Чãваш Енре ҫӳп-ҫап турттарассипе ӗҫлекен «Экоцентр» регионти операторãн партнер-предприятисем умӗнчи парӑмӗ ҫӗршер миллион тенке ҫитнӗ. Ҫӳп-ҫап операторӗн тӑкакӗсем республикӑн Тариф службине тата Ҫутҫанталӑк ресурсӗсемпе экологи министерствине шухӑша янӑ. «Экоцентрӑн» панкрута тухас хӑрушлӑх пур.

Аса илтерер: 2018 ҫул вӗҫӗнче пирӗн республикӑра йӑлари хытӑ каяша турттарассипе ҫӗнӗ тытӑм ӗҫлеме пуҫларӗ. Малтанхи вӑхӑтра тӗрлӗ ӑнланманлӑх час-часах сиксе тухкаларӗ. Халӗ пур ҫӗрте те ҫӳп-ҫап контейнерӗсем пур (2019 ҫулта компани 4 пин ытла контенйер туяннӑ), машинӑсем йӑлари хытӑ каяша турттарса тӑраҫҫӗ.

«Экоцентр» халӗ Чӑваш Ени 1704 ялти йӑлаи хытӑ каяша турттарса тӑрать. Анчах ӗҫшӗн халӑхӑн 85 проценчӗ ҫеҫ тӳлет иккен.

Тимӗр Тяпкинӑн Фейсбукри страницинчен илнӗ сӑнӳкерчӗк

Паян Чӑваш Енри ятлӑ-сумлӑ, ҫивӗч ӑслӑ-тӑнлӑ, анлӑ тавракурӑмлӑ ҫынсенчен пӗри, Виталий Станьял (Никитин), сумлӑ наградӑна тивӗҫнӗ.

Чӑваш тӗнчин шурсухалне «Чӑваш Республики умӗнчи тава тивӗҫлӗ ӗҫсемшӗн» орден медалӗпе чысланӑ.

Виталий Петровича Чӑваш Ен Культура, национальноҫсен ӗҫӗҫен тата архив ӗҫӗн министерствин коллегийӗн анлӑ ларӑвӗнче чысланӑ. Кӑҫал Культура министерстви 85 ҫулхи юбилейне уявлӗ. Светлана Каликова министр отрасль ветеранӗсене культурӑна аталантарма пысӑк тӳпе хывнӑшӑн тав тунӑ.

nashazhizn21.ru сӑнӳкерчӗкӗ

Паян, нарӑс уйӑхӗн 26-мӗшӗнче, И.Я. Яковлев ячӗллӗ Чӑваш патшалӑх университетӗнче Анатолий Данилов художникӑн «Зов земли родной» (чӑв. Тӑван ҫӗр йыхравӗ) куравӗ уҫӑлӗ.

Анатолий Васильевич — Чӑваш Республикин халӑх художникӗ, Раҫҫей Федерацийӗн аслӑ шкулӗн тава тивӗҫлӗ ӗҫченӗ, педагогика наукисен кандидачӗ, ЧППУн профессорӗ, Хӗрлӗ Чутай районӗн хисеплӗ ҫынни.

Ҫак тарана ҫитсе Анатолий Данилов пилӗк теҫеткене яхӑн курав йӗркеленӗ. Вӗсене хамӑр республикӑра ҫеҫ мар, ют ҫӗршывсенче те уҫнӑ. Паянхи курав шучӗпе шӑп та лӑп аллӑмӗш пулӗ. Унта художник тӑван тӑрӑхне, Хӗрлӗ Чутай районне, сӑнланӑ ӳкерчӗксем пулӗҫ. Вӗсене пейзаж тата натюрморт жанрӗпе ӳкернӗ.

Шупашкарти Миначев урамӗнчи 11-мӗш ҫуртра пурӑнакансем алӑк хӑлӑпӗ пӗрмай ваннишӗн пӑшӑрханнипе «Халӑх тӗрӗслевӗ» портала ҫыру ӑсатнӑ.

Унта тӳрех евитлемен-ха вӗсем. 1-мӗш тата 2-мӗш подъездсенче пурӑнакансем малтан управляющи компание ҫырнӑ, домофон тытса тӑракан организацирен те пулӑшу ыйтнӑ. Унтисем итлемеҫҫӗ мар, итлеҫҫӗ. Кашнинчех хӑлӑпа ылмаштараҫҫӗ. Ҫуртра пурӑнакансем вара алӑк тимӗр карта ҫумне ҫапӑнать, ҫавӑнпа хӑлӑп ванать тесе шухӑшлаҫҫӗ. Вӗсен шучӗпе тимӗр карта ҫумне перӗнмелле мар хатӗр вырнаҫтармалла.

Чӑваш Енре туянма палӑртса хунӑ карапсене паллӑ ҫынсен ятне парассине Чӑваш халӑх сайчӗ унччен пӗлтернӗччӗ. Вӗсенчен пӗрин валли ят суйланӑ та. Вӑл Алексей Крылов карап ӑстин ячӗпе хисепленӗ. Ята халӑхпа, сасӑлав ирттерсе суйланӑ. Сасӑлав хутшӑннисенчен 33 проценчӗ Алексей Крылов ятне килӗштернӗ.

Паян тата тепӗр «Валдай» ятне суйламалли сасӑлав иртесси пирки пӗлтернӗ. Вӑл пуш уйӑхӗн 4-мӗшӗччен пырӗ.

Аса илтерер: шыв ҫийӗн ҫӳрекен «Валдай» карапсем «Шупашкар – Хусан» тата «Шупашкар – Чулхула» маршрутсемпе ҫӳрӗҫ. Кунсӑр пуҫне вӗсем Куславккапа Сӗнтӗрвӑррине хутлӗҫ. Карапсене кӑҫал туянмалла. Виҫӗ «Валдай» илме федераци хыснинчен 330 миллион тенкӗ уйӑрнӑ.

Чӑваш Ене кӑшӑлвирусран вакцинӑн черетлӗ партийӗ килсе ҫитнӗ. Ӑна «Фармаци» патшалӑхӑн унитарлӑ предприятине кӳрсе килнӗ.

«Гам-КОВИД-Вак» (сутлӑхри унӑн марки — «Спутник-V») вакцинӑна Чӑваш Ене пурӗ 4100 доза илсе ҫитернӗ.

Вакцинӑна яталӑ условире упрамаллине кура ӑна вӑрах тӑхтамасӑр медицина организацийӗсене тата вакцинаци пукнчӗсене валеҫсе парӗҫ. Аса илтерер: хальхи вӑхӑтра пирӗн республикӑра вакцинацин 41 пункчӗ ӗҫлет.

Привикӑна икӗ хутчен пурнӑҫламалла. Иккӗмӗш укола 21 кунтан тепре тумалла.

Ҫӗмӗрлери масара сарас ыйту вырӑнтисемшӗн 2017 ҫултанпах тӑсӑлать. Ыйтӑва татса пама кирлӗ ҫӗр лаптӑкӗ вӑрман фончӗн шутланнӑран чӑрмав кӑларса тӑратать. Сӑмах масара сарма кирлӗ 5,4 гектар лаптӑк пирки пырать.

Тӳре-шара Росрыболовствӑн тата Федерацин вӑман хуҫалӑхӗн агентствине тӑтӑшах ҫыру ӑсатнӑ. Анчах: «Юрать, усӑ курӑр», – текен хурава хальлӗхе кӗтсе илеймен.

Ӗнер республикӑн Ҫутҫанталӑк ресурсӗсен тата экологи министерствинче лару иртнӗ. Унта РФ Патшалӑх Думин депутачӗ Николай Малов та хутшӑннӑ. Вӑл Рослесхоз ертӳҫипе Сергей Аноприенкӑпа тӗл пулса ҫивӗч ыйтӑва сӳтсе явнине, лару-тӑру ҫывӑх вӑхӑтра уҫӑмланасса шаннине пӗлтернӗ.

Ҫӗмӗрлере 2017 ҫулта 506 ҫын леш тӗнчене ӑсаннӑ, «Чеб.ру» порталта пӗлтернӗ тӑрӑх, 2018 ҫулта 432 ҫынран кая мар (раштав уйӑхӗнчи цифрӑна тупайманран ҫавӑн пек каланӑ), 2019 ҫулта – 493, 2020 ҫулта – 546.

Чӑваш Енри ветерансем сывлӑха «Вега» социаллӑ сиплев центрӗнче ҫирӗплетӗҫ. Асӑннӑ центр аслӑ ҫулхисемпе сусӑрсене йышӑнать.

Ветерансем паянтан пуҫласа пуш уйӑхӗн 14-мӗшӗччен 18 кунлӑх курсра пулӗҫ.

«Вега» центрта канма ирӗк пуррисен категорине ҫак йыш кӗрет: вӑрҫӑ вӑхӑтӗнче тылhа ӗҫленисем; ӗҫ ветеранӗсем; политика репрессине лекнӗ, кайран реабилитациленнисем; сусӑрсем; ватлӑха пула пенси илекен пенсионерсем.

«Вега» центра лекес тесен Чӑваш Республикин «Социаллӑ пулӑшу парас енӗпе ӗҫлекен центрӗ» хысна учрежденине заявлени ҫырса памалла. Кунсӑр пуҫне паспорт копийӗ, сывлӑх пирки тухтӑрсем панӑ справка, ҫӑмӑллӑхпа усӑ курма ирӗк пуррине ҫирӗплетекен справка, полис, сусӑрсен хӑйсен статусне ҫирӗплетекен справка тӑратмалла.

Путевкӑна юлашки икӗ ҫулта «Вегӑра» канманнисене параҫҫӗ.

Чӑваш Енри ҫул-йӗр организацийӗсенчен пӗрне, «Дортех» тулли мар яваплӑ обществӑна, административлӑ майпа явап тыттарӗҫ. Вӑл ҫил-тӑман вӑхӑтӗнче ҫула йӗркеллӗ тасатман.

Ҫавна тӗрӗслеме патшалӑхӑн ҫул-йӗр инспекторӗсем тата прокуратура ӗҫченӗсем тухнӑ.

«Сӑр» автоҫулӑн Ҫӗмӗрле районӗнчи пайӗнче тин ҫеҫ ҫунӑ юра вӑхӑтра тасатман. Ҫавна пула ҫул ҫинче инкексем пулма пултарнӑ.

«Дортех» предприяти директорӗ тӗлӗшпе административлӑ ӗҫ пуҫарнӑ. Ӑна 20 пинрен пуҫласа 30 пин тенкӗ таран штрафлама юрать.

Республикӑн Транспорт тата ҫул-йӗр хуҫалӑхӗн министерстви асӑннӑ предприяти ӗҫ калӑпӑшӗ пысӑк пирки ҫула тивӗҫлипе тытса тӑма ӗлкӗрейменнине пӗлтӗрех палӑртнӑ. Лару-тӑрӑва улӑштарма хальлӗхе май ҫук-мӗн, мӗншӗн тесен контракта 2022 ҫул вӗҫӗччен алӑ пуснӑ.

Пӗлтӗр Шупашкар хулинче ҫӗрсене инвентаризациленӗ чухне ҫӗр саккунне пӑсакансене самай тупса палӑртнӑ.

Цифрӑсен чӗлхипе каласан, ҫӗре ҫынсем е организацисем хӑйсем тӗллӗн ярса илнӗ тӗслӗхе 747 хутчен асӑрханӑ, 9 пин объектӑн право хуҫине палӑртман, 20 пин ытла участока кадастр учетӗнче шута илмен.

Ҫӗрпе ҫыхӑннӑ кӑлтӑка палӑртма хальхи вӑхӑтри инноваци технологийӗсем те самай пулӑшнӑ. Кунта пилотсӑр вӗҫекен хатӗрсене (дрон) асӑнса хӑвармалла.

Ҫӗр саккунне пӑсакансене явап тыттарнӑ май хула хыснине пӗлтӗр 70 ытла миллион тенкӗ шыраса илме май килнӗ. Кӑҫал ҫав виҫе 20 пин тенкӗрен кая мар пуласса шанаҫҫӗ. Ҫӗрпе усӑ курнине тӗрӗслес ыйтӑва ӗнер хула администрацийӗн ирхи планеркинче сӳтсе явнӑ. «Бюджета кӗнӗ укҫапа хула хуҫалӑхне аталантарма усӑ курӑпӑр», – тенӗ Шупашкарӑн сити-менеджерӗ Алексей Ладыков.