Юлашки вӑхӑтра вӑл е ку ҫурта «бомба хуни» пирки пӗлтересси модӑна кӗчӗ-ши? Шӳт — шӳт-ха. Анчах ултав ҫиеле тухсан пурпӗрех явап тытмалла. Шупашкарти «Мега Молл» суту-илӗ центрӗнче бомба пурри пирки миҫе хутчен пӗлтерчӗҫ-ши? Паян ав черетлӗ «бомба» пирки шанкӑравласа каланӑ.

Паллах, хальхинче те хыпар суя пулнӑ. Паян ирхи 10 сехет тӗлне васкавлӑ медпулӑшӑва паллӑ мар арҫын шӑнкӑравласа суту-илӳ центрӗн путвалӗнче бомба хунине, вӑл кӗҫех ҫурӑлассине пӗлтернӗ. Ку хыпара РФ ШӖМӗн республикӑри управленине ҫийӗнчех пӗлтернӗ.

Вырӑна полици ӗҫченӗсем килнӗ, кинологсем ятарласа вӗрентнӗ йытӑсемпе ҫитнӗ. Ҫӑлавҫӑсем, пушарнӑйсем… Пурте пынӑ. Суту-илӳ центрӗнчи ӗҫченсене, унта пынӑ халӑха урама кӑларнӑ. Кинологсем йытӑсемпе ҫурта тӗрӗсленӗ. Нимӗн те тупайман.

Халӗ ку ӗҫ тӗлӗшпе тӗрӗслев пырать, шӑнкӑравласа пӗлтерекен арҫынна шыраҫҫӗ.

Кӑҫалхи ППЭ пӗтӗмлетӗвне тунӑ. ЧР вӗренӳ министрӗ Владимир Иванов пӗлтернӗ тӑрӑх, кӑҫал 12 яш-хӗр вырӑс чӗлхипе те, математикӑпа та экзамен «иккӗлӗх» тытнӑ. Ҫавна май вӗсен экзаменсене тепӗр ҫул ҫеҫ тытма май пулӗ. Ун чухне ҫеҫ вӗсем алла аттестат илӗҫ.

Ҫав 12 яш-хӗрӗн аттестатсӑр мӗн тумалла? Министр ку лару-тӑрӑва сӑнаса тӑрассине пӗлтернӗ, вӗсене ӗҫ профессийӗ пама шантарнӑ.

ППЭре йӗркене пӑснине кӑҫал та тупса палӑртнӑ. Тӗрлӗ сӑлтава пула 27 ҫыннӑн экзамен кӑтартӑвӗсене шута илмӗҫ. Пӗрисем экзамена телефон йӑтса кӗнӗ, теприсем шпаргалкӑран ҫырса илнӗ…

Министр ППЭ ачан пӗлӗвне тӗрӗслемелли пӗртен пӗр мел пулмалла маррине каланӑ. Ҫавӑнпа ҫитес ҫул 11-мӗш класс пӗтерекенсем сочинени те ҫырӗҫ.

Максим Смирнов

Ҫак кунсенче Пӗтӗм тӗнчери Google Science Fair конкурсӑн тӗп тапхӑрӗсенчен пӗри вӗҫленнӗ. Унта тӗнчери шкул ачисемпе студентсем, 13–18 ҫулсенчисем, хутшӑннӑ. Конкурса темиҫе пин ӗҫ ҫитнӗ.

Суйлав тапхӑрӗнче регионти 90 финалиста палӑртнӑ. Вӗсен йышне Раҫҫейри 6 ҫын лекнӗ. Ҫав шутра Шупашкарта пурӑнакан Максим Смирнов та.

ЧР Экономика министерстви пӗлтернӗ тӑрӑх, Максим республика шайӗнче иртекен «Чӑваш Республикин ҫамрӑк изобретателӗ» конкурсра пӗрре мар ҫӗнтернӗ. Ҫак конкурса 2007 ҫултанпа ирттереҫҫӗ.

Пӗтӗм тӗнчери Google Science Fair конкурспа килӗшӳллӗн Максим «Сусӑрсем валли — транспорт хатӗрӗ» проекта хӑтланӑ. Вӑл авари чухне пассажира хӳтӗлет. Урапа ҫапӑнсан кабина 180 градус ҫаврӑнать.

Максим конкурсра ҫӗнтерӗ-ши? Ку авӑнӑн 22-мӗшӗнче паллӑ пулӗ. Ҫӗнтерӳҫе вӗренмешкӗн 50 000 долларлӑх грант тата National Geographic экспедиципе пӗрле 10 кунлӑха ҫулҫӳреве каймашкӑн путевка парӗҫ. Ҫавӑн пекех Virgin Galactic космодрома ҫитме май пулӗ.

Ылтӑн медаль ҫӗнтерӳҫи Елена Наговицына. Лондонри Олимп вӑййинчи сӑн

Мускав ҫывӑхӗнчи Ерино поселокра 10 пин метра чупассипе ҫӗршыв чемпионачӗ иртнӗ. Унта Чӑваш Ен спортсменкисем ылтӑн тата пӑхӑр медале илнӗ. Вӗсем — Лондонри Олимпиадӑна хутшӑннӑ Елена Наговицынапа Альбина Майорова.

Дистанцин малтанхи ҫуррине хӗрарӑмсем пысӑк ушкӑнпа пӗрпек хӑвӑртлӑхпа чупнӑ иккен. Анчах кайран мала Гульшат Фазлитдинова мала тухнӑ хыҫҫӑн ун хыҫҫӑн Елена Нагоицына, Валентина Галимова тата Алена Кудашкина талпӑннӑ. Икӗ ҫухрӑм ҫапла пынӑ хыҫҫӑн Галимова мала тухнӑ, Фазлитдинова юлма тытӑннӑ. Медаль хуҫисем паллӑ пулнӑн самантра Алена Кудашкина юлма пуҫланӑ та юлашки ҫаврӑмра Альбина Майорова унтан иртнӗ. Ҫапла вара Наговицына пӗрремӗш вырӑна тухнӑ, Майорова — виҫҫӗмӗш.

Арҫынсенчен Евгений Рыбаков ҫӗршыв чемпионӗ пулса тӑнӑ, Анатолий Рыбаков — кӗмӗл-ҫӗнтерӳҫӗ, Дмитрий Сафронов — виҫҫӗмӗш. Вӗсем виҫҫӗшӗ те хӑйсен унчченхи рекорчӗсене ҫӗнетнӗ. Раҫҫейре ун пек хӑвӑрт 2008 ҫултанпа чупман иккен.

Чӑваш наци музейӗнче «Ҫемье музейӗ» сӑнӳкерчӗксен конкурсне пӗтӗмлетнӗ. Конкурса республикӑри 251 сӑн ярса панӑ. Вӗсенче Шупашкарпа Ҫӗнӗ Шупашкар хулисенчи, Красноармейски, Хӗрлӗ Чутай, Комсомольски тата ытти районти 70 ҫемье пурнӑҫӗпе историйӗ сӑнланнӑ.

Фотоконкурс ҫӗнтерӳҫисене нумаях пулмасть чысланӑ. Парнесене хулари кредит учрежденийӗсенчен пӗри уйӑрса пулӑшнӑ.

«Ҫемье йӑли-йӗрки» номинацире Карповсем, Вастуловсем, Чеченешкинсем, Кашутинсем, Максимовсем тата Рубцовсем ҫӗнтернӗ; «Ҫемье историйӗнче» — Зотовсем, Фадеевсем, Платоновсем, Приезжевсем, Удяковсем, Степановсем, Трифоновсем, Чевеляксем; «Ҫемье реликвийӗнче» — Мироновсем тата Шегердюковсем; «Ҫемье коллекцийӗнче» — Давыдовсемпе Блиновсем. Куракансене килӗшнӗшӗн уйӑракан парнепе Руссовсене палӑртнӑ.

Ҫӗнтерӳҫӗсене чыслани вӑйӑ-кулӑпа вӗҫленнӗ.

Сӑнсем (14)

Ҫӑкалӑхсем — пулӑра

Утӑ уйӑхӗн 8-мӗшӗнче Йӗпреҫ районӗнчи Ҫӑкалӑх ял клубӗнче А.П.Тимофеевапа А.А.Михетова «Пулӑ, кӗр!» конкурс ирттернӗ. Унта кашниех хутшӑнма пултарнӑ. Кӑмал тунисем вӑлта йӑтса пӗве хӗррине утнӑ.

Конкурса хутшӑннисем пӗр сехет пулӑ тытнӑ. Пӗве ҫывӑхӗнче пулӑ тытмалли вырӑна хӑйсемех суйланӑ. Пӗр сехет иртсен ҫӗнтерӳҫӗсемпе призерсене палӑртнӑ.

Коля Комячов 839 грамм пулӑ тытса виҫҫӗмӗш вырӑна тивӗҫнӗ. Вика Семенова 865 грамм пулӑ тытнӑ. Вӑл иккӗмӗш вырӑн йышӑннӑ. Антон Кошелев – ҫӗнтерӳҫӗ. Вӑл пӗверен 1.142 грамм пулӑ кӑларнӑ.

Камила Измайлова конкурса хутшӑннӑ чи кӗҫӗн ача пулнӑ. «Чи туслӑ ҫемье» номинацире Кошелевсем ҫӗнтернӗ. Ҫӗнтерӳҫӗсемпе призерсене парнесемпе хавхалантарнӑ. Изабелла Дмитриевапа Вячеслав Семенов тытнӑ пулӑран шӳрпе пӗҫернӗ.

Сӑнсем (6)

Ефимовсем, Куликовсем тата Степановсем

Пӗтӗм Раҫҫейри Ҫемье, юрату тата шанчӑклӑх кунӗнче Элӗк районӗнче «Юратупа шанчӑклӑхшӑн» медальсене тивӗҫнӗ мӑшӑрсене саламланӑ.

Кӑҫал Элӗк районӗнче виҫӗ ҫемье ҫак медале тивӗҫнӗ. Лев Архиповичпа Людмила Николаевна Ефимовсем Чӑваш Сурӑмӗнче пурӑнаҫҫӗ. Вӗсем 36 ҫул пӗрле. Вӗсем икӗ ывӑлпа пӗр хӗре ҫӗршыва юрӑхлӑ ҫын ӳстернӗ. Кашниех пурнӑҫра хӑйӗн вырӑнне тупнӑ.

Станислав Николаевичпа Зоя Егоровна Куликовсем Элӗкре пурӑнаҫҫӗ. Вӗсен ҫемйи 35 ҫулта. Мӑшӑр 3 ачана ура ҫине тӑратнӑ.

Михаил Николаевичпа Зоя Михайловна Степановсем - Тури Вылӑ ялӗнчен. Степановсем пӗрле 34 ҫул пурӑнаҫҫӗ. Михаил Николаевич «Молния» колхозра нумай ҫул ӗҫленӗ. Халӗ – ял старости. Мӑшӑр пӗр ывӑла ура ҫине тӑратнӑ. 2000 ҫулта вӗсем Анна ятлӑ хӗрачана усрава илнӗ. Унтан йыш татах пысӑкланнӑ: Ксюша, Наташа, Даша вӗсем патӗнче хӳтлӗх тупнӑ.

http://www.sibil.ru/ сайтри сӑн

Паян, утӑ уйӑхӗн 9-мӗшӗнче, Чӑваш наци вулавӑшӗнче ҫӗнӗ акци пуҫланнӑ. Хальхинче прихутсенчен, кӗнеке лавккисенчен, ыркӑмӑллӑх организацийӗсенчен, православи тӗнне ӗненекенсенчен православи кӗнекисене йышӑнаҫҫӗ. Ҫапла майпа ку литературӑпа пурте паллашма пултаракан вулавӑш йӗркелесшӗн.

Акци йӗркелӳҫисем ҫакнашкал кӗнекесем ҫын чунӗшӗн усӑлллӑ пулнине палӑртаҫҫӗ. Килте тахҫанах вуласа тухнӑ кӗнеке ҫӳлӗк ҫинче тусанланса выртать-и? Эппин, вулавӑша йӑтса пырӑр. Вӑл шӑпах халӗ кирлӗ пулӗ. Кашни экземпляр хӑйӗн вулаканне тупатех.

Тӗн литературине (аудиокӗнеке те юрать) ҫак адреспа йышӑнаҫҫӗ.: Шупашкар хули, Ленин проспекчӗ, 15-мӗш ҫурт, 1-мӗш хут. Тунтикунран пуҫласа шӑматкунччен ирхи 9 сехетрен пуҫласа каҫхи 18 сехетчен йышӑнаҫҫӗ. Акци пирки 62-38-12 номерпе шӑнкӑравласа тӗплӗнрех пӗлме пулать.

Анастасовӑри шкул

Пӑрачкав районӗнчи шкулсене суд хушӑвӗпе килӗшӳллӗн видеосӑнавпа тивӗҫтерӗҫ. Кун пек тавӑҫпа асӑннӑ район прокурорӗ суда ҫитнӗ. Лере прокуратура ыйтӑвне тивӗҫтерме йышӑннӑ. Ҫапла вара Анастасово, Кудеиха, Напольнӑй шкулӗсенче видеокамерӑсем вырнаҫтарӗҫ. Семеновскинчи шкул суд йышӑну кӑларасса кӗтсе ларман – прокурор ыйтнине пурнӑҫланӑ.

Суда ҫитиччен прокуратура районти шкулсене тӗрӗсленӗ. Видеосӑнав пурри терроризмран сыхлама пулӑшать тесе шухӑшлаҫҫӗ иккен.

Суд йышӑнӑвне вӗренӳ учрежденийӗсен кӑҫалхи раштавӑн 1-мӗшӗччен пурнӑҫламалла.

Инвесторсене вӗсем ӑҫтан иккенне пӑхмасӑрах патшалӑх пулӑшӑвӗ парса пулӑшассине, астӑвасса, Чӑваш Енӗн Элтеперӗ Михаил Игнатьев хӑй вӑхӑтӗнче каланӑччӗ-ха. Паянхи правительство ларӑвӗнче ҫавӑн йышши саккун проектне ырланӑ иккен.

Республикӑн экономика министрӗ Владимир Аврелькин пӗлтернӗ тӑрӑх саккун проектне ют ҫӗршыв укҫи-тенкине республикӑн экономикине хывас тӗллевпе хатӗрленӗ. «Маларах патшалӑх пулӑшӑвӗ ют ҫӗршыв резиденчӗсене тивӗҫмен пулсан, паян эпир ун пек преференцие хамӑр ҫӗршыври инвесторсене кӑна мар, ют ҫӗршыврисене те паратпӑр», – тенӗ ют ҫӗршыв сӑмахӗсемпе усӑ курса министр.

Патшалӑх пулӑшӑвӗ тени налук ҫӑмӑллӑхӗ парассине те, патшалӑх гарантине те пӗлтерет иккен. Ҫӑмӑллӑх ҫӗр, ҫурт-йӗр туянассипе тата тара парассипе ҫыхӑнӗ.

Саккун проектне маларах халӑхпа сӳтсе явнине пӗлтернӗ экономика министрӗ, тавлашуллӑ самантсем сиксе тухман имӗш.