ЧР Элтеперӗ Олег Николаев Вырӑс географи обществин Чӑваш Енри уйрӑмӗн попечительлӗх канашне ертсе пыма тытӑннӑ. Ку уншӑн пысӑк чыс пулнине вӑл Телеграм-каналӗнче пӗлтернӗ.

Элтепер каланӑ тӑрӑх, попечительӗх канашне йӗркелени обществӑн ӗҫне ҫӗнӗ варкӑш кӗртӗ, тата нумайрах хастар ҫынсене пӗр тӗвве пухма май парӗ. Чӑваш Енри уйрӑм, сӑмах май, Атӑлҫи тӑрӑхӗнче чи лайӑххисен йышӗнче, 5-мӗш вырӑнта. Раҫҫейре вара – 21-мӗш вырӑнта.

Чӑваш Енри уйрӑма 2006 ҫулта И.Я.Яковлев ячӗллӗ ЧПУ ҫумӗнче йӗркеленӗ. Филиалӗсем Сӗнтӗрвӑрринче тата Тӑвайра пур. Кӑҫал тата Ҫӗмӗрлере уҫӑлмалла.

Хальлӗхе Шупашкарта тата ытти хулара хутса ӑшӑтмалли тапхӑр пуҫланман. Хӑҫан ӑшӑ парӗҫ? Ҫанталӑка кура.

Ҫанталӑк вара ҫитес вӑхӑтра сивӗ тӑрӗ. Вырсарникун ҫумӑр нумай ҫӑвӗ – Шупашкарта 1 тӑваткал метр ҫине 1 литр шыв лекӗ. Ҫумӑрпа пӗрле йӗпе юр та ӳкӗ. Мӗншӗн тесен пӗлӗтсен шайӗнче сывлӑш температури 5 градус сивӗ пулӗ. Кӑнтӑрласерен 0-5 градус кӑна ӑшӑ тӑрӗ, каҫхине каштах «минус» пулӗ. Кашни кун тенӗ пек йӗпе юр ҫӑвӗ.

Иккӗмӗш декадӑра ӑшӑ сывлӑш килӗ. Ун чухне 15-20 градус таран ӑшӑтас шанчӑк та пур.

Юпа уйӑхӗн 7-мӗшӗнче Чӑваш Республикин Наци вулавӑшӗнче литературӑри пысӑк пулӑм иртмелле — Раҫҫейри ҫамрӑк мар «Литература хаҫачӗ» периодикӑллӑ кӑларӑмӗн пултарулӑх бригадипе (Мускав хули) тӗлпулу пулӗ.

Вулакансемпе, ҫыравҫӑсемпе тата калем ӑстисемпе йӗркеленӗ тӗлпулӑва ҫитӗҫ:

• Литература хаҫачӗн политикин пайӗн редакторӗ Олег Пухнавцев;

• хаҫатӑн ятарлӑ проекчӗсен ертӳҫи, вырӑс литература пӗрлӗхӗн председателӗ Александр Чистяков;

• пирӗн ентеш, Канаш хулинче ҫуралса ӳснӗ Сергей Ефимов сӑвӑҫ.

15:00 сехетре сире пурсӑра та «ГИПЕРТЕКСТ» литература премийӗн хӑтлавӗнче тата Сергей Ефимов поэтпа, офицерпа, «Литература хаҫачӗн» харӑсах икӗ преми лауреачӗпе йӗркеленӗ пултарулӑх тӗлпулӑвӗнче (Офицер сӑввисем) кӗтетпӗр.

Премин ҫӗнӗ сезонӗ пирки калаҫӑпӑр, хутшӑнмалли условисем ҫинчен каласа парӑпӑр. Кайран вара лайӑх сӑвӑсем итлӗпӗр.

Сергей Александрович хӑйӗн ҫӗнӗ «Болит ребро, не ставшее тобой» кӗнекипе паллаштарӗ.

Ҫапла вара, Чӑваш Республикин Наци библиотекинче (Ленин пр., 15-мӗш ҫурт) юпа уйӑхӗн 7-мӗшӗнче 15:00 сехетре тӗл пулатпӑр!

Пырӑр! Интереслӗ пулӗ!

Малалла...

Кӗнеке хуплашки

Юпа уйӑхӗн 3-мӗшӗнче чӑвашcен паллӑ этнографӗ, историкӗ, философӗ, педагогӗ, ҫыравҫи, фольклорҫи, литература тӗпчевҫи, тавра пӗлӳҫи, «Чуваши Казанского Заволжья» тата «Чӑваш халӑхӗн историйӗ» монографисен, «Чӑваш халӑхӗ малалла кайӗ-и, каймӗ-ши? эссе авторӗ Гурий Иванович Комиссаров (Вантер) ҫуралнӑранпа 140 ҫул ҫитрӗ. Шӑпах ҫак кунсенче унӑн Ҫырнисен пуххин I томӗ пичетленсе тухрӗ. Ӑна Г.И. Комиссаров (Вантер) ячӗллӗ фонд кӑларнӑ, пухса хатӗрлекенсем: фонд президенчӗ В.В. Комиссаров тата истори ӑслӑлӑхӗсен кандидачӗ А.П. Леонтьев. Кӗнекене ӑсчахӑн истори, этнографи, фольклор, литература тӗпчевӗн ыйтӑвӗсемпе ҫырнӑ, Чӑваш патшалӑх гуманитари ӑслӑлӑхӗсен институчӗн Ӑслӑлӑх архивӗнче ал ҫыру халлӗн упранакан ӗҫӗсем кӗнӗ.

2023 ҫулхи юпа уйӑхӗн 6-мӗшӗнче, эрнекун, Чӑваш Республикин Наци библиотекинче (1-мӗш хут, 119-мӗш пӳлӗм) ҫӗнӗ кӗнекен хӑтлавӗ иртет. 14 сехетре пуҫланать. Йыхравлатпӑр.

Инкелӗ лару-тӑру министерстви тунӑ сӑн

Ӗнер, юпа уйӑхӗн 3-мӗшӗнче, кӑнтӑрла Муркаш районӗнчи Уйкас ялӗнче йывӑҫ ҫурт ҫунса кӗлленнӗ. Пушарнӑйсем ҫитиччен ҫулӑм ҫурта йӑлтах ярса илнӗ, тӑрри йӑтӑнса аннӑ.

Шел те, кил хуҫине ҫӑлма май килмен. Инкеклӗ лару-тӑру министерстви пӗлтернӗ тӑрӑх, 58 ҫулти арҫын ҫунса вилнӗ.

novokuznetsk.su сайтри сӑн

Елчӗк районӗнчи тӳре-шара сусӑра найм мелӗпе тара илсе пурӑннӑ пӳлӗмӗнчен кӑларса янӑ. Лешӗ сӑлтавсене пула унта нумай вӑхӑт пурӑнман, хӑйне кӑларса янине те пӗлмен. Киле таврӑннӑ та – унта урӑх ҫын.

Ҫак ӗҫе вырӑнти администраци тунӑ. Кӑларса ярасси пирки сусӑра пӗлтермен, найм килӗшӗвне те пӑрахӑҫламан. Пӳлӗмри планировкӑна урӑхлатнӑ: юнашаррипе пӗрлештернӗ те тепӗр сусӑра пурӑнма вырнаҫтарнӑ.

Прокуратура Елчӗк районӗн администрацийӗн пуҫлӑхӗ тӗлӗшпе представлени ҫырнӑ, сусӑра урӑх хӑтлӑ пӳлӗм уйӑрса пама ыйтнӑ. Суд ҫакна тивӗҫтернӗ.

Стопкоронавирус.рф сайтри сӑн

Стопкоронавирус.рф сайт пӗлтернӗ тӑрӑх, иртнӗ эрнере республикӑра 500 ытла ҫын кӑшӑлвируспа чирленӗ. Анчах ҫав вӑхӑтра ЧР Сывлӑх сыхлавӗн министерстви ку енӗпе лару-тӑру йӗркеллех пулнине пӗлтерет.

Иртнӗ эрнере 505 ҫыннӑн ҫак диагноз ҫирӗпленнӗ. Танлаштарма, ҫурла уйӑхӗн юлашки эрнинче 90 ҫын чирленӗ.

Палӑртмалла: республикӑра кӑшӑлвируспа чирлекенсем валли 60 койка хатӗрленӗ. Авӑнӑн 18-24-мӗшӗсенче пульницӑна 54 ҫынна вырттарнӑ. Иртнӗ эрнере вара 23 пациент стационара лекнӗ.

kommunarmelenki.ru сайтри сӑн

Етӗрнере пурӑнакан хӗрарӑм ҫуртсӑр, укҫасӑр тӑрса юлнӑ. Йӑлтах – ултавҫӑсене пула.

Ку пӑтӑрмах пирки полицие ҫак хӗрарӑмӑн риелторӗ каласа панӑ. 66-ри хӗрарӑм патне палламан ҫын шӑнкӑравланӑ та унӑн укҫине юттисем хапсӑнни пирки каланӑ. Хайхискер 130 пин тенкӗ кредит илсе темӗнле счет ҫине куҫарнӑ. Кун пирки никама та калама хушман – патшалӑх вӑрттӑнлӑхне пӗлтернӗшӗн яваплӑх тыттарассипе хӑратнӑ.

Тепрехинче ун патне ҫулла вӗҫӗнче шӑнкӑравланӑ. Хальхинче ӑна такам унӑн ҫуртне сутма хӑтланни пирки каланӑ. Ҫапла ан пултӑр тесен ҫурта часрах сутмалла та укҫана «хӑрушсӑр счет» ҫине куҫармалла-мӗн. Ку ӗҫе хӑвӑрт тума пулӑшакан риелторсене те сӗннӗ.

Хӗрарӑм ҫуртне сутса укҫине темӗнле счет ҫине куҫарсан палламан ҫын ҫыхӑнӑва тухма пӑрахнӑ. Ҫапла вӑл ҫуртсӑр, 1 миллиона яхӑн тенкӗсӗр юлнӑ.

rusnewshub.ru сайтри сӑн

Юпа уйӑхӗн 2-мӗшӗнче 9 сехет ҫурӑра Шупашкарти аэропорт ҫывӑхӗнче хӗр парашютпа аннӑ чухне самолет вӗҫмелли ҫул ҫине вӗҫсе аннӑ. Вӑл вӑйлӑ ҫиле пула парашюта итлеттереймен-мӗн.

Ҫав вӑхӑтра рейс самолечӗ тӳпенелле вӗҫсе хӑпарма хатӗрленнӗ. Юрать-ха, авиаци хӑрушсӑрлӑхӗн ҫыннисем хӗре вӑхӑтра пулӑшма ӗлкӗрнӗ, ӑна ҫул ҫинчен илсе кайнӑ. Унсӑрӑн вӑл хӑй парашют тыткӑнӗнчен хӑтӑлаймӗччӗ.

Ку пӑтӑрмаха пула рейспа вӗҫекен самолет темиҫе минут каярах ҫула тухнӑ.

cap.ru сӑнӳкерчӗкӗ

Шупашкар районӗнчи Ҫӗньял ялӗнче пурӑнакан Зинаида Гранцкая Ватӑсен кунӗнче, юпан 1-мӗшӗнче, 100 ҫул тултарнӑ. Ҫулне кура мар вӑр-вар вӑл - хӑнасене юрласа-ташласа кӗтсе илнӗ.

Хӑй ҫак районтах Чулкаҫ ялӗнче ҫуралса ӳснӗ, ӗмӗр тӑршшӗпе педагогикӑра ӗҫленӗ - малтан кӗҫӗн классене вӗрентнӗ, унтан - нимӗҫ чӗлхине.

Халӗ пӗр ӗмӗре парӑнтарнӑ кинемей ачисемпе, мӑнукӗсемпе, вӗсен ачисемпе савӑнса пурӑнать.