Pixabay.com сӑнӳкерчӗкӗ

Чӑваш Енре шӑпарлан саккӑрмӗш хутран ӳксе чӗрӗ юлнӑ.

Инкек Ҫӗнӗ Шупашкарта ҫурла уйӑхӗн 1-мӗшӗнче пулса иртнӗ. Ҫӳллӗ хутран персе аннӑ ачана ҫийӗнчех больницӑна илсе кайнӑ.

Хӗрача 10-мӗш пиллӗкҫуллӑх урамӗнчи 5-мӗш ҫурт чӳречинчен тухса ӳкнӗ. Пӗчӗкскер кипкепе ҫуралнӑ тейӗн – вӑл вилмен. Анчах хытах аманнӑ. Халӗ ача реанимацире выртать.

Инкек сӑлтавне пӗлместпӗр те, анчах ҫулла пӗчӗк ачасем уҫӑ чӳречерен тухса ӳкнӗ тӗслӗхсем пулкалани вӑрттӑнлӑх мар. Ҫавӑнпа та аслисен питӗ тимлӗ пулмалла.

«На связи» сӑнӳкерчӗкӗ

Шупашкарти строительство тата хула хуҫалӑхӗн техникумӗнче ӗҫленӗ хӗрарӑм тӗлӗшпе пуҫиле ӗҫ пуҫарнӑ. Вӑл ӗҫ вырӑнӗпе усӑ курнӑ тесе шутлаҫҫӗ.

Следстви палӑртнӑ тӑрӑх, хушма пӗлӳ паракан уйрӑмӑн заведующийӗ кӑшӑлвирусран шар курнӑ ҫынсене професси пӗлӗвӗ памалла пулнӑ. Ҫакна федераци хыснинчен уйӑрнӑ грант укҫипе пурнӑҫламалла пулнӑ.

Анчах 2020 ҫулхи юпа-раштав уйӑхӗсенче вӑл ӗҫленӗ пекки ҫеҫ тунӑ. Ун патӗнче вӗренекен ҫынсем чӑннипе унта ӑс пухман та. Ҫапла вӑл Раҫҫей хыснине 147 пин тенкӗлӗх тӑкак кӳнӗ.

Шупашкарти ӳнер училищин директорне Владимир Ануфиева «Чӑваш Республикин культурӑн тава тивӗҫлӗ ӗҫченӗ» ят панӑ.

Владимир Николаевич Шупашкарти ӳнер училищинче (техникумӗнче) 2009 ҫулхи ҫурла уйӑхӗнченпе ӗҫлет. Чӑваш Енӗн культура отраслӗ валли кадрсем хатӗрлессипе чӗрӗк ӗмӗр ытла тӑрӑшать. Вӑл туптанӑ кадрсем Шупашкарти Акцыновсен ячӗллӗ ача-пӑча ӳнер шкулӗнче, Шупашкарти 30-мӗш вӑтам шкулта тата Шупашкарти ӳнер училищинче ӗҫлеҫҫӗ.

Владимир Николаевича ӗҫтешӗсем пысӑк пултаруллӑ тата пурнӑҫпа тан утакан ертӳҫӗ тесе хаклаҫҫӗ.

Тинӗс-ҫар флотӗнче хӗсметре тӑнисен энциклопедийӗ. t.me/nikamran каналтан илнӗ сӑнӳкерчӗк

Ӗнер, утӑ уйӑхӗн 31-мӗшӗнче, пирӗн ҫӗршывра Тинӗс-ҫар флочӗн кунне паллӑ турӗҫ. Ҫав ятпа темиҫе ялта палӑк уҫнӑ.

Канаш районӗнчи Вӑтапуҫ ял тӑрӑхӗнче Тинӗс-ҫар флотӗнче хӗсметре тӑнӑ ентешсене асӑнса палӑк лартнӑ.

Канаш районӗнчи Ухманта вара Раҫҫей морякӗсене асӑнса палӑк уҫнӑ. Елчӗк районӗнчи Аслӑ Елчӗкре Тинӗс Ҫар флотӗнче хӗсметре тӑнисен ячӗпе палӑк уҫнӑ.

Патӑрьелсем Тинӗс-ҫар Флотӗнче хӗсметре тӑнисен энциклопедине пичетленӗ.

forum.na-svyazi.ru сӑнӳкерчӗкӗ

Шупашкар хула администрацийӗн ҫурт-йӗрпе коммуналлӑ хуҫалӑх тата хӑтлӑх кӗртекен управленийӗнче ҫӗнӗ директора ҫирӗплетнӗ. Унчченхи пуҫлӑх пӗр-ик кун тимленӗ те пӗр вӑхӑт больница хучӗпе ларнӑ, унтан пӑрахса кайнӑ.

Управлени пуҫлӑхӗ пулма халӗ Павел Чернышева шаннӑ. Вӑл кӑҫалхи нарӑс уйӑхӗнченпе асӑннӑ тытӑмра директор ҫумӗ, тӗп инженер пулса тӑрӑшнӑ. Унчен тӑватӑ ҫул Шупашкар хула адмнистрацийӗн Калинин район администрацийӗнче, Ҫӗнӗ Шупашкар тата Шупашкар хулисен администрацийӗсенче тӑрӑшнӑ.

cap.ru сӑнӳкерчӗкӗ. Канашлури самант

Иртнӗ тунтикун республикӑра пӗр талӑкра 24 ҫын кӑшӑлвируспа чирленӗ пулсан паян – 60. Инфекциленнисен йышӗ ӳссе пырать. Ҫак ыйтӑва паян Правительство ҫуртӗнче иртнӗ канашлура сӳтсе явнӑ.

ЧР сывлӑх сыхлавӗн министрӗ Владимир Степанов ҫакна отпускран, куртортран, таврӑнакансен йышӗ пысӑкланнипе ҫыхӑнтарать. Уйрӑмах – Краснодартан тата Крымран.

Ведомство пӗлтернӗ тӑрӑх, авӑн уйӑхӗнче кӑшӑлвирус ҫӗнӗ вӑйпа сарӑлма тытӑнас хӑрушлӑх пур. Кунсӑр пуҫне яланхи ытти инфекци чирӗсем те йӑл илӗҫ. Министр прививка тумашкӑн вакцина ҫителӗклине пӗлтернӗ. Хальлӗхе 674 доза пур. Вакцинациленекенсен йышӗ нумай пулсан татах кӳрсе килӗҫ. Ревакцинаци тума «Спутник Лайт» каять.

Сӑмах май, халӗ республикӑра коллектив иммунитечӗ 11,5 процентпа танлашать.

ryazan-news.net сайтри сӑн

Паян Шупашкарта нумай хутлӑ ҫурт ҫывӑхӗнче хӗрарӑм виллине тупнӑ. Вӑл ҫӳллӗшӗнчен ӳкни паллӑ. Шел те, вилмеллех.

Ку ирхи 7 сехет те 20 минутра пулнӑ. «Про Город» хаҫата халӑх корреспонденчӗ пӗлтернӗ тӑрӑх, хӗрарӑм Таллеров урамӗнчи 26-мӗш ҫуртӑн 15-мӗш хутӗнчен ӳкнӗ.

Халӗ Следстви комитечӗн Чӑваш Енри следстви органӗсем ӗҫ-пуҫа уҫӑмлатаҫҫӗ. Аса илтерер: нумаях пулмасть ҫӗнӗ кӑнтӑр районӗнче хӗрарӑм 10-мӗш хутран ӳксе чӗрӗ юлни пирки пӗлтернӗччӗ.

Елчӗк районӗнчи Чӑваш Тӑрӑмӗ ялӗнчи ҫынсен пӗр вӑхӑт шывсӑр пурӑнма тивет. Унта шыв башни персе аннӑ.

Ял пӗчӗкех мар. Унта 172 хуҫалӑхра 413 ҫын пурӑнать. Ял ҫыннисем каланӑ тӑрӑх, халӗ ирхине тата каҫхине ҫеҫ шыв ӑсса юлма пулать. Ун чухне шыва 10 минутлӑха ҫеҫ яраҫҫӗ. Чылайӑшӗн витре йӑтса ҫӑлкуҫ патне утма тивет.

cap.ru сӑнӳкерчӗкӗ

Шупашкарта ҫурла уйӑхӗн 2-5-мӗшӗсенче ҫӑмӑл атлетика енӗпе Пӗтӗм Раҫҫейри чемпионат иртет. Ӑна ыран саванӑҫлӑ лару-тӑрура 15 сехет ҫурӑра уҫӗҫ.

Ӑмӑртусем 15 пин ҫын вырнаҫакан «Олимпийский» стадионта иртӗҫ. Чемпионата курмашкӑн лекеймесен те кулянмалла мар. Ӑна федераци спорт каналӗсемпе онлайн мелпе кӑтартсах тӑрӗҫ.

Сӑмах май, кун пек чемпионат Шупашкарта 2016 ҫулта иртнӗ. Ун чухне ӑмӑртусене Олимп чемпионки Елена Исимбаева килнӗччӗ.

ridus.ru сӑнӳкерчӗкӗ

Чӑваш Республикин Шыравпа ҫӑлав службин специалисчӗсен темле лару-тӑрӑва лекнӗ ҫынсене те пулӑшма тивет. Тепӗр чухне килти чӗрчунсене те ҫӑлавҫӑсем пулӑшни кирлӗ пулса тухать.

Утӑ уйӑхӗн 29-мӗшӗнче Шупашкарти Трактор тӑвакансен проспектӗнчи пӗр ҫуртра пурӑнакансем ванна пӳлӗмӗнче кушак джакузи айне кӗрсе кайнине пӑлханса пӗлтернӗ. Мӗнтарӑн чӗрчунӗ каялла тухасшӑн иккен, анчах пултараймасть.

Ҫӑлавҫӑсем кушака пулӑшма тухса кайнӑ. Джакузи айӗнчен туртса кӑларнӑ кушак хӑй ҫӑлӑннишӗн питех те савӑннӑ тесе ӗнентереҫҫӗ ҫӑлавҫӑсем.