vedomosti.ru сайтри сӑн

Нарӑс уйӑхӗнче кунашкалли пулманччӗ-ха. Юлашки талӑкра кӑшӑлвирусран 8 ҫын вилнӗ. Ҫапла ку уйӑхра вируса пула 123 ҫыннӑн пурнӑҫӗ татӑлнӑ.

Ку таранччен кӑшӑлвируса пула 999 ҫын вилнӗ. Пӗтӗмпе 21070 ҫын инфекциленнӗ, вӗсенчен 19298-шӗ сывалнӑ.

Юлашки талӑкра 55 ҫын чирленӗ. 46 ҫын вара сывалнӑ. Паянхи куна илес тӗк, республикӑра стационарта тата килте амбулатори мелӗпе 773 ҫын сипленет. Вӗсен кӑшӑлвирус диагнозӗ ҫирӗпленнӗ.

Шупашкарта кушак йывӑр тиевлӗ машинӑн капочӗ айне пытаннӑ та унта вӑл икӗ талӑк кайнӑ. Ҫапла вӑл 2 пин ытла ҫухрӑм кайнӑ.

Ӗпхӳре чарӑнсан вӑл капот айӗнчен тухнӑ. Ҫавӑн чухне тин ӑна асӑрханӑ. Ҫар ҫыннисем кушака асӑрхасан ӑна ҫул ҫинче пӑрахса хӑварман, кабинӑна лартнӑ.

Чӗлепи хулине ҫитсен ӑна чӗрчунсен приютне панӑ. Ҫур ҫулта ун валли хуҫа тупӑнмасан кушак нимеҫӗсем патӗнче юлӗ.

Тӗмен тӑрӑхӗнчи Анат Тавта районӗнчи Канаш ялӗнче тӑван чӗлхе кунне уявланӑ.

Ӑна унти чӑвашсен «Тӑван» ассоциацийӗ пулӑшнипе йӗркеленӗ.

Ассоциаци ертӳҫи Николай Герасимов тата Анат Тавта районӗнчи чӑвашсен пӗрлӗхӗ тӑрӑшнипе ачасем те уява чылайӑн хутшӑннӑ. Вӗсем чӑвашла сӑвӑсем каланӑ, юрланӑ та, ташланӑ та.

Тӑван чӗлхе кунне халалланӑ мероприятирен аслисем ие, ачасем те хавхаланса саланнӑ. Тӑван тӑрӑхран аякра пурӑнсан та пӗр-пӗринпе килӗштерсе пурӑнма май пурри ентешӗмӗрсене савӑнтарать, чунра чӑвашлӑх туйӑмне аталантарать.

«НТВ» телеканалпа эрнекунсерен кӑтартакан «Жди меня» телекӑларӑмра Чӑваш Енре пурӑнакан хӗрарӑм кун-ҫулӗпе паллаштарнӑ. Телепередача эфира нарӑс уйӑхӗн 20-мӗшӗнче тухнӑ.

Ольга Мелиоранская амӑшне юлашки хут хӑй тӑваттӑра чухне курнӑ. Ольга Мускавра ҫуралнӑ. Хӗрача 4 ҫулта чухне унӑн ашшӗ тӑванӗсем патне Чӑваш Ене килнӗ чухне ҫул ҫинчи инкекре вилнӗ. Амӑшӗ хуйха пула хӗрне Чӑваш Енри тӑванӗсем патне килсе янӑ, таврӑнма шантарса тухса кайнӑ. Ольга шухӑшланӑ тӑрӑх, амӑшӗ эрех ӗҫнӗрен именнипе килмен. Хӗрарӑм ӑна ҫуралнӑ кунсенче саламланӑ, открыткӑсем ҫырса янӑ.

Пӗчӗк хӗрне пӑрахса хӑварнӑ амӑшне хальлӗхе тупайман.

Пушкӑртстанри чӑваш, ученӑй-историк, истори наукисен докторӗ, Пушкӑртстанри патшалӑх медицина университечӗн философи, социаллӑ-гуманитарлӑ дисциплинӑсен кафедрин профессорӗ Ирина Сухарева (Саригель) Галимзян Ибрагимов ячӗллӗ преми лауреачӗн хисеп паллине тивӗҫнӗ.

Ирина Сухарева Пушкӑртстанри чӑвашсен историне тӗпчессипе тата асӑннӑ тӑрӑхри халӑхсен наци культурипе йӑли-йӗркине упраса хӑварассипе нумай ӗҫленине палӑртнӑ.

Ирина Витальевна Фейсбукра ҫырнӑ тӑрӑх, Хисеп ячӗсемпе наградӑсемшӗн ӗҫлемест, ҫын ҫине тухма та питех кӑмӑлламасть. «Юратнӑ ӗҫӗме лӑпкӑн ҫеҫ пурнӑҫлама юрататӑп», – тесе ӗнентерет вӑл. Ҫав вӑхӑтрах кӗтмен ҫӗртен чыслани кӑмӑллине пытарман.

Чӑваш Ен шыв ҫийӗн ҫӳрекен «Валдай» карап туянасси пирки Чӑваш халӑх сайчӗ пӗлтернӗччӗ. Аса илтерер: республика ертӳҫисем карап туянсан «Шупашкар – Хусан» тата «Шупашкар – Чулхула» маршрутсем уҫас ӗмӗтлӗ. Кунсӑр пуҫне вӗсем Куславккапа Сӗнтӗрвӑррине хутлӗҫ. Карапсене кӑҫал туянмалла. Виҫӗ «Валдай» илме бюджетран 330 миллион тенкӗ уйӑрнӑ.

Сӑмах май каласан, карапсене республикӑри ятлӑ-сумлӑ ҫынсен ячӗсене парасшӑн. Ӑна халӑхпа суйлӗҫ. Сасӑлава тӗнче тетелӗнчи «Контактра» ушкӑнра йӗркеленӗ. Карап ятне парассине сумлӑ ҫак ҫынсенчен суйлӗҫ: Андриян Николаев космонавт, Граждан вӑрҫин участникӗ Василий Чапаев, велоспорт енӗпе тава тивӗҫлӗ спорт мастерӗ Валерий Ярды, карап ӑсти Алексей Крылов тата Геннадий Айги поэт.

Сасӑлав нарӑс уйӑхӗн 25-мӗшӗнче вӗҫленӗ.

деревягино.рф сайтри сӑн

Республикӑра кафесемпе ресторансене талӑкӗпех ӗҫлеме ирӗк панӑ. Ку хушӑва ЧР Элтеперӗ Олег Николаев алӑ пуснӑ.

Аса илтерер: чӳк уйӑхӗнче кафесемпе ресторансене 23 сехетчен ҫеҫ ӗҫлеме ирӗк панӑ. Икӗ эрне каялла вӗсен ӗҫне ҫур ҫӗр иртни 2 сехетчен тӑсма ирӗк панӑччӗ. Халӗ вара талӑкӗпех ӗҫлеме ирӗк пур. Анчах хальлӗхе банкетсем ирттерме юрать.

Кафере зала 75 процент тултарма юрать. Анчах сӗтелсене унчченхи пекех 1,5 метр аякра лартмалла. Пӗр сӗтел хушшинче 4 ҫынран ытларах лармалла мар.

ria.ru сайтри сӑн

Нарӑс уйӑхӗ пуҫланнӑранпа республикӑра 115 ҫын кӑшӑлвирусран вилнӗ. Кӑрлач уйӑхӗнче вара виҫӗ эрнере 232 пациент вилнӗ. Кун пирки федераци информаци центрӗ пӗлтерет.

Ку таранччен 21015 ҫын инфекциленнӗ. Вӗсенчен 19252-шӗ сывалнӑ. Паянхи кун тӗлне 991 ҫын вируса пула вилнӗ. Вӗсенчен 5-шӗ юлашки талӑкра сывлама пӑрахнӑ.

Кӑшӑлвируспа чирлекенсен йышӗ чаксах пырать. Юлашки талӑкра 56 ҫын инфекциленнӗ, 49 ҫын сывалнӑ.Танлаштармашкӑн: юпа уйӑхӗнче 56 ҫын вилнӗ, чӳк уйӑхӗнче – 135, раштавра – 254, кӑрлачра – 350.

ШӖМ тунӑ сӑн

Ҫӗнӗ Шупашкарта 7 ҫулти хӗрача килтен тухса кайнӑ. Юрать-ха, ӑна тупнӑ. Кун пирки ЧР ШӖМӗ пӗлтерет.

Нарӑс уйӑхӗн 20-мӗшӗнче 12 ҫулти хӗрача 7-ри йӑмӑкӗпе Хӗвелтухӑҫ урамӗнчи вулавӑша кайнӑ. Унта кӗҫӗнни тепӗр хӗрачапа калаҫса кайнӑ та унпа пӗрле тарнӑ.

Аппӑшӗ вӗсем ҫурт хыҫнелле тарнине курса ӗлкӗрнӗ, анчах ӑна хӑй тупайман. 22 сехетре амӑшӗ кӗҫӗн хӗрӗ киле килменнине кура полицие пӗлтернӗ.

Полицейскисем хӗрачасем тарнӑ ҫуртри хваттерсене тӗрӗсленӗ. Пӗринче ачасен сассисене илтнӗ. Хайхи хӗрача ют хваттерте ҫывӑрма хатӗрленнӗ, аслисене ӑна ашшӗ-амӑшӗ ирӗк панине ӗнентернӗ.

rg.ru сайтри сӑн

Раҫҫейри влаҫ кӑшӑлвируспа ҫыхӑннӑ пандеми хӑҫан пӗтме пултарассине пӗлтернӗ. Патшалӑх Думин председателӗ Вячеслав Володин экспертсен шухӑшне шута хурса интервьра пӗлтернӗ.

Вӑл палӑртнӑ тӑрӑх, ҫӗршывра пандеми хӑрушлӑхне май килнӗ таран пӗчӗклетме май килнӗ. Экспертсен шухӑшӗпе, ҫулла вӗҫнелле, кӗркунне пуҫламӑшнелле чирлесси самай пӗчӗкленет.

Кӗркунне вара каллех ӳсме пултарать. Ку ҫынсен отпуск вӗҫленнипе, чылайӑшӗ унтан чирлесе таврӑннипе ҫыхӑннӑ.