Чӑваш Ен шыв ҫийӗн ҫӳрекен «Валдай» карап туянасси пирки Чӑваш халӑх сайчӗ пӗлтернӗччӗ. Аса илтерер: республика ертӳҫисем карап туянсан «Шупашкар – Хусан» тата «Шупашкар – Чулхула» маршрутсем уҫас ӗмӗтлӗ. Кунсӑр пуҫне вӗсем Куславккапа Сӗнтӗрвӑррине хутлӗҫ. Карапсене кӑҫал туянмалла. Виҫӗ «Валдай» илме бюджетран 330 миллион тенкӗ уйӑрнӑ.

Сӑмах май каласан, карапсене республикӑри ятлӑ-сумлӑ ҫынсен ячӗсене парасшӑн. Ӑна халӑхпа суйлӗҫ. Сасӑлава тӗнче тетелӗнчи «Контактра» ушкӑнра йӗркеленӗ. Карап ятне парассине сумлӑ ҫак ҫынсенчен суйлӗҫ: Андриян Николаев космонавт, Граждан вӑрҫин участникӗ Василий Чапаев, велоспорт енӗпе тава тивӗҫлӗ спорт мастерӗ Валерий Ярды, карап ӑсти Алексей Крылов тата Геннадий Айги поэт.

Сасӑлав нарӑс уйӑхӗн 25-мӗшӗнче вӗҫленӗ.

"Про Город" сайтри сӑн

Шупашкартан Мускава кайма тухнӑ автобус ҫунма тытӑннӑ. Кун пирки «Про Город» хаҫата халӑх корреспонденчӗ пӗлтернӗ.

Автобус паян, нарӑс уйӑхӗн 21-мӗшӗнче, ҫунма пуҫланӑ. Пассажирсем пӗлтернӗ тӑрӑх, ку инкек Балашиха ҫывӑхӗнче пулнӑ.

«Ирхи 6 сехетре автобус ҫунма тытӑнчӗ. Мускава маршруткӑпа ҫитрӗмӗр. Ҫулӑма ятарлӑ хатӗрсемпе сӳнтернӗ, пассажирсене салонран кӑларма ӗлкӗрнӗ, ҫавӑнпа никам та шар курман», - каласа кӑтартнӑ пӗр пассажир.

Халӗ специалистсем ҫулӑм мӗнрен тухнине тӗпчеҫҫӗ.

Тӑван ҫӗршыв хӳтӗлевҫин кунӗнче Ҫеҫпӗл Мишши ячӗллӗ Чӑваш патшалӑх ҫамрӑксен театрӗ ашшӗсем валли ятарлӑ акци ирттерет. Ҫак ырӑ йӑлана театрта тахҫанах тытса пыраҫҫӗ. Пӗтӗм тӗнчери хӗрарӑмсен кунӗнче те ҫавӑн евӗрлӗ акци иртет унта.

Уяв кунӗнче тӗпренчӗкӗсемпе театра пыракан ашшӗсемпе аслашшӗ-кукашшӗсене спектакль курма тӳлевсӗр кӗртеҫҫӗ.

Спектакль умӗн ашшӗсене тӗрлӗ парне кӗтӗ, ҫав шутра — юрӑ-кӗвӗллӗ парне те.

Тӑван ҫӗршывӑн хӳтелевҫин кунӗнче театр «Золотой цыплёнок» (0+) юрӑллӑ-кӗвӗллӗ юмах кӑтартӗ.

journ.chuvsu.ru сӑнӳкерчӗкӗ

Шупашкарти урамсенчен пӗрне Лев Кураков академик ятне парасшӑн. Кун пирки Чӑваш Республикинчи халӑхсен ассамблейин паян иртнӗ пухӑвӗнче сӑмах хускатнӑ.

Аса илтерер: унта ассамблейӑн ҫӗнӗ ертӳҫи пулма РФ Патшалӑх Думин депутатне Леонид Черкесова суйланӑ.

Лев Кураков пӗлтӗрхи раштав уйӑхӗн 21-мӗшӗнче пурнӑҫран уйрӑлса кайрӗ. Чӑваш Енри паллӑ ӑсчах, экономист, политик И.Н. Ульянов ячӗллӗ Чӑваш патшалӑх университечӗн ректорӗ пулнӑ. Лев Пантелеймонович 1943 ҫулхи кӑрлачӑн 4-мӗшӗнче Патӑрьел районӗнчи Чӑваш Ишекӗнче ҫуралнӑ. Канашри финанс техникумӗнче (1961), Хусанти патшалӑх финанспа экономика институтӗнче (1966) пӗлӳ илнӗ. Аспирантурӑпа доктортантурӑна Мускаври Г.В. Плеханов ячӗллӗ халӑх хуҫалӑх институтӗнче вӗреннӗ, стажировкӑна Берлинра (Аслӑ экономика шкулӗнче) ирттернӗ. 1990 ҫулта ӑна ЧПУ ректорӗн пуканне шанса панӑ. 1997 ҫулта чӑваш Республикин вице-президентне суйланӑ. 1998 ҫулхи кӑрлачпа ҫӗртме уйӑхӗсенче Чӑваш Республикин Правительство председателӗ пулнӑ.

Шупашкарти Халӑхсен туслӑхӗн ҫуртӗнче декортиавлӑ прикладной ӳнер ӑстин, Чӑваш Енре ҫуралса ӳснӗ, Питӗрте пурӑнакан Наталия Михайлован куравӗ уҫӑлӗ.

Ентешӗмӗр тӗрлет тата чӑваш наци пуканисене ӑсталать. Пултарулӑх вӑрттӑнлӑхӗпе ӑна Мария Симакова (вӑл кӑҫалхи кӑрлач уйӑхӗн 23-мӗшӗнче пурнӑҫран уйрӑлса кайрӗ) хӑнӑхтарнӑ. Пуканесене чӑваш ӑсти папье маше енӗпе те ӑсталать. Унсӑр пуҫне вӑл тӗрлет, пиҫиххи явать.

Курава нарӑс уйӑхӗн 26-мӗшӗнче 15 сехетре савӑнӑҫлӑ лару-тӑрура уҫӗҫ.

in-dig-o.gallery.ru сӑнӳкерчӗкӗ

Чӑваш Енре Йӑлӑма аталантарасшӑн. Асӑннӑ территорин социаллӑ пурнӑҫӗпе экономикине тӑнӑҫ аталантарас тӗллевпе ятарлӑ мероприятисен палнне йышӑннӑ.

Асӑннӑ программӑна 2021-2025 ҫулсем валли пӑхса хӑварнӑ. Ӑна пурнӑҫлассишӗн яваплисен кашни ҫур ҫулта пӗрре республикӑн Экономика аталанӑвӗн тата пурлӑх хутшӑнӑвӗсен министерствине отчет парса тӑмалла, министерствӑн — Чӑваш Республикӑн Министрсен Кабинетне.

Йӑлӑма аталантарасси ҫинчен калакан программӑна ӗнер, нарӑс уйӑхӗн 18-мӗшӗнче, алӑ пуснӑ. Ӑна республикӑн влаҫ органӗсен официаллӑ порталӗнче вырнаҫтарнӑ.

Чӑваш Енӗн Культура, национальноҫсен ӗҫӗсен тата архив ӗҫӗн министерстви оперӑпа балет театрӗнчи икӗ должность валли кадр резервӗ хатӗрлессине пӗлтернӗ.

Министерствӑн сайтӗнче темиҫе кун каялла вырнаҫтарнӑ хыпарта каланӑ тӑрӑх, Чӑваш патшалӑх оперӑпа балет театрӗн директорӗ тата художество ертӳҫи пулма тивӗҫ ҫынсенчен кадр резервӗ йӗркелӗҫ.

Документсене ҫак уйӑхӗн 24-мӗшӗччен парса ӗлкӗрмелле. Вӗсене ӗҫ кунӗсенче йышӑнаҫҫӗ. Вӗсене Шупашкарти Президент бульварӗнчи 17-мӗш ҫутри 411-мӗш пӳлӗме ҫитерсе памалла.

fb.ru сайтри сӑн

Шупашкарти Президент пепкелӗх центрӗнче нарӑс уйӑхӗн 9-мӗшӗнче ҫуралнӑ хӗрачана ашшӗ-амӑшӗ хӑйне евӗр ят панӑ. Мускав районӗн администрацийӗн пресс-служби хыпарланӑ тӑрӑх, ачана Мишель тесе ҫыртарнӑ.

Мӗн тенине пӗлтерет-ха ку? Мишель «Турӑ евӗр» тесе куҫать. ЗАГС пайӗн ӗҫченӗсем ашшӗне герб ӳкернӗ документ – ҫуралнине ӗнентерекен сивдетельство – панӑ. Специалистсем ҫамрӑк амӑшне тата ашшӗне ӑнӑҫу суннӑ, пӗчӗкскере вара сывӑ та телейлӗ ӳсмешкӗн ӑшӑ сӑмахсем каланӑ.

Республикӑна кашӑлвирусран хӳтеленмелли вакцинӑн тепӗр партийӗ килнӗ. Хальхинче – 4100 доза. Кун пирки ЧР Сывлӑх сыхлавӗн министерстви пӗлтерет.

2400 доза пӗрер дозӑллӑ флаконсенче килнӗ. Ку мобильлӗ пунктсем валли меллӗ. Унта пациентсем маларах ҫырӑнмасӑр килеҫҫӗ. Сӑмах май, ыран Шупашкарти «Каскад» суту-илӳ центрӗнче унашкал пункт уҫӑлӗ. Вӑл нарӑсан 18-21-мӗшӗсенче 14-19.30 сехетсенче ӗҫлӗ.

Палӑртмалла: республикӑна кӑшӑлвирусран хӳтӗленмелли 27 пин ытла вакцина килнӗ.

«Smartavia» авиакомпани билетсене йӳнӗ хакпа сутмалли акци ирттерет. Вӑл пилӗк кун пырӗ.

Авиабилетсене йӳнетнӗ хакпа туянас тесен нарӑс уйӑхӗн 20-мӗшӗччен ӗлкӗрмелле. Акци вӑхӑтӗнче хӑш-пӗр билет хакӗ 990 тенкӗрен пуҫланать. Ӑна ҫуталӑкӑн кирек хӑш тапхӑрӗ валли туянса хума май пур. Ҫула тухас шухӑша ылмаштарсан билет хакне тавӑрса памӗҫ.

Билетсене йӳнетнӗ хакпа 60 маршрутпа сутӗҫ, ҫав шутран 30 процентне — 990 тенкӗпе. Шупашкарти А.Г. Николаев ячӗллӗ аэропортра пӗлтернӗ тӑрӑх, акцие «Шупашкар—Симферополь» маршрут та лекнӗ.

Акцие билетсене авиакомпанин сайтӗнче, офиссенче, агентствӑсенче тата «Нордавиа» акционерсен обществин колл-центрӗ урлӑ туянма пулать.