РФ Следстви комитечӗн Чӑваш Енри управленийӗн ӗҫченӗсем республикӑра вырнаҫнӑ колонисенчен пӗринче тӑрӑшакан ҫынсен тӗлӗшпе пуҫиле ӗҫ пуҫарнӑ.
Юсанмалли 1-мӗш колонин ӗҫе хӑнӑхмалли центрӗнче тӑрӑшакан икӗ ҫынна ӗҫ вырӑнӗпе усӑ курнӑ тесе шанмаҫҫӗ.
Тӗпчевҫӗсем шухӑшланӑ тӑрӑх, пӑтӑрмах кӑҫалхи пуш уйӑхӗнчен пуҫласа авӑн уйӑхӗччен пулса иртнӗ. Маларах асӑннӑ икӗ ӗҫчен колонире айӑплав вӑхӑтне ирттерекенсене ӗҫе хӑнӑхтармалли центрта ертсе пыракан должноҫсене йышӑннӑ. Подразделенире ҫӗвӗ ӗҫӗшӗн тата хатӗр продукци пахалӑхӗшӗн яваплӑскерсем ҫӗвӗ цехӗнче ӗҫлекенсенчен пӗринчен штраф изоляторне хурса хурассипе хӑратса укҫа тапӑннӑ. «Кӗмӗле» вӗсем заказчик продукцие йышӑнмасан транспорт тӑкакӗшӗн пама ыйтнӑ.
Колонире айӑплава ирттерекен ҫын, чӑн та, хӑранӑ. Вӑл хӑйӗн пӗлӗшӗсем тата тӑванӗсем урлӑ асӑннӑ ҫынсене пурӗ 27 пин тенкӗ куҫарса панӑ.
Пӑтӑрмаха РФ Следстви комитечӗн Чӑваш Енри управленийӗн ӗҫченӗсемпе Федерацин хӑрушсӑрлӑх службин республикӑри управленийӗн ӗҫченӗсем пӗрле пулса тупса палӑртнӑ.
Шупашкар хулин тӗп архитекторӗ Вениамин Мамуткин ҫурла уйӑхӗн 31-мӗшӗнче ӗҫлеме пӑрахассине эпир унччен пӗлтернӗччӗ-ха. Аса илтерер: 60 ҫулти Вениамин Мамуткин хула администрацийӗн архитектурӑпа хула строительствин управленийӗн пуҫлӑхӗн ҫумӗнче – хулан тӗп архитекторӗнче 2014 ҫултанпа ӗҫленӗ.
Утӑ уйӑхӗн 1-мӗшӗнче Шупашкарта пурӑнакан пӗр ҫын хӑйӗн ҫурчӗн почта адресне кӑтартма ыйтса хула администрацийӗн архитектурӑпа хула строительствин управленине ҫырупа тухнӑ. Ҫав справка хайхине тепӗр учреждение пама кирлӗ пулнӑ. Арҫын кӑштахран Венамин Мамуткин алӑ пуснӑ хурава илнӗ. Анчах вӑл хурав тивӗҫлӗскер пулман.
Ҫавӑншӑн прокуратура управлени пуҫлӑхӗ тӗлӗшпе административлӑ ӗҫ пуҫарнӑ, иртнӗ уйӑх вӗҫӗнче надзор органӗ суда ҫитнӗ. Пуҫлӑх пулнӑ ҫынна суд 5 пин тенкӗ штраф хурса пама йышӑннӑ.
Улатӑрта ют ҫӗршыв ҫыннисем ӗҫленине тупса палӑртнӑ. Вӗсем хулари Горшенин урамӗнче брусчатка сарнӑ.
Ют ҫӗршыв ҫыннисем тимленине Шалти ӗҫсен министерствин Улатӑрти пайӗн миграци ыйтӑвӗсемпе ӗҫлекен уйрӑмӗн ӗҫченӗсем асӑрханӑ. Ютран килнисен ӗҫлеме юрать-ха, анчах малтан ятарлӑ ирӗк (е патент) илмелле. Хайхисен ун пек хутсем пулман.
Ҫавӑ саккуна административлӑ майпа пӑсни пулать. Брусчатка саракансенчен кашнинех 2-шер пин тенкӗ штраф хурса панӑ. Ют ҫӗршыв ҫыннисене ӗҫлеттернӗ организаци (вӑл — кӳршӗллӗ регионта регистрациленнӗскер) тӗлӗшпе те протоколсем ҫырнӑ. Ӗҫе суда ярса панӑ. Саккуна пӑснӑ организацие 250 пин тенкӗрен пуҫласа 800 пин тенкӗ таран штрафлама е предприяти ӗҫне 90 кун таранлӑха чарса хума май юрать.
Йӗпреҫ районӗнчи суд 54 ҫулти хӗрарӑм тӗлӗшпе приговор вуланӑ. Ӑна РФ Пуҫиле кодексӗн 158-мӗш статйин 3-мӗш пайӗн «г» пункчӗпе явап тытарма йышӑннӑ. Ку статьяпа банк счёчӗ ҫинчен укҫа вӑрлакансене айӑплаҫҫӗ.
Суд палӑртнӑ тӑрӑх, пӗр арҫын хӑйӗн банк карттине паллакан хӗрарӑма упрама тесе тыттарнӑ. Анчах ку вӑл качакана купӑста хураллама хушнӑ пекрех пулса тухнӑ. Лешӗ вӑрланӑшӑн судпа темиҫе хутчен те айӑпланнӑ хӗрарӑм пулнӑ.
Ҫавскер банк карттин пин-кодне пӗлнӗрен банкоматра 5 пин тенкӗ укҫана илнӗ. Хӗрарӑма суд 10 пин тенкӗ штраф хурса панӑ.
Ҫӗмӗрлере пурӑнакан 65 ҫулти арҫын ҫынна пӑшалпа персе вӗлернӗ. Ҫитес 7 ҫула унӑн ҫирӗп режимлӑ колонире ирттерме тивӗ.
Пӑтӑрмах пӗлтӗрхи ҫурла уйӑхӗнче пулса иртнӗ. Арҫын патӗнче 50 ҫулти пӗлӗшӗ хӑналаннӑ. Иккӗшӗ хушшинче ӑнланманлӑх сиксе тухнӑ. Ӳсӗр кил хуҫи хӑнана «Сайга-12» сунар пӑшалӗпе уринчен кӗрӗслеттернӗ. Сурана пула лешӗ кӑштахран вилсе кайнӑ.
Пӑтӑрмаха пытарас тесе арҫын вилене кавирпе чӗркенӗ те машина ҫине хурса ҫывӑхри вӑрмана илсе кайнӑ. Анчах унта ӑна пӗр хӗрарӑм асӑрханӑ.
Шупашкар хулинчи К. Маркс урамӗнче пурӑнакан пӗр мӑшӑр эрех ӗҫме, сыпса лартсан шавлама юратнӑ. Кӳрши тарӑхса ҫитнӗ курӑнать — йӗрке хуралҫисене евитленӗ. Ҫакӑншӑн лешсем хытах кӳренсе лартнӑ, тавӑрма шухӑшланӑ.
46 тата 40 ҫулти упӑшкипе арӑмӗ полицие пӗлтерекене нумай хваттерлӗ ҫурт домофонӗ витӗр тата кил хуҫин хваттер алӑкӗ патне пырса усал сӑмах каласа вӑрҫнӑ. Кил хуҫи арҫынни ҫухалса кайман — диктофон ҫине ҫырса илнӗ.
Кайран арҫын прокуратурӑран пулӑшу ыйтнӑ. Прокуратура тӗрӗслевӗ тӑрӑх арӑмӗпе упӑшки тӗлӗшпе административлӑ ӗҫ пуҫарнӑ, суд вӗсене 3-шер пин тенкӗшер штраф хурса панӑ.
Ставрополь тӑрӑхӗнчи арҫын Чӑваш Енри следстви изоляторӗсенчен пӗринче «паттӑрланнӑ». Пӑтӑрмах кӑҫалхи кӑрлач уйӑхӗнче Ҫӗрпри 2-мӗш следстви изоляторӗнче пулса иртнӗ.
Унччен судпа темиҫе хутчен те айӑпланнӑ (ҫав шутра ҫынна вӗлернӗрен те тӗрмере ларнӑ) арҫын юсанмалли учрежденире кутӑнлашма тытӑнса кайнӑ. Урайӗнчи йывӑҫ плинтуса сӳтсе илнӗ, видеосӑнав камерине хутпа хупласа хунӑ.
Изоляторта ӗҫлекен ҫын асӑрхаттарсан вӑл тарӑхса кайнӑ, усал сӑмахпа перкелешнӗ, плинтуспа йӗрке хуралҫи ҫине пенӗ, унтан ӑна ҫапнӑ.
Суд арҫынна виҫӗ ҫуллӑха ирӗкрен хӑтарма йышӑннӑ. Ҫапла вара Ставрополь тӑрӑхӗнчи арҫыннӑн айӑплав вӑхӑчӗ пӗтӗмӗшле 12 ҫулпа танлашӗ.
Вӑрнар районӗнче пурӑнакан пӗр хӗрарӑм суд приставӗсенчен утарта пытаннӑ. Унта вӑл пӗрле пурӑнакан арҫын патӗнче пулнӑ. 1975 ҫулта ҫуралнӑскер ҫул ҫитмен ачи умӗнче 350 пин тенкӗ парӑм пухса тултарнӑ.
Ҫӗртме уйӑхӗн пуҫламӑшӗнче Вӑрнар районӗнчи суд ӑнман амӑшне ҫур ҫул ӗҫлеметтерме йышӑннӑ. Хӗрарӑм икӗ кун ӗҫленӗ те ҫухалнӑ. Айӑплава пурнӑҫа кӗртекен федераци службин управленийӗн ӗҫченӗсем суда айӑплав мелне ылмаштарма ыйтса хутпа тухнӑ. Черетлӗ ларӑва хӗрарӑм пыман, йышӑнӑва куҫӑн мар мелпе кӑларнӑ.
Хӗрарӑм Вӑрнар районӗнчи Оттикӑвӑ ялӗнчен 15 ухрӑмра вырнаҫнӑ утарта пытанса пурӑннӑ. Унта машина ҫитме май ҫукран шанчӑклӑ вырӑн тесе шухӑшланӑ-тӑр. Анчах приставсем шыраса тупса пӗр кунхине ирех пырса кӗнӗ. Хӗрарӑма 1 уйӑх та 13 кунлӑха колони-поселение ӑсатнӑ.
Ҫӗнӗ Шупашкарти нумай хваттерлӗ ҫуртсенчен пӗринче, Совет урамӗнчи 14-мӗш ҫуртра (вӑл общежити шутланать), пушар тухнӑ хыҫҫӑн хулара инкеклӗ лару-тӑру режимӗ туса хунине эпир унччен пӗлтернӗччӗ. Аса илтерер: вут-ҫулӑм утӑ уйӑхӗн 14-мӗшӗнче 17 сехет те 45 минутра тухнӑччӗ. Инкекре 1,3 пин тӑваткал метр лаптӑк ҫинче ҫивитти сиенленнӗ. Ҫынсем, телее, шар курман.
Асӑрханмасӑр пурлӑха сиенленӗшӗн пуҫиле ӗҫ пуҫарнӑ. Пушара пула 250 пин ытла тенкӗлӗхшар кӑтартнӑ. Тӗпчевҫӗсем шухӑшланӑ тӑрӑх, мачча ҫинче такам пулнӑ. Инкек ҫавӑн хыҫҫӑн тухнӑ. Те, шӑрпӑкпа вылянӑ ӗнтӗ, те пирус туртнӑ. Айӑплине пакунлисем тупса палӑртӗҫ.
Етӗрне районӗнче пурӑнакан пӗр арҫын рак тытнӑран ята кӗнӗ. Асӑннӑ ҫын рак тытмалли хатӗрсене Сӑр юханшывӗнче 5 штук таран лартса тухнӑ. Шучӗпе вара кӑҫалхи кӑрлач уйӑхӗн 1-мӗшӗнчен пуҫласа утӑ уйӑхӗн 15-мӗшӗччен раксене тытма юрамасть.
Апла пулин те арҫын пурӗ 191 рак тытнӑ. Ҫапла вара вӑл юханшыва 40 пин тенкӗ ытла тенкӗлӗх тӑкак кӳнӗ.
Полицейскисем рак тытмалли хатӗрсене туртса илнӗ, раксене шыва янӑ.
Арҫын тӗлӗшпе РФ Пуҫиле кодексӗн 256-мӗш статйин 1-мӗш пайӗпе пуҫиле ӗҫ пуҫарнӑ. Ку статьяпа браконьера икӗ ҫул таран ирӗкрен хӑтарма юрать.
+0.3 °C