«АвтоВАС» предприяти автовокзалсемпе тата пассажирсене турттарассипе ӗҫлеме пӑрахӗ. Ҫакӑн пирки компани сайтӗнче пӗлтернӗ. Ҫапла йышӑнӑва акционер обществин директорсен канашӗ йышӑннӑ иккен.

«АвтоВАС» халӗ автовокзал пулӑшӑвӗ кӳме килӗшекене шырать. Ӑна вӑл автовокзалсене арендӑна парӗ. Хӑйӗн харпӑрлӑхӗнчи хӑш-пӗр пурлӑха сутас кӑмӑллине те пӗлтернӗ.

«АвтоВАС» акционерсен обществин икӗ автовокзал тата Шупашкарта, Ҫӗнӗ Шупашкарта, Улатӑрта, Ҫӗмӗрлере, Улатӑрта, Етӗрнере, Сӗнтӗрвӑрринче тата ытти хӑш-пӗр район центрӗнче и 17 диспетчерпа касса пункчӗ пур. 2019 ҫулта «АвтоВАС» Куславккари тата Пӑрачкаври ҫав пунктсене хупнӑ.

Чӑваш Енре нимеҫӗсен ирӗклӗ «Симӗс Чӑваш Ен» экологи отрячӗ ӗҫлеме тытӑннӑ. Ӑна республикӑри кашни муниципалитетрах йӗркелесшӗн.

Хальхи вӑхӑтра Чӑваш Енре экологи нимелӗхӗпе кӑсӑкланас туртӑм ӳсни палӑрать – ҫапла палӑртнӑ «Симӗс хула» экологи организацийӗн регионти председателӗ Федор Алексеев. Вӑл палӑртнӑ тӑрӑх, шулсенче, аслӑ шкулсенче, техникум-колледжсенче экоотрядсем йӗркеленеҫҫӗ, ҫӗнӗ проектсем ҫуралаҫҫӗ, ҫутҫанталӑка сыхлас тӗлӗшпе мероприятисем иртеҫҫӗ.

Тӳре-шара пӗлтернӗ тӑрӑх, республикӑра 143 экологи отрячӗ ӗҫлет. Вӗсенче 4900 яхӑн ҫын тӑрать.

Паян 10 сехетре Шупашкарти 20-мӗш шкулта вӗренекенсене эвакуациленӗ. Вырӑна пушарнӑйсем, васкавлӑ медпулӑшу, полици, Росгварди ҫитнӗ.

Иртен-ҫӳрене те ҫывӑха пыртарман, Хусанкай урамӗнчи тротуарпа иртме ыйтнӑ.

Сӑмах май, ку уйӑхра шкулсенче виҫӗ эвакуаци пулнӑ. Унччен 5-мӗш гимназин «А» корпусӗнче тата 17-мӗш шкулта ачасене эвакуациленӗ.

ШӖМ тунӑ сӑн

Мускав облаҫӗнче пурӑнакан арҫын пӗлтӗр раштав уйӑхӗ вӗҫӗнче Шупашкара тусӗсем патне килнӗ. Хайхискер Иван Яковлев проспектӗнче вырнаҫнӑ суту-илӳ центрӗнче ҫӳренӗ чухне пӗр пушмака куҫ хывнӑ та ӑна тӑхӑнса тухса кайнӑ.

Ҫӗнӗ пушмак вырӑнне арҫын хӑйӗнне киввине лартса хӑварнӑ. Лавка ӗҫченӗсем кивӗскере икӗ эрнерен ҫеҫ асӑрханӑ. Вӗсем кун пирки полицие пӗлтернӗ.

Видеокамерӑсене пӑхса ҫак ӗҫе кам тунине палӑртнӑ. Тытса чарнӑ чухне арҫын вӑрланӑ пушмакпа пулнӑ. Халӗ вӑл унашкал ытти преступление тунипе туманнине тӗрӗслеҫҫӗ.

Тӗнчипе паллӑ велоҫулҫӳревҫӗ Никита Тӗнче Америкӑри Пӗрлешӳллӗ Штатсенче водительте ӗҫлет. Руль умне ларса вӑл темиҫе кунлӑха инҫе ҫула тухса каять. Ку ӗҫе вӑл кӑҫал пуҫӑннӑ. Пӗлтӗрхи ҫулталӑка Никита кичем пулнӑ тесе хаклать.

Аякри ҫула тухсан каҫхине вӑл е машинӑра тӗлӗрсе илет, е хӑна ҫуртӗнче ҫӗр каҫать. Ҫакӑн пирки вӑл хӑйӗн Инстаграмри страницинче пӗлтерсе тӑрать. Хӑна ҫуртӗнче ҫӗр каҫнӑшӑн тӑкака ӗҫӗнчен саплаштараҫҫӗ иккен. Хӑна ҫуртӗнче Никита ҫӑвӑнать, япалисене ҫуса типӗтет. Ҫул ҫинче машина ванни те пулнӑ, ҫил-тӑман алхасни те.

Аса илтерер: халӗ Тӗнчесен икӗ ача: Ая тата раштав уйӑхӗн 27-мӗшӗнче АПШри Далласри клиникӑра ҫут тӗнчене килнӗ Эльдар.

Ӗнер, кӑрлач уйӑхӗн 25-мӗшӗнче, Шупашкарти Коммуналлӑ Слобода урамӗнче пӗр машина ҫул урлӑ чипер качакан хӗрачана пырса ҫапнӑ.

«Ҫыхӑнура» форумри видеора ачана ытти машина чиперех каҫарса яни аван курӑнать. Пӗр водитель вара, «Форд Фокус», «Веста» автомобиль чарӑннине те пӑхмасть, малалла ыткӑнать.

Машина пырса ҫапсан ача хӑех тӑрать-ха. Анчах вӑл уксахлать тата унӑн хӑрах пушмакӗ хывӑнса ӳкнӗ.

Ачана ҫапса кайнине сиссен «Форд Фокус» сӗмсӗррӗн иртсе каймасть — чарӑнса ларать. Автомобильтен хӗрарӑмпа арҫын сиксе тухаҫҫӗ, ача патне васкаса пыраҫҫӗ.

Паян Чӑваш Ен Правительствинче ҫӗнӗ ҫын ӗҫе кӳлӗннӗ. Вице-премьер тивӗҫне пурнӑҫлама 46 ҫулти Павел Данилова шаннӑ. Вӑл Строймин, Транспорт министерствин тата Патшалӑх ҫурт-йӗр инспекцийӗн ӗҫне йӗркелесе пырӗ.

Юлашки ҫулсенче вӑл «Раҫҫей Стройминӗн проект дирекцийӗ» автономи учрежденине ертсе пынӑ. Мускавран килнӗ пулин те Павел Данилов Чӑваш Еншӗн ют ҫын мар. Вӑл кунта ҫуралнӑ, 2000-мӗш ҫулсенче Шупашкар хула администрацийӗн пуҫлӑхӗн Анатолий Емельяновӑн финанспа экономика енӗпе ҫумӗ пулса ӗҫленӗ.

Павел Данилов Плеханов ячӗллӗ Раҫҫей экономика академийӗнче вӗреннӗ. Ӗҫ биографине банк тытӑмӗнче пуҫӑннӑ. Чӑваш Ен Элтеперӗн пулӑшуҫи те пулнӑ, коммерци тытӑмӗнче тимленӗ.

Ҫакна палӑртар: Павел Даниловӑн ашшӗ Владимир Данилов (вӑл пӗлтӗр вилнӗ) Чӑваш Енӗн вице-премьерӗ – вӗренӳ министрӗ пулнӑ.

Раҫҫей Федерацийӗнчи коммунистсен партийӗн Чӑваш Енри рескомӗн III пленумӗ хӑҫан иртесси паллӑ. Ӗнер, кӑрлачӑн 25-мӗшӗнче, реском бюровӗн ларӑвӗ иртнӗ. Унта пленума хӑҫан ирттерессине татса панӑ. Коммунистсен пӗлтерӗшлӗ пухӑвӗ нарӑс уйӑхӗн 2-мӗшӗнче 14 сехетре иртмелле.

Бюро ларӑвӗнче реском валли «Соболь» автомобиль туянас ыйтӑва та сӳтсе явнӑ. Автомобиль илме партин Тӗп комитечӗ укҫа уйӑрӗ.

Пленумра коммунистсем партин рескомӗн пӗрремӗш секретарьне тата бюро пайташӗсене суйлӗҫ.

«Правда ПФО» тӗнче тетелӗнчи хаҫат хӑйӗн ҫӑлкуҫӗ ҫине таянса хыпарланӑ тӑрӑх, Мускавра парти пайташӗсем реском пӗрремӗш секретарӗ пулма Александр Андреев тата Алексей Шурчанов кандиадтурисене тишкернӗ. Унтисем Алексей Шурчанова сӗннӗ.

Аса илтерер: рескомӑн пӗрремӗш секретарӗ Валентин Шурчанов пулнӑччӗ, пӗлтӗрхи раштавӑн 18-мӗшӗнче вӑл ӗмӗрлӗхе куҫ хупрӗ.

Атӑл тӑрӑх Шупашкара хӑнасем килеҫҫӗ те: «Вот это здание с колоннами, видать, ваша филармония?», — тесе ыйтаҫҫӗ. «Ҫук ҫав», — хуравлатпӑр вырӑс чӗлхипе.

Хӗрлӗ лапамри 7-мӗш ҫуртра К.В. Иванов ячӗллӗ чӑваш драма театрӗ 1961-мӗш ҫултанпа ӗҫлет! Вӑл вырӑнтан ӑна 70-мӗш, 80-мӗш ҫулсенчех куҫармалла пулнӑ та ҫав!

Пирӗн энциклопединче театр керменӗ пирки «Хуламӑра пуҫарса яракан ҫуртӑмӑр» тесе ҫыраҫҫӗ (градообразующее)!!! Чӑннипех те, — мӗн тери мухтавлӑ-ҫке пирӗн театр!

90-мӗш ҫулсенче куҫарма майсем пурччӗ! 1994-мӗш ҫулхи кӑрлач уйӑхӗн 21-мӗш кунӗнче сумлӑ, илемлӗ йӑли-йӗркипеле Н.В. Федоров республикӑмӑрӑн ертӳҫи пулса тӑчӗ! (Ҫавӑн чухне Лев Пантелеймонович Кураков ҫӗнтерейменнишӗн ку таранччен те питӗ кулянатпӑр!) 1997-мӗш ҫулта Вырӑс драма театрӗ хӑйӗн ҫуртӗнчен пирӗн Ҫеҫпӗл Мишши ячӗллӗ театрне Трактор тӑвакансен культурӑ керменне хӑваласа ярать тейӗпӗр! Вӑл (Трактор тӑвакансен КК) текен керменте 1997-мӗш ҫултанпа икӗ чӑваш театрӗ пӗр-пӗрне пулӑшса ӗҫленӗ пулӗччӗҫ!

Н.В. Федоров ӗҫлеме тытӑнсан, ҫӗртме уйӑхӗн 24-мӗш кунӗ Чӑваш Республикин патшалӑх уявӗ пулса тӑнине пӗлсессӗнех вырӑс патши Шупашкарти кӳлемӗшре «Атӑлҫи ҫӑлкуҫӗсем», кайрантарах «Раҫҫей ҫӑлкуҫӗсем» ятлӑ ҫӗршыври фольклор фестивальне ирттерме ирӗк пачӗ!

Малалла...

don24.ru сайтри сӑн

Шупашкарта пурӑнакан 43 ҫулти арҫын килте ларсах укҫа ӗҫлесе илес тенӗ те ҫур миллионсӑр тӑрса юлнӑ.

ЧР ШӖМӗ пӗлтернӗ тӑрӑх, кӑрлач уйӑхӗн 21-мӗшӗнче вӑл полицие пырса пӑтӑрмахӗ пирки каласа кӑтартнӑ. Ун патне палламан ҫын шӑнкӑравласа килте ларсах ӗҫлесе илме сӗннӗ-мӗн. Анчах малтан укҫа тӳлесе хумалла имӗш.

Тупӑш нумай тума пулать тени арҫынна илӗртнӗ. Ҫавӑнпа вӑл пӗр шухӑшламасӑрах темиҫе кун ҫав ҫын каланӑ счет ҫине укҫа куҫарса тӑнӑ. Пӗр кунхине хайхискер тупӑш хӑҫан пулассипе кӑсӑкланнӑ. Кун хыҫҫӑн укҫа ӗҫлесе илме сӗннӗ ҫыннӑн шӑрши-марши те юлман, пач ҫухалнӑ. Унччен вӑл ҫур миллион тенкӗ куҫарса ӗлкӗрнӗ. Кун тӗлӗшпе пуҫиле ӗҫ пуҫарнӑ.