krasota.pskovlive.ru сайтри сӑн

Чӑваш Енре кӑшӑлвируспа чирлекенсен йышӗ ӳссех пырать. Ҫавна май тухтӑрсен ӗҫӗ кунра-кун йывӑрланать. Йывӑр лару-тӑрура вӗсене пулас медиксем, студентсем, пулӑшӗҫ.

Шупашкар хула администрацийӗ пӗлтернӗ тӑрӑх, тухтӑрсене аслӑ шкулта е колледжра аслӑ курссенче вӗренекен студент-медиксем пулӑшӗҫ. Халӗ республикӑра нимеҫӗсен штабӗсене те йӗркеленӗ. Нимеҫӗсем тухтӑрсем валли транспорт хатӑрлеҫҫӗ, пациентсем патне шӑнкӑравлаҫҫӗ, эмелсем илсе ҫитереҫҫӗ.

И.Н.Ульянов ячӗллӗ ЧПУра ӑс пухакан 70-е яхӑн студент тухтӑрсене «хӗрлӗ зонӑра» пулӑшма пуҫланӑ ӗнтӗ. Вӗсем васкавлӑ медпулӑшу бригадисенче те ӗҫлеҫҫӗ. Шупашкарти медицина колледжӗн 50-а яхӑн студенчӗ поликлиникӑсенче медсестрасене пулӑшаҫҫӗ.

"Про Город" сайтран илнӗ сӑн

Шупашкарта Богданкӑра авари пулнӑ: машина хир сысни ҫине пырса кӗнӗ. Чӗрчун вилнӗ, машина та самаях сиенленнӗ.

Авари Богданкӑран М-7 ҫул ҫине тухнӑ ҫӗрте 20 сехет те 10 минутра пулнӑ. Ҫакна курнӑ ҫынсем каланӑ тӑрӑх, аварие икӗ машина лекнӗ: «Форд» тата «Шевроле». «Фодӑн» малти пайӗ вӑйлах сиенленнӗ, малти бампер арканнӑ. Унӑн рулӗ умӗнче хӗрарӑм ларнӑ. Телее, вӑл аманман.

Хир сысни вара тӳрех вилнӗ. Вӑл малтан пӗр машина айне кӗрсе кайнӑ, унтан – теприн айне. Унӑн вили ҫул айккинче выртнӑ. Хир сысни самаях пысӑк пулнӑ.

РБК тунӑ сӑн

Раҫҫейре килте кӑшӑлвирусран амбулатори мелӗпе сипленекенсем валли резерв фондӗнчен 5 миллиард ытла тенкӗ уйӑраҫҫӗ. Ку укҫана килте сипленекен пациентсем валли тӳлевсӗр эмел пама уйӑраҫҫӗ.

Пульницӑра выртман ҫынсен чирӗ шала ан кайтӑр тесе сипленмелли схема палӑртаҫҫӗ. Тухтӑр ҫырса панӑ эмелсене тӳлевсӗрех илме май пур. Ҫапла Раҫҫейре 640500 пациент тӳлевсӗр эмелсене тивӗҫмелле.

Михаил Мишустин премьер-министр резерв фондӗнчи укҫа-тенке регионсене кӗске вӑхӑтра ҫитерме хушнӑ. Чӑваш Ене 45 миллион та 829 пин те 500 тенкӗ килмелле.

poisknews.ru сайтри сӑн

Чӑваш Енре кӑшӑлвирусран кашни кунах вилеҫҫӗ. 15 кунра 42 ҫыннӑн пурнӑҫӗ татӑлнӑ. Ӗнер ав каллех вилнӗ – 3 ҫын пурнӑҫран уйрӑлнӑ. Ҫапла ку таранччен 155 ҫын вируса парӑнтарайман.

Ҫулталӑк пуҫланнӑранпа 10074 ҫын инфекциленнӗ, вӗсенчен 8554-шӗ сывалнӑ. Чӳк уйӑхӗн 3-мӗшӗ тӗлне республикӑра 1365 пациент пульницӑра е килте амбулатори мелӗпе сипленнине шута илнӗ.

Республикӑра кӑшӑлвирус сарӑлнин индексӗ 1-пе танлашать. Сӑмах май, малашне пульницӑран кӑшӑлвирус анализӗ «минус» паллӑпа килмесӗрех киле ярӗҫ.

«Пӗрлӗхлӗ Раҫҫей» партин регионти уйрӑмӗ «Контактра» халӑх ушкӑнӗнче онлайн йышӑну пӳлӗмӗсем ирттерессине пӗлтернӗ.

Чӳк уйӑхӗнче шкулсенче иккӗмӗш чӗрӗк пуҫланӗ. Ашшӗ-амӑшне тата ачасене темӗн те кӑсӑклантарать: шкулта епле графикпа вӗрентесси, ача пахчисем епле ӗҫлесси, техникумсен студенчӗсене инҫет ҫыхӑну мелӗпе вӗрентмӗҫ-и... Ҫак ыйтусене Чӑваш Енӗн вице-премьерӗ — вӗренӳ министрӗ Алла Салаева чӳк уйӑхӗн 5-мӗшӗнче хуравлӗ.

Чӳк уйӑхӗн 6-мӗшӗнче 17 сехетре Чӑваш Енӗн Ҫурт-йӗр инспекцийӗн пуҫлӑхӗ Виктор Кочетков ҫынсен ыйтӑвне хуравлӗ. Унпа ҫурт-йӗрпе ҫыхӑннӑ самантсене хускатма май килӗ. Тӗнче тетелӗнчи эпир маларах асӑннӑ ушкӑнра ыйтусене халех йышӑнаҫҫӗ.

Ӗнер пирӗн республикӑра 65 ҫултан аслӑрах ҫынсене тата чӗрепе юн тымарӗсен, ҫавӑн пекех сывлӑш ҫулӗсен чирӗсемпе нушаланакансене килте ларма сӗнекен хушу кӑларчӗҫ. Аса илтерер: асӑннӑ категорие кӗрекенсен пульницӑна е аптекӑна каймалла, суд органӗсене е лавккана ҫитсе килмелле пулсан, йытӑ уҫӑлтарма, физкультурӑна тата зарядка тума ҫеҫ урама тухмалла. Ӗҫе каякан ватӑсене те ҫул ҫӳреме чармӗҫ.

Ҫавна май пирӗн республикӑра «Эпир пӗрле» нимеҫӗсен штабӗ ӗҫе пуҫӑнассине пӗлтернӗ. Вӗсен йышне кӗме никама та чармаҫҫӗ. Ӳрӗклӗх тата ырӑ кӑмӑл ҫеҫ кирлӗ .

Шупашкарти «Юман» дружини чӳк уйӑхӗн вӗҫӗнче Мускава тухса кайӗ. Следж-хоккей командине ҫӳрекен маттур ачасем Мускаври тантӑшӗсемпе ӑмӑртӗҫ. Унччен вӗсем апла тупӑшӑва хутшӑнса курман.

Тӗрӗссипе, ачасен кун пек ушкӑнӗсем те сахал. Следж-хоккей команди пирӗн ҫӗршывра иккӗ кӑна: пӗри — Мускавра, тепри — Чӑваш Енре.

«Юман» ушкӑна «Это чудо» (чӑв. Ку вӑл тӗлӗнтермӗш) ыр кӑмӑллӑх фончӗ йӗркеленӗ. Занятисем Чӑваш кадет корпусӗ ҫумӗнчи Регионти хоккей центрӗнче иртеҫҫӗ. Унта 8 ҫултан пуҫласа 15 ҫула ҫитичченхи ачасем ҫӳреҫҫӗ.

Ушкӑнӑн тӗп тренерӗ Александр Ларионов каланӑ тӑрӑх, следж-хоккей пайташӗсен шайби пысӑкрах, ун варринче сасӑ кӑларакан 8 шар пур. Ӑна хоккеистсем илтчӗр тесе ҫапла тунӑ. Тренер шӑхличӗ те тӗрлӗрен. Пӗри шайба зонӑна лексен шӑхӑрмалли, тепри хапхаҫӑна шайбӑран хӳтӗленмеллине систерет.

Ӗҫ тата кадрсем шыракан hh.ru сайтӑн тӗпчев служби Чӑваш Ен ҫыннисем урӑх региона тухса кайма хатӗррине тӗпченӗ. Ыйтӑма хутшӑннисенчен 35 проценчӗ ют ҫӗре кайма хатӗр, 40 проценчӗ кун пирки шухӑшлать. 19 проценчӗ ҫеҫ тӑван кӗтесрех юласшӑн.

Ыйтӑма хутшӑннӑ Чӑваш Ен ҫыннисенчен 24 проценчӗ Мускава пысӑк шалу, Краснодар тӑрӑхне лайӑх климӑт, Питӗре хӑтлӑ хула шыраса каяс кӑмӑллӑ. Пирӗн республика ҫыннисене ҫавӑн пекех Ленинград облаҫӗ (7%), Мускав облаҫӗ (6%), Крым (5%), Калининград облаҫӗ (4%), Тутарстан (2%), Тӗмен облаҫӗ (1%), Ҫӗнҫӗпӗр облаҫӗ (1%) илӗртеҫҫӗ.

Паян Шупашкар хулин администрацийӗн пуҫлӑхне суйланӑ. Сити-менеджер пулма Алексей Ладыковах шаннӑ.

Аса илтерер: республика тӗп хулин сити-менеджерӗ пулас кӑмӑллисем пилӗк ҫын Республика тӗп хулин сити-менеджерӗ пулас кӑмӑллисем пилӗк ҫын тупӑннӑччӗ: Дмитрий Попов, Юрий Шакеев, Олеся Абашева, Алексей Ладыков тата Владимир Владимиров. Комисси вӗсенчен иккӗшне: Алексей Ладыкова тата Олеся Абашевӑна — суйласа илнӗччӗ.

Паян Шупашкарти Депутатсен пухӑвӗн черетсӗр иккӗмӗш ларӑвӗ иртнӗ. Унта Алексей Ладыков кандидатурине ырланӑ.

Пуҫлӑхсене маларах тӑватӑ районта суйланӑччӗ. Ун чухне те ҫӗнӗ ертӳҫӗсем пулманччӗ. Улатӑр районӗнче Нина Шпилевӑна администраци пуҫлӑхӗ пулма шаннӑ, Патӑрьел районӗнче – Рудольф Селиванов, Красноармейски районӗнче – Александр Кузнецова, Шӑмӑршӑ районӗнче – Владимир Денисова.

Валерий Павлов

Паян, чӳк уйӑхӗн 3-мӗшӗнче, Чӑваш Ен Элтеперӗ Олег Николаев Чӑвашпотребсоюз канашӗн ертӳҫипе Валерий Павловпа ӗҫлӗ тӗлпулу ирттернӗ. Енсем тӗплӗ калаҫу вӑхӑтӗнче ял хуҫалӑх таварӗсене халӑх патне илсе ҫитерессипе ҫыхӑннӑ ыйтусем тавра канашланӑ.

Предприяти хӑйӗн продукцине ҫак ятсемпе: анлӑ кӑларать: «Vкусная линия», «Чувашский сувенир, «Сетнер», «Сарпике», «Юлташ», «Хуняма» тата «Родная малиновка».

Пирӗн республикӑра райпо лавккисем пин ытла. Кунсӑр пуҫне обществӑлла апатлану предприятийӗсем сахал мар.

Чӑваш Ен Правительстви Чӑвашпотребсоюза шкулсенче ачасене апатлантарма таварпа тивӗҫтерме сӗннӗ.