golos-nazrani.ru сайтри сӑн

Вӑрмар муниципаллӑ округӗнчи умламҫӑ пухнӑ 4,8 миллион тенкине ултавҫа куҫарса панӑ.

Хӑй каласа кӑтартнӑ тӑрӑх, ун патне палламан ҫын шӑнкӑравланӑ та хӑратсах пӑрахнӑ: счечӗ ҫинчи укҫана такам Украинӑна куҫарма тӑнӑ имӗш. Хайхискере пӗр тӑхтамасӑр укҫана хӑрушсӑр счет ҫине куҫарма хушнӑ. Ҫапла вӑл 1 миллион та 800 пин тенкӗсӗр тӑрса юлнӑ.

Кун тӗлӗшпе пуҫиле ӗҫ пуҫарнӑ.

"Ҫыхӑнура" порталти сӑн.

Ӗнер республикӑра ҫил вӑйлӑ пулнӑ. Ҫавна май хӑш-пӗр тӑрӑхра ҫутӑ та сӳнсе ларнӑ.

Инкеклӗ лару-тӑру патшалӑх комитечӗ пӗлтернӗ тӑрӑх, ӗнер каҫхине 19 ялта электричество сӳннӗ, 2,5 пин ытла ҫын шар курнӑ. Ҫак списока Улатӑр, Патӑрьел, Вӑрнар, Йӗпреҫ, Канаш, Муркаш, Вӑрмар муниципаллӑ округсенчи ялсем лекнӗ. Каҫхи 9 сехет тӗлне 11 бригада, пӗтӗмпе 29 ҫын, ӗҫленӗ. 22 сехет тӗлне 14 ялта ҫутӑ пулман.

Аса илтерер: ӗнер ҫил ҫеккунтра 20-25 метр хӑвӑртлӑхпа вӗрнӗ.

cap.ru сӑнӳкерчӗкӗ

Чӑваш Енре «Атте» паллӑ пама пуҫлӗҫ. Республикӑн влаҫ органӗсен официаллӑ порталӗнче пӗлтернӗ тӑрӑх, ку пуҫарӑва Олег Николаев Элтепер те ырласа йышӑннӑ.

«Атте» Чӑваш Республикин ашшӗн мухтавӗн палли» патшалӑх награине пама пуҫлассине «Ашшӗн калаҫӑвӗ» ҫавра сӗтел вӑхӑтӗнче сӳтсе явнӑ. Пуҫарупа Чӑваш Енри Ашшӗсен канашӗ (председателӗ — Алексей Мурыгин) тухнӑ иккен.

Суд приставӗсен службин архивӗнчи сӑн

Ҫӗрпӳ округӗнче пулнӑ аварире пассажир аманнӑ. Куншӑн, кӑмӑл-сипет тӗлӗшӗнчен сиен кӳнӗшӗн, водительтен укҫа шыраса илнӗ.

Ун чухне ҫанталӑк тӗтреллӗ тӑнӑ. Водитель руле итлеттереймесӗр ҫул хӗрринчи паллӑ ҫине пырса тӑрӑннӑ, унтан кювета чӑмнӑ. Салонри хӗрарӑм аманнӑ. Куншӑн суд водителе 400 пин тенкӗ тӳлеттерме йышӑннӑ. Анчах лешӗ килӗшмен.

Ҫавна май суд приставӗ ыйтнипе унӑн шалӑвӗнчен укҫа тытса юлма пуҫланӑ. Ҫавӑн пекех ӑна ют ҫӗршыва тухса ҫӳреме чарнӑ. Кун хыҫҫӑн тин арҫын пӗтӗм укҫана саплаштарнӑ.

Хӗрлӗ Чутай районӗнчи Акчикассинче пурӑнакан Перасковья Васюкова юпа уйӑхӗн 10-мӗшӗнче 102 ҫул тултарнӑ.

Унӑн пурнӑҫӗ те тантӑшӗсенни пекех пулнӑ. Вӑрҫӑ ҫулӗсем тата ун хыҫҫӑнхи йывӑр самана. Апла пулин те хӗрарӑм пуҫ усман.

Ҫуралнӑ кунӗнче ун патӗнче Хӗрлӗ Чутайӗнчи халӑхӑн социаллӑ ыйтӑвӗсене тивӗҫтерекен центр ӗҫченӗсем тата вырӑнти тӳре-шара пулнӑ, кинемее ҫуралнӑ кунпа саламланӑ.

Максим Иванов тунӑ сӑн

Улатӑрта ача пахчи пулнӑ ҫурта каллех сутма лартнӑ. Кунта сӑмах – «Хӗвел» ятли пирки.

Ача пахчин территорине те пӗрлех сутаҫҫӗ. Малтанхи хака палӑртнӑ: 19 миллион та 785 пин тенкӗ. Чи пӗчӗк хак – 9 миллион та 892 пин те 500 тенкӗ. Ӑна аукционра чӳк уйӑхӗн 13-мӗшӗнче сутӗҫ.

Палӑртмалла: ача пахчине 2020 ҫулта авариллӗ лару-тӑрура тесе хупнӑ. Ӑна пӗлтӗр сутма хӑтланнӑ. Анчах туянакан пулманран аукцион иртмен.

/t.me/pro_cheby каналтан илнӗ сӑнӳкерчӗк

Чӑваш Енри учительсен оклачӗ пурӑнма кирлӗ чи пӗчӗк виҫерен пӗчӗкрех иккен. Кун пирки Телеграмри каналсенчен пӗринче ӗнер пӗлтернӗ. Асӑннӑ ҫӑлкуҫра хыпарланӑ тӑрӑх, оклад эпир маларах асӑннӑ виҫерен икӗ хута яхӑн пӗчӗкрех.

Категорисӗр тата стажсӑр уительсен оклачӗ пирӗн республикӑра 8533 тенкӗпе танлашать-мӗн. Атӑлҫи тӑрӑхӗнчи регионсене илсен унтан пӗчӗкреххи Мари Элта ҫеҫ. Унта вӑл — 8265 тенкӗ. Ку вӑл — юпа уйӑхӗн 4-мӗшӗ тӗлне илсен.

Тутарстанри учительсен оклачӗ — 16157 тенкӗ, Чулхуларисен — 13467 тенкӗ.

t.me/oanikolaev каналтан илнӗ сӑнӳкерчӗксем

Ӗнер, юпа уйӑхӗн 10-мӗшӗнче, Чӑваш Енри виҫӗ кинемей 100 ҫул тултарнӑ.

Вӗсенчен иккӗшӗ, Анна Иванова тата Мария Кручинина, Шупашкарта пурӑнаҫҫӗ, Шемсия Сафина — Патӑрьел муниципаллӑ округӗнчен.

Вӑрҫӑ ҫулӗсенче Мария Христофоровна тата Шемсия Алиулловна фронтра ӗҫленӗ, аслӑ Ҫӗнтерӗве ҫывхартма пулӑшнӑ. Анна Титовна II Прибалтика фронтӗнче ҫарта пулнӑ.

Анна Иванова вӑрҫӑ ҫулӗсенче телейлӗ те вӑрӑм ӗмӗр пирки ӗмӗтленнӗ. Халӗ вара вӑл ҫынсене кӳрентерес марччӗ тесе пурӑнать.

Кинемейсене Телеграмри хӑйӗн каналӗнче республика Элтеперӗ Олег Николаев саламланӑ.

Ҫӗрпӳ муниципаллӑ округӗнче Виҫпӳрт ялӗ ҫывӑхӗнче строительство ҫӳп-ҫап купине тупнӑ. Унта тимӗр бетон конструкцийӗсем, кивӗ асфальт катӑкӗсем выртнӑ. Пӗтӗмпе - 1260 тӑваткал метр ҫинче.

Свалка ял хуҫалӑх пӗлтерӗшлӗ ҫӗрсем ҫинче. Россельхознадзор ҫӗр хуҫине асӑрхаттару панӑ, ӑна рекультиваци тума сӗннӗ.

Ҫӗр хуҫи строительство ҫӳп-ҫапне илсе тухнӑ, рекультиваци тумалли проект хатӗрлеме заявка хӑварнӑ.

t.me/oanikolaev сӑнӳкерчӗкӗ

Чӑваш Ен Элтеперӗ ют ҫӗшыв журналисчӗсемпе тӗл пулнӑ, вӗсен ыйтӑвӗсене хуравланӑ.

Республика ертӳҫи Олег Николаев Телеграмра хыпарланӑ тӑрӑх, вӑл

Армени, Беларуҫ, Вьетнам, Казахстан тата Таджикистан журналисчӗсемпе курса калаҫнӑ. Ют ҫӗршыври массӑллӑ информаци хатӗрӗсенче ӗҫлекенсен пресс-турне пирӗн тӑрӑхра пуҫласа йӗркеленӗ.

Олег Николаев пӗлтернӗ тӑрӑх, Чӑваш Ен ют ҫӗршывсемпе килӗштерсе ӗҫлени ҫинчен каласа кӑтартнӑ тата тата хутшӑнусене аталантарса пырасси пирки калаҫнӑ.

Чӑваш Ен, сӑмахран, Раҫҫейпе Беларуҫ туса кӑларакан троллейбуссене туянать, Вьетнама чӑваш сӑрине ӑсатасшӑн.

Хӑнасене республика культурипе, йӑли-йӗркипе паллаштарнӑ, унӑн экономика, промышленность тата туризм вӑй-хӑвачӗ ҫинчен каласа кӑтартнӑ.