f-m.store/volga сайтри сӑн

Мари Элте пӗр ҫамрӑка шыранӑ. Ӑна вара Чӑваш Енре тупнӑ. Ҫак каччӑ хӑй ӑсталанӑ кимӗпе Атӑл урлӑ Сӗнтӗрвӑрри районне ишсе ҫитнӗ.

Вӑл – 15 ҫулта. Ӑна ака уйӑхӗн 13-мӗшӗнче Сӗнтӗрвӑрри районӗнчи кану бази территорийӗнче хуралҫӑ асӑрханӑ. Арҫын ача каласа кӑтартнӑ тӑрӑх, вӑл хӑй ӑсталанӑ кимӗпе ишеве тухнӑ, анчах ҫаврӑнса ӳкнӗ.

Хуралҫӑ арҫын ача пирки полицие пӗлтернӗ. Халӗ ҫав ачан сывлӑхӗ чиперех. Ӑна ашшӗ-амӑшӗ патне тавӑрнӑ. Ҫакӑ паллӑ: ҫамрӑк тӗлӗшпе преступлени туман.

Твиттер тата Яндекс сӑнӳкерчӗкӗсенчен хатӗрленӗ коллаж

Кӑшӑлвирус сарӑласран йышӑнакан мерӑсем кунран кун ҫирӗпленсе пыраҫҫӗ. Хӗрлӗ хӑва праҫникӗнче (Шупашкар районӗнче Кӑчӑкӑ уявне ҫавӑн пек те калаҫҫӗ) чиркӳсене кайма сӗнменччӗ, Турра ӗненекенсем ҫапах та итлесшӗнех пулмарӗҫ.

Мӑнкунта та ҫавӑн пек пуласран республика Элтеперӗн тивӗҫӗсене вӑхӑтлӑх пурнӑҫлакан Олег Николаев ятарлӑ хушу алӑ пуснӑ.

Паянтан Чӑваш Енри мӗнпур чиркӗве тата тӗнпе ҫыхӑннӑ вырӑнсене кайма чарнӑ. Мӗнпур конфесси ҫыннисен ҫавна пӑхӑнмалла. Унсӑр пуҫне ҫӑва ҫине те кайма юрамасть. Ҫын вилсен (Турӑ сыхлатӑр та) пытарма ҫывӑх ҫынсен ҫеҫ хутшӑнма юранине каланӑ хушура.

...Хамӑр енчен ҫакна палӑртар: ялсенче шӑтӑк алтма мӗнпур йыш пухӑнать — унта экскаваторпа усӑ курмаҫҫӗ.

ҪҪХПИ тунӑ сӑн

Ҫӗмӗрлепе Чулхула чиккинче те пропуск пункчӗ ӗҫлеме пуҫланӑ. Сӑмах май, кӑшт маларах Етӗрне районӗн чиккинче урӑх регионтан килекенсене тӗрӗслеме тытӑннӑ. Йӑлтах – кӑшӑлвируса пула.

Понтонлӑ каҫӑ урлӑ документ кӑтартсан ҫеҫ каҫма пулать халӗ. Инспекторсем Чулхула облаҫне унта прописка пур пулсан ҫеҫ ярӗҫ. Кӳршӗ облаҫрен вара Чӑваш Енре прописка пур пулсан ҫеҫ кӗртӗҫ.

Чулхулара пурӑнкансен, ӗҫлекен ҫынсен код кӑтартсан ҫеҫ чикӗ урлӑ каҫма май пур. Чӑваш Енрисенчен справка ытаҫҫӗ.

shymkent.enbek.gov.kz сӑнӳкерчӗкӗ

Пирӗн республикӑра малашне ҫулсерен Карьера кунӗсем ирттерме палӑртнине эпир унччен пӗлтернӗччӗ. Аса илтерер: Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев «О дополнительных мерах, направленных на привлечение молодежи к работе в системе государственного управления» (чӑв. Патшалӑх управленийӗн тытӑмӗнче ӗҫлеттерме ҫамрӑксене явӑҫтарма хушма мерӑсем йышӑнасси ҫинчен) хушу кӑларнӑччӗ.

Влаҫ органӗсенче ҫамрӑксем сахаллине кура вӗсем валли Карьера кунӗсем ирттересшӗнччӗ. Кӑҫалхине ака уйӑхӗнче йӗркелессине хыпарланӑччӗ.

Республикӑра кӑшӑлвирус сарӑлнӑ саманара Карьера кунӗсене ирттермӗҫ. Кун пирки Олег Николаев ятарлӑ йышӑну тунӑ. ЧР Элтеперӗн Патшалӑх граждан службин, кадр политикин тата патшалӑх наградисен управленийӗнче пӗлтернӗ тӑрӑх, Карьера кунӗсене каярах йӗркелӗҫ.

Кӑшӑлвирус чирӗллӗ ҫынсемпе хутшӑнура пулнисем карантина ҫак кунсенче Муркаш районӗнчи «Лесная сказка» (чӑв. Вӑрман юмахӗ) санаторире ирттереҫҫӗ. Республикӑн Сывлӑх сыхлав министерстви пӗлтернӗ тӑрӑх, унта паян — 42 ҫын.

Кӑшӑлвирус сарӑлнӑ вӑхӑтра обсерваторие ҫаврӑннӑ санатори айлӑмлӑ вырӑнта тата вӑрманта вырнаҫнӑ. Ҫывӑхра ялсем ҫук. Ҫавна май унта карас ҫыхӑнӑвӗ начар. Карантина лекнисене ку лару-тӑру тивӗҫтермен. Карас ҫыхӑнӑвӗн компанийӗсенчен пӗри, «МТС», санатори территорийӗнче мобильлӗ станци вырнаҫтарнӑ. Ҫак ӗҫе вӑл икӗ кунта пурнӑҫланӑ. Ӗҫе республикӑн Информполитика министерстви пулӑшнипе пурнӑҫланӑ.

Карантина санаторири обсерваторире ирттерекенсене «МТС» сим-карттӑсем валеҫсе панӑ.

Ҫакӑн пирки Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паянхи канашлура каланӑ. Мероприятире кӳлмекпе Хӗрлӗ лапама юсаса ҫӗнетес ыйтӑва тишкернӗ. Хӗрлӗ лапама ҫӗртме уйӑхӗн 1-мӗшӗ тӗлне юсаса пӗтересшӗн. Кайран кӳлмеке ҫӗнетме пуҫӑнмалла. Планпа килӗшӳллӗн — 2021 ҫулта ҫеҫ.

«ДОРИСС» предприятин пуҫлӑхӗ Всеволод Рощин ӗҫе унччентерех пуҫӑнма сӗннӗ. Компани кӑҫалах юсама тытӑнма хатӗр иккен.

Олег Николаев предприятие тата хула администрацийӗн пуҫлӑхне Олег Николаева хастар ӗҫшӗн тав тунӑ.

Элтепер тивӗҫӗсене вӑхӑтлӑх пурнӑҫлаканӗ республикӑн Стройминӗпе Экономика аталанӑвӗн тата пурлӑх хутшӑнӑвӗсен министерствисене проекта аталантарма уйӑракан укҫан пӗр пайне 2021 ҫултан 2020 ҫула куҫарас ыйтӑва тишкерме сӗннӗ.

Раҫҫей Ӗҫлев министерстви ӗҫсӗррисене уйӑхсерен 12 пин те 130 тенкӗ тӳлеме май паракан йышӑну проектне хатӗрленӗ. Унччен ку пособин чи пысӑк виҫи уйӑхсерен 8 пин тенкӗпе танлашатчӗ. Кӑшӑлвируса пула ҫынсем ӗҫсӗр юлнине кура пособи виҫине ӳстерме ҫӗршыв Президенчӗ Владимир Путин хӑй хушнӑччӗ. Унтан та ытларах. Пособие кӑҫалхи ака уйӑхӗн 1-мӗшӗнчен пуҫласа ҫӗртме уйӑхӗн 30-мӗшӗччен пурне те 12130 тенкӗ тӳлесшӗн. Тепӗр майлӑ каласан, ӗҫ укҫин виҫине шута илмесӗр. Ӗҫсӗр ҫыннӑн ача-пӑча пулсан кашни тӗпренчӗкшӗн 3-шер пин тенкӗ хушса тӳлӗҫ.

Ӗҫсӗр юлнине ҫирӗплетме ӗҫ кӗнекин копине, ӗҫрен хӑтарнине ҫирӗплетекен приказа, юлашки виҫӗ уйӑхри ӗҫ укҫине кӑтартакан справка илсе ҫӳреме кирлӗ мар. Яваплӑ ведомствӑсем ку хута хӑйсемех ыйтса илӗҫ.

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев Николай Бударин космонавта професси уявӗпе саламланӑ. Кун пирки вӑл Инстаграмра пӗлтернӗ.

«Космонавтика кунӗпе, туссем! Ака уйӑхӗн 12-мӗшӗ – наци мӑнаҫлӑхӗн, профессионализм ҫитӗнӗвӗн тата мӗнпур ҫӗршывӑн талпӑнӑвӗн кунӗ. Космос отраслӗн аталанӑвӗн ҫитӗнӗвӗпе эпир кунсерен усӑ куратпӑр. Пуласлӑх технологийӗсем пирӗншӗн тахҫанах кулленхи куна ҫаврӑнчӗҫ. Ҫав технологисем пулӑшнипе хамӑрӑн ентешӗмӗре Николай Михайлович Бударин космонавта уяв ячӗпе саламлама пултартӑм», – тесе ҫырнӑ Олег Николаев.

Чӑваш Ен тӗнчене харӑсах виҫӗ космонавта парнеленине палӑртнӑ вӑл. Андриян Николаев, Муса Манаров тата Николай Бударин ячӗсем Чӑваш Ен историйӗнче ӗмӗрлӗхе ҫырӑннине асӑннӑ. «Эпӗ вӗсен паттӑрлӑхӗпе хавхаланатӑп. Тӳпе пирки ӗмӗтленсе вӗсен мӗн тӳсме тивнине ачасене каласа кӑтартатӑп», – ҫырнӑ Олег Николаев Инстаграмра.

Чӑваш Ен Элтеперӗн Администрацийӗ алла ҫыхмалли сехет туянать. Пӗтӗмпе 300 штук. Вӗсенчен ҫурри — хӗрарӑмсем валли, тепӗр ҫурри — арҫынсем валли. Сехечӗ ахальли мар. Чӑваш автономи облаҫне йӗркеленӗренпе 100 ҫул ҫитнине халалланӑскер пулӗ вӑл.

Сехет хатӗрлекен валли 779 100 тенкӗ уйӑрма палӑртнӑ. Тепӗр майлӑ каласан, пӗр сехет хакӗ 2 пин те 597 тенке ларӗ. Контракта алӑ пуснӑ хыҫҫӑн сехете 10 кунта хатӗрлесе памалла.

Сехет классика формиллӗ пулмалла. Циферблатӑн варринче Чӑваш автономи облаҫне йӗркеленӗренпе 100 ҫул ҫитнине халалланӑ ӳкерчӗк вырнаҫтармалла. Сехетӗн хыҫал енне «От главы Чувашской Республики» (чӑв. Чӑваш Республикин Элтемерӗнчен) тесе ҫырса хурӗҫ.

Сехет латуньтен хатӗрлӗҫ. Ылтӑн евӗр тӗслӗ пулӗ вӑл. Арҫын сехечӗн диаметрӗ 38 мм, хӗрарӑмӑн 28 мм пулӗ.

Васкавлӑ медпулӑшу пульницин архивӗнчи сӑн

Паян Чӑваш Енре тепӗр ҫын кӑшӑлвируспа чирлени пирки сайтра хыпарларӑмӑр. Каҫ енне тепӗр тӗслӗх тупса палӑртнӑ. Ҫапла майпа паян кӑшӑлвируспа чирлӗ икӗ ҫынна тупнӑ.

Вӗсем иккӗшӗ те – Чӑваш Ен ҫыннисем, Мускавран килнӗскерсем. Ку та Мускавра анализ панӑ, анчах кӑтартӑвне кӗтсе илеймен – республикӑна ҫитнӗ. Ҫак икӗ ҫынран пӗри – автобуспа, тепри хӑйӗн машинипе ҫитнӗ.

Ку арҫыннӑн тӑванӗсенчен анализ илнӗ, вӑл тата кампа хутшӑнма пултарнине палӑртаҫҫӗ.

Палӑртмалла: ҫапла майпа паянхи кун тӗлне Чӑваш Енре кӑшӑлвируспа 4 ҫын чирленӗ, вӗсенчен пӗрине пульницӑран киле янӑ ӗнтӗ.