bishelp.ru сӑнӳкерчӗкӗ

Ҫӗмӗрлере пурӑнакан 48 ҫулти хӗрарӑм хӑйӗн укҫине палламан арҫынна шанса тыттарнӑ. Урамра мар-ха. Банк уйрӑмӗнче.

Хӗрарӑмӑн Шупашкарта пурӑнакан хӗрне укҫа куҫарса парасси килнӗ. Хӑйӗн банк картти пулман. Ҫавна кура вӑл палламан пӗр арҫынна пулӑшма ыйтнӑ. Лешӗ хирӗҫлемен. Хӗрарӑм ют ҫынна 5 пин тенкӗ кӑларса тыттарнӑ. Лешӗ ӑна малтан хӑйӗн картти ҫине хунӑ, унтан хӗрарӑмӑн хӗрӗн картти ҫине куҫарнӑ. Укҫа адресат патне ҫитиччен арҫын банкран васкаса тухса кайнӑ.

Укҫа ҫитменнине кура хӗрарӑм пакунлисенчен пулӑшу ыйтнӑ. Лешсем укҫа ӑҫта кайнине палӑртассипе ӗҫлеҫҫӗ. Вӗсем шухӑшланӑ тӑрӑх, карттӑ номерне наборланӑ чухне арҫын е йӑнӑшма пултарнӑ, е юри улталанӑ.

Кӑҫалхи авӑн уйӑхӗнче Етӗрнере хальхи вӑхӑтри Йывӑр атлетика центрӗ уҫӑлӗ. Ӑна тӗплӗ юсанӑ хыҫҫӑн ӗҫлеттерсе ярӗҫ.

Икӗ хутлӑ ҫурта 22 ҫул каялла хута янӑ. Унти юсав ӗҫӗсене иртнӗ ҫул вӗҫӗнче пуҫӑннӑ. Ҫав тӗллевпе республика хыснинчен муниципалитета 23 миллион тенкӗ ытла уйӑрса панӑ.

Ку укҫапа ҫурта тулаш енчен юсаса ҫӗнетнипех ҫырлахман, шалтан та хитрелетнӗ. Йывӑр атлетсем валли пӗрремӗш хутра ятарлӑ зал хатӗрленӗ. Иккӗмӗш хутра – нумай функциллӗ спорт залӗ. Ӑна йывӑр атлетсемпе пӗрлех ҫӑмӑл атлетсем валли те пӑхса хӑварнӑ. Шахмат вӑййине юратакансен кӑмӑлне те шута илнӗ. Вӗсем валли те пӳлӗм пӑхса хӑварнӑ.

Кӑшӑлвируспа чирлекенсен шучӗ пирӗн республикӑра 7,5 пинрен иртнӗ. Ҫав шутран 82 проценчӗ сывалнӑ.

Паян ир тӗлне пирӗн республикӑра 7516 ҫын кӑшӑлвируспа чирленине шута илнӗ. Ку вӑл – официаллӑ статистика. Маларах асӑннӑ 7,5 пин ытла тӗслӗхрен 35 ҫынна вирус иртнӗ талӑкра ернӗ.

6196 ҫын сывалнӑ. Ҫав йышран 27 ҫын иртсе кайнӑ талӑкра сипленнӗ.

Кӑшӑлвирус пандемийӗ пуҫланнӑранпа COVID-19 68 пациент пурнӑҫне татнӑ. Ку вируса пула юлашки талӑкра никам та вилмен.

Аса илтерер: пирӗн республикӑра пысӑк суту-илӳ центрӗсене тата аттракционсене уҫма ирӗк панӑ.

Шупашкарта экскаватор хыпса илнӗ. Вӑл И.Н. Ульянов ячӗллӗ Чӑваш патшалӑх университечӗн спорткомплексӗ патӗнче ларнӑ. Пушар эрнекун ирхи 4 сехет тӗлӗнче тухнӑ. Вут-ҫулӑм техникӑна сиенленӗ.

Эрнекун каҫхине тепӗр пушар Вӑрмар районӗнче тухнӑ. «Хӗрлӗ автан» унти Мӑнҫырма ялӗнче пурӑнакан 38 ҫулти хӗрарӑмӑн килӗнче ташланӑ. 2018 ҫулта туса кӑларнӑ «KIA Rio» машина гаражра ларнӑ. Гаражри машинӑпа пӗрлех хуҫалӑхри хуралтӑсем ҫуннӑ. Ҫулӑм 150 тӑваткал метр ҫинче алхаснӑ. Инкеклӗ ӗҫсен министерствин ӗҫченӗсем пӳрте ҫулӑмран ҫӑлса хӑварнӑ. Малтанласа шухӑшланӑ тӑрӑх, пушар электрооборудование ҫыхӑнтарнӑ чух йӑнӑшнине пула тухнӑ.

Николай Максимовӑн «Майра патша парни» историлле романне (Ш,. Чӑв. кӗн. изд-ви, 2018. – 380 с.) вуланӑ чухне шухӑшланинчен.

(Кӗнекене Галина Соловьева вулавӑшҫӑ Шупашкартан парса янипе Сергей Сорокин таврапӗлӳҫӗ яла леҫсе пачӗ; вӗсене тав тӑватӑп).

Халӑх хӑйӗн иртнӗ вӑхӑтне пӗлесшӗн

ҫакӑ та патриотизм ӑнлав шутнех кӗрет.

А.Н.Толстой

Романри ӗҫсем «пин те ҫичҫӗр утмӑл ҫиччӗмӗш ҫулхи ҫӗртме уйӑхӗн тӑххӑрмӗшӗнче» Улатӑр патӗнче пуҫланаҫҫӗ. Кӗтерне патша кортежӗ Чӗмпӗртен таврӑнать. Юланутҫӑсем кӑна икҫӗр гвардеец яхӑн майра патша караванне хуралласа пыраҫҫӗ. Григорий Орлов граф, генерал-адъютант, вырӑсла пӗлмен икӗ чӑваша пуҫ тайманшӑнах пуҫӗсене касса пӑрахма хушсан, патша умне пӗр казак чӗркуҫленет: Ваше величество! Тархасшӑн, чарсам ку усал ӗҫе! Чӑвашсем вӗсем, вырӑсла ӑнланмаҫҫӗ.

— Эппин, эсӗ чӑваш иккен-ха..

— Ҫапла, чӑваш эпӗ. Сентиер Медведев...

Ҫак самантран майра патша «чипер те хӑюллӑ упана» астуса юлать.

Малалла...

Тауэр кӗперӗ / Thames RIB Experience

Лондонра Тауэр кӗперӗн икӗ пайӗ, вӗсен механизмӗсем ҫӗмӗрӗлнине пула, икӗ сехет ытла икӗ еннелле уйӑрӑлнипе тӑнӑ. Ҫакӑн ҫинчен The Guardian ҫырать.

Хаҫат информациленӗ тӑрӑх, каҫхи вӑхӑтра карапсене ирттерсе ярас тесе вӗсене икӗ еннелле сарнӑ чухне конструкци хӗсӗнсе ларнӑ.

Хула полицийӗ пӗлтернӗ тӑрӑх, кӗпер механизмӗ юсавсӑррине пула ӑна ҫуран ҫӳрекенсемпе транспорт валли хупнӑ.

Тауэр кӗперӗ 1894 ҫулта уҫӑлнӑ. Вӑл икӗ башньӑран тӑрать, ҫӳлте вӗсем икӗ каҫма урлӑ пӗрлешӗннӗ. Хула саккунӗсемпе килӗшӳллӗн, 30 фут (9 метр ытла) ҫӳллӗш мачтӑллӑ е хушӑм пайлӑ карапсене, вӗсен хуҫисем 24 сехет хушшинче ҫакӑн пирки ыйтнӑ пулсан, тӳлевсӗр ирттерсе ярма хуть те хӑш вӑхӑтра кӗпере ҫӗклесе сармалла. Сооружени сайтӗнчи информаци тӑрӑх, кӗпере икӗ еннелле ҫулталӑкра вӑтамран 850 хут уйӑраҫҫӗ.

Шупашкарти Ҫӗнӗ хулари шкул ачасене йышӑнма хатӗр. Унта паян хула администрацийӗн пуҫлӑхӗ Алексей Ладыков пулнӑ. Ҫавӑн пирки вӑл Инстаграмри хӑйӗн страницинче пӗлтернӗ.

Алексей Ладыков хыпарланӑ тӑрӑх, ҫӗнӗ шкула сӗтел-пукан кӳрсе килнӗ, бассейна шыв тултарнӑ, спортлапамне хатӗрлесе пӗтернӗпе пӗрех. Вӗренӳ ҫулӗнче ку учреждени 1600 ачана йышӑнӗ.

Ырӑ хыпара вуланисем хушшинче чӑннипех хӑпартланнисем те пур. «Пирӗн вӑхӑтра бассейнлӑ ҫакӑн пек шкул пирки ӗмӗтленме те пултарайман», – палӑртнӑ, сӑмахран, @svetlana.avrora.

Паян, ҫурла уйӑхӗн 22-мӗшӗнче, Чӗмпӗрте чӑвашсен уявӗ иртнӗ. «Акатуйран Чӳклеме таран» ят панӑскере онлайн мелпе йӗркеленӗ.

Ӑна пуҫаракансем пӗлтернӗ тӑрӑх, наци уявӗ чӑвашсем мӗн авалтан ҫӗре юратса ӗҫленине, тӑван киле сума сунине, йӑла-йӗркене пӑхӑннине аса илтерет. Чӗмпӗр ҫӗрӗ ҫинче иртнӗ уява вӑлтӑрӑхри тата Чӑваш Енри чӑвашсем ҫеҫ мар, ытти тӑрӑхрисем те хутшӑннӑ.

«Акатуйран Чӳклеме таран» мероприяти 11 сехетре, чӑваш апат-ҫимӗҫне хатӗрлеме вӗрентекен ӑсталӑх сехечӗсем 12 сехетре, уяв концерчӗ 14 сехетре пуҫланнӑ.

ШӖМ тунӑ сӑн

19 ҫулти каччӑна унччен правасӑр хӑварнӑ. Вӑл вара руль умне ларнӑ. Ҫитменнине, ӳсӗр пулнӑ.

Ҫурла уйӑхӗн 21-мӗшӗнче Улатӑрти полици уйрӑмне 25 ҫулти хӗрарӑм пынӑ. Унӑн «Лада Калина» машинине вӑрланӑ-мӗн. Ҫак ӗҫе кам тума пултарнине те чухланӑ вӑл: тусӗн 19 ҫулти пӗлӗшӗ. Лешӗ уҫҫине ыйтмасӑрах илнӗ.

Руль умне правасӑр, ӳсӗр ларнӑ каччӑна ҫийӗнчех тупнӑ. Куншӑн ӑна уголовлӑ майпа явап тыттарма пултараҫҫӗ. Вӑл руль умне унччен те ӳсер ларни пулнӑ.

Каччӑ тӗлӗшпе пуҫиле ӗҫ пуҫарнӑ. «Лада Калина» машинӑна вара ятарлӑ стоянкӑна ӑсатнӑ.

riadagestan.ru сайтри сӑн

Чӑваш Енри вӗрентекенсене кӑшӑлвирус анализне тӳлевсӗр туса парасшӑн. Кун пирки чувашинформ.рф пӗлтерет. Укҫа-тенке вара республикӑри хыснаран уйӑрасшӑн.

«Хамӑр ума тӗллев лартрӑмӑр, эсир ҫакна ырласан, шкулта ӗҫлекенсене, вӗрентекенсене кӑшӑлвирус пуррипе ҫуккине тӳлевсӗр майпа тӗрӗслӗпӗр. Ку анализа ОМС тытӑмӗпе килӗшӳллӗн тӳлеменрен эпир укҫана Чӑваш Ен хыснинчен уйӑрма палӑртнӑ», - тенӗ ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев.

Аса илтерер: шкул ачисене маска тӑхӑнса ҫӳремелле мар пулӗ.