РФ Патшалӑх Думин депутачӗ Алена Аршинова аслашшӗн ашшӗ Василий Чапаевпа пӗрле ҫапӑҫни пирки пӗлтернӗ. Кун пирки вӑл «Советская Чувашия» хаҫата панӑ интервьюра каланӑ.
Алена Аршинова каланӑ тӑрӑх, ӑна кун пирки асламӑшӗ каласа кӑтартнӑ. Аслашшӗн ашшӗ Чапаев дивизийӗнче пулнӑ, вӗсен килӗнче унпа пӗрле тунӑ сӑнӳкерчӗк те упраннӑ. Анчах ӑна архивпа пӗрле НКВД туртса илнӗ. Халӗ Аршиновсен ҫемйи ӑна шырать.
Алена Аршинова унччен асламӑшӗ хӑйне чӑваш тесе шутланине те каланӑ.
Етӗрнесен ентешлӗхне йӗркеленӗренпе кӑҫал 25 ҫул ҫитет. РФ Патшалӑх Думин депутачӗ Николай Малов Фейсбукра пӗлтернӗ тӑрӑх, юбилее хатӗрленсе ирттерес тӗллевпе йӗркелӳ комитечӗн ларӑвне пухӑннӑ. Унта уяв датине малтанласа палӑртнӑ. Хальлӗхе калаҫса татӑлнӑ тӑрӑх, етӗрнесем юбилее ака уйӑхӗн 3-мӗшӗнче Чӑваш патшалӑх оперӑпа балет театрӗнче пухӑнӗҫ.
Юбилей каҫӗнче тӗрлӗ курав ӗҫлӗ, Етӗрне районӗнчи пултарулӑх коллективӗсен концерчӗ пулӗ.
Уява Етӗрне районӗнче пурӑнакансем те, унта ҫуралса ӳссе тӗрлӗ ҫӗре саланнисем те пухӑнӗҫ.
Чӑваш Енре хӗрарӑмсен хоккейне аталантарасшӑн. Ҫакӑн пирки республикӑн спорт министрӗ Василий Петров тата РФ Патшалӑх Думин депутачӗ Анатолий Аксаков хӗрарӑмсен пӗртен-пӗр хоккей командипе (вӑл «Чебоксарские амазонки» ятлӑ) тӗл пулсан сӳтсе явнӑ.
Министр Анатолий Аксакова республикӑра спорта аталантарма пулӑшнӑшӑн тав тунӑ. Шупашкарти «Атӑл» стадиона юсасси шӑпах вӑл пулӑшнипе пуҫланнӑ. Уйӑх каялла тренерсемпе тӗл пулсан вӗсен шалӑвне ӳстермелли пирки сӑмах хускатнӑ. Ку ыйтупа депутат халӗ федераци шайӗнче ӗҫлет.
Хӗрарӑмсен хоккей команди вара депутата Челепир хулинчи ӑмӑртӑва хутшӑнма спорт тумӗ туянма пулӑшма ыйтнӑ. Парламентари хирӗҫлемен – туянса панӑ.
Хӗрарӑмсен хоккей командине (дружина капитанӗ – Евгения Фомина) 2017 ҫулхи юпа уйӑхӗнче йӗркеленӗ. Йышра паян 25 спортсмен.
Василий Петров министр республикӑри хоккей шкулӗн директорне Олег Салтыкова Хоккей федерацийӗн регионти ертӳҫине Алексей Протаповича хӗрарӑмсен хоккейне аталантарассипе программа хатӗрлеме хушнӑ.
Депутатсем нумай ачаллӑ ҫемьене ҫӗр лаптӑкӗ вырӑнне укҫа пама сӗннӗ. Шупашкар хулин депутатсен пухӑвӗнче ҫак ыйтӑва сӳтсе явнӑ.
Нарӑсӑн 1-мӗшӗ тӗлне Шупашкарта нумай ачаллӑ 6181 ҫемье ҫӗр илме черетре тӑрать. Ҫавӑн чухлӗ ҫӗр лаптӑкӗ хатӗрлеме майӗ те ҫук-мӗн. Пӗрремӗшӗнчен, хула ҫывӑхӗнче 4045 лаптӑк, 265 гектар чухлӗ, ҫитмест. Иккӗмӗшӗнчен, пур лаптӑксенче инженери, транспорт инфратытӑмӗ ҫук.
Ҫаксене шута илсе депутатсем «Чӑваш Республикинче нумай ачаллӑ ҫемьесене ҫӗр лаптӑкӗ парасси ҫинчен» саккуна пӑхса тухма, лаптӑк вырӑнне пӗр хутчен укҫа пама сӗннӗ. Ку укҫапа пурӑнмалли условисене лайӑхлатма пулӗ-мӗн.
Шупашкар районӗнчи коммунистсем Социаллӑ пулӑшу центрӗ уҫнӑ. Вӑл Кӳкеҫри Теплица урамӗнчи 12-мӗш ҫуртра вырнаҫнӑ.
Чӑваш парламенчӗн депутачӗ Александр Андреев Фейсбукра пӗлтернӗ тӑрӑх, центра пыракансем хӑйсене килӗшнӗ тумтире, пушмака, ача-пӑча валли теттесем суйласа илме пултараҫҫӗ.
Центрӑн ӗҫ вӑхӑчӗ — ирхи 9 сехетрен пуҫласа 16 сехетчен. Вӑл тунтикунтан пуҫласа эрнекунччен ӗҫлӗ.
Сӑмах май каласан, Социаллӑ пулӑшу центрӗнче кирек кама та хапӑл туса кӗтсе илӗҫ. Тӑхӑнма чиперех, анчах хӑвӑра кирлӗ мар япаласене илсе пырсан савӑнӗҫ тата тав тӑвӗҫ.
Паян, Кӑшарнире, ҫынсем вакра шыва кӗреҫҫӗ. Шупашкар хула администрацийӗн пуҫлӑхӗ Алексей Ладыков хӑйӗн ҫумӗсемпе Владимир Филипповпа тата Андрей Петровпа вакра шыва кӗнӗ. Ҫакна вӗсем видео ӳкерсе Инстаграмри страницӑна вырнаҫтарнӑ.
Ҫавӑн пекех Калинин районӗн администрацийӗн пуҫлӑхӗ Яков Михайлов, Шупашкар хулин депутатсен пухӑвӗн депутачӗ Сергей Муравьев та сивӗрен хӑрамасӑр уявра вакка чӑмнӑ.
Палӑртмалла: Роспотребнадзор Кӑшарнире шыва кӗнӗ чухне асӑрхануллӑ пулма ыйтнӑ.
Чӑваш Ен Элтеперӗ Олег Николаев республикӑн Патшалӑх Канашне Ҫыру яма хатӗрленет. Документпа вӑл нарӑс уйӑхӗн 2-мӗшӗнче паллаштарӗ.
Паян, кӑрлачӑн 18-мӗшӗнче, Чӑваш Ен Элтеперӗ республика парламенчӗн тата партисен фракцийӗсен ертӳҫисемпе тӗл пулнӑ. Ҫавӑнта вӑл парламента Ҫырупа тухассине пӗлтернӗ.
Кӑҫалхи Ҫыру Олег Николаевшӑн — пӗрремӗш. Унта вӑл Правительствӑн, Патшалӑх Канашӗн, вырӑнти хӑй тытӑмлӑх органӗсен тӗп енӗсемпе паллаштарӗ. Ҫулталӑкри тӗп Ҫырӑва ҫыриччен унчченхи Элтепер халӑх шухӑшне те пухатчӗ. Тен, кӑҫал та ҫаплах пулӗ.
Ӗнер, кӑрлач уйӑхӗн 12-мӗшӗнче, Вӑрнар районӗнче РФ Патшалӑх Думин депутачӗ Игорь Моляков ӗҫлӗ визитпа пулнӑ. Вӑл район администрацийӗн пуҫлӑхӗпе Андрей Тихоновпа, поселокри хастарсемпе тата вырӑнти депутатсемпе тӗл пулнӑ.
Енсем муниципалитетри ҫивӗч ыйтусене тишкернӗ. Сӑмахран, ҫул-йӗр тӑвассине. Республика пӗлтерӗшлӗ икӗ ҫула (Мӑн Явӑш енне каяканнине тата «Нурӑс – Шӑхасан») тӗплӗн юсамалла. Вӑрнар поселокӗнчи ҫулсене те япӑхнӑ. Хальхи вӑхӑтра вырӑнтисем Советски Ашмаров, Жорж Илюкин, Пионерски, Комсомольски, Матросов урамӗсене юсамалла документсем хатӗрлеҫҫӗ. Ӗҫе пурнӑҫлама 90 миллион тенкӗ таран кирлӗ. Пурнӑҫлама палӑртса хунӑ ытти ӗҫ те самай.
Шупашкар хулин дупутатсен пухӑвӗн депутачӗ Сергей Антонов кинемее ҫуралнӑ кунпа саламласа открытка янӑ. Анчах вӑл тӑванӗсене савӑнтарман, мӗншӗн тесен кинемей ку тӗнчере ҫук ӗнтӗ, ҫулла вилнӗ.
Ватӑ хӗрарӑм, 1933 ҫулта ҫуралнӑскер, кӑҫал ҫулла утӑн 27-мӗшӗнче пурнӑҫран уйӑлнӑ. Анчах депутат ҫакна тӗрӗслемесӗрех салам открытки янӑ. Ӑна кинемеейӗн тӑванӗ Павел Гарамов почта ещӗкӗнчен илнӗ.
Ку тӑванӗсене кӳрентернӗ. Вӑл депутатран каҫару кӗтнӗ. Сергей Антонов чӑнах та унран каҫару ыйтнӑ.
Чӑваш Енре пурӑнакансем кӑшӑлвирусран татах вилнӗ. Иртсе кайнӑ талӑкра ун пеккисен шучӗ 6 ҫынпа танлашнӑ. Чире вара пӗтӗмпе 127 ҫынӑнне тупса палӑртнӑ. Ҫулталӑк пуҫланнӑранпа ковид Чӑваш Енри 15206 ҫынна ернӗ.
Раштав уйӑхӗн 21-мӗшӗ тӗлне кӑшӑлвируспа 1231 ҫын чирлет. Сывалнӑ май пульницӑран 114 ҫынна кӑларнӑ.
Ковид пандемийӗ тесе пӗлтернӗренпе пирӗн тӑрӑхра 423 ҫын пурнӑҫран уйрӑлнӑ, 13 пин те 552 ҫын сывалнӑ.
Аса илтерер: паян РФ Патшалӑх Канашӗн депутатне, Канаш районӗнче ҫуралнӑ Валентин Шурчанова юлашки ҫула ӑсатнӑ. Вӑл та кӑшӑлвируспа чирленӗ, Мускаври пульницӑсенчен пӗринче сипленнӗ.
+15.3 °C