Куславккаран Ҫӗнӗ Шупашкара ҫитме ҫул ҫывӑхланӗ. «Атӑл» ҫул ҫинчен Нишер ялне ҫитме ҫул сарма палӑртнӑ. Унта асфальт хурсан водительсене Куславккаран Ҫӗнӗ Шупашкара ҫитме ҫул кӗскелӗ. Халӗ автомобильсен урапа ҫулӗпе ҫӳреме тивет. Йӗпе-сапара, паллах, иртсе ҫӳреймӗн.

Ҫӗнӗ ҫул тӑвас пирки Куславкка районӗн социаллӑ пурнӑҫӗпе экономика аталанӑвне сӳтсе явма пухӑнсан (хальхи вӑхӑтра ун пек пухусем тӗрлӗ муниципалитетра иртеҫҫӗ) сӑмах хускатнӑ. Ӗҫе ҫывӑх вӑхӑтра пуҫӑнӗҫ.

Кунсӑр пуҫне Куславккари Октябрьски ҫула юсӗҫ.

Шупашкар хулинчи Кадыков урамӗнчи лавккасенчен пӗринче пӗр арҫын хӗрарӑмӑн телефонне вӑрланӑ. Хӗрарӑм лавккара ача пӳмипе пулнӑ. Ҫыхӑну хатӗрне вӑл унта хунӑ. Ача амӑшӗ тавар суйланӑ самантпа усӑ курса арҫын телефона вӑрласа тарнӑ.

Пӑтӑрмах пӗлтӗрхи чӳк уйӑхӗн 15-мӗшӗнчех пулса иртнӗ. Вӑрланӑ самант видеона лекнӗ.

Пакунлисем вӑрра чылай вӑхӑт шыранӑ. Ҫав ҫын 44 ҫулти арҫын пулнӑ. Вӑл унччен темиҫе хут та тӗрмере ларнӑ икккен. Кирпӗч шутласа тухнӑранпа вӑхӑт нумаях та иртмен — каллех усал ӗҫ тунӑ.

7 пине яхӑн тӑракан смартфона арҫын полицейскисене тавӑрса панӑ. Пуҫиле ӗҫе суда ярса панӑ.

journ.chuvsu.ru сӑнӳкерчӗкӗ

Шупашкарти урамсенчен пӗрне Лев Кураков академик ятне парасшӑн. Кун пирки Чӑваш Республикинчи халӑхсен ассамблейин паян иртнӗ пухӑвӗнче сӑмах хускатнӑ.

Аса илтерер: унта ассамблейӑн ҫӗнӗ ертӳҫи пулма РФ Патшалӑх Думин депутатне Леонид Черкесова суйланӑ.

Лев Кураков пӗлтӗрхи раштав уйӑхӗн 21-мӗшӗнче пурнӑҫран уйрӑлса кайрӗ. Чӑваш Енри паллӑ ӑсчах, экономист, политик И.Н. Ульянов ячӗллӗ Чӑваш патшалӑх университечӗн ректорӗ пулнӑ. Лев Пантелеймонович 1943 ҫулхи кӑрлачӑн 4-мӗшӗнче Патӑрьел районӗнчи Чӑваш Ишекӗнче ҫуралнӑ. Канашри финанс техникумӗнче (1961), Хусанти патшалӑх финанспа экономика институтӗнче (1966) пӗлӳ илнӗ. Аспирантурӑпа доктортантурӑна Мускаври Г.В. Плеханов ячӗллӗ халӑх хуҫалӑх институтӗнче вӗреннӗ, стажировкӑна Берлинра (Аслӑ экономика шкулӗнче) ирттернӗ. 1990 ҫулта ӑна ЧПУ ректорӗн пуканне шанса панӑ. 1997 ҫулта чӑваш Республикин вице-президентне суйланӑ. 1998 ҫулхи кӑрлачпа ҫӗртме уйӑхӗсенче Чӑваш Республикин Правительство председателӗ пулнӑ.

politeka.net сайтри сӑн

Хӗрарӑм реанимацие полицейские ҫапнӑ. Куншӑн унӑн явап тытма тивӗ. Кун пирки прокуратура пӗлтерет.

Ку пӗлтер чӳк уйӑхӗн 18-мӗшӗнче пулнӑ. Йӗпреҫ районӗн пульницинче реанимаци коридорӗнче хуларан тӑванӗ патне килнӗ хӗрарӑм ӳсӗр ларнӑ. Вӑл маска та, бахил та тӑхӑнман.

Йӗрке хуралҫи ӑна тухса кайма ыйтнӑ, анчах ку хӑнк та туман. Унтан тытнӑ та полицейские чӑмӑрӗпе питӗнчен ҫапнӑ. Йӗпреҫ районӗн сучӗ хӗрарӑма 20 пин тенкӗ штраф тӳлеттерме йышӑннӑ. Приговор хальлӗхе вӑя кӗмен.

Ҫӗнӗ Шупашкарти ача пахчин заведующийӗ пулнӑ хӗрарӑм хӑйӗн амӑшне ӗҫе хут ҫинче илсе ӑна шалу куҫарса панине Чӑваш халӑх сайчӗ пӗлтернӗччӗ.

Халӗ ӑна суд туса 40 пин тенкӗ штраф хурса панӑ.

Хӗрарӑм хӑйӗн амӑшне ӗҫленӗҫи туса укҫа тӳлесе пурӑннипе ҫеҫ ҫырлахман. Вӑл ӗҫ вырӑнӗпе усӑ курса ҫынсен премийӗсене хӑйӗн кӗсйине чикме кӑмӑлланӑ.

Амӑшне хӗрарӑм-заведующи 2019 ҫулхи утӑ уйӑхӗнче ӗҫе илнӗ. Хут ҫине вӑл кӗҫӗн воспитатель тесе кӑтартнӑ. 3,5 уйӑхра ӑна 39 пин тенкӗ тӳленӗ. Кунсӑр пуҫне заведующи 2019 ҫулхи авӑн уйӑхӗнчен тытӑнса 2020 ҫулхи ака уйӑхӗччен пӗр ӗҫчене 62 пин тенкӗ преми тӳленӗ, ҫав шутран 40,5 пин тенкине каялла илнӗ. Ҫавӑн пек мелпе 2019 ҫулхи раштав уйӑхӗнченпе 2020 ҫулхи ҫурла уйӑхӗччен тепӗр ӗҫченрен 59 пин тенкӗ илнӗ.

Куславккара ача пахчи валли пристрой тума тытӑннӑ та ӑна паянхи кунччен те вӗҫлеймен. «Чӑваш Ен» ПТРК журналисчӗсем ку ыйтӑва тишкернӗ.

Хулари «Комаровка» микрорайонта шкул пур, ача пахчи вара ҫук. Ашшӗ-амӑшӗ ачисене хула варринчи ача пахчине илсе ҫӳрет.

Пӗлтӗрхи чӳк уйӑхӗнче 2-мӗш шкул ҫумне пристрой тунӑ. Унта 40 ача валли вырӑн пулмалла. Анчах шӑпӑрлансем халӗ те унта ҫӳремеҫҫӗ-ха.

Строительство ӗҫӗсем пӗтнӗ-ха, хатӗр-хӗтӗрӗн пӗр пайне туяннӑ, анчах уншӑн тӳлемен. Пӗтӗмпе тата 4 миллион тенкӗ тӳлемелле. 10,5 пин тенкине тӳленӗ.

cap.ru сӑнӳкерчӗкӗ

Пӑрачкав районӗнчи ача пахчинче пилӗк ҫын кӑшӑлвируспа чирлесе ӳкнӗ. Кун пирки район администрацийӗн пуҫлӑхӗ Евгений Лебедев оперативлӑ штаб ларӑвӗнче пӗлтернӗ.

Вӑл каланӑ тӑрӑх, воспитательницӑн упӑшки шапаша ҫӳренӗ, унта кӑшӑлвируспа чирленӗ. Вӑл килсен арӑмӗ те чирлесе ӳкнӗ, анчах килте ларман, ӗҫе тухнӑ. Ҫапла 5 ҫын инфекциленнӗ.

Хальхи вӑхӑтра республикӑра 10 шкулти 11 класс дистанци мелӗпе вӗренет, училище-техникумра – 3 ушкӑн. Куславкка районӗнчи Энтри Пасар шкулне вара карантина хупнӑ.

Ҫӗнӗ Шупашкарта арҫын лавккаран духи вӑрланӑ. Кайран ӑна совеҫ кӑшлама пуҫланӑ та вӑл каҫару ыйтса сутуҫӑсем патне ҫыру ҫырнӑ.

Пӗлтӗр пуш уйӑхӗн 8-мӗшӗнче 56 ҫулти арҫын лавккана кӗнӗ те духи йӑтса тухнӑ. Сутуҫӑ ҫакна асӑрхаса ун хыҫҫӑн чупнӑ, анчах ӗлкӗреймен, лешӗ тарса пытаннӑ.

Тӗнче тетелӗнче арҫынна шыраса пӗлтерӳсем вырнаҫтарнӑ. Арҫын ҫакна курса тепӗр ҫын урлӑ сутуҫӑсене каҫару ыйтнӑ ҫыру панӑ. Ӳкӗннине палӑртса, хакне саплаштарма 2,5 пин тенкӗ парса янӑ. Анчах духи хакне саплаштарма 500 тенкӗ ҫитмен.

Кӑҫал арҫынна тытса чарнӑ. Полицире каланӑ тӑрӑх, вӑл духине юратнӑ хӗрарӑмӗ валли вӑрланӑ.

Чӑваш Ен Наци вулавӑшӗнчи «Кӗмӗл ӗмӗр» галерейӑра ӗнер, нарӑс уйӑхӗн 18-мӗшӗнче, «Айхие пуҫ тайса. Игорь Улангин графики» ятпа курав уҫӑлнӑ.

Вулавӑшра пӗлтернӗ тӑрӑх, курав икӗ пайран тӑрать тейӗн. Пӗр енчен – хура-шурӑ: графика, текстсем, кӗнеке макечӗсем тата К.М. Бельманӑн кӑларӑмӗсем валли хатӗрленӗ кӗнеке макечӗсем тата ӳкерчӗксем (вӗсене чӑвашла куҫараканӗ тата редакторӗ — Г. Айги). Тепӗр енче — 2019 ҫулта пичетленнӗ «Поклон – пению» кӗнекин тӗрлӗ тӗслӗ листисемпе ӳкерчӗкӗсем.

Курава Игорь Улангин художник тата Геннадий Айхи поэтӑн пултарулӑхне хаклакансем пухӑннӑ. Вӗсен хушшинче пултарулӑх ҫыннисем, журналистсем пулнӑ.

Курава Олег Улангин, вӑл — Игорь Улангинӑн тӑванӗ, уҫнӑ. Уяв каҫне Атнер Хусанкай литература критикӗ ертсе пынӑ.

Курав пуш уйӑхӗн 23-мӗшӗччен ӗҫлӗ.

cap.ru сӑнӳкерчӗкӗ

Ӗнер Шупашкарти «Каскад» суту-илӳ центрӗнче кӑшӑлвирусран хӳтӗленмелли прививка тумалли пункт уҫӑлнӑ. Вӑл нарӑс уйӑхӗн 21-мӗшӗччен 14-19.30 сехетсенче ӗҫлӗ.

Паянхи кун тӗлне ку пунктра 100 ытла ҫын прививка тунӑ. Ытларахӑшӗ – 60 ҫултан аслӑраххисем. Пунктра Роспотребнадзор ыйтакан условисене тунӑ, медицинӑра усӑ курмалли морозильник вырнаҫтарнӑ. Унта пырса кирек кам та прививка тума пултарать.

Пациента малтан тухтӑр пӑхать. Ҫумра паспорт, СНИЛС, полис пулмалла. Тепӗр 21 кунран «Каскадра» пункт каллех уҫӑлӗ. Ун чухне иккӗмӗш прививкӑна тӑвӗҫ.