«Победа» авиакомпани ҫу уйӑхӗнче расписание виҫҫӗмӗш рейс кӗртӗ. Самолетсем кунсерен вӗҫӗҫ.

Шупашкарти аэропортра пӗлтернӗ тӑрӑх, хушма рейс ҫу уйӑхӗн 11-мӗшӗнчен уҫӑлӗ. Хушма рейспа каякансене самолет «Шереметьево» аэропорта илсе ҫитерӗ, унтанах илсе килӗ. Асӑннӑ аэропортран самолет 15 сехет те 35 минутра хускалӗ, Шупашкартан – 17 сехет те 25 минутра.

Мускаври икӗ аэропортран рейссем уҫнӑ май «Победа» акци ирттерет. Кун пирки Шупашкарти аэропорт Инсаграмра хыпарланӑ, авиакомпани вара хӑйӗн клиенчӗсене ҫырупа систернӗ. Акци вӑхӑтӗнче вӑл билетсене 499 тенкӗпе сутма йышӑннӑ.

Чӑваш патшалӑх академи драма театрӗнче кӑҫалхи пӗрремӗш премьерӑна хатӗрленеҫҫӗ.

«Инкеклӗ телей» спектакле Юлия Николаева калавӗ тӑрӑх Сергей Павлов инсценировкипе лартӗҫ. Ӑна Сӑр тата Хусан хӳтӗлев чиккисене чавма хутшӑннисен ӗҫне халалланӑ.

Спектакль режиссерӗ тата художник-постановщикӗ – СССР халӑх артисчӗ Валерий Яковлев. Ҫӗнӗ ӗҫе ака уйӑхӗн пуҫламӑшӗнче куракан патне ҫитерӗҫ. Валерий Яковлев каланӑ тӑрӑх, «Инкеклӗ телей» спектакль пирӗн ҫӗршывӑн тата республикӑн историйӗнчи ҫӗнӗ страницӑсене уҫса парӗ. Окоп чавнӑ хӗрарӑмсемпе ачасем чирленӗ, шӑнса пӑсӑлнипе, выҫлӑхпа нушаланнӑ, леш тӗнчене ӑсанакансем те пулнӑ.

Чӑваш Енре хӗрарӑмсен хоккейне аталантарасшӑн. Ҫакӑн пирки республикӑн спорт министрӗ Василий Петров тата РФ Патшалӑх Думин депутачӗ Анатолий Аксаков хӗрарӑмсен пӗртен-пӗр хоккей командипе (вӑл «Чебоксарские амазонки» ятлӑ) тӗл пулсан сӳтсе явнӑ.

Министр Анатолий Аксакова республикӑра спорта аталантарма пулӑшнӑшӑн тав тунӑ. Шупашкарти «Атӑл» стадиона юсасси шӑпах вӑл пулӑшнипе пуҫланнӑ. Уйӑх каялла тренерсемпе тӗл пулсан вӗсен шалӑвне ӳстермелли пирки сӑмах хускатнӑ. Ку ыйтупа депутат халӗ федераци шайӗнче ӗҫлет.

Хӗрарӑмсен хоккей команди вара депутата Челепир хулинчи ӑмӑртӑва хутшӑнма спорт тумӗ туянма пулӑшма ыйтнӑ. Парламентари хирӗҫлемен – туянса панӑ.

Хӗрарӑмсен хоккей командине (дружина капитанӗ – Евгения Фомина) 2017 ҫулхи юпа уйӑхӗнче йӗркеленӗ. Йышра паян 25 спортсмен.

Василий Петров министр республикӑри хоккей шкулӗн директорне Олег Салтыкова Хоккей федерацийӗн регионти ертӳҫине Алексей Протаповича хӗрарӑмсен хоккейне аталантарассипе программа хатӗрлеме хушнӑ.

Кавказ Чӑваш Енпе ҫывӑхланӗ. Ҫав вӑхӑт ҫитессе нумай кӗтме тивмӗ.

Шупашкарти аэропортра пӗлтернӗ тӑрӑх, пуш уйӑхӗн 3-мӗшӗнчен «ИрАэро» авиакомпани ҫӗнӗ маршрут уҫӗ. Самолетсене вӑл «Шупашкар – Минеральные Воды» маршрутпа ҫӳретӗ. Рейссем эрнере пӗр хутчен пулӗҫ: пуш уйӑхӗнче – юнкунсерен, ака тата ҫул уйӑхӗсенче – ытларикунсерен.

Кавказри Минеральные Воды – Раҫҫейӗн кӑнтӑр енчи чи паллӑ ҫичӗ хулинчен пӗри. Унта спа-центрсем тата ҫутҫанталӑкӑн илемлӗ вырӑнӗсем пур. Кавказри паллӑ хуласем: Пятигорск, Кисловодск, Ессентуки – Минеральные Воды хули ҫывӑхӗнче вырнаҫнӑ. Вӗсенчи санаторисенче сывлӑха ҫирӗплетме пулать. Сӑртлӑ-туллӑ вырӑнсене альпинистсемпе туристсем, сӑртран ярӑнма юратакан йӗлтӗрҫӗсемпе сноубордистсем те килӗштереҫҫӗ, мӗншӗн тесен унта – Европӑри чи ҫӳллӗ ту, Эльбрус.

forum.na-svyazi.ru сайтри сӑн

Шупашкарта тепӗр 6 ача пахчи тума палӑртнӑ. Тӳре-шара вӗсем ӑҫта вырнаҫассине пӗлтернӗ.

Тӗрӗссипе, вӗсене тума тытӑннӑ темелле. Хӑш объектра ӗҫсем графикран юлса пынине Шупашкар хула администрацийӗн пуҫлӑхӗ Алексей Ладыков тӗрӗсленӗ.

Сити-менеджер палӑртнӑ тӑрӑх, «Радужный», «Лента», «Солнечный» микрорайонсенче ӗҫсем графикпе килӗшӳллӗн пыраҫҫӗ. Алексей Ладыков ача пахчисене ҫулталӑк вӗҫлениччен туса пӗтермеллине каланӑ.

Кунсӑр пуҫне Шупашкарта Алькеш поселокӗнче, «Благовещенский» тата «Университет-2» микрорайонсенче ача пахчисем хута каймалла.

om1.ru сайтри сӑн

Улатӑр тӑрӑхӗнче пурӑнакан 29 ҫулти арҫын тӗлӗшпе пуҫиле ӗҫ пуҫӑрнӑ. Ӑна вырӑнти предприяти укҫине кӗсьене чикнӗшӗн айӑпласшӑн.

Арҫын предприятире экспедиторта ӗҫленӗ. Следстви пӗлтернӗ тӑрӑх, 2019 ҫулхи раштавран пуҫласа 2020 ҫулхи ҫӗртмеччен вӑл продукци кӳрсе килнине тӗрӗслесе тӑнӑ. Ӑна куншӑн укҫа панӑ, нухрата вара предприяти кассине хумалла пулнӑ. Анчах арҫын харпӑр усламҫӑсенчен илнӗ укҫан пӗр пайне кассӑна хуман, хӑйӗн кӗсйине чикнӗ. Ҫапла майпа вӑл 16 пин тенкӗ вӑрланӑ тесе шутлаҫҫӗ.

Ун тӗлӗшпе пуҫарнӑ уголовлӑ ӗҫе айӑплав алӑ пусмашкӑн прокуратурӑна ярса панӑ.

cheboksari.bezformata.com сайтри сӑн

Ӗнер, нарӑсӑн 27-мӗшӗнче, Шупашкарти Мускав кӗперӗ ҫинче темиҫе машина ҫапӑннӑ. Аварире ачасем те шар курнӑ. Юрать-ха, вилекенсем пулман.

Кӑнтӑрла «Мазда» водителӗ дистанцие пӑхӑнман, ҫавна май вӑл харӑсах темиҫе машинӑпа ҫапӑннӑ. Вӗсенчен пӗри – «Лада Гранта». Унӑн салонӗнче икӗ ача пулнӑ. Аварире водитель тата ачасем аманнӑ.

Авари саманчӗ видеокамера ҫине лекнӗ. Шӑпах «Мазда» водительне пула тухнӑ та ҫак авари. Ҫакна курнӑ ҫынсем каланӑ тӑрӑх, вӑл питӗ пысӑк хӑвӑртлӑхпа пынӑ, ҫул ҫинчен тухса кайса отбойнике ҫапӑннӑ, унтан – «Лада Грантӑпа».

ren.tv сайтри сӑн

Юлашки талӑкра кӑшӑлвирусран 6 ҫын вилнӗ. Ҫапла, каварлӑ вирус кашни кунах ҫынсен пурнӑҫне татать. Анчах малтанхи уйӑхсемпе танлаштарсан лару-тӑру питӗ ҫивӗчех мар. Паянхи кун тӗлне республикӑра 1034 ҫын кӑшӑлвирусра парӑнтарайман.

Юлашки талӑкра 55 ҫын инфекциленнине палӑртнӑ. Ку таранччен пӗтӗмпе 21398 ҫын кӑшӑлвируспа чирленӗ. Вӗсенчен 19593-шӗ сывалнӑ. Юлашки талӑкра 49 ҫынна тухтӑрсем сывалнӑ тесе палӑртнӑ.

Паянхи кун тӗлне стационарта тата килте амбулатори мелӗпе 771 ҫын кӑшӑлвирусран сипленет.

Тӗнчесен архивӗнчи сӑн

Никитӑпа Анастасия Тӗнчесем каллех таҫта кайма тухнӑ. Кун пирки вӗсем нумаях пулмасть пӗлтернӗ.

Ку мӗнпе ҫыхӑннине уҫӑмлатар. Тӗнчесем АПШра Техас штатӗнче пурӑннӑ. Нарӑс уйӑхӗнче унта юр вӑйлӑ ҫуса лартнӑ, ҫил-тӑман алхаснӑ. Унашкалли Техасра питӗ сайра пулать. Кун хыҫҫӑн чылай офис ӗҫлемен, ҫур хулан ҫутӑ, ӑшӑ пулман. Тӗнчсем те ҫутӑсӑр, ӑшӑсӑр пурӑннӑ. Пӳлӗмре сивӗ пулнӑран вӗсем хывӑнмасӑрах ҫывӑрнӑ.

Ҫакна пула Тӗнчесем урӑх ҫӗре кайма шутланӑ. Ӑҫта каяссине вӗсем пӗлтермен. Ҫакӑ паллӑ: ҫулӑн пӗр пайне ҫемье парӑнтарнӑ. «Паян 550 миле яхӑн кайрӑмӑр», - тесе ҫырнӑ чухне Тӗнчесем Индианӑра пулнӑ.

Аса илтерер: ҫемье 2019 ҫулхи ҫулла ҫула тухнӑ. Пӗлтӗр ҫулталӑк вӗҫӗнче вӗсен ывӑл ҫуралнӑ. Хӗрӗ Ая кӗҫех 3 ҫул тултармалла.

ШӖМ тунӑ сӑн

Ӗнер, шӑматкун, каҫхи 6 сехет хыҫҫӑн Шупашкарти Чаканар ялӗ ҫывӑхӗнче 55 ҫулти хӗрарӑма машина ҫапса хӑварнӑ. Шел те, вӑл пульницӑра сывлама пӑрахнӑ.

«Приора» машинӑн кустӑрми айне Шупашкарта пурӑннӑ 55-ри хӗрарӑм лекнӗ. Вӑл светофор ҫук вырӑнта ҫул урлӑ каҫма тӑнӑ. Анчах ун ҫине машина пырса кӗнӗ. Хӗрарӑма пульницӑна илсе ҫитенӗ. Анчах 2 сехетрен унӑн чӗри тапма чарӑннӑ.

«Приора» рулӗ умӗнче Муркаш районӗнче пурӑнакан 41 ҫулти арҫын ларнӑ. Тӗрӗслев палӑртнӑ тӑрӑх, вӑл ӳсӗр пулман.