ШӖМ тунӑ сӑн

Нарӑс уйӑхӗн вӗҫӗнче Муркаш округӗн полици уйрӑмне арҫын пиччӗшӗ ҫухални пирки пӗлтернӗ. Лешӗ эрехпе айкашма юратнӑ. Вӑл нарӑс уйӑхӗн 24-мӗшӗнче ҫӗрле ҫухалнӑ. Ҫемйи ун пирки нимӗн те пӗлмен.

Москакасси ялӗнче пурӑнакан ҫак арҫынна полицейскисем тепӗр кунхине Юнкӑ ялӗнче тупнӑ. Аслӑ инспектор Алексей Илларионов тата Марина Блинова инспектор ӑна полици уйрӑмне илсе ҫитернӗ, вӑл тупӑнни пирки тӑванӗсене пӗлтернӗ.

Чӑваш академи драма театрӗнче Йӗпреҫ ентешлӗхӗ хӑйӗн черетлӗ уявне ирттерчӗ. Ӑна ҫемье ҫулталӑкне халалланӑ.

Пухӑннисене ентешлӗх ертӳҫи, Чӑваш Республикин тава тивӗҫлӗ артистки А. Краснова, Йӗпреҫ муниципаллӑ округӗн администраци ертӳҫи И. Семенов, Чӑваш патшалӑх Канашӗн ялхуҫалӑх ыйтӑвӗсемпе ӗҫлекен комитет ертӳҫин ҫумӗ Р. Алексеев, Республикӑри театр ӗҫченӗсен пӗрлӗхӗн председателӗ С. Павлов, ветерансене пӗрлештерсе тӑракан обществӑлла организацисен тата тӗрлӗ ентешлӗхсен представителӗсем ӑшшӑн саламларӗҫ, ентешлӗх ӗҫне хастар хутшӑнакансене, салтак амӑшӗсемпе мӑшӑрӗсене тата ӗҫре палӑрнисене Хисеп хучӗсем тата парнесем парса чысларӗҫ.

Уявра Йӗпреҫ поселокӗнчен, Хурамал, Туҫа, Кӗлемкасси, Ирҫе Ҫармӑс тата ытти ялсенчен килнӗ пултарулӑх ушкӑнӗсем, Йӗпреҫри ачасен музыка шкулне ҫӳрекенсем чӑваш, вырӑс, ирҫе юрри-ташшипе куракансене савӑнтарчӗҫ.

Шел пулин те, пухӑннисене калаҫтарнӑ пӗр ҫитменлӗх пирки те каласа хӑвармалла. Халиччен республикӑри ентешлӗх уявӗсем тӑван чӗлхепе иртекенччӗ. Хальхинче Йӗпреҫсем ҫак хӑнӑхнӑ йӑлана уясшӑн пулмарӗҫ.

Анна Егорован халӑх тетелӗнчи страницинчен илнӗ сӑнӳкерчӗк

И.Н.Ульянов ячӗллӗ Чӑваш патшалӑх университетӗнче «Тӑван чӗлхепе тӑван литературӑна чи лайӑх вӗрентекен» конкурсӑн 2-мӗш кунӗ иртнӗ.

Конкурса 21 вӗрентекен хутшӑннӑ. «Иккӗшӗ тӑван вырӑс чӗлхи вӗрентекенсем, виҫҫӗшӗ пуҫламӑш шкул вӗрентекенӗсем, ыттисем тӑван чӑваш чӗлхи вӗрентекенсем», – тесе хыпарланӑ Анна Егорова халӑх тетелӗнчи хӑйӗн страницинче.

Чи маттурисен йышӗнче: Анна Вельдяева (Улатӑр тӑрӑхӗнчи Алтышево шкулӗнче вырӑс чӗлхи вӗрентекен); Алевтина Димитриева (Муркаш тӑрӑхӗнчи Ярапайкасси шкулӗнче чӑваш чӗлхи вӗрентекен); Ксения Леонтьева (Ҫӗрпӳ хулин 2-мӗш шкулӗнче чӑваш чӗлхи вӗрентекен); Людмила Николаева (Шупашкар хулин 62-мӗш шкулӗнче чӑваш чӗлхи вӗрентекен);

Алёна Алена (Йӗпреҫ посёлокӗн 2-мӗш шкулӗнче чӑваш чӗлхи вӗрентекен).

Анна Егорован халӑх тетелӗнчи страницинчи сӑнӳкерчӗк

Чӑваш Республикин Вӗренӳ институтӗнче паллӑ ӑсчах, филологи ӑслӑлӑхӗн докторӗ Николай Егоров профессор ҫуралнӑранпа 75 ҫул ҫитнине халалласа «Чӗлхе пулмасан халӑх та пулмасть …» ҫавра сӗтел иртнӗ.

Николай Егоров – тюрколог-лингвист, филологи наукисен докторӗ (1992), профессор, Чӑваш Республикин наукӑн тава тивӗҫлӗ ӗҫченӗ (1999), Турккӑ лингвистика обществин член-корреспонденчӗ, Пӗтӗм тӗнчери тюркологсен ассоциацийӗн президиумӗн пайташӗ.

Вӑл Вӑрмар районӗнчи Ҫӳлти Кинчер ялӗнче ҫуралнӑ.

mperspektiva.ru сайтри сӑн

Шупашкарта пурӑнакан 36 ҫулти арҫынна тытса чарнӑ. Вӑл хӑйӗн 12-ри хӗрне мӑшкӑлласа пурӑннӑ тесе шутлаҫҫӗ.

Рен ТВ пӗлтернӗ тӑрӑх, арҫын савутра стропальщикре ӗҫлет. Ун тӗлӗшпе икӗ пуҫиле ӗҫ пуҫарнӑ. Следстви шухӑшӗпе, вӑл 12-ри хӗрне 2022 ҫулхи ҫулларанпа 2023 ҫулхи раштавччен мӑшкӑлласа пурӑннӑ. Вӗсен ҫемйи учетра тӑмасть, арӑмӗ пур. Ҫак арҫын унччен судпа ҫыхланманни паллӑ.

sovch.chuvashia.com сайтри сӑн

Пуш уйӑхӗн 1-мӗшӗнчи мониторинг кӑтартнӑ тӑрӑх, халӑхран 1 литр сӗте 22,6 тенкӗпе пуҫтараҫҫӗ. Пӗлтӗр ку вӑхӑтра хак 22,4 тенкӗпе танлашнӑ. Апла сӗт хакӗ 20 пус ӳснӗ.

Пӗлтӗр пуш уйӑхӗнче Раҫҫейӗпех халӑхран пухакан сӗт хакӗ чакнӑ. Ҫакна санкцисем пулнипе, суту-илӳре сӗт юр-варӗ нумайланнипе, халӑх сӗт-турӑх таврашне сахалрах туянма пуҫланипе сӑлтавланӑ. Кайран вара ҫулла ҫитнӗ - ӗнесем симӗс курӑк ҫине тухса сӗт ытларах антарма тытӑннӑ. Ҫакна пула та хак чакнӑ.

Хальхи вӑхӑтра Элӗк, Комсомольски, Сӗнтӗрвӑрри округӗсенче сӗтшӗн ытларах тӳлеҫҫӗ - 1 литршӑн 26 тенкӗ таран. Чи пӗчӗк хаксем - Йӗпреҫ, Пӑрачкав, Шӑмӑршӑ, Вӑрмар округӗсенче: унта пӗр литр сӗте 19 тенкӗрен пуҫласа 21 тенкӗ таран хакпа туянаҫҫӗ.

BadShofer сайтри сӑн

Шупашкарти экономикӑпа технологи колледжӗн преподавателӗ студента тапнӑ. Ку видео тӗнче тетелӗнче сарӑлнӑ.

Студент занятире кансӗрленӗ-мӗн. Ҫавӑнпа хӗрарӑм вӗрентекен ӑна аудиторирен малтан тӗксе кӑларса яма хӑтланать, унтан тапать. Анчах студент ҫавах каялла таврӑнса пӗрремӗш парта хушшине ларать.

ЧР Вӗренӳ министерствин пресс-служби пӗлтернӗ тӑрӑх, ку тӗслӗх тӗлӗшпе ведомство тӗрӗслев ирттерӗ.

"Чеб.ру" сайтри сӑн

«Чеб.ру» форум сайт пӗлтернӗ тӑрӑх, Чӑваш Енри ҫынсен прависене хӳтӗлекен уполномоченный Сергей Романов пурнӑҫран уйрӑлнӑ. Вӑл 46 ҫулта пулнӑ.

Сергей Романов 1978 ҫулта Кӳкеҫре ҫуралнӑ. Аслӑ шкултан вӗренсе тухсан, салтакран таврӑнсан вӑл ЧР шалти органӗсенче тата Юстици министерствин управленийӗнче ӗҫленӗ. Унтан прокуратура органӗсенче те вӑй хунӑ.2020 ҫулта вӑд тивӗҫлӗ канӑва тухнӑ. Ҫав ҫулах ӑна ҫынсен прависене хӳтелекен уполномоченнӑй пулма шаннӑ.

Шупашкарта пурӑнакан 64 ҫулти хӗрарӑм криптовалютӑпа укҫа ӗҫлесе илес тенӗ.

Рекламӑна вӑл тӗнче тетелӗнче курнӑ та унта заявка хӑварнӑ. Кӗҫех унпа ҫыхӑнакан та тупӑннӑ. Тава тивӗҫлӗ канури хӗраӑм туххӑмрах мӗнпур укҫине — 7,5 миллион тенке — унта хывнӑ. Укҫа ӗҫлесе илме ӗмӗтленнӗ ватӑ куҫман пурлӑх сутса тунӑ укҫисӗр тӑрса юлнӑ.

cap.ru сайтри сӑн

Шупашкарта иртекен «Ҫӗрулми» курава нумай ҫын килсе курнӑ, ҫӗрулми нумай туяннӑ. Пӗрремӗш кунхине кӑна 30 тонна ҫӗрулми сутӑннӑ. Пӗлтӗр халӑх куравра 45-50 тонна ҫӗрулми туяннӑ.

Ҫын нумай килнине кура ЧР ял хуҫалӑх министрӗ Сергей Артамонов ака уйӑхӗнче каллех курав йӗркелессине пӗлтернӗ. Тепӗр ҫулхине вара курава тӳрех темиҫе вырӑнта йӗркелесшӗн.

«Курав уҫӑлчӗ кӑна-ха, черетсем вара ӳсеҫҫӗ те ӳсеҫҫӗ. Кун пеккине тахҫанах курман. Сутассине, паллах, кӑштах лайӑхрах йӗркелемелле», - тенӗ Сергей Артамонов министр.