t.me/chuv_kray каналтан илнӗ сӑнӳкерчӗк

Чӑваг патшалӑх университечӗн виҫӗ студенчӗ «Студентсен стартапӗ» пӗтӗм ҫӗршыври конкурсра ҫӗнтернӗ. Вӗсенчен кашниех пӗрер миллион тенке тивӗҫӗ. Унпа вӗсем хӑйсен бизнес-проектне пурнӑҫа кӗртӗҫ.

Вырӑс тата чӑваш филологийӗпе журналистикин факультетӗнче вӗренекен Юлия Данилова «МЧСӑн интерактивлӑ музейӗ» интерактивлӑ проектшӑн гранта тивӗҫнӗ.

Медицина факультетӗнче пӗлӳ илекен Владислав Малыгин кариес профилактикипе ҫӗнӗлле ӗҫлеме ӗмӗтленет. Вӑл усӑллӑ канихвет шухӑшласа кӑларнӑ. Ҫав ҫимӗҫ шӑла сиен кӳмест, кариес пуҫланасран вара хӳтӗлет.

Химипе фармакологи факультечӗн студентки Александра Трофимова вара пӑрҫа йышши пӗр курӑкран герпесран хӳтӗлемелли мазь хатӗрлесшӗн.

tula.mk.ru сайтри сӑн

Патӑрьел районӗнчи Туҫа ял тӑрӑхӗн администрацийӗн пуҫлӑхӗ пулнӑ арҫынна суд тунӑ. Ӑна 100 пин тенкӗ штраф тӳлеттерме йышӑннӑ.

Суд палӑртнӑ тӑрӑх, вӑл 2015 ҫулта Кивӗ Ахпӳрт ялӗнче пурӑнакан пӗлӗшне 0,35 гектар ҫӗр ҫинче хушма хуҫалӑх йӗркелеме ирӗк паракан суя документсем тыттарнӑ. Унччен вара ҫак лаптӑка никама та паман.

Кун хыҫҫӑн пӗлӗшӗ ҫӗре харпӑрлӑха илнӗ. Кадастр хакӗ – 145 565 тенкӗ. Унпа вӑл хӑйне кирлӗ пек усӑ курнӑ.

Шупашкарта пурӑнакан Анна Иванова паян, юпа уйӑхӗн 10-мӗшӗнче, 100 ҫул тултарать.

Вӑл Канаш районӗнчи Вӑрман Енӗш ялӗнче ҫуралнӑ. Ҫичӗ класс вӗренсе пӗтерсен фермӑна ӗҫе вырнаҫнӑ. Анчах вӑрҫӑ пуҫлансан ӑна связистсен курсне вӗренме янӑ, кайран салтака илсе кайнӑ.

Вӑрҫӑран аманса таврӑнса ҫыхӑну уйрӑмӗн пуҫлӑхӗнче мӗн тивӗҫлӗ канӑва кайичченех ӗҫленӗ. Мӑшӑрӗпе вӑл 1950 ҫулта ҫемье ҫавӑрнӑ. Виҫӗ ывӑлпа икӗ хӗр ура ҫине тӑратнӑ. Паян вӗсенчен пӗр хӗрӗпе пӗр ывӑлӗ ҫук ӗнтӗ — леш тӗнчене уйрӑлса кайнӑ.

Кинемей Шупашкарти хваттерӗнче пӗчченех пурӑнать. Лавккана та тухса кӗрет, килне те хӑех тирпейлесе тӑрать. Питӗр хулинчи хӗрӗ хӑйӗн патне илсе каясшӑн та, кинемей тӑван тӑрӑхран тухса кайма килӗшмест. Кинемей калпак тата шарф ҫыхса вӑхӑта ирттерет, кӳршӗ-аршӑпа хутӑшать.

«Ҫынпа ҫураҫуллӑ пурӑнмалла», — тет тӑнлавне пас тытнӑ Анна Титовна.

mintrud.cap.ru сӑнӳкерчӗкӗ

Чӑваш Енри ачасем кӗрхи каникул вӑхӑтӗнче те уйлӑхсенче канӗҫ. Унта пурне те ямӗҫ. Йывӑр лару-тӑрури ҫемьесенче ӳсекенсене ҫеҫ.

Ачасене талӑкӗпе пурӑнтармалли уйлӑхсене республикӑра виҫӗ ҫӗрте уҫӗҫ. Вӗсем юпа уйӑхӗн 28-мӗшӗнчен пуҫласа чӳк уйӑхӗн 4-мӗшӗччен ӗҫлӗҫ.

Заявленисене халӑхӑн социаллӑ ыйтӑвӗсене тивӗҫтерекен центрсенче паянтан йышӑнма пуҫланӑ.

sdelanounas.ru сайтри сӑн

Вӑрнар районӗнче 3 арҫын ача рельссем ҫине чулсем хурса алхаснӑ. Ҫакна «Мускав – Хусан» маршрутпа ҫӳрекен машинист асӑрханӑ та кун пирки Вӑрнарти чукун ҫул станцийӗн дежурнӑйне пӗлтернӗ. Лешӗ ку хыпара транспорт полицине ҫитернӗ.

Полицейскисем вырӑна ҫитнӗ, ҫак ӗҫе тунӑ арҫын ачасене тупнӑ. Вӗсем 18 ҫул тултарманнине кура ашшӗ-амӑшне административлӑ майпа явап тыттарнӑ.

mintrud.cap.ru сӑнӳкерчӗкӗ

Улатӑр хулинче пурӑнакан ӗҫсӗр программист графика дизайнерне вӗренет. Ӑсталӑха алла илме «Работа России» (чӑв. Раҫҫейри ӗҫ) кадр центрӗ май парать. Шӑпах асӑннӑ центр Никита Дементьева ҫӗнӗ профессие суйласа илме пулӑшнӑ.

«Хушма пӗлӳ илни мана хамшӑн ӗҫлеме май парӗ, программӑлас ӗҫе тарӑнрах ӑнланма пултарӑп. Сайтсем, веб-программӑсем хатӗрлесе укҫа ӗҫлесе илесси мана питех те хавхалантарать. Анимаци роликӗсем те ӑсталама юрататӑп», – хавхаланса каласа кӑтартнӑ каччӑ.

Ҫӗнӗ профессие Никита ҫулталӑк вӗҫӗ тӗлне вӗренсе пӗтермелле.

Маргарита Мельникова сӑнӳкерчӗкӗ

Юпа уйӑхӗн 6-мӗшӗнче Ҫӗрпӳре кӗмӗл волонтёрсен «Кӗмӗл Чун» республикӑри иккӗмӗш форумӗ иртнӗ.

Унта «2023 ҫулхи чи лайӑх кӗмӗл волонтёр» конкурс ҫӗнтерӳҫисене чысланӑ. Маттуррисене 4 номинаципе палӑртнӑ.

«Эко-волонтер» номинацире Красноармейски муниципаллӑ округӗнчи Валерий Геннадьевичпа Светлана Матвеевна Мефодьевсене чысланӑ, «Социаллӑ экспресс» номинацире — Ҫӗмӗрле муниципаллӑ округӗнчи Галина Милинӑна; «Ҫӗнтерӳ волонтёрӗ» номинацире — Ҫӗрпӳ муниципаллӑ округӗнчи Валентина Михайловӑна; «Волонтёр-наставник» номинацире — Шӑмӑршӑ муниципаллӑ округӗнчи Константин Емельянова.

culture.cap.ru сӑнӳкерчӗкӗ

Пӗтӗм тӗнчери педагог-художниксен союзне йӗркеленӗренпе 10 ҫу ҫитнине халаласа Чӑваш Енӗн Наци вулавӑшӗнче педагог-художниксен форумӗ иртнӗ. Ӑна маларах асӑннӑ союзӑн республикӑри пӗрлешӗвӗ тата Шупашкарти ӳнер училищи (техникумӗ) йӗркеленӗ.

Мероприятие тӗрлӗ шайри 60 ытла педагог хушӑннӑ. Вӗсен йышӗнче — вӑтам шкулсенче ӗҫлекенсем, хушма пӗлӳ паракан учрежденисенче тӑрӑшакансем, вӑтам тата аслӑ пӗлӳ паракан заведенийӗсен преподавателӗсем.

Форума пуҫтарӑннисене Шупашкарти ӳнер училищин директорӗ Владимир Ануфриев тата Чӑваш Енӗн Наци вулавӑшӗн директорӗ Роза Лизакова саламланӑ.

culture.cap.ru сӑнӳкерчӗкӗ

Чӑваш Енӗн Наци вулавӑшӗнче юпа уйӑхӗн 3-мӗшӗнче «Театр – мой мир. Театр – манӑн тӗнче. Художник Станислав Кошкин» кӗнеке-альбома хӑтланӑ. Кӑларӑма Н. М. Кириллова пухса хатӗрленӗ. Ҫав кунах унта Станислав Кошкинӑн «Театр – мой мир» (чӑв. Театр — манӑн тӗнче) куравӗ уҫӑлнӑ.

Станислав Константинович — Чӑваш Республикин тава тивӗҫлӗ художникӗ, Раҫҫейри художниксен союзӗн пайташӗ. Авӑн уйӑхӗн 25-мӗшӗнче художник 75 ҫул тултарнӑ.

Станислав Кошкин Вӑрнар районӗнчи (халӗ — муниципаллӑ округ) Вӑрман Кипек ялӗнче ҫуралнӑ. Хальхи вӑхӑтра вӑл Питӗр хулинче пурӑнать. Шупашкарти ӳнер училищинче тата Ленинградри патшалӑхӑн театр, музыка тата кинематографи институтӗнчен вӗренсе тухнӑ. Ленинградри ҫамрӑксен театрӗнче художник-постановщикра тата ытти хулара ӗҫленӗ.

cheb-centr.soc.cap.ru/press-centr сӑнӳкерчӗкӗ

Шупашкар хулинче пурӑнакан Любовь Куралева ӗмӗрне учительте ӗҫлесе ирттернӗ. Ачасене вӑл историе вӗрентнӗ. Раҫҫей Федерацийӗн вӗрентӳ отличникӗ пулас мӑшӑрӗпе 18 ҫулта чухне паллашнӑ. Куралевсем 60 ҫул ӗнтӗ пӗрне-пӗри юратса та хисеплесе пурӑнаҫҫӗ.

Виталий Владимирович шкул директорӗ пулнӑ, ачасене вырӑс литературине вӗрентнӗ. Пулас мӑшӑрне вӑл Есенинпа Блок сӑввисемпе тыткӑнланӑ. Куралевсен килӗнче поэзи паян та янӑрать. Анчах вӑл халӗ унчченхинчен те тарӑнрах пӗлтерӗшлӗ.

Кил хуҫи хӗрарӑмне, Любовь Андреевнӑна, паян Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн социаллӑ ӗҫченӗ Ольга Нарушевич пулӑшса тӑрать.