forum.zarulem.ws сӑнӳкерчӗкӗ

Чӑваш Енре ҫул ҫинчи хӑрушсӑрлӑха сӑнаса тӑракан камерӑсем йышлӑ, апла пулин те ҫын вилмеллех пулса иртекен аварисем пулаҫҫӗ. Ҫавна май республика Элтеперӗ Олег Николаев республикӑн тӗп хулин тата Ҫӗнӗ Шупашкарӑн тӳрешарине фотовидеофиксаци камерисемпе тухӑҫлӑ усӑ курмастӑр тесе хурланӑ.

Кӑҫал пирӗн республикӑра ҫӗнӗрен 83 комплекс вырнаҫтарнӑ. Вӗсем — инкек уйрӑмах пулса иртекен вырӑнсенче. Статистикӑна ӗненсен, асӑннӑ хатӗрсем пур ҫӗрте инкексем сахалтарах пулса иртеҫҫӗ.

Чӳк уйӑхӗн 1-мӗшӗ тӗлне пирӗн республикӑара 282 стационар комплексӗ ӗҫленӗ, ҫав шутран 32-шӗ — куҫса ҫӳрекеннисем, 4-шӗ — мобильлӗ.

Камерӑсен шучӗ нумайланнӑ пулин те кӑҫалхи 10 уйӑхра ҫул ҫинчи инкексенче вилнисен шучӗ пӗлтӗрхи ҫав тапхӑртинчен чӗрӗк чухлӗ ӳснӗ, 29-тан 36-а ҫитнӗ. Ҫав вӑхӑрах инкексен шучӗ 12,1 процент чакнӑ.

7ooo.ru сӑнӳкерчӗкӗ

Чӑваш Енре дронсенчен хӳтӗленмелли 4 пӑшал туяннӑ. Вӗсене хысна шучӗпе илнӗ.

Кун пирки республика Элтеперӗ Олег Николаев Шалти ӗҫсен органӗсенче ӗҫлекенсен кунӗнче пӗлтернӗ.

«Ҫитес вӑхӑтра вӗсене эпир Чӑваш Енӗн Шалти ӗҫсен министерствине парӑпӑр. Асӑннӑ хатӗрсем уйрӑмах асӑрханмалли зонӑсене хӳтӗлеме кирлӗ», – тенӗ Олег Николаев.

чувашинформ.рф сӑнӳкерчӗкӗ

Чӑваш Енри тата ҫӗршыври патшалӑх организацийӗсем халӑх тетелӗнче хӑйсен страницисене ҫине тӑрсах аталантараҫҫӗ. Кам — кӑмӑлтан, кам — хӑйне хистесе. Тӳре-шарапа патшалӑх организацийӗсем халӑх тетелне мӗншӗн куҫнине тавҫӑрма йывӑр мар — ватти-вӗтти паян халӑх тетелӗсенче ларать.

Пирӗн республикӑри патшалӑх организацийӗсен официаллӑ страницисен шучӗ хальхи вӑхӑтра 2 пине ҫитнӗ. Вӗсене ҫырӑннисем — 1,5 миллион ҫын.

Асӑннӑ страницӑсен лайӑх енӗсенчен пӗри — вӗсем урлӑ ҫынсем хӑйсен ыйтӑвӗсене васкавлӑн уҫӑмлатма пултарни. Ыйтусене пост айӗнчи комментари евӗр те, страницӑна яракан ҫыру пек те ӑсатма пултараҫҫӗ. Соцсетьсене тытса пыракансем ҫав ыйтусене сӑнасах тӑраҫҫӗ, вӗсене вӑраха ямасӑр хуравлаҫҫӗ.

oir.mobi сайтри сӑн

Вӑрмар муниципаллӑ округӗнче карантин пулнине палӑртнӑ. Ҫак тӑрӑхра вилнӗ тилле экспертиза тунӑ та унӑн урнӑ чир пулнине палӑртнӑ. Халӗ унта специалистсем инфекцие сарӑлма парас мар тесе мероприятисем ирттереҫҫӗ.

Аса илтерер: юпа уйӑхӗн вӗҫӗнче Канаш муниципаллӑ округӗнче ӗнен урнӑ чир пулнине тупса палӑртнӑ. Муркаш муниципаллӑ округӗнче те пӗр вырӑнта урнӑ чир инфекцине пӗтерес тӗлӗшпе ӗҫлеҫҫӗ.

"Контактри" сӑн

10 ҫулти арҫын ача килте пӗчченех пулнӑ чухне ашшӗн пневматика пистолетне тупнӑ. Хайхискер тусӗсемпе унпа выляма, банкӑсене пеме шутланӑ.

Анчах вӑйӑран вӑкӑр тухать теҫҫӗ вӗт. Пуля арҫын ачана шӑп та лӑп ҫамкинчен лекнӗ. Ӑна Республикӑри ача-пӑча клиника пульницине илсе кайнӑ. Тухтӑрсем пӗр тӑхтамасӑр ӑна операци тунӑ. Халӗ арҫын ачан сывлӑхе хӑрушлӑхра мар.

mintrud.cap.ru сӑнӳкерчӗкӗ

Чӑваш Енӗн Ӗҫ тата социаллӑ хӳтлӗх министерствине пӑхӑнса тӑракан икӗ учрежденире ҫӗнӗ пуҫлӑхсем ӗҫе кӳлӗннӗ. Вӗсемпе коллектива Алена Елизарова министр иртнӗ эрне вӗҫӗнче паллаштарнӑ.

Йӗпреҫри халӑхӑн социаллӑ ыйтӑвӗсене тивӗҫтерекен центрта директор тилхепине Андрей Иванова тыттарнӑ. Ҫав ҫын унччен Раҫҫейӗн Пенси фончӗн Вӑрнар районӗнчи управленине ертсе пынӑ.

Комсомольскинчи ҫавӑн пек центра Ирина Долгова ертсе пыма тытӑннӑ. Вӑл маларах районти халӑха социаллӑ пулӑшу паракан центрӑн пуҫлӑхӗнче тӑрӑшнӑ.

Пӗрремӗш канал ӳкернӗ видео скринӗ

Ӗнер Пӗрремӗш каналпа эфира тухнӑ «Асамлӑ уй» кӑларӑма Куславккара пурӑнакан Любовь Малькова хутшӑннӑ. Вӑл пушӑ алӑпа кайман - хӑй ӑсталанӑ пуканесене парнеленӗ. Пӗри Якубович сӑнлӑ, тепри - чӑваш пики.

Любовь ача пахчинче ӗҫлет. Кӑларӑма каясси пирки вӑл каласа ҫӳремен, ку хыпара хӑй ӗҫлекен ача пахчинче кӑна пӗлнӗ.

Любовь Малькова пӗрремӗш турта ҫӗнтерсе финала тухнӑ. Унта та вӑл ҫӗнтернӗ. Ҫапла Любовь супервӑййа хутшӑнма килӗшнӗ. Анчах унта сӑмаха пӗлмен. Ҫапах Леонид Якубович вӑл суйланӑ пӗр парнене - юр тасатмалли хатӗре - асӑнмалӑх Чӑваш Енри хӗрарӑма пама йышӑннӑ.

novoorsk56.ru сайтри сӑн

Паян Чӑваш наци музейӗнчн Пысӑк этнографи диктантне ҫырнӑ. «Раҫҫейӗн тӗрленӗ картти» упранакан зала 30 ҫын пухӑннӑ. Ҫав йышра ЧР Элтеперӗ Олег Николаев та пулнӑ.

Акци кӑҫалхипе саккӑрмӗш хут иртнӗ. Унта хутшӑнакансен йышӗ ҫуллен ӳссе, географийӗ анлӑланса пырать.

Диктанта чӳк уйӑхӗн 8-мӗшӗччен онлайн майпа та ҫырма пулать. Тестра 30 ыйту. Вӗсенчен 10-шӗ республикӑпа ҫыхӑннисем. Диктанта ҫырма 45 минут уйӑрса параҫҫӗ.

skidki-segodnya.ru сӑнӳкерчӗкӗ

Пирӗн ҫӗршыва ют ҫӗршывсенчи ҫынсем сахал мар килеҫҫӗ. Ҫывӑх Хӗвелтухӑҫӗнчи ҫынсем уйрӑмах йышлӑ.

Пирӗн патра ӗҫлесе пурӑнас тесен вӗсен вырӑс чӗлхи пӗлмелле. Ҫавна экзамен тытса, ятарлӑ сертификатпа ҫирӗплетсе памалла.

Анчах хутпа хут пӗр мар иккен. Тӗрӗсрех каласан, вырӑс чӗлхи пӗлмен мигрантсем те тупӑнаҫҫӗ иккен.

Чӑваш Енӗн Шалти ӗҫсен министерствин Миграци енӗпе ӗҫлекен управленийӗ ют ҫӗршыв ҫыннисем кӑтартакан сертификатсене тӗрӗслеҫҫӗ те хут ҫинче ҫырни пур чухне те тӳрре килменни палӑрать — документсен хуҫисем вырӑс чӗлхине пӗлмеҫҫӗ.

Чӗлхе пӗлмесӗрех сертификатлӑ панӑ тӗслӗхсене кӑҫал пирӗн тӑрӑхри полицейскисем 35 хутчен тупса палӑртнӑ. Ҫавна май яваплисем тӗлӗшпе пуҫиле ӗҫсем пуҫарнӑ. Сертификат илме пулӑшнисене судсем тӗрмене хупса хумасӑр явап тыттарнӑ, мигрантсене вырӑс чӗлхи пӗлет тесе панӑ сертификатсене вара суя тесе йышӑннӑ.

yur-gazeta.ru сайтри сӑн

Етӗрне муниципаллӑ округӗнчи Вӑрманкас Асламас ялӗнче пурӑнакан 35 ҫулти хӗрарӑм ачине хӗненӗ тесе шутлаҫҫӗ. 13-ри хӗрачана унран туртса илнӗ, кукамӑшне (е асламӑшне) панӑ.

Следстви шутланӑ тӑрӑх, кӑҫалхи ҫӗртме-ҫурла уйӑхӗсенче ҫак хӗрарӑм килӗнче ӳсӗр пулнӑ чухне хӗрне пӗрре мар хӗненӗ, ӑна тивӗҫлӗ воспитани паман. Ҫак ҫемье унччен те ӑнӑҫсӑррисен шутӗнче тӑнине палӑртмалла.

Халӗ следстви малалла пырать.