Чӑваш Ен Элтеперӗ Олег Николаев утӑ уйӑхӗнчи танлаштарӑмра 4-мӗш вырӑн йышӑннӑ. Ҫакна тӗнче тетелӗнчи запроссен йышӗпе палӑртнӑ. Олег Николаев PravdaSerm хатӗрленӗ танлаштарӑмра пӗрремӗш хут ҫакнашкал вырӑн йышӑннӑ.

Пӗрремӗш вырӑнта – Сарӑту облаҫӗн кӗпӗрнаттӑрӗ. Вӑл 94 балл пухнӑ. Иккӗмӗш вырӑнта – Тамбов облаҫӗн ертӳҫи (93 балл). Ун хыҫҫӑн Калуга облаҫӗн, Чӑваш Енӗн тата Мари Элӗн ертӳҫисем йӗркесене йышӑннӑ. Олег Алексеевич танлаштарӑмра 91 балл пухнӑ.

chuvashia.sledcom.ru сӑнӳкерчӗкӗ

Ҫӗнӗ Шупашкарта ҫамрӑк арҫынна 6 ҫулти хӗрача ҫумне ҫулӑхнӑ тесе тытса чарнӑ. Ун тӗлӗшпе пуҫиле ӗҫ пуҫарнӑ. Тӗпчевҫӗсем ҫав этем ытти чух та ҫавӑн пек хӑтланса ҫӳремен-ши тесе шанмаҫҫӗ. Арҫын усал ӗҫ тунӑран шар курнисене пӗлтерме ыйтаҫҫӗ.

РФ Следстви комитечӗн Чӑваш Енри управленийӗнче пӗлтернӗ тӑрӑх, утӑ уйӑхӗн 31-мӗшӗнче Ҫӗнӗ Шупашкарта 6 ҫулти хӗрача хӑйӗн килӗнчен инҫе мар скверта выляса ҫӳренӗ. Ҫавӑн чухне ӑна ют арҫын тӗмсем хушшине астарса чӗннӗ. Унта вӑл ача ҫумне ҫулӑхнӑ.

https://fom.ru/Kultura-i-dosug сӑнӳкерчӗкӗ

Раҫҫейре пурӑнакансенчен иккӗ-виҫҫӗмӗш пайӗ ют ҫӗршывсенче пачах та пулса курман. Ҫакна «Общественное мнение» (чӑв. Халӑх шухӑшӗ) фонд ыйтӑмӗ кӑтартса панӑ.

Ыйтӑма фонд сайтӗнче йӗркеленӗ, унта 18 ҫултан аслӑраххисем пурӗ 1,5 пин респондент хутшӑннӑ.

Ыйтӑма хутшӑннисенчен 59 проценчӗ чикӗ леш енче пулса курман. Тепӗр 9 проценчӗ ют ҫӗршыва канма 10 ҫул каярах кайнӑ. Чикӗ леш енне кайнӑранпа ҫулталӑк та ҫитменнисен хисепӗ — 2 процент. 1 ҫултан пуҫласа 3 ҫулччен кайнисен тата 5 ҫултн пуҫласа 10 ҫулччен маларах кайнисен хисепӗ — 6-шар процент.

journ.chuvsu.ru сӑнӳкерчӗкӗ

Чӑваш Енӗн Цифра аталанӑвӗн, информаци политикин таиа массӑллӑ коммуникацисен министерствинче кадр улшӑнӑвӗ пулса иртнӗ.

Паян, ҫурла уйӑхӗн 4-мӗшӗнче, министр ҫумне Юлия Стройковӑна ӗҫрен кӑларнӑ. Документа республика ертӳҫи Олег Николаев алӑ пуснӑ.

Юлия Стройкова министр заместителӗн пуканне 2015 ҫулхи ҫӗртме уйӑхӗн пуҫламӑшӗнче йышӑннӑччӗ.

Стопкоронавирус.рф сайтри сӑн

Утӑ уйӑхӗн 9-мӗшӗнченпе Чӑваш Енре кӑшӑлвирусран пӗр ҫын та вилмен. Стопкоронавирус.рф пӗлтернӗ тӑрӑх, юлашки талӑкра вара республикӑри 1 ҫыннӑн ҫак инфекцие пула пурнӑҫран уйрӑлнӑ. Пӗтӗмпе утӑ уйӑхӗнче 3 ҫын кӑшӑлвируса пула вилнӗ, ҫӗртмере – 13. Пандеми пуҫланнӑранпа республикӑра 4654 ҫын ҫак чирпе нушаланса пурнӑҫран уйрӑлнӑ.

Иртнӗ талӑкра 54 ҫын сывалнӑ, 15 ҫынна пульницӑна вырттарнӑ. Ку таранччен 82,4 пин ытла чирленӗ. Вӗсенчен 77,3 пинӗшӗ сывалнӑ. Ку 93,8 процентпа танлашать.

Инкеклӗ лару-тӑру министерстви тунӑ сӑн

Ӗнер каҫхи 6 сехет ҫурӑра Патӑрьел районӗнчи Сӑкӑт ялӗ ҫывӑхӗнче AGROS 530 маркӑллӑ комбайн ҫунса кайнӑ. Вӑл 2008 ҫулта туса кӑларнӑскер пулнӑ. Кун пирки Инкеклӗ лару-тӑру министерстви пӗлтерет.

Шел те, комбайн тӗппипех ҫунса кайнӑ. Малтанлӑха палӑртнӑ тӑрӑх, техника электрохатӗр тӗрӗс ӗҫлеменнине пула ҫунма пуҫланӑ.

Чантӑрта пурӑнакансем хӑйсене канӑҫсӑрлантаракан ыйтӑвӑн уҫҫи-хуппине тупас тесе Мускав районӗн администрацийӗнчен пулӑшу ыйтнӑ. Вӗсен шухӑшӗпе, ялти масар ҫинче ют ҫынсене пытараҫҫӗ.

Ҫак кунсенче Чантӑра Мускав район администрацийӗн пуҫлӑхӗ Сергей Ильин тата ытти тӳре-шара ҫите килнӗ. Ҫав шутра – ҫынсене пытарма пулӑшакан бюро пуҫлӑхӗ те.

Пухура регламента пӑхса тухма, ялти масар ҫине пытарас йӗркене тишкерме йышӑннӑ. Ӑна халӑхпа ҫирӗплетӗҫ.

Чантӑрта чӑнах та ют ҫынсене пытарнӑ-ши вара? Администраци хатӗрленӗ пресс-релизран ҫакӑ паллӑ мар.

Ваттисен йӑлине пӑхӑнасси паянхи кун темле кивӗ, ниме тӑман, юрӑхсӑр япала шутланать тесен йӑнӑшмастӑп пуль. Паянхи кун пирӗн пурнӑҫра компьютер-смартфон таврашӗпе тивӗҫлӗ шайра усӑ курма пӗлесси хисепленет, модӑпа тан пыни тата ытти те. Пирӗн мӑн асаттесем пире хӑварнӑ йӑласем вара манӑҫа тухаҫҫӗ.

Ваттисен йӑли

Ваттисен йӑли тенӗ чухне пӗр енчен хамӑр авалхи тӗн пирки калама пулать (тепӗр тесен, йӑла-йӗрке унта самай вырӑн йышӑннӑ), тепӗр енчен вӑл йӑласем нимӗнле тӗнпе те ҫыхӑнмаҫҫӗ. Калӑпӑр, хӑнана кайнӑ май (ахаль кӗрсе тухнӑ чухне те!) мӗнле те пулин парне илсе каяссине православи тӗнне, е ислам тӗнне йышӑннӑшӑнах пӑрахмалла-и? Ҫук-ҫке. Тӗнпе ӗненӳ вӑл пӗр япала, ваттисен йӑли — тепӗр япала.

Ваттисен йӑли шутне эп, сӑмахран, хӑнана кайнӑ чухне парнепе кайнине, сӗтел хушшине ларнӑ май чи малтан ватӑ ҫынна сӑмах панине, сӗтел пуҫне чи сумлӑ ҫынна (ҫак вырӑна ачасене лартнине пӗрре мар куратӑп!) лартнине тата ытти ҫавнашкал манӑҫа тухса пыракан йӑлана кӗртетӗп.

Хамӑрӑн чӑваш чӗлхипе кулленхи пурнӑҫра сахалрах та сахалрах усӑ курнишӗн эпир пӑшӑрханатпӑр пулсан, ку тӗлӗшпе кӑшт та пулин ӗҫсем тӑватпӑр пулсан, ваттисен йӑли-йӗрки пирки пушшех те маннӑ теме пулать.

Малалла...

Ҫӗнӗ Шупашкарти 14-мӗш шкулта ӑс пухакан Анастасия Жукова Инкеклӗ лару-тӑру министерстви пушарпа ҫӑлав спорчӗ енӗпе ирттернӗ Пӗтӗм Раҫҫейри турнирта ылтӑн медаль ҫӗнсе илнӗ.

Тупӑшу Ӗренпурта ҫурла уйӑхӗн 2-мӗшӗнче пуҫланнӑ. Пирӗн ентеш 17-18 ҫулсенчи ҫамрӑксен йышӗнче ӑмӑртнӑ, штурм пусмипе хӑпарнӑ. Палӑртма кӑмӑллӑ: Настя юлашки 5 ҫулта кунашкал ӑмӑртусенче пӗрре мар ҫӗнтернӗ.

Сӑмах май, Пӗтӗм Раҫҫейри турнира 23 регионти чи вӑйлӑ атлетсем хутшӑннӑ.

capella21.ru сӑнӳкерчӗкӗ

Морис Яклашкин дирижёр паян, ҫурла уйӑхӗн 4-мӗшӗнче, 75 ҫул тултарать. Вӑл Чӑваш патшалӑх академи симфони капеллин дирижёрӗнче ӗҫлет.

Морис Николаевич Тӑвай районӗнчи Чутей ялӗнче ҫуралнӑ. Канашри педагогика училищинче, И.Я. Яковлев ячӗллӗ Чӑваш патшалӑх педагогика институчӗн музыкӑпа педагогика факультетӗнче, Горький хулинчи М.И.Глинка ячӗллӗ патшалӑх консерваторийӗн дирижерпа хор факультетӗнче вӗреннӗ.

«Тутарсен симфони оркестрӗ пур. Эпир мӗнпе кая текен шухӑш Чӑваш патшалӑх телерадиокомпани хорӗнче ӗҫленӗ чухнех мана канӑҫ памастчӗ. Моцарт, Бах, Чайковский, Рахманинов, Римский-Корсаков тата ытти классик хайлавӗсене юрлаймастӑмӑрччӗ. 2000 ҫулта республика правительствине симфони оркестрӗ йӗркелеме пулӑшма ыйтрӑм. Пулӑшрӗҫ», — аса илнӗ вӑл интервьюсенчен пӗринче.

Морис Яклашкин — Чӑваш АССРӑн тава тивӗҫлӗ ӳнер ӗҫченӗ, Раҫҫейӗн тава тивӗҫлӗ ӳнер ӗҫченӗ, Чӑваш Республикин хисеплӗ ҫынни.