"Про Город" сайтри сӑн

Паян 10 сехетсенче Шупашкарти «Ҫӗнӗ хула» микрорайонта общество чарӑнӑвӗнче арҫын виллине асӑрханӑ. Вӑл «Иван Прокопьев урмӗ» чарӑнура выртнӑ.

Ҫакна курнӑ ҫынсем каланӑ тарӑх, вырӑна васкавлӑ медпулӑшу ҫитнӗ. Анчах арҫынна пулӑшу кирлӗ пулман – вӑл вилнӗ.

Каярахпа арҫын виллине ритуаллӑ служба ӗҫченӗсем илсе кайнӑ.

Ака уйӑхӗн 1-мӗшӗнчен Шупашкартан Муркаша каякансен е унтан хулана килекенсен укҫа ытларах тӳлеме тивӗ. Билет хакӗ 20 процент ӳсет.

Хальхи вӑхӑтра билет 150 тенкӗ тӑрать. Акан 1-мӗшӗнчен вара 180 тенкӗ пулӗ. Тарифсем пирки пӗлтернине пассажирсем маршруткӑсенче курнӑ. Хак мӗншӗн ӳснине ӑнлантарман.

Ҫынсем куншӑн кӑмӑлсӑрланаҫҫӗ. Ҫул ҫинче капла ҫур шалу пӗтет-мӗн. Халӑх автопарк ҫӗнеленшӗн те кӑмӑлсӑр. 12 ҫул каяллахи «Мерседесссемпех» ҫӳремелле, укҫине вара ытларах тӳлемелле теҫҫӗ.

cap.ru сӑнӳкерчӗкӗ

Иртнӗ эрнере Чӑваш Енӗн Правительство ҫуртӗнче Тӗп редакторсен кунӗ иртнӗ. Кӑҫал ӑна пуҫласа йӗркеленӗ. Унта республикӑри массӑллӑ информаци хатӗрӗсенче пуҫлӑхра тӑрӑшакансем ҫеҫ мар, Чӑваш Енӗн Регион управленийӗн центрӗнче, Роскомнадзорта тимлекенсем хутшӑннӑ. Унта медиаотральти ҫивӗч ыйтусене сӳтсе явнӑ.

Канашлӑва уҫнӑ республикӑн цифра аталанӑвӗн министрӗн ҫумӗ Алина Федорова пуҫтарӑннисене лайӑх ӗҫленӗшӗн тав тунӑ.

Роскомнадзорӑн республикӑри управленийӗн пуҫлӑхӗн ҫумӗ Татьяна Евдокимова тӗрӗслевпе надзор ӗҫӗпе паллаштарнӑ, информаци ресурсӗсемпе ӗҫлекен специалист Анжелика Иванова халӑх сечӗсене тытса пырас вӑрттӑнлӑха уҫса панӑ. Шупашкар районӗнчи «Тӑван Ен»хаҫат редакторӗ Виктория Вышинская регионти тӗп пулӑмсене епле ҫутатса пама палӑртни ҫинчен каласа кӑтартнӑ.

culture.cap.ru сӑнӳкерчӗкӗ

Чӑваш Енре «Чӑваш ахах-мерченӗ» регионсем хушшинчи фольклор фестиваль-конкурсне пӗтӗмлетнӗ. Конкурса «Трктор тӑвакансен культура керменӗ» республикӑри халӑх пултарулӑхӗн центрӗ ирттернӗ.

Конкурса Чӑваш Енри 16 муниципаллӑ округран тата ҫӗршывӑн тӗрлӗ кӗтесӗнчи 12 коллективран заявкӑсем килнӗ. Хутшӑнакансен шучӗ ҫапла майпа 750 ҫынна ҫитнӗ. Иккӗмӗш тура Чӑваш Енри Элӗк, Йӗпреҫ, Куславкка, Красноармейски, Сӗнтӗрвӑрри, Муркаш, Ҫӗмӗрле муниципаллӑ округӗсенчи тата Мускаври, Пушкӑртсанри, Тутарстанри, Пензӑпа Самара облаҫӗсенчи 6 коллектива суйласа илнӗ.

Пӗрремӗш степеньлӗ дипломсене виҫӗ коллектив тивӗҫнӗ. Вӗсем — Красноармейски тӑрахӗнчи «Трак ен» фольклор ансамблӗ (ертӳҫи — Антонина Никонорова), Мускаври «Ентеш» фольклор ансамбьлӗ (ертӳҫи — Алевтина Тельцова), Пушкӑртстанри «Мерчен» фолькор ансамблӗ (ертӳҫи — Людмила Романова).

"Википедиа" сайтри сӑн

«Тӑван ҫӗршыв ывӑлӗсем» офицерсен юлташлӑхӗ Шупашкарти ҫӗнӗ урама Ҫӗрпӳ районӗнчен тухнӑ Александр Викторов генерал-полковник ятне пама сӗннӗ. Вӗсем ЧР Элтеперӗпе Олег Николаевпа Мускавра тӗл пулнӑ чухне ку ыйтӑва ҫӗкленӗ.

Ҫитес ҫул Александр Викторов ҫуралнӑранпа 100 ҫул ҫитет. Вӑл Тӑван ҫӗршывӑн Аслӑ вӑрҫи вӑхӑтӗнче Курск ҫапӑҫӑвне те хутшӑннӑ. 1944 ҫулта ӑна Ӗпхӳри ҫар училищине янӑ, кун хыҫҫӑн вӑл ҫӗршыв чиккине хураллакансен ҫарӗнче службӑра пулнӑ. Александр Григорьевич 2003 ҫулта Питӗрте вилнӗ. Юлашки ҫулсенче вӑл унта пурӑннӑ.

morgau.cap.ru сӑнӳкерчӗкӗ

Муркаш муниципаллӑ округӗнчи тӳре-шара культура сферинче професси уявӗпе чӑвашла саламланӑ.

«Эсир тӑван халӑх культурипе йӑли-йӗркине сыхласа хӑварас тата малалла аталантарас тесе тӑрӑшатӑр. Ҫак ӗҫе ял ҫыннисемпе пӗрле пурнӑҫлатӑр. Ҫитӗнекен ӑрӑва та ҫак ӗҫе явӑҫтаратӑр. Вӗсем хамӑрӑн ҫӗршывӑн мухтавлӑ историйӗпе пуян культурине ӑша хывса ӳсчӗр тесе сахал мар ӗҫ туса ирттеретӗр.

Муркаш тӑрӑхӗнче пӗр мероприяти те культура ӗҫченӗсем хутшӑнмасӑр иртмест. Художество пултарулӑх ушкӑнӗсем кашни уява илем кӳреҫҫӗ. Эсир ял ҫыннисен канӑвне, вӗсен пушӑ вӑхӑтне усӑллӑ ирттерме тӗрлӗрен майсем туса паратӑр. Тавах сире хӑвӑрӑн тивӗҫӗре чун-чӗре хушнӑ пек пурнӑҫланӑшӑн, тӗрлӗ енлӗ пултарулӑхӑршӑн», — тесе ҫырнӑ округ администрацийӗн пуҫлӑхӗн Алексей Матросовӑн тата Депутатсен Муркаш муниципаллӑ округӗн пухӑвӗн председателӗн Александр Ивановӑн саламӗнче.

alter-pnz.ru сӑнӳкерчӗкӗ

Канаш муниципаллӑ округӗн администрацийӗнче ӗҫлекенсем хӑйсем патне янӑ ыйтӑва вӑхӑтра хуравламан.

Вырӑнти прокуратура тӗрӗсленӗ чухне пӗр ҫын пӗлтерхи раштав уйӑхӗн 1-мӗшӗнче ыйтса ҫырни5е, анчах ӑна тӳре-шара хуравлама васкаманнине тупса палӑртнӑ. 30 кун та иртсе кайнӑ, унтан тата тепӗр 23 кун.

Вӑхӑтра хуравламан специалист тӗлӗшпе прокуратура административлӑ майпа ӗҫ пуҫарнӑ.

galatr.cap.ru сӑнӳкерчӗкӗ

Улатӑрти районсем хушшинчи прокуратура вырӑнти 7-мӗш строительство организацийӗ ҫурт-йӗрпе коммуналлӑ хуҫалӑх сферинчи саккуна епле пӑхӑннине тӗрӗсленӗ.

Улатӑрти Мускав урамӗнчи нумай хваттерлӗ ҫуртсенчен пӗрне йӗркеллӗ тытса тӑманни палӑрнӑ. Подъездри хутсенче тирпейсӗр пулнӑ. Отделка, штукатурка, сӑрланӑ сийсем сӗвӗнсе пӗтнӗ, электропӑралуксем яхӑхса кайнӑ.

Йӗркеллӗ ӗҫлеменшӗн 7-мӗш строительство организацине тата пуҫлӑхне явап тыттарӗҫ.

chnmuseum.ru сӑнӳкерчӗкӗ

Пуш уйӑхӗн 28-мӗшӗнче Чӑваш тӗррин музейӗнче Василий Димитриев историк ҫуралнӑранпа 100 ҫул ҫитнине халалласа «В поисках кладов истории» (чӑв. Истори пуянлӑхне шыраса) курав уҫӑлӗ. Вӑл Василий Димитриевич ӗҫӗсемпе тата унӑн япалисемпе паллаштарӗ, чӑваш халӑх истоорине учёнӑй епле курнине уҫӑмлатса парӗ.

Василий Димитриев пирки ӗҫтешӗсем чӑваш медиевистикин патриархӗ тенӗ, мӗншӗн тесен вӑл чӑваш тӗнчин вӑтам ӗмӗрне тӗпченӗ. Архивсемпе вулавӑшсенче нумай ларса вӑл ҫӗнӗ фактсене, документсене асӑрханӑ. Сӑмахран, феодализм тапхӑрӗнчи чӑвашсен историйӗпе паллаштаракан документсене Мускаври, Питӗрти архивсенче тупнӑ. Ҫавсене тӗпе хурса Шупашкар пирки пуҫласа хӑҫан асӑннине пӗлме пултарнӑ.

russian7.ru сайтри сӑн

Шупашкарта пурӑнакан упӑшкипе арӑмӗ ултавҫӑсенчен шар курнӑ. ШӖМ пӗлтернӗ тӑрӑх, вӗсене пула ҫемье хысни 65 пин тенкӗ катӑлнӑ.

Вӗсене тӗрлӗ ҫынсем улталанӑ. 51 ҫулти арӑмӗ инвестиципе ӗҫлесе илес тесе палламан счет ҫине 45 пин тенкӗ куҫарнӑ. 52-ри упӑшки вара ултавҫӑсен серепине кӑшт маларах лекнӗ. Вӑл пахча валли чуччу туянас тенӗ, тӗнче тетелӗнче пӗлтерӳ тупнӑ. Мессенджер урлӑ вӑл сутуҫӑпа ҫыхӑннӑ. Лешӗ ӑна укҫа куҫарма QR-код ярса панӑ. Арҫын 20 пин тенкӗ куҫарсан хайхискер телефонне тытма пӑрахнӑ.

Ку тӗслӗх тӗлӗшпе пуҫиле ӗҫ пуҫарнӑ.