cap.ru сайтран илнӗ сӑн

Хӗрлӗ Чутайри «Солнышко» (чӑв. Хӗвелӗш) ача пахчинче Ача-пӑча Фольклориадин фестивальне ирттернӗ. Ӑна Раҫҫейре кӑҫал халӑхсен культура эткерлӗхӗн ҫулталӑкне ирттернӗ май йӗркеленӗ. Сӑмах май, ҫӗртмен 23-мӗшпе 27-мӗшӗсенче Шупашкарта I Ача-пӑча Фольклориади иртӗ — районти мероприятие унта хатӗрленсе ирттернӗ те.

Ача пахчине ҫӳрекен шӑпӑрлансем илемлӗ тумсемпе ташланӑ, вӑйӑ картине тӑнӑ, юрӑсем шӑрантарнӑ. Воспитательсем те чӑваш тумӗсем тӑхӑнса хутшӑннӑ. Фестивальте тӗрлӗ номинацисем пулнӑ: халӑх юрри, халӑх ташши, халӑх кӗвӗ инструменчӗсем, чӑваш халӑх вӑййисем.

Хӗрлӗ Чутай районӗн официаллӑ сайчӗ пӗлтернӗ тӑрӑх фестиваль пурин кӑмӑлне те кайнӑ: ачасем те унта хавассӑн хутшӑннӑ, воспитательсем те пӗтӗм чунне парса ӗҫленӗ.

вести35.рф сайтри сӑн

Шупашкарта пурӑнакан 44 ҫулти хӗрарӑма ҫӗнӗ мелпе улталанӑ. Ун патне палламан ҫын шӑнкӑравланӑ та телефон ҫыхӑнӑвӗ япӑхланни пирки пӗлтернӗ, харпӑр кабинета кӗмелли логинпа вӑрттӑн сӑмаха ыйтнӑ.

Хӗрарӑм, шӑнкӑравлаканӗ ултавҫӑ пулӗ тесе, малтанах нимӗн те пӗлтермен. Анчах лешӗ унӑн ятне, паспорт даннӑйӗсене, усӑ куракан тарифа каланӑ хыҫҫӑн хӗрарӑмӑн иккӗленӗвӗ сирӗлнӗ. Вӑл смс-ҫырусене тепӗр номер ҫине ярса тӑма улшӑну кӗртме те килӗшнӗ.

Икӗ кунран хайхискер ун ячӗпе такам кредит илнине, пухӑннӑ укҫине вӑрланине пӗлнӗ. Пӗтӗмпе — 800 пин тенкӗ. Кун тӗлӗшпе пуҫиле ӗҫ пуҫарнӑ.

youtu.be/L47hepxk5fc фидеохостинга вырнаҫтарнӑ видеоран илнӗ сӑнӳкерчӗк

Шупашкарта Чӑваш Ен Правительствин машини светофорӑн хӗрлӗ ҫутипе каҫса кайнине асӑрханӑ.

Республикӑн ҫул-йӗр хӑрушсӑрлӑхӗн патшалӑх инспекцийӗн инспекторӗсем cheb.ru порталта вырнаҫтарнӑ видеона тишкернӗ. Ҫавӑн хыҫҫӑн водителе административлӑ майпа явап тыттарма йышӑннӑ. Хӗрлӗ ҫутӑпа каҫса кайнӑшӑн штраф виҫи — пин тенкӗ.

Правительство машинин (унӑн номерӗ — А017АА 121) водителӗ ҫу уйӑхӗн 13-мӗшӗнче хулари Ярославль урамӗнче ҫул-йӗр правилине пӑсса Тукташ урамӗ еннелле пӑрӑннӑ. Унччен ҫав машинӑри пассажир ларкӑчӗ ҫинче республикӑн культура министрне пӗрре ҫеҫ мар асӑрханӑ-мӗн.

mychu.ru сӑнӳкерчӗкӗ

Шупашкарти строительство организацийӗсенчен пӗринче рабочие ӗҫ укҫине вӑхӑтра тӳлемен. Кӑлтӑка хулари Мускав районӗн прокуратури тупса палӑртнӑ.

«КАН» тулли мар яваплӑ обществӑн директорӗ рабочисенчен пӗрне 2 уйӑх ытла укҫа тӳлемен. Парӑм 23 пин тенкӗрен иртсе кайнӑ. Ҫав вӑхӑтрах строительство компанийӗн укҫа пулнӑ, анчах ӑна вӑл урӑх тӗллевпе усӑ курнӑ.

Прокуратура директор тӗлӗшпе пуҫиле ӗҫ пуҫарнӑ. Тӗрӗслев вӑхӑтӗнче предприятире ҫынсене шалу тӳлемен ытти тӗслӗхе те, тен, тупса палӑртӗҫ.

forum.na-svyazi.ru сӑнӳкерчӗкӗ

Чӑваш Енре Республикӑн клиника больницин ҫӗнӗ комплексӗн проектне 2023 ҫул вӗҫӗнче туса пӗтермелле. Ӑна хатӗрлессине Раҫҫейӗн сывлӑх сыхлав министрӗ Михаил Мурашко ырланӑ.

Ырланӑ проектпа смета документацине 2023 ҫулхи раштав уйӑхӗнче хатӗрлесе ҫитерӗҫ. Раҫҫейӗн Сывлӑх сыхлав министерстви ҫӗршывӑн Стройминне асӑннӑ проекта 2023-2025 ҫулсенчи федерацин адреслӑ инвестици программине кӗртме сӗннӗ.

Ҫӗнӗ комплексра 1300 койка пулӗ. Проект валли бюджетра 174 миллион тенкӗ пӑхса хӑварнӑ.

Ҫӗнӗ комплекс Шупашкарти Солнечнӑй микрорайонта пулӗ.

cheb.ru сайтри сӑн

Шупашкар хула администрацийӗн пуҫлӑхӗ пулнӑ Алексей Ладыков пӗлтӗр мӗн чухлӗ укҫа ӗҫлесе илнине кӑтартса деклараци тӑратнӑ. Аса илтерер: халӗ вӑл ЧР Министрсен Кабинечӗн ҫумӗ, РФ Президенчӗн Чӑваш Енри тулли праваллӑ элчи. Ку должноҫсене вӑл пӗлтӗр авӑн уйӑхӗнче йышӑннӑ.

Алексей Ладыков пӗлтӗр 1 миллион та 971 пин тенкӗ ӗҫлесе илнӗ. Унӑн харпӑрлӑхӗнче машина, хваттер ҫук. 38 тата 34 тӑваткал метрлӑ хваттерсемпе усӑ курать.

Экс-сити-менеджерӑн ывӑлӗн 135 тӑваткал метрлӑ хваттер пуррине палӑртнӑ.

Айӑплава пурнӑҫлакан федераци служби тунӑ сӑн

Куславккари юсанмалли 5-мӗш колонире ларакан хӗрарӑмсем теттесем ҫӗленӗ. Вӗсене Кӳкеҫри интернатра пурӑнакан ачасене парнеленӗ.

Тетте ҫӗлес шухӑш айӑпланнӑ хӗрарӑмсен ҫуралнӑ. Вӗсем пукане театрӗнче усӑ курмалли юмахри сӑнарсене ӑсталанӑ.

Интернатра пурӑнакан, ӑс енчен хавшак ачасем теттесене алла тытсан питӗ савӑннӑ, вӗсен куҫӗ телейпе ҫиҫнӗ. Ку акци шӑпӑрлансене кӑна мар, айӑпланнӑ хӗрарӑмсене хӑйсене те савӑнтарнӑ. Ара, вӗсем ҫапла майпа хӑйсен юратӑвне кӑтартма пултарнӑ.

www.forsmi.ru сӑнӳкерчӗкӗ

Ҫӗмӗрле районӗнчи Вырӑс Улхашӗнчи ферма ҫивиттине витнӗ тимӗре такам вӑрлама пуҫланӑ. Пурлӑх пӗчӗккӗн-пӗчӗккӗн ураланнӑ.

Ферма япӑха-юхӑна пуҫланӑ пулин те унӑн хуҫин вӑрра иртӗхтерес килмен. Пуҫтаха тупса палӑртма йӗрке хуралҫисенчен пулӑшу ыйтнӑ.

Пакунлисем вӑрра йытӑпа шыранӑ. Титан Кросс ятлӑ полици йытти кирлӗ йӗр ҫине тӳрех лекнӗ. Вӑл пытанса ларнӑ каччӑсен тӗлне ҫитсе тухнӑ.

18-19 ҫулсенчи ҫамрӑксем хӑйсен айӑпне ҫийӗнчех йышӑннӑ, анчах фермӑн хуҫи пуррине вӗсем пӗлмен те иккен.

forum.na-svyazi.ru сӑнӳкерчӗкӗ

Пирӗн ҫӗршывӑн кӑнтӑр енчи хӑш-пӗр хулине самолётсем вӑхӑтлӑха вӗҫмӗҫ.

Росавиацин ҫӗнӗ йышӑнӑвӗпе чару ҫу уйӑхӗн 31-мӗшӗччен пырӗ.

Самолетсем ҫав вӑхӑтра Анапӑна, Белгорода, Брянска, Воронежа, Геленджика, Краснодара, Курска, Липецка, Дон ҫинчи Ростова, Симферополе тата Элистана вӗҫмӗҫ.

Авиакомпанисене пассажирсемшӗн меллӗрех ытти маршрутпа Сочи, Волгоград, Минеральные Воды, Ставрополь тата Мускав хулисенчи аэропортсемпе усӑ курса турттарма сӗннӗ. Ҫӗршыври ытти аэропорт штат режимӗпе ӗҫлет.

Унччен Шупашкартан Краснодара «ИрАэро» авиакомпани вӗҫнӗччӗ. Ҫулла пирӗн тӑрӑхран «Nordwind» компани Симферополе ҫӳреме палӑртнӑччӗ. Ун вырӑнне самолетсем Сочие вӗҫӗҫ.

21.мвд.рф сайтран илнӗ сӑнӳкерчӗк

Чӑваш Енри ача-пӑча уйлӑхӗнче ферма уҫнӑ. Выльӑх-чӗрлӗхӗнне мар-ха. Майнинг-ферма.

Саккуна пӑсса ӗҫлекен ҫав заведени Ҫӗрпӳ районӗнчи «Звездный» ача-пӑча уйлӑхӗнче тӗпленнӗ.

Вӗренӳ учрежденийӗн директорӗ тӗлӗшпе пуҫиле ӗҫ пуҫарнӑ. Майнинг-ферма энергетиксене 800 пин тенкӗ ытлалӑх тӑкак кӳнӗ.

Криповалюта хатӗрлекен оборудовани уйлӑхӑн столовӑйӗнче пӗлтӗрхи чӳк уйӑхӗнченпе кӑҫалхи ака уйӑхӗччен ӗҫленӗ.

Оборудование кам кӗртсе вырнаҫтарнине тӗпчевҫӗсем палӑртӗҫ. Директор тӗлӗшпе пуҫарнӑ пуҫиле ӗҫе малалла тӗпчеҫҫӗ.