степанов пӗлтернӗ тӑрӑх, чирлекенсен шучӗ утӑ уйӑхӗн 2-5-мӗшӗсенче пирӗн тӑрӑхра ӳснӗ.

Владимир Степанов хӑйсем тӑрӑшса ӗҫленипе лару-тӑрӑва йӗркелеме май килнине ӗнентернӗ-ха. Анчах Роспотребнадзорӑн республикӑри управленийӗн ертӳҫи Надежда Луговская тем хаваслансах калаҫман. Лару-тӑру начарланнине вӑл Чӑваш Енре пурӑнакансем маска тӑхӑнманнипе, пӗр-пӗринпе ҫывӑх ҫӳренипе тата пирӗн тӑрӑхрисем ют регионсене канма кайнипе сӑлтавланӑ. Надежда Луговская лавккасенче, халӑх йышлӑ ытти вырӑнти евӗрех общество транспортӗнче малтанхиллех маска тӑхӑнмаллине аса илтернӗ.

prohvost.club сайтри сӑн

Чӑваш Енре паянхи кун тӗлне тепӗр 67 ҫыннӑн кӑшӑлвирус пулнине палӑртнӑ. Ку таранччен 5521 ҫын инфекциленнӗ.

Юлашки кунсенче кӑшӑлвирусран вилекенсен йышӗ нумайланма пуҫланнӑ. Ӗнер кӑна ку йышра 40 ҫынччӗ, паян – 43.

Юлашки талӑкра 24 ҫын сывалнӑ. Пӗтӗмпе 3053 ҫын чире парӑнтарнӑ. Паянхи кун тӗлне 2428 ҫын кӑшӑлвирусран сипленет. Нумаях пулмасть инфекци сарӑлнин коэффициенчӗ 1-рен сахалрахчӗ. Утӑ уйӑхӗн 3-мӗшӗнчен ку кӑтарту 1-рен иртнӗ.

nat-geo.ru сайтри сӑн

Юлашки кунсенче Чӑваш Енре кӑшӑлвируспа чирлисен йышӗ ӳссе пырать. Мӗншӗн? Влаҫ тытӑмӗнче ӗҫлекенсем ҫакӑн сӑлтавне ӑнлантарнӑ.

ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев пӗлтернӗ тӑрӑх, Чӑваш Енри пӗр организацире кӑшӑлвируспа харӑсах 60 ҫын чирленӗ. Ку ыйтӑва Правительство ҫуртӗнче иртнӗ планеркӑра та сӳтсе явнӑ.

Предприяти ятне пӗлтермен, унта инфекци сарӑлнӑ. Халӗ лару-тӑрӑва тӗрӗслесе тӑраҫҫӗ.

Сӑмах май, ку таранччен республикӑра 5424 ҫын инфекциленнӗ, 3026-шӗ сывалнӑ. 40 ҫын кӑшӑлвируса пула пурнӑҫран уйрӑлнӑ.

kaspyinfo.ru сайтри сӑн

Чӑваш Енре кӑшӑлвируспа чирлисен йышӗ 40 ҫынна ҫитнӗ. Юлашки талӑкра тепӗр 3 ҫын инфекцие пула пурнӑҫран уйрӑлнине пӗлтернӗ. Аса илтерер: ӗнер те ку списока 3 ҫын хушӑннӑччӗ.

Юлашки талӑкра 25 ҫын сывалнӑ. Ку таранччен 3008 ҫын инфекцие парӑнтарнӑ. Паянхи кун тӗлне тепӗр 71 ҫын кӑшӑлвируспа чирлине палӑртнӑ. Республикӑра чирлисен йышӗ 5386 ҫынна ҫитнӗ.

Сӑмах май, юлашки кунсенче кӑшӑлвируспа чирлисен йышӗ чакса пынӑччӗ, талӑкра 55-60 ҫын инфекциленнине пӗлтеретчӗҫ. Юлашки талӑкра вара чирлисен йышӗ ӳснӗ.

Чӑваш Ен Сывлӑх сыхлав министерствин Президент пепкеллӗх центрӗнче организмра кӑшӑлвируса хирӗҫ ятарлӑ белок (вырӑсла ӑна антитела теҫҫӗ) пуррине палӑртма май пур. Тӗпчев меслечӗ – иммуноферментлӑ анализ.

Анализа Шупашкарти Ярославль урамӗнчи 48-мӗш ҫуртри репродуктивлӑ пулӑшу кӳрекен 2-мӗш уйрӑмӗн хуҫалӑх расчечӗн пайӗнче (вӑл «Республика лапамӗ» чарӑнура вырнаҫнӑ) йышӑнаҫҫӗ: тунтикун, юнкун кӗҫнерникун – ирхи 7 сехет те 30 минутран пуҫласа 9 сехет те 30 минутчен; шӑматкун – 8 сехетрен пуҫласа 12 сехетчен. Ҫумра паспорт тата укҫа кирлӗ.

Анализ париччен 2-3 сехет маларах апат ҫимелле мар, пирус туртма юрамасть. Газсӑр тӑрӑ шыв ӗҫнишӗн тем мар.

Анализ парас тесен 8 (8352) 62-02-84 телефонпа тунтикунтан пуҫласа эрнекун таран ирхи 8 сехетрен тытӑнса 14 сехетчен шӑнкӑравласа ҫырӑнмалла.