ЧР экономика аталанӑвӗн экс-министрӗ Владимир Аврелькин тӗрмере ларать. Ҫулталӑк пусламӑшӗнче суд ӑна унта 4,5 ҫуллӑха ӑсатма йышӑннӑ. Кӗҫех, ултӑ кунран, ун тӗлӗшпе каллех суд пулмалла. Юпа уйӑхӗн 9-мӗшӗнче каллех приговор вулӗҫ.
Аса илтерер: Владимир Аврелькина дожноҫпе усӑ курнӑшӑн айӑпланӑ. Аврелькинпа пӗрле ҫак ӗҫе тунӑ икӗ ҫын тата строительство фирмин пуҫлӑхӗ те явап тытаҫҫӗ.
Экс-министр патшалӑх субсидийӗсем пама посредниксем урлӑ икӗ миллион тенкӗ ыйтса илнӗ. Тата пӗр миллион тенкине ҫав строительство организацийӗнченех тепӗр тӳре-шарана памалле тесе илнӗ. Анчах ҫакна тума хатӗрленмен те вӑл.
Кӑҫалхи пуш уйӑхӗн 4-мӗшнче республикӑн экономика министрӗн ҫумӗн тивӗҫӗсене пурнӑҫлама Олег Молякова шаннине Чӑваш халӑх сайчӗ пӗлтернӗччӗ. Аса илтерер: вӑл — «Тӗрӗслӗхшӗн Раҫҫей» партире тӑракан Игорь Моляков депутатӑн пӗртӑванӗ. Олег Моляков 55 ҫулта. Вӑл 1993 ҫултан пуҫласа 2002 ҫулччен ЧР экономика министрӗн ҫумӗнче ӗҫленӗ, унтан Патшалӑх Думин депутачӗ пулнӑ. 2010 ҫул пуҫламӑшӗнче «РУКС» предприятире те ӗҫленӗ.
Ӗнер Олег Молякова министр ҫумӗнчен хӑтарма йышӑннӑ. Ӗнерех ӑна Чӑваш Ен Элтеперӗн Олег Николаевӑн пулӑшуҫи пулма ҫирӗплетнӗ.
Паян Чӑваш Ене РФ премьер-министрӗ Михаил Мишустин вӗҫсе килнӗ. Вырӑнти оппозиционер Юрий Шакеев федераци шайӗнчи тӳре-шара хӑйне тимлӗх уйӑртӑр тесе машинисене Правительство ҫурчӗ умне килсе лартнӑ. ГАЗельсенчен пӗрин ҫине Шупашкар сити-менеджерӗ тӗлӗшпе ҫырни пур.
«Про Город» хаҫат Юрий Шакеевпа ҫыхӑнса вӑл ҫакна мӗншӗн тунипе кӑсӑкланнӑ. «Манӑн суйлавпа ҫыхӑннӑ пӑтӑрмахсене палӑртас килет. Вӑл иртнӗ чухне йӗркене пӑснӑ тӗслӗхсем пулнӑ. Ача пахчисемпе, шкулсемпе, Китай экспансийӗпе ҫыхӑннӑ ыйтусем те пур тата», - тенӗ оппозиционер.
13 сехет те 10 минутра Шакеевӑн машинисене ятарлӑ техникӑпа тата троспа ҫул ҫинчен илсе кайма хӑтланнӑ.
ЧР Элтеперӗ Олег Николаев патшалӑх закупкисене тӗрӗслесе тӑракан пулӑшуҫа палӑртнӑ. Ку тивӗҫе «Раҫҫей патриочӗсем» политика партийӗн регионти уйрӑмӗн лидерӗ, Тӗп суйлав комиссийӗн пайташӗ, Халӑх фрончӗн регионти штабӗн муниципалитет закупкисене тӗрӗслесе тӑракан ушкӑнӑн координаторӗ Владислав Солдатов пурнӑҫлӗ.
Палӑртмалла: вӑл Олег Николаевӑн улттӑмӗш пулӑшуҫи пулса тӑнӑ. Владислав Солдатов штат должноҫӗнче ӗҫлӗ.
Владислав Солдатов малтан ШӖМре ӗҫленӗ, унтан темиҫе ҫӗрте тӑрӑшнӑ. 2005 ҫултанпа «Раҫҫей патриочӗсем» политика партийӗн регионти уйрӑмне ертсе пырать, 2015 ҫултана Халӑх фрончӗн регионти штабӗн пайташӗ.
Чӑваш Енри 13 район тата хула администрацийӗсен ертӳҫисене отставкӑна янӑ. Ҫӗнӗ Шупашкар тата Канаш хулисен сити-менеджерӗсене ӗҫрен кӑларнӑ. Ку контракт вӗҫленнипе ҫыхӑннӑ.
Улатӑр, Элӗк, Патӑрьел, Йӗпреҫ, Канаш, Комсомольски, Муркаш, Пӑрачкав, Ҫӗмӗрле, Елчӗк, Тӑвай район администрацийӗсен пуҫлӑхӗсене отставкӑна янӑ. Хальлӗхе вӗсен тивӗҫӗсене ҫумӗсем пурнӑҫлаҫҫӗ.
Сӑмах май, Шупашкар хула администрацийӗн пуҫлӑхӗн Алексей Ладыковӑн та контракт вӗҫленсе пырать. Ӑна та кӗҫех отставкӑна ярӗҫ.
Авӑн уйӑхӗн 29-мӗшӗнче Чӑваш Ене РФ премьер-министрӗ Михаил Мишустин килме палӑртнӑ. Тӳрех каламалла: премьер-министр ку статуса йышӑннӑранпа пирӗн патра пулман.
Малтанлӑха пӗлтернӗ тӑрӑх, Михаил Мишустина социаллӑ экономика аталанӑвӗн комплекслӑ программипе паллаштарӗҫ. Хальлӗхе прмьер-министр республикӑри хӑш вырӑна ҫитессине татӑклӑн калама ҫук, мӗншӗн тесен программа улшӑнсах тӑрать. Малтан ӑна И.Н.Ульянов ячӗллӗ ЧРУна, Индустри паркне кӑтартма палӑртнӑ, кайран ку шухӑша пӑрахӑҫланӑ.
Хальлӗхе программа ҫапларах: Михаил Мишустин В.И.Чапаев ячӗллӗ савутра тата «Текстильмашра» пулӗ.
Чӑваш Енри ҫар комиссариатне малашне ҫӗнӗ ҫын ертсе пырӗ. Ку пукана Бахтиёр Холиков йышӑннӑ. «Пӗтӗмӗшле илсен, Чӑваш Республикин ҫар комиссариачӗн йӑли-йӗрки тарӑн. Эсир лайӑх еткерлӗх илетӗр, сире ӑнӑҫу сунатӑп», - тенӗ ЧР Элтеперӗ Олег Николаев ҫӗнӗ пуҫлӑха. Бахтиёр Холиков республикӑшӑн тӑрӑшма шантарнӑ.
Палӑртмалла: Бахтиёр Холикова РФ хӳтӗлев министрӗ Чӑваш Енӗн ҫар комиссариачӗн пуҫлӑхне лартасси пирки утӑ уйӑхӗн 15-мӗшӗнче алӑ пуснӑ, хӑйӗн тивӗҫӗсене авӑн уйӑхӗн 23-мӗшӗнче пурнӑҫлама тытӑннӑ.
Унччен Чӑваш Республикин ҫар комиссариатне Александр Мокрушин ертсе пынӑ.
Сӗнтӗрвӑрри районӗн администрацине ҫӗнӗ ҫын ертсе пыма тытӑнӗ. Ку должноҫе Владимир Мустаев йышӑннӑ. Конкурса Сӗнтӗрвӑрри районӗн депутачӗсен пухӑвӗнче пӗтӗмлетнӗ.
Палӑртмалла: кӑҫал ҫӗртме уйӑхӗнче Анатолий Мясников район администрацине ертсе пыма пӑрахнӑ. Вӑл ку должноҫе 4 ҫул йышӑннӑ.
Депутатсем пухура Владимир Мустаева ҫиччӗмӗш созыври район пухӑвӗн полномочийӗсем вӗҫлениччен контрактпа ӗҫлеттерме йышӑннӑ.
Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев Федераци Канашӗнче Чӑваш Енрен кам пулассине пӗлтернӗ тесе Чӑваш халӑх сайчӗ унчченех хыпарланӑччӗ. Ку вырӑнта Николай Федоровах юлать тенӗччӗ ун чухне.
Аса илтерер: регион Элтеперне суйланакан кашни кандидат суйлав кампанийӗ вӑхӑтӗнче сенатор должноҫӗ валли виҫӗ кандидат тӑратать, ҫӗнтерсен вӗсенчен пӗрне суйлать. Олег Николаев Федераци Канашӗн вице-спикерне Николай Федорова, «Пӗрлӗхлӗ Раҫҫей» партин Чӑваш Енри уйрӑмӗн ертӳҫине Алена Аршиновӑна, Раҫҫей Геройне Николай Гаврилова тӑратнӑччӗ. Паян Олег Николаев Элтепер должноҫне йышӑннӑ хыҫҫӑн темиҫе хушу кӑларнӑ. Вӗсенчен пӗринпе вӑл Николай Федорова сенатор портфельне пама йышӑннӑ.
Паян Чӑваш Ен Правительствине отставкӑна янӑ. Ҫакӑн пек хушӑва республикӑн Элтеперӗ Олег Николаев должноҫе йышӑннӑ хыҫҫӑн алӑ пуснӑ. Ӗҫлӗ хута республикӑн влаҫ органӗсен официаллӑ порталӗнче вырнаҫтарнӑ.
Тӳрех палӑртар: асӑннӑ йышӑнӑва Чӑваш Ен Конституцийӗн 72-мӗш тата 91-мӗш статийӗсемпе килӗшӳллӗн тунӑ. Тепӗр майлӑ каласан, Элтепер должноҫне йышӑнсан Правительствӑна отставкӑна ямалла. Ӑна ҫӗнӗрен йӗркеличчен унчченхи йышӑн малтанхиллех ӗҫлемелле.
Паянах Олег Николаев тепӗр хушӑва та алӑ пуснӑ. ЧР Министрсен Кабинечӗн Ертӳҫи пулма вӑл хӑйне ҫирӗплетнӗ.
-12.7 °C