m.ru24.net сайтри сӑн

РФ Президенчӗ Владимир Путин ҫынсене кӑшӑлвирусран массӑллӑ вакцинаци тума хушнӑ. Ку хушӑва вӑл РФ премьер-министрне Татьяна Голиковӑна панӑ. Кун пирки «РИА Новости» пӗлтерет.

Путин хушнӑ тӑрӑх, масштаблӑ вакцинацие тума тепӗр эрнерен тытӑнӗҫ. «Пӗлетӗп, пирӗн 2 миллион ытла доза туса кӑларнӑ е ҫитес темиҫе кунра кӑларма палӑртаҫҫӗ. Тӗнчере кӑшӑлвирусран тумалли пӗрремӗш регистрациленӗ "Спутник V" прививкӑна ку шая ҫитӗ. Ку пире массӑллӑ мар пулин те, масштаблӑ вакцинаци ирттерме май парать. Унччен калаҫса татӑлнӑ пекех, малтан хӑрушлӑх ушкӑнне кӗрекен ҫынсене – тухтӑрсене тата вӗрентекенсене – тӑвӗҫ», - ҫапла каланӑ Владимир Путин РФ Хӳтӗлев министерствин нумай функциллӗ медцентрӗсене уҫнине халалланӑ видеоконференцире.

Раштав уйӑхӗнче пире мӗнле ҫанталӑк кӗтет? Урамра ав шартлама сивӗ хуҫаланать. Синоптиксем пӗлтернӗ тӑрӑх, эрнен иккӗмӗш ҫурринче татах сивӗтӗ. Раштавӑн пӗрремӗш декадинче 20-25 градус сивӗ пулма пултарӗ.

Ку уйӑхӑн виҫҫӗмӗш декадинче «Атлантика» килет. Каллех сивӗ пулӗ. Ҫӗнӗ ҫул умӗн ҫеҫ кӑштах ӑшӑтма тытӑнӗ. Раштавӑн 31-мӗшӗнче тинех ӑшӑ кун пулӗ.

Ҫанталӑк ӑшӑтсанах юр ҫума тытӑнӗ. Раштавӑн юлашки 4 кунӗнче юр хулӑнӑшӗ 7-10 сантиметра ҫитме пултарать. Эппин, Ҫӗнӗ ҫула эпир юрпа кӗтсе илӗпӗр.

81 ҫулти хӗрарӑм ултавҫӑсенчен шар курнӑ. Лешсем ӑна пӗр ҫул суйса пурӑннӑ, укҫа сӑптӑрнӑ.

Ватӑ хӗрарӑм телевизорпа сиплевҫӗ пирки пӗлтерӳ курнӑ. Хайхискер унпа ҫыхӑннӑ лешӗ унран укҫа ыйтма пуҫланӑ. Кинемей лешӗ ыйтнине пурнӑҫласа укҫа куҫарнӑ та куҫарнӑ…

Банк ӗҫченӗсем хӗрарӑмӑн куҫне уҫма тӑрӑшнӑ, укҫа куҫармалла марри пирки асӑрхаттарнӑ. Ватӑскер вара вӗсене итлемен, палламан счетсем ҫине 29 хутчен куҫарнӑ, хӑйӗн юлашки укҫине кӑларса панӑ. Пӗтӗмпе 2 миллион тенкӗ куҫарнӑ.

Палламан ҫынсем шӑнкӑравласа хӑратма тытӑнсан ҫеҫ вӑл тӑна кӗнӗ. Лешсем кредит илсе вӗсене куҫарса пама ыйтнӑ. Кун тӗлӗшпе пуҫиле ӗҫ пуҫарнӑ.

.

vesti-aleksin.ru сайтри сӑн

Паян, хӗллен пӗрремӗш кунӗнче, Шупашкарта иртен-ҫӳрен ҫын пӑр айне анса кайнӑ пулӑҫа ҫӑлнӑ. Кун пирки «Про Город» хаҫата халӑх корреспонденчӗ каласа кӑтартнӑ.

Арҫын Атӑл ҫинче пулӑ тытса ларнӑ. Хайхискер кӑнтӑрла, 12 сехет ҫурӑра, ӑнсӑртран пӑр айне анса кайнӑ. 70 ҫулти арҫынпа мӗн пуласси пирки шутлама та хӑрушӑ.

Пулӑҫ кӑшкӑрашнине илтсен иртсе каякан ҫын пулӑшма васканӑ. Вӑл ӑна шывран туртса кӑларма пултарнӑ. Вырӑна васкавлӑ медпулӑшу машини ҫитнӗ. Пӑр айне анса кайнӑ арҫынна пульницӑна илсе кайнӑ.

ШӖМ тунӑ видео скринӗ

Ватӑ хӗрарӑмсене вӗлерне ҫынна тытса чарнӑ. Ӑна 9 ҫул шыранӑ. Ҫак арҫын тӗрлӗ регионти, ҫав шутра – Чӑваш Ен те, хӗрарӑмсене 2011-2012 ҫулсенче вӗлернӗ.

26 хӗрарӑма вӗлернӗ тӗслӗхе следовательсем уҫӑмлатайман. Анчах ҫакӑ паллӑ пулнӑ: вӗсене пурне те пӗр ҫыннах вӗлернӗ.

Ҫак тискер ӗҫсене кам тума пултарнине тупса палӑртнӑ. Вӑл – Хусанта пурӑнакан Радик Тагиров. Слесарьте ӗҫлекен арҫын 2009 ҫулта вӑрланӑшӑн судпа айӑпланнӑ.

Тутарстанри ШӖМ пӗлтернӗ тӑрӑх, вӑл ватӑ хӗрарӑмсен шанӑҫне кӗнӗ. Хӑй ЖКХ е социаллӑ служба ӗҫченӗ тесе хваттере кӗнӗ. Кил хуҫи хӗрарӑмне вӗлерсен вӗсене укҫи-тенкине вӑрласа кайнӑ.

gasi.culture21.ru сайтри сӑн

«Чӑвашкино» киностуди директорӗ тӗлӗшпе пуҫиле ӗҫ пуҫарнӑ. Мӗнпе айӑпа кӗнӗ-ха ҫак пуҫлӑх?

Следстви версийӗ тӑрӑх, 2018 ҫулхи чӳк уйӑхӗнче «Чӑвашкино» директорӗ «Наследие» фильм ӳкермешкӗн «СибирьСтройПроект» тулли мар яваплӑ обществӑпа 1,1 миллион тенкӗлӗх килӗшӳ алӑ пуснӑ. Иккӗмӗш вырӑна Ибрагимов Рустем Решитович харпӑр усламҫӑ йышӑннӑ. Следовательсем шутланӑ тӑрӑх, «Чӑвашкино» директорӗ Андрей Абдюшов аукцион ҫӗнтерӳҫине аукционра выляса янӑ усламҫӑпа субподряд килӗшӗве тумашкӑн ӳкӗте кӗртме тӑрӑшнӑ. Унсӑрӑн килӗшӗве пӑрахӑҫлассипе, сценарие ҫирӗплетмессипе хӑратнӑ.

Ҫӗнтерӳҫӗпе килӗшӗве чӑнах та пӑрахӑҫланӑ, ку тивӗҫе суту ирттемесӗр усламҫа панӑ.

polis812.ru сайтри сӑн

Чӑваш Енре пӗр талӑкра кӑшӑлвируспа чирлекенсен йышӗ сахалланса пырать. Чӳкӗн 29-мӗшӗнче 124 ҫын чирленӗ, ӗнер 114-ӑн инфекциленнӗ.

Ку лайӑх хыпар-ха. Анчах каварлӑ вируса пула вилекенсем кашни кун тенӗ пекех пур. Паянхи кун тӗлне тепӗр 6 ҫын вилнӗ. Ҫапла ку таранччен кӑшӑлвирус 284 ҫыннӑн пурнӑҫне татнӑ.

Паянхи кун тӗлне 12673 ҫын инфекциленнӗ, вӗсенчен 11543-шӗ сывалнӑ. Юлашки талӑкра 110 ҫыннӑн кӑшӑлвирус пуррине палӑртнӑ. Юлашки талӑкра 24 ҫын инфекциленнӗ. Хальхи вӑхӑтра «кӑшӑлвирус» диагноз лартнӑ 846 ҫын килте амбулатори мелӗпе е пульницӑра сипленет.

Раштав уйӑхӗн 3-мӗшӗнче «За Россию» (чӑв. Раҫҫейшӗн)3 халӑх фрончӗ Пӗтӗм тӗнчери сусӑр ҫынсен кунӗ тӗлне «Доступная среда» (чӑв. Хӑтлӑ хутлӑх) тест йӗркелӗ.

Проекта аслӑ шкулсенче тата шкулсенче вӗренекенсем, обществӑлла апатлану предприятийӗсенче ӗҫлекенсем, йла пулӑшӑвне кӳрекенсем, регионсенчи тата муниципалитетсенчи влаҫ органӗсенче тӑрӑшакансем хутшӑнасса шанаҫҫӗ. Чӑваш Енӗн Ӗҫ тата социаллӑ хӳтлӗх министрествинче пӗлтернӗ тӑрӑх, тест сусӑрсен тӗлӗшпе тимлӗрех пулмаллине аса илтерме тивӗҫ.

Теста хутшӑнас тесен https://edu.rirportal.ru/total-test-2020/ каҫӑпа иртмелле.

Станислав Юхтар

Станислав Юхтар художник 60 ҫул тултарнине, шел те, каярах юлса пӗлтӗмӗр. Ку пулӑм ҫинчен «Тӑван Атӑл» журналта Арсений Тарасов журналист тата драматург ҫырса пӗлтернӗ.

«Хӑй утса ҫӳрекен ҫӗр чӑмӑрӗ ӑна хӗвел тавра 60 хут ҫавӑрттарса вӗҫӗ-хӗррисӗр галактикӑна кӑтартать. Станислав Николаевичӑн хӑйӗн галактики пур, вӑл — чӑваш тӗнчи. 60 ҫул ҫав тӗнчен сывлӑшӗпе сывлать, ҫав тӗнчен юрри-кӗввине итлесе киленет, Митта Ваҫлейӗ: «Эпӗ чӑвашла калаҫнӑ чухне чунпа канатӑп», — тенӗ пек тӑван чӑвашсемпе тӑван чӗлхепе 60 ҫул калаҫса чунпа канать», — ӑшшӑн паллаштарнӑ пултаруллӑ ҫыравҫӑ.

«Пирӗнешкел ытти ҫын пекех темелле. Анчах вӑл сывлакан сывлӑш та, вӑл илтекен юрӑ-ҫемӗ те, калаҫӑвӗ те пирӗннинчен, хальхинчен, урӑхларах пулнӑн туйӑнать, мӗншӗн тесен Юхтарӑн чӑваш тӗнчи — сӗм-сӗм ӗмӗрсем каяллахи чӑваш йӑхӗсен тӗнчи», — малалла тӑснӑ сӑмахне Арсений Тарасов.

Станислав Юхтар Ҫӗрпӳ районӗнчи Вӑрӑмҫут ялӗнче 1960 ҫулхи чӳк уйӑхӗн 3-мӗшӗнче ҫуралнӑ, унтах тӗпленсе пурӑнать. Вӑл – график, живописҫӑ, Раҫҫей художникӗсен союзӗн пайташӗ. Чӑваш патшалӑх педагогика институтӗнчи художествӑпа графика факультетӗнчен вӗренсе тухнӑ.

Малалла...

Чӑваш патшалӑх ҫамрӑксен театрӗн Николай Гоголь повеҫӗ тӑрӑх лартнӑ «Шинель» спектаклӗ Ача-пӑчан пӗтӗм тӗнчери пысӑк фестивалӗнче лауреат ятне тивӗҫнӗ. Унӑн режиссерӗ – Мускаври Владимир Беляйкин режиссер. Фестивальте чӑваш спектаклӗ «Чи лайӑх музыка спектаклӗ» номинацире ҫӗнтернӗ.

Фестивальти ӗҫсене Мускаври кӗпӗрне театрӗнче ӗнер пӗтӗмлетнӗ. Ку мероприятие асӑннӑ театрӑн илемлӗх ертӳҫи – Раҫҫей халӑх артисчӗ Сергей Безруков йӗркеленӗ. Фестивале вӑл 2018 ҫулта пуҫарнӑ.

Фестивале тӑратнӑ ӗҫсене 6-16 ҫулсенчи ачасенчен тӑракан тӳресем хакланӑ. Вӗсем — актер студийӗсене ҫӳрекенскерсем, музыкантсем, спорстменсем, пӗтӗм ҫӗршыври Олимпиадӑсен ҫӗнтерӳҫисем.

Фестивале хупни ҫинчен хатӗрленӗ репортаж «Пӗрремӗш канал» телеканалпа паян ирхине «Доброе утро» (чӑв. Ырӑ ир) кӑларӑм эфирӗнче пулчӗ. Унта Ҫеҫпӗл Мишши ячӗллӗ Чӑваш патшалӑх ҫамрӑскен театрӗн директорӗ Елена Николаевӑна тата «Шинель» спектаклӗн режиссерне Владимир Беляйкина кӑтартрӗҫ. Режиссер чӑваш артисчӗсемпе ӗҫлеме питӗ килӗшнине пӗлтерчӗ.