icecreamclub.ru сӑнӳкерчӗкӗ

Шупашкар хулинчи вӑйпитти арҫыннӑн пылак ҫиес килнӗ-ши? Вӑл лавккасенчен пӗринчен 72 плитка шӑккӑлат вӑрланӑ.

Шӑккӑлат вӑрлани видеокамера ҫинче ҫурла уйӑхӗнче ҫырӑнса юлнӑ. Ҫавна йӗрке хуралҫисене лавккара ӗҫлекенсем панӑ.

31 ҫулти арҫын унччен те аолици куҫӗ тӗлне ҫакланкаланӑ. Унччен те — лавккасенчен япала вӑрланипе.

Халӗ арҫынна тытса чарнӑ. Ӑна Шупашкарти тата Шупашкар ҫывӑхӗнчи районсенчи суту-илӳ точкисенчен япала вӑрланӑ тесе шанмаҫҫӗ. Вӑйпитти тӗлӗшпе йӗрке хуралҫисем пуҫиле ӗҫ пуҫарнӑ, тӗпчев пырать.

Чӑваш Патшалӑх Канашӗн депутачӗ, Чӑваш Енри Ентешлӗхсен ертӳҫисен канашӗн председателӗ Юрий Зорин чӳк уйӑхӗн 13-мӗшӗнче Вӑрмар районӗнчи Аслӑ Пинерти тӗп пӗлӳ паракан шкулта пулнӑ.

Юрий Александрович шкул коллективӗпе тӗл пулса калаҫнӑ. Вӑл пирӗн республикӑра кӑҫалтан Чӑваш тӗррин кунне уявлама пуҫлассине аса илтернӗ. Сӑмах май, Юрий Зорин пушӑ алӑпа ҫӳремест. Шкула вӑл чӑваш тӗррипе паллаштаракан вӗренӳ пособийӗн 20 комплектне парнеленӗ. Вӑл пособисене депутат Куславкка, Вӑрмар тата Тӑвай районӗнчи мӗнпур шкула туянса пама шантарнӑ.

«Раскраска-исследование» тата «Книжки для вырезания» кӗнекесем туяннӑ. Вӗсем чӑваш ҫи-пуҫӗпе паллаштараҫҫӗ.

Андреевсем пӗр самантра нумай ачаллӑ ҫемье пулса тӑнӑ. Вӗсен виҫӗреш ҫуралнӑ.

Икӗ арҫын ачапа пӗр хӗрача срокран маларах, юпа уйӑхӗнче, ҫут тӗнчене килнӗ. Вӗсем кесарево мелӗпе ҫуралнӑ. Пепкесем 1654 грамм, 1486 грамм, 1182 грамм тайнӑ. Вӗсем пульницӑра пӗр уйӑх выртнӑ, вӗсене специалистсем сӑнаса тӑнӑ. Ара, кирек хӑш вӑхӑтра та ачасен сывлӑхӗ япӑхланма пултарнӑ. Халӗ ачасен сывлӑхӗ чиперех.

Ашшӗ-амӑшӗ ачасене Серафим, Савелий, Ева ят хунӑ. Палӑртмалла: пӗлтӗр те, кӑҫал та республикӑра виҫӗреш пулманччӗ.

cap.ru сӑнӳкерчӗкӗ

Чӑваш Ене кӑшӑлвирусран килте амбулатори мелӗпе сипленекен пациентсем валли эмел туянмашкӑн федераци хыснинчен укҫа килесси пирки пӗлтернӗччӗ. ЧР Сывлӑх сыхлавӗн министерстви пациентсене эмелсемпе тивӗҫтермелли майсем пирки каласа кӑтартнӑ.

Медпулӑшу ыйтсанах ковидпа чирлисене кирлӗ эмелпе тивӗҫтерӗҫ. Вӗсене илме аптекӑна кайма тивмӗ. Ҫапла майпа чирлисем сыввисемпе сахалрах хутшӑнӗҫ.

Пӗрремӗш май: пациент поликлиникӑна тухтӑр патне килсен ӑна эмелсем параҫҫӗ. Иккӗмӗш май: пациента эмелсене киле пырса параҫҫӗ. Кун валли терапевта е пӗтӗмӗшле практика тухтӑрне киле чӗнсе илмелле, вӑл сиплев палӑртӗ, эмелсене вара нимеҫӗ е поликлиникӑри медӗҫчен килсе парӗ.

Амбулатори мелӗпе сипленекен 5818 чирлӗ ҫынна тӳлевсӗр эмелпе тивӗҫтерме палӑртнӑ. 16 тӗрлӗ эмел туянма хыснаран 45,8 миллион тенкӗ уйӑрнӑ.

osteokeen.ru сайтри сӑн

Ҫанталӑк сивӗ тӑрать. Чӑваш Енре шӑнса вилнӗ тӗслӗхе шута илнӗ. Ку чӳк уйӑхӗн 17-мӗшӗнче пулнӑ.

Ӗнер ирхине Улатӑр районӗнчи Кире поселокӗнче иртен-ҫӳрен арҫын виллине асӑрханӑ, полицие чӗннӗ. Ҫав ҫын 48 ҫулти арҫын пулнӑ. Вӑл киле темиҫе метр ҫеҫ ҫитеймен. Малтанлӑха пӗлтернӗ тӑрӑх, вӑл шӑнса вилнӗ.

Халӗ Следстви комитечӗ ку тӗслӗх тӗлӗшпе тӗрӗслев ирттерет, ун хыҫҫан пӗтӗмлетӳ тӑвӗҫ.

yamalpro.ru сайтри сӑн

Ӗнер кӑшӑлвирусран вилнӗ тӗслӗх пулман, паян вара 8 ҫын ҫак каварлӑ вируса пула пурнӑҫран уйрӑлнине пӗлтереҫҫӗ. Ҫапла вилнисен шучӗ 211 ҫынна ҫитнӗ. Чӳк уйӑхӗнче кӑна кӑшӑлвирусран 66 ҫыннӑн пурнӑҫӗ татӑлнӑ.

Паянхи кун тӗлне республикӑра 11195 ҫын кӑшӑлвируспа чирленӗ, вӗсенчен 9944-шӗ сывалнӑ. Паян сывалакансем нумаййӑн пулнӑ: 224 ҫын. 87 ҫыннӑн инфекци пуррине пӗлтернӗ.

Пяанхи кун тӗлне республикӑра 1040 ҫын килте амбулатори мелӗпе е пульницӑра сипленет.

kokshetau.asia сайтри сӑн

Канаш районӗнчи Ҫӗнӗ Ачча ялӗнче пурӑнакан арҫын ывӑлне хӗненӗ тесе шутлаҫҫӗ. Ун тӗлӗшпе пуҫиле ӗҫ пуҫарнӑ.

Следстви управленийӗ пӗлтернӗ тӑрӑх, 43 ҫулти арҫын ӳсӗр чухне ывӑлне хӗненӗ. Ку пӗрре мар пулнӑ. Следовательсем вӑл 2019 ҫулхи раштав уйӑхӗнчен пуҫласа ывӑлӗ ҫине алӑ ҫӗкленӗ тесе шухӑшлаҫҫӗ.

18 ҫул тултарман ачана хур кӑтартнӑшӑн арҫыннӑн явап тытма тивӗ. Халӗ арҫын ача 13 ҫулта. Ӗҫ-пуҫа малалла тишкереҫҫӗ, судпа медицина экспертизи ирттереҫҫӗ.

kylinariaohta.ru сайтри сӑн

Раҫҫейре «Раҫҫейри тутӑсем» наци конкурсӗ пӗрремӗш хут старт илнӗ. Ӑна РФ ЯЛ хуҫалӑх министерстви йӗркеленӗ.

Конкурса хутшӑнма 79 регионти 500 ытла бренд заявка панӑ. Чӑваш Ен чысне тӑватӑ ҫимӗҫ хӳтӗлӗ. Вӗсем – «Ҫӗрпӳ пӗремӗкӗ» (Ҫӗрпӳ райповӗ), «Чӑваш шӑрттанӗ» (Етӗрнери аш-какай комбиначӗ), «Чӑваш пылӗ» (Канаш районӗнчи «Мелилотус», «Чӑваш Енри качака сӗчӗ» (Шупашкар районӗнчи» «Ялти картиш»).

Конкурс сакӑр номинаципе иртет, унта пӗчӗк тата вӑтам предприятисем ҫеҫ хутшӑнаяҫҫӗ. Ҫӗнтерӳҫӗсем Ял хуҫалӑх министерстви пулӑшакан комплекслӑ программӑна кӗрӗҫ.

Чӑвашсен ҫимӗҫне ҫӗнтермешкӗн пулӑшар. Конкурс сайтӗнче сасӑлав раштавӑн 2-мӗшӗччен пырать.

Алексей Николаев страницинчи сӑнӳкерчӗксем

Шупашкара Питӗртен килекен самолет чӳк уйӑхӗн 14-мӗшӗнче Мускаври Внуково аэропортӗнче анса ларнине Чӑваш халӑх сайчӗ пӗлтернӗччӗ. Аса илтерер: самолетӑн топливо системи таса мар пулнӑ.

Паян эпир асӑннӑ лайнерӑн пилочӗ Алексей Николаев ку историе хӑйӗн страницинче комментариленине асӑрхарӑмӑр. Инкеклӗ лару-тӑру пулнӑ тенипе пилот килӗшмест. Пысӑках мар техника сӑлтавӗ ҫеҫ, вӑл кӑлтӑкпа Хабаровска та ҫитме пулатчӗ тесе палӑртнӑ. Шупашкарта вӑл кӑлтӑка пӗтерме пултаракан специалистсем ҫук тенӗ. Ҫавӑнпа вӑл компанипе ҫыхӑнса никӗс аэропортра анса ларма йышӑннӑ. Самолета ылмаштарма 40 минут ҫеҫ иртнӗ.

Чӳк уйӑхӗн 16-мӗшӗнче Етӗрне районӗнчи йӗрке хуралҫисенчен карас ҫыхӑнӑвӗн салонӗсенчен пӗринче администраторта ӗҫлекен ҫын пулӑшу ыйтнӑ. Пакунлисене вӑл ӑнлантарнӑ тӑрӑх, салона пӗр арҫын кӗнӗ. Вӑл батарейка туяннӑ. Япалашӑн 5 пин тенкӗлӗх укҫапа татӑлнӑ. Сутуҫӑ ытлашши укҫана тавӑрса панӑ хыҫҫӑн арҫыннӑн вакки те тупӑннӑ. Администратора вӑл вак укҫа тыттарнӑ, 5 пин тенкӗлӗххине каялла илнӗ.

Арҫын лавккаран тухса кайсан сутуҫӑ 2 пин тенкӗ ҫитменнине асӑрханӑ. Улталанӑ тесе шухӑшлакан арҫынна Чулхула облаҫӗнчи Лысково хулинче тытса чарнӑ. Ӑна Чӑваш Ене конвойпах илсе килнӗ. Арҫын чӳк уйӑхӗн 15 тата 16-мӗшӗсенче Шупашкарпа Ҫӗнӗ Шупашкарта та ҫавӑн пек улталаса ҫӳренӗ тесе шухӑшлаҫҫӗ. Ӗрӗнпур облаҫӗнче пурӑнаканскер тӗрмерен кӑҫалхи ҫурла уйӑхӗнче ҫеҫ тухнӑ.