cap.ru сайтри сӑн

ЧР транспорт министрӗн ҫумне Максим Петрова ӗнер ӗҫрен кӑларни пирки пӗлтернӗччӗ. Халӗ вара вӑл урӑх должноҫе йышӑннӑ. Максим Петров – транспорт министрӗ.

Вӑл транспорт министрӗ пулнӑ Владимир Осипов ӗҫрен кайсан унӑн тивӗҫӗсене пурнӑҫланӑ. Унччен вӑл унӑн ҫумӗ пулнӑ.

Максим Петров 2020 ҫулхи юпа уйӑхӗччен автомобиль ҫулӗсен аталанӑвӗн пайӗн пуҫлӑхӗн тивӗҫӗсене пурнӑҫланӑ. Министр ҫумӗнче 3 ҫул ӗҫленӗ.

mintrans.cap.ru сӑнӳкерчӗкӗ

Чӑваш Енӗн Правительствинче черетлӗ кадр улшӑнӑвӗ пулса иртнӗ. Ӗнер, раштав уйӑхӗн 6-мӗшӗнче, республикӑн транспорт тата ҫул-йӗр хуҫалӑхӗн министрӗн ҫумне Максим Петрова ӗҫрен кӑларнӑ.

Хушӑва респуюлика ертӳҫи Олег Николаев алӑ пуснӑ. Документа республикӑн влаҫ органӗсен официаллӑ порталӗнче ӗнер вырнаҫтарнӑ.

Чӑваш Енӗн транспорт тата ҫул-йӗр хуҫалӑхӗн министрӗн ҫумӗ пулса Максим Петров 2020 ҫулхи юпа уйӑхӗнченпе ӗҫленӗ.

t.me/alenaelizarova каналтан илнӗ сӑнӳкерчӗк

Чӑваш Енӗн ӗҫ тата социаллӑ хӳтлӗх министрне Алёна Елизаровӑна пӗр ача хӑйӗн «Нарспи» картинине парнеленӗ.

«Вӗсем пирки «хӑйне евӗр» ачасем теҫҫӗ. Ытти ача пекех вӗсем те ачашлӑха, юратӑва туясшӑн, хӑйсемшӗн тӑрӑшнине курасшӑн», — тесе ҫырнӑ министр Телеграмри хӑйӗн страницинче.

Министр Кӳкеҫри ачасен интернат-ҫуртӗнче пулнӑ. Ӑна унта ӑсталӑх лаҫҫине чӗннӗ. Ылтӑн алӑллӑ ачасем тем те пӗр ӑсталаҫҫӗ.

Владислав Разводов вӗтӗ шӑрҫапа чӑваш ялавне тӗрлет. Александр Митрофанов вара хӑйӗн «Нарспи» картинине министра парнеленӗ. Вӑл ӑна йывӑҫа ҫунтарса хатӗрленӗ.

t.me/nikamran сӑнӳкерчӗкӗ

Чӑваш Енри Шупашкар районӗнче ҫуралнӑ Евгений Степанов «Ҫул кӑтартакан ҫӑлтӑр – 2023» премийӗн «Чи лайӑх эскурсовод» номинацийӗнче ҫӗнтернӗ.

Асӑннӑ наградӑна ҫӗршывӑн тӗп хулинче туризма аталантаракансене параҫҫӗ иккен. Мускавра пурӑнакан пирӗн ентешӗмӗр сумлӑ ҫав йыша лекнӗ.

Аса илтерер: Евгений И.Н. Ульянов ячӗллӗ Чӑваш патшалӑх университетӗнчи журналистика факультетӗнче ӑс пухнӑ. Кайран вӑл пӗр хушӑ телевиденире ӗҫленӗ. Ун хыҫҫӑн экскурсисем ирттерме тытӑннӑ.

Унӑн «Мускавра уҫӑлса ҫӳретпӗр» проекчӗ пурнӑҫланма тытӑннӑранпа 7 ҫул ҫитнӗ. Евгений хӑйӗнпе пӗр шухӑшлӑ ҫынсемпе туристсем валли экскурсисем тӳлевсӗрех ирттерет.

t.me/nikamran каналта вырнаҫтарнӑ сӑнӳкерчӗк

Шупашкарти ҫурма ротондӑна историпе культура палӑкӗсен йышне кӗртнӗ. Кун пирки Телеграмри каналсенчен пуринчен хыпарланӑ.

Сӑмах Юрату сӑмсахӗнче вырнаҫнӑ архитектура сооруженийӗ пирки пырать. Телеграмри «Пуринчен малтан. Ҫывӑрса юлмасан» каналта пӗлтернӗ тӑрӑх, ҫурма ротондӑна чӑваш архитекторӗ Феофан Сергеев 1955 ҫулта хӑпартнӑ.

culture.cap.ru сӑнӳкерчӗкӗ

Ыран, раштав уйӑхн 7-мӗшӗнче, 18 сехетре Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче Станислав Кондратьев профессор ҫуралнӑранпа 85 ҫул ҫитнине халалласа пуҫтарӑнӗҫ.

Станислав Алексеевич Раҫҫейӗн педагогика вокал пӗрлешӗвӗн хастарӗсенчен пӗри пулнӑ. Унтан ытти аслӑ шкулти вокал преподавателӗсем те сӗнӳ-канаш ыйтнӑ. Вокал ӑсталӑхне ун патӗнче Мускавра, Чулхулара, Пермьре, Хусанта, Йошкар-Олара, Чӗмпӗрте тата ытти хулара пурӑнакансем те вӗреннӗ.

Станислав Кондратьев 1938 ҫулхи чӳк уйӑхӗн 14-мӗшӗнче Хӗрлӗ Чутай районӗнчи Туктамӑш ялӗнче ҫуралнӑ. 1957 ҫулта Ф.П. Павлов ячӗллӗ музыка училищине вӗренме кӗнӗ. Кайран Хусанти консерваторири вокал кафедринче пӗлӳ илнӗ. 2002 ҫулта Чӑваш патшалӑх культурӑпа ӳнер институтӗнче ӗҫлеме пуҫӑннӑ, Чӑваш патшалӑх университетӗнче вокал кружокне ертсе пынӑ.

mykaleidoscope.ru сайтри сӑн

Йӗпреҫ районӗнче кӑҫалхи утӑ уйӑхӗнче пульница ӗҫченӗ пациент патне килне пынӑ. Вӑл ун патне сывлӑхне тӗрӗслеме ҫитнӗ.

Анчах 72 ҫулти тухтӑрпа инкек пулса иртнӗ. Вӑл картишне кӗнӗ кӑна – ӑна йытӑ уринчен ҫыртнӑ.

Кун хыҫҫӑн район прокуратури тӗрӗслев ирттернӗ. Ҫакӑ палӑрнӑ: кил хуҫи йытӑ ытти ҫынна сиен ан кӳтӗр тесе тӑрӑшман. Прокуратура суда тавӑҫ тӑратнӑ. Йытӑ хуҫинчен 20 пин тенкӗ шыраса илнӗ. Ку – тухтӑра кӑмӑл-сипет тӗлӗшӗнчен сиен кӳнӗшӗн.

1obl.ru сайтри сӑн

Раштав уйӑхӗн 4-5-мӗшӗсенче юн нумай ҫунӑ хыҫҫӑн халӑх тетелӗсенче ҫулсене тасатманни пирки ҫӑхав нумайланнӑ. Ытларах – Шупашкарта, Ҫӗнӗ Шупашкарта, Улатӑрта, Етӗрне тата Шупашкар округӗсенче пурӑнакансенчен.

Ҫула хырман тӑк ӑҫта ҫӑхав ҫырмалла? Федераци трассисене «Волго-Вятскупрдор» пӑхса тӑрать, ҫак сайтра ҫӑхав ҫырма пулать: www.rosavtodor.ru. Вырӑнти ҫулсене муниципалитетӑн тасатмалла.

Муниципалитетсен хушшинчи ҫулсене юртан тасатманни пирки ҫак номерпе шӑнкӑравласа пӗлтермелле: 8-919-971-01-08. Е бота ҫырмалла: @Roadmonitor_bot.

Кӑҫал синоптиксем хӗл сивӗ те юрлӑ пуласса шантараҫҫӗ. Вӑтам температура 1 градус сивӗрех, юн нормӑран кӑшт нумайрах пулмалла.

Чи сивви нарӑс пулӗ. Кӑрлач уйӑхӗ климатпа килӗшӳллӗн иртмелле. Раштав уйӑхӗ вара нормӑран кӑшт ӑшӑрах пулмалла. Вӑл чи юрли пулӗ. Раштавра вӑтам кӑтартуран ытларах юр ҫумалла. Ку уйӑхра юр хулӑнӑшӗ 30 сантиметра ҫитмелле, кӑрлачра – 38 сантиметра, нарӑсра – 46 сантиметра.

Малтанлаха палӑртнӑ тӑрӑх, чи сивӗ кунсем нарӑс уйӑхӗнче пулӗҫ. Ун чухне ӑшӑтас шанчӑк пӗчӗк.

Инкеклӗ лару-тӑру министерстви сайтри сӑн

Паян Шупашкарта ҫӑлавҫӑсем Атӑлта пӑр айне анса кайнӑ арҫынна пулӑшнӑ. Ку пӑтӑрмах юханшывӑн сылтӑм енче 10 сехетре насос станцийӗнчен инҫех мар пулса иртнӗ.

Арҫын ҫыран хӗрринчен 300 метр аякра пӑр айне анса кайнӑ. Ҫакна курнӑ ҫынсем тӳрех ҫӑлав службине шӑнкӑравланӑ. Вырӑна чи малтан Сергей Орлов тата Павел Самочков ҫитнӗ. Вӗсем Инкеклӗ лару-тӑру министерствин ГИМС центрӗн инспекторӗсем.

Пӑрлӑ шывран туртса кӑлариччен арҫын шӑнса кӳтнӗ, вӑйран кайнӑ. Ӑна ҫӑлсан тухтӑрсен аллине панӑ.