rsnadzor21.rchuv.ru сайтри сӑн

Шупашкарта 180 килограмм панулмине тӗп тунӑ. Кун пирки Россельхознадзорӑн Чӑваш Енри тата Чӗмпӗр облаҫӗнчи управленийӗн пресс-служби пӗлтерет.

Чӑваш Енри транспорт прокуратури ҫурла уйӑхӗн 5-мӗшӗнче суту-илӳ вырӑнӗнче 182,2 килограмм панулми тупнӑ. Ун ҫинчи этикеткӑсем ҫинче нимӗнле маркировка та пулман. Ҫакӑ курӑннӑ: панулмисене татнӑ. Анчах документсем пулман.

Тӗрӗслев хыҫҫӑн вӗсене туртса илнӗ, 182,2 килограмм панулмине тӗп тунӑ.

Следстви комитечӗн сайтӗнчи сӑн

Етӗрне хулинчи общежитире икӗ арҫын виллине тупнӑ. Вӗсем 39-та тата 54 ҫулта пулнӑ. Арҫынсене пусмӑрласа вӗлернӗ йӗр пулнӑран пуҫиле ӗҫ пуҫарнӑ.

Ҫак ӗҫе 52 ҫулти арҫын тума пултарнӑ тесе шутлаҫҫӗ. Ӑна тытса чарнӑ. Вӑл – вӗсен пӗлӗшӗ.

Следстви версийӗ тӑрӑх, ҫурлан 5-мӗшӗнче вӗсем общежитире пурте пӗрле эрех ӗҫнӗ. Унтан хирӗҫсе кайнӑ. 52-ри арҫын пӗлӗшӗсене хӗненӗ, мӑйӗнчен ҫӗҫӗпе темиҫе хут чикнӗ. Лешсем вилнӗ. Кун хыҫҫӑн пӳлӗмре ҫулӑм тухнӑ. Халӗ вӑл мӗне пула тухнине тӗпчеҫҫӗ.

Ҫӗмӗрле районӗнчи Турхан ялӗ ҫывӑхӗнчи пӗвере пулӑҫ сарӑмсӑр вилнӗ. Пулла кайсан унӑн пурнӑҫӗ татӑлнӑ.

Ҫурла уйӑхӗн 6-мӗшӗнче, паян, ҫур ҫӗр иртни 1 сехет те 42 минутра унӑн виллине ҫав тӑрӑхра пурӑнакан ҫынсем асӑрханӑ, кӗлеткене ҫыран хӗррине кӑларнӑ.

Малтанлӑха пӗлтернӗ тӑрӑх, 1956 ҫулта ҫуралнӑ арҫын пулла кайнӑ, пӗвене тетел карнӑ. Ҫавӑн чухне вӑл тетелпе ҫыхланса ларнӑ та путнӑ.

Следстви комитечӗ кун тӗлӗшпе следстви умӗнхи тӗрӗслев ирттерет. Сӑмах май, шыва кӗмелли сезон пуҫланнӑранпа Чӑваш Енре 32 ҫын путса вилнӗ.

Мӑкшӑ Республикинчи заповедникре алхасакан пушара сӳнтерме Чӑваш Енри ҫӑлавҫӑсем те кайнӑ. 80 ҫынран тӑракан аэромобильлӗ ушкӑн тата 13 техника кӳршӗ региона паян ирхине тухса кайнӑ. Ку йыша Шупашкарти, Вӑрмарти, Йӗпреҫри, ытти тӑрӑхри пушарнӑйсем кӗнӗ.

Юлашки даннӑйсене ӗненес тӗк, заповедникре ҫулӑм 850 гектар ҫинче алхасать. Сӑмах май, Чӑваш Енри ҫӑлавҫӑсем 2010 ҫулта та Чулхула облаҫне вӑрман сӳнтерме кайнӑ. 2011 ҫулта Тутарстанра «Пӑлхар» теплоход путнӑ вырӑнта ӗҫленӗ. 2013 ҫулта вара Хабаровск крайӗнче ейӳпе кӗрешнӗ.

Чӑваш Ен Элтеперӗ Олег Николаев чӑвашла хитре калаҫнине пирӗнтен чылайӑшӗ хӑнӑхса ҫитрӗ ӗнтӗ. Тепӗр тесен, чӑваш ҫынни тӑван чӗлхепе калаҫнинчен (ашшӗ-амӑш чӗлхине хисепленинчен) тӗлӗнме кирлӗ те мар-ха. Аса илтерер: Олег Николаев Хӗрлӗ Чутай районӗнчи Чурпай ялӗнче ҫуралса ӳснӗ.

Республика ертӳҫи интервьюсене те чӑвашла парать, черетлӗ эрнене те икӗ чӗлхепе пӗтӗмлетет.

Ӗнер вара вӑл «Хыпар» хаҫатӑн ыйтӑвӗсене хуравланӑ. Кун пирки «Хыпар» издательство ҫурчӗн директорӗ — тӗп редакторӗ Татьяна Вашуркина Фейсбукра пӗлтернӗ. «Республика Пуҫлӑхӗ, Олег Алексеевич Николаев «Хыпар» хаҫатӑн ыйтӑвӗсене хуравлама килӗшрӗ, паллах — чӑвашла. Тӗплӗнрех, ҫитес номерте», — тесе ҫырнӑ наци медаихолдингӗн пуҫлӑхӗ. Элтеперпе Шупашкарти Чӑваш тӗррин музейӗнче тӗл пулнӑ.

Хыснаран 20 миллион тенкӗ ытла укҫа хывса баскетбол тата футбол лапамӗсем, чупса ҫӳремелли ҫулсем тунӑ, мини-футбол лапамӗ, тренажёрсем вырнаҫтарнӑ. Тренажёрсем айӗнче резинӑран сий сарман пирки ӳксе аманас хӑрушлӑх пысӑк.

Строительсем ӗҫе вӗҫленӗ хыҫҫӑн физкультура урокӗнчи ачасене строительствӑран юлнӑ ҫӳп-ҫапа тата вак чула пуҫтарма илсе тухнӑ. Ку вӑл пӗлтӗр пулнӑ. Шупашкар районӗнчи Атайкассинчи стадиона кӑҫал та йӗркене кӗртсе пӗтереймен-ха.

«Чӑваш Ен» патшалӑх телерадиокомпанийӗ вырӑнтисем хыпарланӑ тӑрӑх пӗлтернине ӗненсен, строительсем ӗҫе тивӗҫлипе пурнӑҫламан. Симӗс курӑк ешермелли вырӑнта, ҫав шутра футбол лаптӑкӗнче те, кирпӗч выртать тата хытхура ашкӑрать.

Кӑҫалхи ҫӗртме уйӑхӗнче вырӑнти ял тӑрӑхӗ подрядчик патне кӑлтӑка пӗтерме ыйтса ҫырупа тухнӑ-мӗн-ха. Утӑ уйӑхӗнче ҫӗре тикӗслеме тытӑннӑ, ӗҫе ҫурла уйӑхӗн 15-мӗшӗччен вӗҫлемелле.

Стадиона симӗслетес енӗпе те ыйту пур. Лартма палӑртнӑ 150 чӑрӑшран пиллӗкмӗш пайӗ ҫеҫ пур, вӗсем те хут ҫинче малтан палӑртнинчен лутрарах иккен.

Кунта мӗнех хушса калайӑн? Ӗҫе йӗркеллӗ вӗҫлеменнине курса тӑрсах ӑна алӑ пусса йышӑннӑ тӳре-шарапа специалист мӗнпур ыйту хуравне пӗлет пулинех.

Малалла...

И.Н. Ульянов ячӗллӗ Чӑваш патшлӑх университетӗнче тата В.И. Чапаев ячӗлл производство пӗрлешӗвӗнче тӑрӑшакансем тӗлӗнмелле резина хутӑшне патентлама пултарнӑ.

Асӑннӑ хутӑш пуйӑс чукун ҫулпа пынӑ чухне вӑл чӗтреннине тата сасӑ кӑларнине пӗчӗклетме май парӗ.

Рецептпа рельса ҫирӗплетнӗ чух усӑ курма пулать. Ҫакӑ рельссемпе усӑ курас вӑхӑта тӑсма пулӑшӗ. Чукун ҫул вакунӗсенче вара ытлашши шӑв-шав тӑмӗ.

Ҫӗнӗлӗхе Чӑваш патшалӑх университетӗнчи Николай Кольцов тата В.И. Чапаев ячӗллӗ производство пӗрлешӗвӗнчи Сергей Сандалов, Николай Ушмарин, Евгений Егоров шухӑшласа кӑларнӑ. Ҫӗнӗлӗхе 2021 ҫул вӗҫлениччен тӗрӗслӗҫ.

ШӖМ тунӑ сӑн

Электропуйӑс Канаша чип-чиперех ҫитсе чарӑннӑ. Тепӗр кун ирхине пӑхаҫҫӗ – вакуна такам ӳкерсе пӗтернӗ. Ҫӗрле вандал пуйӑса ӳкерчӗксемпе илемлетнӗ.

Анчах пуйӑс – альбом мар вӗт. Ӳкерчӗксене пула вӑл юрӑхсӑра тухнӑ. Ҫав ҫамрӑка часах тупнӑ. Ун тӗлӗшпе пуҫиле ӗҫ пуҫарнӑ.

Пуйӑс ҫине ӳкернӗ каччӑ 26 ҫулта, Мускавра пурӑнать. Ҫав кун вӑл Канашра пулнӑ. Ҫур ҫӗр иртни 2 сехетре вӑл никам та ҫук чухне аэрозоль баллонсемпе усӑ курса вакун ҫине ӳкернӗ.

Каччӑ тӗлӗшпе пуҫарнӑ пуҫиле ӗҫе суда пӑхса тухма ярса панӑ. Куншӑн 3 уйӑхлӑха арестлеме те пултараҫҫӗ.

news.myseldon.com сайтри сӑн

Шӑрӑх ҫанталӑк кӑҫал самай нумай вӑхӑт пулчӗ. Ҫынсем шыва кӗрсе уҫӑлас теҫҫӗ. Анчах, шел те, путакансем те сахал мар пулнӑ.

Ҫурла уйӑхӗн 3-мӗшӗнче Канаш районӗнчи Олешево ялӗ ҫывӑхӗнчи пӗвере 50 ҫулти арҫын путнӑ. Унӑн виллине ҫав кунах тупайман. Тепӗр кунхине, ҫурла уйӑхӗн 4-мӗшӗнче, водолазсем унӑн виллине ҫыран хӗррине илсе тухнӑ.

РФ Следстви комитечӗн Чӑваш Енри следстви органӗсем кун тӗлӗшпе следстви умӗнхи тӗрӗслев ирттереҫҫӗ.

Паян Токио хулинче иртекен Олимп вӑййисенче Чӑваш Ен тата Мускав чысне хӳтӗлекен Анжелика Сидорова финалта тупӑшнӑ. Питӗ маттур вӑл! Кӗмӗл медаль ҫӗнсе илнӗ.

Ылтӑн медаль валли кӑшт ҫеҫ ҫитеймен. Малтан Анжелика 4,70 метр ҫӳллӗшне шӑчӑпа сикнӗ. Унтан 4,80, 4,90… 4 метр та 95 сантиметра, шел те, сикеймен. Ҫапла вӑл ылтӑн медале илеймен, 2-мӗш вырӑна тухнӑ. Пӗрремӗшӗнче – Америкӑри Кэти Наджеотт.

Палӑртмалла: кӑҫалхи Олимп вӑййисенче Анжелика Сидорова ҫӗнсе илнӗ «кӗмӗл» ҫӑмӑл атлетикӑра пӗрремӗш медаль пулнӑ. Аса илтерер: спортсменка 2019 ҫулта тӗнче чемпионатӗнче 9,95 метра сикнӗ. Анчах хальхинче ӑна ӑнман.