Шупашкартан кӑҫал ҫӗнӗ авиарейссем уҫасшӑннине эпир унччен пӗлтернӗччӗ. Аса илтерер: Росавиаци патшалӑх субсидилекен авиамаршрутсен списокне пичетленӗччӗ. 266 маршрут шутӗнче Шупашкартан ытти хулана каякан 4 авиарейс та пурччӗ. Вӑл хуласем ҫаксем: Краснодар, Екатеринбург, Минеральные Воды тата Ҫӗнӗ Уренгой.

Шупашкарти аэропортра пӗлтернӗ тӑрӑх, «ИрАэро» авиакомпани йӗркелекен ҫӗнӗ рейссем валли вӑхӑт малтанласа палӑртнӑ ӗнтӗ.

Патшалӑх субсидилекен программӑна Краснодар, Минеральные Воды тата Ҫӗнӗ Уренгой хулисем кӗнӗ.

Самолетсем пуш уйӑхн 3-мӗшӗнче вӗҫме тытӑнмалла. Ҫӗнӗ Уренгойран Шупашкара юнкунсерен 11 сехет те 20 минутра ҫитмелле, Минеральные Воды хулана 12 сехет те 20 минтура кунтан вӗҫсе кайса унта 17 сехет те 20 минутра ҫитмелле, Краснодара 18 сехет те 20 минутра вӗҫсе каймалла.

Кӗҫнерникунсерен Краснодартан 8 сехет те 40 минутра Шупашкара вӗҫсе каймалла, Ҫӗнӗ Уренгоя пирӗн патран кӗҫнерникунсерен 9 сехет те 40 имнутра хускалмалла.

Пассадирсене 103 пассажир вырӑнӗлӗх «Сухой Суперджет 100» самолет турттарӗ. Билетсене ҫывӑх вӑхӑтра сутма пуҫлӗҫ.

Малалла...

social.riafan.ru сайтри сӑн

Улатӑрти тухтӑрсем пациентӑн хырӑмӗнчен кашӑк кӑларнӑ. Арҫын ун пек операцие темиҫе хутчен тӳснӗ ӗнтӗ. Вӑл унччен те кашӑк ҫӑтнӑ. Ку вара – 10-мӗш хут.

Ҫапла майпа арҫын пульницӑна лекес тесе хӑтланнӑ-мӗн. Вӑл тӗрмере ларать. Кашӑк ҫӑтса янӑскере Улатӑрти пульницӑна конвойпа илсе ҫитернӗ. Тухтӑрсем операци туса унӑн хырӑмлӑхӗнчен кашӑк кӑларнӑ. Халӗ пациентӑн сывлӑхӗ йӗркеленсе пырать ӗнтӗ.

Специалистсем асӑрхаттараҫҫӗ: мӗнле те пулин япала ҫӑтсан ҫын вилме те пултарать!

sntrassvet.ucoz.ru сайтри сӑн

Кӑрлач уйӑхӗн 21-мӗшӗнче оперативлӑ дежурнӑй пулчӗ ҫине хыпар ҫитнӗ: дачӑра ҫын шӑнса вилме пуҫланӑ. Ҫӑлавҫӑсем Шупашкар районӗнчи «Унга» дачӑна ҫитнӗ.

Унта вара 73 ҫулти арҫын выртнӑ, алли-ури шӑнса кӳтнӗ, тӑм илнӗ. Ун пирки ҫӑлавҫӑсене кӳрши, дачӑна йӗлтӗрпе ҫитнӗскер, пӗлтернӗ.

Арҫын дачӑра пурӑннӑ-мӗн. Ҫӑлавҫӑсем дачӑна юрҫӳренпе ҫитнӗ, ватӑ ҫынна васкавлӑ медпулӑшу тухтӑрӗсем патне ҫитернӗ. Лешсем вара ӑна пульницӑна леҫнӗ.

Халӗ йӗрке хуралҫисем арҫын мӗншӗн дачӑра пурӑннине тӗпчеҫҫӗ.

Кӑрлач уйӑхӗн 20-мӗшӗнче Чӑваш Енри Халӑхсен туслӑхӗн ҫуртӗнче республикӑра пурӑнакан халӑхсен ташшисене вӗрентмелли ӑсталӑх сехечӗн пӗрремӗш занятийӗ иртнӗ. на онлайн-мелпе йӗркеленӗ.

Чӑваш ташшипе ӑсталӑх сехетне Шупашкарти тӗп клубӑн тытӑмӗнчи «Нарспи» клубӑн «Сарпике» халӑх ташӑ ансамблӗн балетмейстерӗ Алиса Лукина ирттернӗ.

Чӑваш халӑх хореографи ӳнерӗ икӗ жанртан тӑрать: вӑйӑ (уяв картисем), maшӑ. Жанрсенче хӑйсен тӗсӗсем пур. Уяв картинче — юрӑ карти, вӑйӑ картисем, ташӑ карти тата карта вӑййисем.

«Сарпике» ансамбль «Вӑйӑра» ташша кӑтартнӑ. Коллектив ертӳҫи Алиса Лукина ташӑпа паллаштарнӑ. «Нарспи» клубӑн аккомпаниаторӗ, баянист, «ЯлАр» этно-рок ушкӑн ертӳҫи Николай Пыркин та кӑсӑклӑ самантсене уҫӑмлатнӑ.

Кӑшӑлвируспа кӗрешекен оперштаб ларӑвӗнче ЧР сывлӑх сыхлавӗн министрӗ Владимир Степанов пӗлтернӗ тӑрӑх, ӗнер республикӑра пӗр пульница кӑшӑлвируспа чирлисене йышӑнма пӑрахнӑ.

Сӑмах Канаш районӗнчи тӗп пульница пирки пырать. Вӑл Шӑхасан ялӗнче вырнаҫнӑ. Тек унта кӑшӑлвируспа чирлисене сиплемӗҫ. Унтан пациентсене кӑларнӑ, дезинфекци тунӑ хыҫҫӑн яланхи режимпа ӗҫлеме тытӑнӗҫ, унчченхи пекех 120 койка пулӗ. Ҫапла майпа ҫынсем пульницӑра ытти профильпе те пулӑшу илме пултарӗҫ.

Паян кӑшӑлвируспа кӗрешекен оперштабӑн черетлӗ ларӑвӗ иртнӗ. Роспотребнадзор унта пӗлтернӗ тӑрӑх, Шупашкарти экономикӑпа технологи колледжӗн студенчӗсем кӑшӑлвируспа чирленӗ.

Ведомство палӑртнӑ тӑрӑх, хальхи вӑхӑтра Чӑваш Енре вӗренӳ организацийӗсенче кӑшӑлвируспа чирленӗ 14 тӗслӗх тупса палӑртнӑ. Шупашкарта – 9, Ҫӗнӗ Шупашкарта – 11, Канашра 2, районсенче 2 тӗслӗх.

Ҫавӑн пекех ача пахчисенче те чирлекенсем пур. Ултӑ шкулта, виҫӗ техникум-колледжра кӑшӑлвируспа аптӑранӑ ҫынсене тупса палӑртнӑ. Шупашкарти экономикӑпа технологи колледжӗнче виҫӗ студент инфекциленнӗ.

Кӑрлачӑн 28-мӗшӗнчен пысӑк экран ҫине «Зоя» фильм проката тухать. Палӑртма кӑмӑллӑ: Зоя Козьмодемьянскаян рольне Шупашкарта ҫуралса ӳснӗ Анастасия Мишина калӑпланӑ.

Настя 1993 ҫулта ҫуралнӑ, 2012 ҫулта Раҫҫей театр ӳнерӗн институтне (ГИТИС) режиссер факультетне вӗренме кӗнӗ. Ҫав ҫулах ӑна Владимир Маяковский ячеллӗ театр труппине йышӑннӑ. Настя «Вольф», «Заключение» фильмсенче те ӳкерӗннӗ.

Хальхинче Анастасия Мишина Тӑван ҫӗршывӑн Аслӑ вӑрҫин историйӗнче ҫырӑнса юлнӑ паллӑ разведчицӑна – Зойӑна – вылянӑ.

reporter-ua.com сӑнӳкерчӗкӗ

Ҫак кунсенче пирӗн республикӑра пушарсен шучӗ палӑрмаллах ӳснӗ. Иртнӗ ҫулхи раштав уйӑхӗн 25-мӗшӗнчен пуҫласа кӑрлач уйӑхӗн 10-мӗшӗччен пирӗн тӑрӑхра «хӗрлӗ автан» 66 хутчен алхаснӑ. Инкек 15 ҫын пурнӑҫне татнӑ.

Раҫҫейӗн Инкеклӗ ӗҫсен министерствин Чӑваш Енри Тӗп управленийӗн пуҫлӑхӗ Валерий Зеленин пӗлтернӗ тӑрӑх, вилекенсенчен ытларахӑшӗ — арҫынсем, пенсионерсем тата ӗҫсӗр ҫынсем.

Чӑваш Енӗн Инкеклӗ лару-тӑрӑвӑн патшалӑх комитетӗнче пӗлтернӗ тӑрӑх, пушарсен шучӗ Муркаш, Пӑрачкав, Вӑрмар районӗсенче уйрӑмах нумайланнӑ.

Мускавра пурӑнакан хӗр Инстаграмри хӑйӗн страницинче чӑвашла тумлантарнӑ пуканесене, тӑван халӑхӑмӑрпа ҫыхӑннӑ ытти сӑна тӑтӑшах вырнаҫтарать.

«Ырӑ ир пурне те! Пӗчӗк юлташсене чӑваш тумӗ питӗ хитре каять) Килӗшетӗр-и?», «Ытти халӑхӑн тӗрри те, паллах, питӗ илемлӗ. Анчах та тӑван япала капӑртарах та хитререх туйӑнать», — ҫапларах постсем ҫырать маттур пике хӑйӗн ӳкерчӗкӗсен айне.

Ксения Кошелева — Чӑваш Енри Йӗпреҫ районӗнчен. Халӗ Мускавра ӗҫлесе пурӑнать. Пултаруллӑ иллюстратор ӳкерме ачаранах юратнӑ, анчах биологипе географи учительне вӗренсе тухнӑ. Художество пӗлӗвӗ пулмасан та пӗлӗшӗсем ыйтсан кӗнекесене те хитрелетет.

Тӑван халӑхӑмӑрӑн пуян культурине юратасси Мускава куҫса кайсан тата ют ҫӗршывра пулса курнӑ, ытти культурӑпа паллашнӑ хыҫҫӑн ҫуралнӑ.

Ксения планшетра ӳкерет. Унӑн ӗҫӗсем электрон мелпе упранаҫҫӗ. Ӗҫе пуҫӑнсанах пӗр ӳкерчӗкпе эрне таран ларма тивнӗ, халӗ 5-6 сехет татти-сыпписӗр ӗҫлесен вӗҫлет. Унӑн ӳкерчӗкне 40 пин тенкӗпе туянакан та пулнӑ.

Пассажирсене Чӑваш Ен тӗп хулинчен Мускава тата Мускавран Шупашкара турттаракан «Победа» авиакомпани хушма рейссем кӗртме палӑртнине эпир унччен пӗлтернӗччӗ-ха.

Темиҫе кун каялла Шупашкарти аэропортра расписани ҫывӑх вӑхӑтра уҫӑмланассине хыпарланӑччӗ. Халӗ, чӑн та, паллӑ.

Шупашкартан Мускава хушма авиарейссене ҫакӑн пек йӗркеленӗ:

— нарӑс уйӑхӗн 20-мӗшӗнче 19 сехет те 35 минутра;

— нарӑс уйӑхӗн 23-мӗшӗнче 16 сехет те 25 минутра;

— нарӑс уйӑхӗн 26-мӗшӗнче 15 сехет те 20 минутра;

— нарӑс уйӑхӗн 28-мӗшӗнче 17 сехет те 50 минутра;

— пуш уйӑхӗн 5-мӗшӗнче 15 сехет те 20 минутра;

— пуш уйӑхӗн 8-мӗшӗнче 17 сехет те 50 минутра;

— пуш уйӑхӗн 12-мӗшӗнче 15 сехет те 20 минутра;

— пуш уйӑхӗн 14-мӗшӗнче 17 сехет те 50 минутра;

— пуш уйӑхӗн 19-мӗшӗнче 15 сехет те 20 минутра;

— пуш уйӑхӗн 21-мӗшӗнче 17 сехет те 50 минутра;

— пуш уйӑхӗн 26-мӗшӗнче 15 сехет те 20 минутра.