kostanews.ruсайтри сӑн

Шупашкарта ултавҫӑсем ҫӳреҫҫӗ. Кун пирки тӳре-шара халӑха асӑрхаттарать.

Хваттерсем тӑрӑх ҫынсем ҫӳреҫҫӗ, вентиляци тӗрӗслеҫҫӗ имӗш. Кайран куншӑн укҫа ыйтаҫҫӗ. Анчах ун пек ҫынсене укҫа памалла кӑна мар, хваттере те кӗртмелле мар.

Астӑвӑр: венитляцие управляющи компанийӗ тӗрӗслет. Кун пирки маларах пӗлтереҫҫӗ: мессенджерта е подьезд умӗнчи пӗлтерӳ хӑми ҫинче. Ку - тӳлевсӗр.

Вентиляци тӗрӗслеме килнӗ ултавҫӑсем пирки полицие шӑнкӑравласа каламалла.

«Чӑвашкино» сӑнӳкерчӗкӗ

Ҫу уйӑхӗн 27-мӗшӗнче «Чӑвашкино» киностуди «Чӑваш эпир пултӑмӑр» документлӑ фильм кӑтартнӑ. Ӑна Алексей Енейкин ӳкернӗ.

Документлӑ кинокартинӑна киностуди ӗҫченӗсем пӑхнӑ тата пахаланӑ.

Фильма 2021 ҫулхи ҫулла ӳкерме тытӑннӑ. Ӑна В.Г. Родионов паллӑ ӑсчах пурнӑҫӗпе пултарулӑхне халалланӑ. Документлӑ киноӗҫе киностуди «Ҫынсем – легендӑсем» ярӑмпа хатӗрленӗ.

inpavposad.riamo.ru сайтри сӑн

Паян Шупашкар хула администрацийӗнче иртнӗ планеркӑра Сосновкӑра «Травянка-1» сад юлташлӑхӗнче пушар пулнине те сӳтсе явнӑ. Шел те, унта ҫыннӑн пурнӑҫӗ татӑлнӑ.

Пушар ҫу уйӑхӗн 27-мӗшӗнче каҫхи 8 сехетсенче пулнӑ. 1981 ҫулта ҫуралнӑ арҫыннӑн пурнӑҫӗ татӑлнӑ. Халӗ ҫулӑм мӗнрен тухнине тӗпчеҫҫӗ.

Аса илтерер: нумаях пулмасть Улатӑр хулинчи виҫӗ ҫамрӑк ҫӗрле киле таврӑннӑ чухне пушар тухнине, шар курнӑ ҫынна пулӑшнине пӗлтернӗччӗ.

Чӑваш Енри ял хуҫалӑх предприятийӗсемпе фермер хуҫалӑхӗсенче ҫурхи уй-хир ӗҫӗсем малалла пыраҫҫӗ. Паянхи кун тӗлне илсен, пӗрчӗллӗ тата пӑрҫа йышши культурӑсене 179,3 пин гектар ҫинче, е 85,5 процент, акнӑ. Пӗлтӗрхи ҫак кун тӗлне пӗтӗмпе 203,9 пин гектар акнӑ, е планпа пӑхнин 101,8 процентне.

Планпа пӑхнин 95 ытларах процентне хальлӗхе Муркаш (99,7%), Пӑрачкав (99,7%), Елчӗк (98,3%) тата Куславкка (98%) районӗсенче акнӑ.

Техника культурисене республикӑра 16 пин гектар (2021 ҫулта – 17,3 пин гектар) акнӑ, ҫав шутран 5,8 пин гектарӗ — рапс, 3,5 пин гектарӗ — горчица (сарӑ пӑрӑҫ).

tamlife.ru сӑнӳкерчӗкӗ

Чӑваш Енри ача-пӑча уйлӑхӗсенче те малашне гимн юрласа ялав ҫӗклӗҫ. Шкулсенче ҫеҫ мар, лагерьсенче те патриотлӑх мероприятийӗсене ытларах ирттерӗҫ. Кашни ир Раҫҫей гимнне юрласа ялав ҫӗклӗҫ.

Ачасен ҫуллахи канӑвне йӗркелеме епле хатӗрленни ҫинчен Чӑваш Ен Правительствин паян иртнӗ канашлӑвӗнче вӗрентӳ тата ҫамрӑксен политкин министрӗ Дмитрий Захаров каласа кӑтартнӑ. Ҫамрӑксен пуҫарулӑхӗн центрӗнче тата ЧППУра 480 вожатӑя вӗрентсе кӑларнӑ.

Лагерьсем ӗҫлеме хатӗр-мӗн, анчах тӑваттӑшӗ санитарипе эпидемиологи заключенийӗ илеймен. Вӗсем дезинфекци, дератизаци тума заявкӑсем каярах тӑратнӑ. Пӗринче специалистсене шыв пахалӑхӗ тивӗҫтермен.

Тинех синоптиксем пире савӑнтарҫҫӗ! Умра – шӑрӑх кунсем. Анчах аслатиллӗ ҫумӑрсем те пулӗҫ.

Ҫитес кунсенче сывлӑш температури 23-28 градуса ҫитӗ. Хӗвел ҫинче 30 градус пекех туйӑнӗ. Ҫапах шыва кӗме тӑхтамалла-ха. Атӑлти шыв 11 градус таран ҫеҫ ӑшӑннӑ.

Чи ӑшӑ кун эрнекун пулӗ. Ун чухне аслати те кӗмсӗртетӗ. Шӑматкун та ҫумӑр ҫукалӗ. Вырсарникун уяр тӑрӗ. Малтанлӑха пӗлтернӗ тӑрӑх, ҫӗртмен 8-9-мӗшӗсенче сивӗтес хӑрушлӑх пур.

Инкелӗ лару-тӑру министерстви тунӑ сӑн

Паян Шупашкарта пляжсене тӗплӗн тӗрӗслӗҫ. Шыв тӗпне водолазсем ҫӳп-ҫапран тасатӗҫ. Ахальтен мар, шыва кӗмелли сезона уҫма хатӗрленеҫҫӗ. Сезон ҫӗртме уйӑхӗн 1-мӗшӗнче уҫӑлӗ.

Шупашкарта тӑватӑ пляж ӗҫле: Мускав ҫыранӗ хӗрринче, Тӗп пляж, Ҫӗнӗ сала пляжӗ тата Атӑлӑн сулахай ҫыранӗ хӗрринчи пляж. Ҫӗртме уйӑхӗн 1-мӗшӗнчен пуҫласа пур ҫӗрте те ҫӑлавҫӑсем талӑкӗпех ӗҫлӗҫ. Кашни пляжрах громкоговоритель, "Шыва кӗме юрамасть" тесе ҫырнӑ табличка пур.

Палӑртмалла: кӑҫал республикӑра 13 пляж, шыв хӗрринче канмалли 128 вырӑн ӗҫлӗ.

чувашинформ.рф сайтран илнӗ сӑнӳкерчӗк

Ҫурхи ӗҫсене пӗтерсен чӑвашсем мӗн авалтан Акатуя пуҫтарӑннӑ. Ҫав ырӑ йӑла паян та манӑҫман. Юлашки ҫулсенче ӑна ҫӗршыв шайӗнче ирттереҫҫӗ.

Кӑҫал пирӗн республикӑн тӗп хулинче, Шупашкарта, Акатуй ҫӗртме уйӑхӗн 24-мӗшӗнче иртӗ. Ҫӗршывӑн тӗрлӗ кӗтесӗнче пурӑнакан йӑхташӑмӑрсем те ҫак уява пуҫтарӑнӗҫ.

Мускавра вӑл ҫӗртме уйӑхӗн 18-мӗшӗнче иртӗ. Йӗркелӳ комитечӗн ларӑвӗнче республика парламенчӗн спикерӗ Леонид Черкесов пӗлтернӗ тӑрӑх, Мускаври национальноҫсен ҫуртӗнче наци тумӗсен, ал ӑстисен ӗҫӗсен тата республикӑри предприятисен продукцийӗн куравӗсене йӗркелӗҫ. Сцена ҫине Мускаври, Чӑваш Енри тата ытти тӑрӑхри хӑй тӗллӗн вӗреннӗ артистсем тухӗҫ. Вӑйпиттисем кӗрешӳ мелӗпе хӑйсен вӑйне виҫӗҫ.

Ҫав кунах, ҫӗртме уйӑхӗн 18-мӗшӗнче, Питӗрте Акатуй иртӗ. Иркутскра ҫӗртме уйӑхӗн 10-мӗшӗнче Акатуя пуҫтарӑнӗҫ, Пенза облаҫӗнче — утӑ уйӑхӗн 2-мӗшӗнче.

forum.na-svyazi.ru сайтран илнӗ сӑнӳкерчӗк

Ҫӗнӗ Шупашкарта 1 пин ытла ӗҫ вырӑнӗлӗх ятарлӑ экономика лаптӑкӗ уҫасшӑн. Ятарлӑ экономика зонин проекчӗ ҫӗртме уйӑхӗн 2-мӗшӗччен коррупцие хирӗҫ никама пӑхӑнман экспертиза витӗр тухӗ; унтан, ҫӗртме уйӑхӗн 10-мӗшӗччен, документа халӑхпа сӳтсе явӗҫ.

Ятарлӑ экономика зонин проектне РФ Экономика аталанӑвӗн министерстви хатӗрленӗ.

Ятарлӑ экономика зонинче, паянхи куна илсен, 5 инвестор производствӑна укҫа хывас кӑмӑллине палӑртнӑ. Ҫав тӗллевпе вӗсем 3 ҫул хушшинче 13 миллиарда яхӑн тенкӗ укҫа хывӗҫ. Вӗсене пурлӑх тата транспорт налукӗнчен 20 ҫуллӑха, ҫӗр налукӗнчен 3 ҫуллӑха, тупӑш налукӗнчен 49 ҫуллӑха хӑтарӗҫ. Ҫӗнӗ производствӑсенче 1 пин ытла ҫын ӗҫ вырӑнӗ тупӗ.

Инвесторсем аш-какай комбиначӗ, йывӑҫ сӳсӗнчен плита хатӗрлекен, тырӑ авӑртса тӗрлӗ продукци кӑларакан тата ытти производство уҫасшӑн.

rosbalt.ru сайтри сӑн

Ҫу уйӑхӗн 27-мӗшӗнче Шупашкарта пурӑнакан арҫын ҫурҫӗр иртни 1 сехетре полицие пынӑ. Киле таврӑннӑ чухне ӑна такам тапӑнса 13 пин тенкӗ тӑракан телефонне вӑрланӑ.

30 ҫулти арҫын каланӑ тӑрӑх, вӑл ҫӗрле хупахран таврӑннӑ, утса пынӑ чухне ӑна такам хыҫалтан тӗкнӗ те аллинчи телефонне вӑрласа тарнӑ.

Вӑрра тупнӑ. Ҫав ҫын та хупахра пулнӑ иккен. Шӑпах ҫавӑнта вӑл ют ҫын телефонне куҫ хывнӑ ахӑртнех. Тытса чарнӑ тӗле ун ҫумӗнче телефон пулман. Ӑна шырама тивӗ.