Сайта кӗр | Регистраци | Сайта кӗрсен унпа туллин усӑ курма пулӗ
 +7.3 °C
Ҫӗнӗ тусна туп, киввине ан ман.
[ваттисен сӑмахӗ]
 

Хыпарсем

Культура
Елена Троянская сӑнӳкерчӗкӗсем
Елена Троянская сӑнӳкерчӗкӗсем

Чӳк уйӑхӗн 13-мӗшӗнче Чӗмпӗрте Чӑваш культурин кунӗ иртнӗ. Ӑна Чӑваш автономи облаҫне йӗркеленӗренпе 100 ҫул ҫитнине халалланӑ. Кӑшӑлвируса пула куракансене залӑн 1/3 пайӗ чухлӗ ҫеҫ пухма ирӗк панӑ.

Фойере Чӑваш патшалӑх академи симфони капеллин камерлӑ оркестрӗ чӑваш композиторӗсен произведенийӗсемпе кӗтсе илнӗ. Уявпа саламлама Чӗмпӗр облаҫӗнчи искусствӑпа культура политикин министрӗ Евгения Сидорова пырса ҫитнӗ. Чӑваш уявӗсене йӗркелесе ирттерме май тупнӑшӑн вырӑнти чӑвашсен автономийӗн ертӳҫи Олег Мустаева тав тунӑ.

Уява Чӑваш Енри «Ҫавал», «Ҫеҫпӗл», «Nota g» ушкӑнсем хутшӑннӑ.

 

Ҫул-йӗр

Ҫӗнӗ ҫул тӗлӗнче пуйӑспа инҫе ҫула кайса килес текенсем валли ырӑ хыпар пӗлтерер. «Раҫҫейӗн чукун ҫулӗсем» предприятин пассажирсене турттаракан компанийӗ билетсене йӳнӗрех хакпа сутассине пӗтерет. Анчах патне ҫитсен туянмалла мар, халех илсе хумалла.

Билетсене йӳнӗрех хакпа чӳк уйӑхӗн 30-мӗшӗччен сутаҫҫӗ. Каялла килмелли билетӑн хакне 30 процент йӳнӗрехпе туянас тесен билетсене кайма та, килме те харӑс илсе хумалла. Йӳнӗрех хакпа илнӗ билетсемпе чӳк уйӑхӗн 27-мӗшӗнчен пуҫласа кӑрлач уйӑхӗн 7-мӗшӗ таран ҫула тухма май килӗ.

 

Пӑтӑрмахсем
stavplus.ru сӑнӳкерчӗкӗ
stavplus.ru сӑнӳкерчӗкӗ

Шупашкар хулинче пӗр арҫын чӳк уйӑхӗн 14-мӗшӗнче машинӑри барсеткӑна ҫухатнӑ. Автомобильрен вӑл пӗр 40 минутлӑха тухнӑ. Ҫав вӑхӑтра машинӑри пурлӑх ҫухалнӑ. Арҫын машина алӑккине хупса хӑварман иккен.

«ГАЗель» автомобиль Эльмен урамӗнче ларнӑ. 51 ҫулти арҫын йӗрке хуралҫисенчен пулӑшу ыйтнӑ. Пӗчӗк сумкӑра 15 пин тенкӗ укҫа пулнине пӗлтернӗ.

Уй куҫлӑ, вӑрман хӑлхаллӑ теҫҫӗ. Хула урамӗ куҫлӑ та, хӑлхаллӑ та. Машина патӗнче ҫӳрекен шанчӑксӑр ҫынна асӑрхакансем, чӑн та, тупӑннӑ. Шӑпах вӗсем пулӑшнипе 38 ҫулти арҫынна тытса чарма май килнӗ. Вӑл унччен темиҫе хут та судпа айӑпланнӑ.

 

Республикӑра
interesnienovosti321.mirtesen.ru сайтри сӑн
interesnienovosti321.mirtesen.ru сайтри сӑн

Муркаш районӗнчи Шатракасси шкулӗнчи вӗрентекенсене шалу ҫителӗклӗ тӳлемен. Прокуратура Муркаш районӗнчи шкулсенче вӗрентекенсене шалу мӗнле тӳленине тӗрӗсленӗ. Шатракассинче вара йӗркене пӑснӑ тӗслӗх тупнӑ.

Кун хыҫҫӑн Шатракассинчи икӗ вӗрентекене шалу тӳлесе ҫитернӗ. Акӑ мӗн тупса палӑртнӑ: икӗ ҫынна стажшӑн окадӑн 5 процентне хушса тӳлемен. Ҫапла вӗсене шалу тӳлесе ҫитереймен.

Шатракасси шкулӗн директорне административлӑ майпа явап тыттарнӑ.

 

Культура

Эстонире пурӑнакан хастар чӑваш, Ираида Захарова, Фейсбукра пӗлтернӗ тӑрӑх, Чӑваш Енрен аякри ҫӗршывра тӗлӗнмелле самант пулса иртнӗ.

Кӗркуннен юлашки кунӗсем ӑшӑ пулнипе усӑ курса Таллинри Чӑваш культурин музейӗн пуҫарӑвне пурнӑҫлама май килнӗ. Ку пуҫару тӗрлӗ халӑхсен «Лира» пӗрлешӗвӗ тата Нарвӑри чӑвашсен «Нарспи» ушкӑнӗ пӗр шухӑшлӑ пулнӑран пулса иртнӗ. Иртнӗ вырсарникун, чӳк уйӑхӗн 15–мӗшӗнче, «Лира» ҫурчӗн картышӗнче чӑвашсем пуҫтарӑннӑ. Эстони ҫӗрӗ ҫинче Юман тата Ҫӑка ӳсме тытӑннӑ. Ҫав пулӑма халалласа чӑваш апат-ҫимӗҫне хатӗрленӗ, юрӑсем юрланӑ, вайӑри пекех картана тӑрса ташӑсем ташланӑ.

Ку йывӑҫсене лартакансем пӗтӗм чӑвашсен ваттисене, Чӑваш автономи облаҫне йӗркеленӗренпе Ен 100 ҫул ҫитнине тата Эстонире пурӑнакан пӗтӗм чӑвашсене халаланӑ.

 

Сывлӑх
yur-gazeta.ru сайтри сӑн
yur-gazeta.ru сайтри сӑн

Паян республикӑра кӑшӑлвирусран пӗр ҫын та вилмен. Кун пирки федераци информаци центрӗ пӗлтерет.

Ку таранччен республикӑра 203 ҫын кӑшӑлвирусран вилнӗ. Пӗтӗмпе 11108 ҫын инфекциленнӗ, вӗсенчен 9720-шӗ сывалнӑ. Пӗр талӑкра 85 ҫын инфекциленнӗ, 27 ҫын чире парӑнтарнӑ.

Палӑртмалла: чӳк уйӑхӗнче республикӑра 58 ҫын кӑшӑлвируса пула вилнӗ.

 

Ҫул-йӗр
"Грани" видео скринӗ
"Грани" видео скринӗ

Ҫӗнӗ Шупашарпа Шупашкар хушшинче автобус ярӗҫ-и? ЧР Элтеперӗ «Грни» хаҫата панӑ интервьюра икӗ хула хушшинче вӑхӑтлӑх маршрут – автобус – ярассине пӗлтернӗ.

Аса илтерер: унччен Шупашкартан Ҫӗнӗ Шупашкара 100-мӗш троллейбус ҫӳретчӗ. Анчах транспорт шучӗ сахал пулнӑран ӑна нумай вӑхӑт кӗтме тивнӗ. Маршрута ҫӗнӗрен ярӗҫ-и? Олег Николаев каланӑ тӑрӑх, маршрут йӗркеллӗ ӗҫлетӗр тесен 15 троллейбусран кая мар ямалла. Кӗҫех республикӑна 68 ҫӗнӗ троллейбус килмелле, тен, пӗр пайне шӑпах ҫак маршрутпа ярӗҫ. Анчах хальлӗхе ку татӑклӑ хурав мар-ха. Тӳре-шара лару-тӑрӑва тишкерӗ.

Элтепер икӗ хула хушшинче ҫӳрекен 3-4 маршрутпа автобуссем яма шантарнӑ.

 

Персона
Сергей Романов
Сергей Романов

Паян, чӳк уйӑхӗн 17-мӗшӗнче, Чӑваш Енӗн Патшалӑх Канашӗн черетлӗ 45-мӗш сессийӗ иртнӗ. Унта пӑхса тухнӑ ыйтусем хушшинче республикӑра Этем правине хӳтӗлес енӗпе ӗҫлекен уполномоченнӑй кандидатурине сӳтсе явни те пулнӑ. Омбудсмен пулас кӑмӑллӑ ҫын — Сергей Романов.

Парламентӑн сессийӗнче пулнисем каланӑ тӑрӑх, Уполномоченнӑй пуканне йышӑнма ӗмӗтленекен ҫынна депутатсем видеоҫыхӑну мелӗпе итленӗ. Сергей Романов хӑйӗн биографийӗпе паллаштарса тӑман, анчах унчченхи омбудсменсен ӗҫне пысӑка хурса хакланине, хӑй те вӗсенчен юласшӑн маррине палӑртса хӑварнӑ.

Уполномоченнай кандидатурине Этем правине хӳтӗлес енӗпе ӗҫлекен ҫӗршыври омбудсмен пӑхса тухса ырламалла.

 

Сывлӑх
 sputnik-vakcina.ru сайтри сӑн
sputnik-vakcina.ru сайтри сӑн

Республикӑна кӑшӑлвирусран тумалли вакцинӑн тепӗр парийӗ ҫитмелле. Ӑна раштав уйӑхӗнче илсе килӗҫ.

Аса илтерер: авӑн уйӑхӗнче вакцинӑн пӗрремӗш партийӗ килнӗ, унпа «хӗрлӗ зонӑра» ӗҫлекен тухтӑрсене прививка тунӑ.

ЧР Патшалӑх Канашӗн сессийӗнче ЧР сывлӑх сыхлавӗн министрӗ Владимир Степанов каланӑ тӑрӑх, раштав уйӑхӗнче республикӑна 1012 доза килӗ. Хальхинче те унпа кӑшӑлвируспа чирлӗ пациентсемпе ӗҫлекен тутӑрсене прививка тӑвӗҫ.

Ыттисем ҫитес ҫул кӑрлач-нарӑс уйӑхӗсенче прививка тума пултарӗҫ.

 

Ҫурт-йӗр
sin-doch.ru сайтри сӑн
sin-doch.ru сайтри сӑн

Малашне Чӑваш Енре нумай хваттерлӗ ҫӗнӗ ҫуртсенче ҫӑрапа уҫмалли чӳречесем лартӗҫ. Кун пирки ЧР Правительствинче иртнӗ канашлура калаҫнӑ, ку ыйту пирки строительство министрӗ Александр Героев тӗплӗнрех каласа кӑтартнӑ.

Ҫакна ачасем ҫӳллӗшӗнчен ӳксе ан вилччӗр тесе профилактика тӗлӗшпе тӑваҫҫӗ. Аса илтерер: ачасем шӑпах ҫак сӑлтава пула ытларах вилнине палӑртнӑ. Кӑҫал 6 шӑпӑрлан ҫӳллӗ хутри чӳречерен ӳксе пурнӑҫран уйрӑлнӑ, 23 ача суранланнӑ. Юлашки хутчен кунашкал тӗслӗх Шупашкарти «Ҫӗнӗ хула» микрорайонта пулнӑччӗ.

Хыпар ҫӑлкуҫӗ: https://cheb.ws/news.htm?shownews=251542
 

Страницӑсем: 1 ... 1294, 1295, 1296, 1297, 1298, 1299, 1300, 1301, 1302, 1303, [1304], 1305, 1306, 1307, 1308, 1309, 1310, 1311, 1312, 1313, 1314, ... 3866
Orphus

Баннерсем

Шутлавҫӑсем

0 Хурал кӗтесӗ (чат)

Ҫанталӑк

Шупашкарта ҫывӑх вӑхӑтра (05.04.2025 15:00) пӗлӗтлӗ ҫанталӑк, атмосфера пусӑмӗ 742 - 744 мм, 8 - 10 градус ӑшӑ пулӗ, ҫил 3-5 м/ҫ хӑвӑртлӑхпа кӑнтӑр-хӗвеланӑҫ енчен вӗрӗ.

Гороскоп

СурӑхВӑкӑрЙӗкӗрешРакАрӑсланХӗрТарасаСкорпионУхӑҫӑТу качакиШывтӑканПулӑсем
Сурӑх: Халӗ эсир юрату серепине ҫакланма пултаратӑр. Сире шӑпах романтика хутшӑнӑвӗ кирлӗ вӗт? Анчах ҫӑлтӑрсем асӑрхаттараҫҫӗ: килӗштерӳ кӗҫех кӗвӗҫӳпе ылмашӑнӗ. Хирӗҫни уйрӑлу патне илсе ҫитерме пултарать. Тен, ҫывӑх ҫынсем е тӑвансем пулӑшу ыйтӗҫ.

Ака, 05

1961
64
Чӑваш Республикин ҫамрӑк строителӗсен слёчӗ (ака, 5-6) пуҫланнӑ.
Пулӑм хуш...Пулӑм хуш...