Шупашкарта социаллӑ ӗсчен пулса тӑрӑшакан Галина Кузьмина: «Манӑн платник та, повар та пулма тивет», — тесе калать.
Шупашкар хулинчи халӑхӑн социалла ыйтӑвӗсене тивӗҫтерекен комплекслӑ центрта пӗлтернӗ тӑрӑх, ватӑ ҫынсене пӑхасси пӗртте ҫӑмӑл ӗҫ мар. Утнӑ ҫӗрте утса, чупнӑ ҫӗрте чупса ҫӳресе ӗҫлеҫҫӗ социалла ӗҫченсем.
Галина Кузьмина социаллӑ сферӑра 6 ҫул ӗҫлет. Паян вӑл 9 ватта пӑхать. Хӑшӗсем патне кунне иккӗ ҫӳрет, хӑшӗсем патне — эрнере темиҫе хутчен. Вӗсем самай ҫулланнӑскерсем, 94 ҫултан пуҫласа 95 ҫулчченхи ҫынсем. Вырӑнпа выртакансем те пур. Ӳрӗк те вӑр-вар хӗрарӑм пурне те юрама тӑрӑшать. Ӗҫпе те, сӑмахпа та.
«Икра» авиакомпани ЧР Транспорт министерствине Шупашкартан Калининграда самолетсем яма сӗннӗ. Ведомство пӗлтернӗ тӑрӑх, рейссене 2025 ҫулта уҫма палӑртнӑ.
Хальхи вӑхӑтра авиакомпани Росавиаципе пӗрле субсидилекен авиасообщенисене переченьне кӗртес енӗпе ӗҫлеҫҫӗ.
Рейссем ҫитес ҫул ҫу уйӑхӗн 1-мӗшӗнчен пуҫласа авӑнӑн 30-мӗшӗччен эрнере икӗ хут пулӗҫ. Авиакомпани 110 вырӑнлӑ самолетсем вӗҫтерме палӑртнӑ.
Чӑваш Енри икӗ ҫын банк приложенийӗн номерне ылмаштарман пирки укҫасӑр юлнӑ.
Авӑн уйӑхӗн 5-мӗшӗнче йӗрке хуралҫисенчен 52 ҫулти арҫын пулӑшу ыйтнӑ. Вӑл каласа кӑтартнӑ тӑрӑх, унӑн уйрӑм пӳлӗмӗпе усӑ курса 147 пин тенкӗ ытла укҫа вӑрланӑ. Арҫын унччен пӗр телефон номерӗпе усӑ курнӑ, ӑна банк приложенийӗпе ҫыхӑнтарнӑ. Кайран номерпе усӑ курма пӑрахсан номере ылмаштарман.
Ҫӗрпӳре пурӑнакан 43 ҫулти хӗрарӑм ҫавна пула 1,5 миллион тенкӗсӗр юлнӑ.
Шупашкарти «Ҫӗнӗ хула» микрорайонта пӗр арҫын пӗр яша тытса тӑрса хӑйӗн ывӑлне ҫапма хушнӑ, хӑй вӑл ҫав вӑхӑтра яша тытса тӑнӑ.
Ку пӑтӑрмах пирки тӗнче тетелӗнчи тӗрлӗ ҫӑлкуҫра хыпар сарӑлнӑ хыҫҫӑн РФ Следстви комитечӗн Чӑваш Енри управленийӗн ӗҫченӗсем тӗрӗслев пуҫарнӑ.
Скейт-паркра ярӑнакан яшсем пӗчӗк ачана пӑрӑнма ыйтнӑ-мӗн. Ҫакӑ ачан ашшӗне килӗшмен. Яшсенчен пӗрне вӑл ярса илнӗ те хӑйӗн пӗчӗк ывӑлне яша ҫапма хушнӑ.
Мурманск облаҫӗн кӗпӗрнаттӑрӗ Андрей Чибис суйлавра ҫӗнтернӗ. ЦИК пӗлтернӗ тӑрӑх, суйлавҫӑсен 41 проценчӗ сасӑланӑ, 73,99 проценчӗ Андрей Чибисшӑн сасӑ панӑ. Сувлава «Пӗрлӗхле Раҫҫей» партирен хутшӑннӑ.
Андрей Владимирович - Чӑваш Енрен. Вӑл 1979 ҫулта Шупшкарта ҫуралнӑ. 2019 ҫултанпа Мурманск облаҫӗн кӗпӗрнаттӑрӗн должноҫне йышӑнать. Унччен вӑл РФ строительство тата ЖКХ министрӗн ҫумӗ пулнӑ.
Шупашкарти полицейскисен служба йытти, Измир ятлӑскер, 70 пин тенкӗ вӑрланӑ ҫынна тытса чарма пулӑшнӑ.
20 ҫулти каччӑ кафере апатлансан енчӗкне сӗтел ҫинче манса хӑварнӑ. Унта вара 70 пине яхӑн тенкӗ пулнӑ.
Видеокамерӑна пӑхсан вӑрланӑ арҫынна палӑртнӑ. Йытӑ унӑн йӗрӗ ҫине ӳксе ун патне илсе ҫитернӗ. Чӑнах та, енчӗкӗ те, укҫи те ҫав ҫын патӗнче пулнӑ.
Шупашкарти «Ҫӗнӗ хула» микрорайонта пурӑнакан пӗр арҫын ӳсӗр водителе тытса чарма пулӑшнӑ.
Авӑн уйӑхӗн 2-мӗшӗнче 18 сехетре пӗр арҫын ӗҫрен велосипедпа килне таврӑннӑ чухне «Новогородская» аллейӑра «Лада Калина» автомобиле асӑрханӑ. Унӑн урапи пушаннӑ, вӑл тротуар ҫине кӗре-кӗре кайнӑ. Ҫав вӑхӑтра тротуарпа ҫынсем йышлӑн утса пынӑ.
Велосипедпа пыракан арҫын нумай шухӑшласа тӑман — «Калина» хыҫҫӑн вӗҫтернӗ. Пӗр ҫӗрте водитель бордюр урлӑ каҫса кайма тӑнӑ. Александр Васильев тата ҫав вӑхӑтра ҫулпа пынӑ ют ҫӗршыври машина водителӗ тӗлӗнтермӗш автомобиле чарса лартнӑ. Вӗсем ӑна ҫул-йӗр хӑрушсӑрлӑхӗн инспекторӗ килсе ҫитиччен тытса тӑнӑ. Водитель хирӗҫ тӑнӑ-ха, анчах велорсипедпа пыраканни хӑй вӑхӑтӗнче ирӗклӗ мелпе кӗрешнӗскер пулнӑ та парӑнман.
1992 ҫулта ҫуралнӑ водитель тухтӑр патӗнче тӗрӗсленмен килӗшмен. Ун тӗлӗшпе администартивлӑ ӗҫ пуҫарнӑ.
Шупашкарти 10-мӗш шкул умне Андриян Николаев космонавтӑн бюстне лартнӑ. Ӑна Андриян Григорьевичӑн ҫуралнӑ кунӗнче, авӑн уйӑхӗн 5-мӗшӗнче, вырнаҫтарнӑ.
Унӑн бюсчӗ унта унччен те пулнӑ-ха, анчах хӑш-пӗр пайӗ хӑйпӑнса ӳкнӗ. Ачасемпе вӗрентекенсем ӑна хӑйсен вӑйӗпе реставраци тума хӑтланнӑ, анчах ку пулӑшман. Кӑҫал вара ҫӗнӗ бюст лартнӑ.
Палӑртмалла: 10-мӗш шкул 1999 ҫултанпа Андриян Николаев ячӗпе хисепленет. Космонавт ҫуралнӑранпа кӑҫал 95 ҫул ҫитнӗ.
Шупашкарта медицина форумӗ иртнӗ. Унта пӗтӗм ҫӗршыври 3 пине яхӑн медицина ӗҫченӗ пуҫтарӑннӑ.
Вӗсем — федераци, регион тата республика шайӗнчи пысӑк специалистсем, тӗп тухтӑрсем, поликлиникӑсемпе уйрӑмсен заведующийӗсем, пӗрремӗш звенора ӗҫлекен врачсем, профильлӗ специалистсем – кардиологсем, гастроэнтерологсем, ревматологсем тата ыттисем.
Форума хутшӑнакансем сахӑр диабечӗпе, чӗрепе юн тымарӗсен, вар-хырӑм, сывлӑш ҫулӗсен чирӗсемпе кӗрешес ыйтусене сӳтсе яваҫҫӗ.
Шупашкарти 40 ҫулти арҫын, сварщикре ӗҫлекенскер, юрату шыраса укҫасӑр тӑрса юлнӑ. Вӑл паллашу сайтӗнче Америкӑри хӗрарӑмпа паллашнӑ. Унтан вӗсем мессенджерта ҫырӑннӑ.
Кӗҫех хӗрарӑм ӑна юратни пирки пӗлтернӗ, ун патне посылкӑпа хаклӑ парне янине каланӑ.Анчах вӑл таможньӑра чарӑнса тӑнӑ-мӗн, ӑна илме укҫа тӳлемелле.
Арҫын иккӗленнӗ, полицие пырса каласа кӑтартнӑ. Полицейскисем ку, ахӑртнех, ултавҫӑ пулнине каланӑ, ӑна ҫыхӑнӑва татма хушнӑ.
Арҫын итлесе ҫапла тунӑ-ха, анчах «савнийӗ» ун патне тепӗр номертен ҫырса янӑ, ҫапла каллех калаҫса кайнӑ. Кайран сварщик пӗлӗшӗсенчен 98 пин илсе «савнийӗ» кӑтартнӑ счет ҫине куҫарнӑ. Укҫине илсен «Америкӑри савни» ҫухалнӑ.
+2.3 °C