Шупашкарта ҫуралнӑ, халӗ Мускавра вӗренекен Валентина Алексеева «Раҫҫей мисӗ» ята ҫӗнсе илни пирки пӗлтернӗччӗ.

Халӗ Валентина Мексикӑна Раҫҫей чысне «Тӗнче мисӗ» конкурсра хӳтӗлеме кайнӑ.

Конкурс чӳк уйӑхӗн 16-мӗшӗнче иртӗ. Унччен, чӳк уйӑхӗн 14-мӗшӗнче, наци костюмӗсене кӑтартас енӗпе шоу иртӗ.

"Чӑваш Ен" ПТРК видеовӗнчен илнӗ скриншот

Кӑҫал республикӑри колхоз театрӗсене пуҫарса янӑранпа 90 ҫул ҫитет. Ҫавна май Кӳкеҫре тӗрлӗ мероприяти ҫине тӑрсах йӗркелеҫҫӗ.

Ҫак уйӑхӑн пуҫламӑшӗнче унти вулавӑшра, сӑмахран, ҫавра сӗтел иртнӗ. Ыран вара Кӳкеҫре фестиваль пулӗ. Унта вырӑнти хӑй тӗллӗн вӗреннӗ сцена ӑстисемпе, шкул ачисемпе пӗрлех Чӑваш патшалӑх академи драма театрӗн артисчӗсем те хутшӑнӗҫ. кун пирки Чӑваш халӑх сайтне Шупашкар муниципаллӑ округӗнчи культура, туризм, социаллӑ аталану пайӗн пуҫлӑхӗ Маргарита Павлова пӗлтерчӗ.

Инкеклӗ лару-тӑру министерстви тунӑ сӑн

Муркаш округӗнче юпан 25-мӗшӗнче 59-ти тата 60 ҫулти арҫынсем кимӗпе пулӑ тытма кайнӑ та таврӑнман.

Паян ирхине ҫӑлавҫӑсем вӗсен виллине Васильевка выҫҫӑлккинчен 3 ҫухрӑмра тупнӑ. Инкеклӗ лару-тӑру министерстви пӗлтернӗ тӑрӑх, халӗ ку инкек мӗнле пулнине тӗпчеҫҫӗ. Ведомство кимме ларнӑ чухне ҫӑлав жилеткине тӑхӑнмалли пирки аса илтереҫҫӗ.

Ольга Иванова страницинчен илнӗ сӑнӳкерчӗк

Чӑваш кӗнеке издательствинче Сергей Павлов ҫыравҫӑн «Кам-ши вӑл, Ҫеҫпӗл? Кто он, Сеспель?» кӗнеки пичетленсе тухнӑ.

«Ҫак кӗнеке куҫ умӗнче ҫуралчӗ тесен те йӑнӑш мар. Сергей Павлов чӑваш халӑх ҫыравҫипе Ольга Федорова редактор алҫырӑва самай чутларӗҫ-якатрӗҫ, ҫӗнӗлӗх кӗртрӗҫ. Кӑларӑм кӗҫӗн ҫулсенчи вулакансемшӗн ӑнланмалла, ҫав хушӑрах интереслӗ пултӑр тесе чылай тӑрӑшрӗҫ. Екатерина Васильевӑпа пӗрле ятарлӑ сӑнӳкерчӗксем тума Ҫеҫпӗлпе ҫыхӑннӑ вырӑнсене ҫитсе килчӗҫ. Юлия Лутошкина иллюстратор чаплӑ ӳкерчӗксем калӑпларӗ», — хыпарланӑ ҫӗнӗ кӑларӑма епле хатӗрлени пирки Чӑваш кӗнеке издательствин редакторӗ Ольга Иванова халах тетелӗнчи хӑйӗн страницинче.

cap.ru сайтри сӑн

Шупашкарта авӑн уйӑхӗнче троллейбуссенче СПБ урлӑ тӳлесен билет хакӗ 8 тенкӗ йӳнӗрех пулнӑ. Ку акцие ҫулталӑк вӗҫӗччен тӑсма йышӑннӑ. Ку мелпе Шупашкарта тата Ҫӗнӗ Шупашкарта тӳлеме пулать. Акци раштав уйӑхӗн 31-мӗшӗччен тӑсӑлӗ.

Ҫапла майпа Шупашкарти троллейбуссенче тата Ҫӗнӗ Шупашкара ҫӳрекен 62-мӗш троллейбусра билет хакӗ 21 тенкӗ пулӗ. Ҫӗнӗ Шупашкарти троллейбуссенче вара – 17 тенкӗ.

cheb-centr.soc.cap.ru сӑнӳкерчӗкӗ

Шупашкар хулинче пурӑнакан Лина Емельянова чылай ҫул Италире ӗҫленӗ, вӑл унти ватӑсене пӑхса пурӑннӑ. Халӗ хӗрарӑм Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрта социаллӑ ӗҫчен пулса тӑрӑшать.

Паян 50 ҫул тултарнӑ Лина Аркадьевна пӗлтернӗ тӑрӑх, ватӑсене хӗрхенсе пулӑшас тени шӑпах Италирен пуҫланнӑ та. Вӑл паян 10 ватта пӑхса тӑрать, вӗсенчен ҫиччӗшӗ патне кунсерен кайса тӑрать.

"Контактри" сӑн

Пӗтӗм тӗнчери «Артек» ача-пӑча центрӗнче «Пысӑк тӑхтав» конкурса пӗтӗмлетнӗ. Чӑваш Енри виҫӗ шкул ачи унта 1 милион тенкӗлӗх сертификата тивӗҫнӗ.

Вӗсем – Ҫӗнӗ Шупашкарти 18-мӗш лицейри Соня Степанова, Шупашкарти 5-мӗш гимназири Екатерина Аврамова, Ҫӗрпӳри 1-мӗш шкулти Елена Ракчеева.

Сӑмах май, конкурса, Чӑваш Енри 19 шкул ачи хутшӑннӑ.

"На связи" форумри сӑн

Ҫӗнӗ Шупашкартан Шупашкара ҫӳрекен 101С автобус халӗ «Университет» микрорайона таран ҫитет. Вӑл Вӑрман урамӗнче чарӑнать.

Унччен ҫак маршрутӑн юлашки чарӑнӑвӗ И.Н. Ульянов ячӗллӗ Чӑваш патшалӑх университечӗн ҫӗнӗ корпусӗ патӗнче пулнӑ. Сӑмах май, 101С автобус Ҫӗнӗ Шупашкарти Химтехнумран И.Н. Ульянов ячӗллӗ ЧПУ таран Мускав проспекчӗпе ҫитет.

ШӖМ тунӑ сӑн

Ӗнер «Атӑл» автоҫул ҫинче виҫӗ фура ҫапӑннӑ. «Донгфэнг» грузовикӑн хыҫалти пайӗ хирӗҫ ҫул ҫине тухса, кайнӑ. Ҫав вӑхӑтра ун ҫине КамАЗ пырса кӗнӗ. Унӑн водителӗ вырӑнтах вилнӗ.

Кунсӑр пуҫне фура «Скания» ҫине пырса кӗнӗ. «Донгфэнг» рулӗ умӗнче Беларуҫ ҫынни ларнӑ. Вӑл – 62-ре. Малтанлӑха пӗлтернӗ тӑрӑх, кӑҫал ҫуркунне унӑн водитель правине туртса илнӗ.

"Контактри" сӑн

Шупашкар муниципаллӑ округӗнчи Иккассинче пурӑнакансем автоҫул хӗрринче йывӑҫ хунавӗсем лартнӑ. Пӗтӗмпе вӗсем «Кӳкеҫ – Иккассинче» 3 пине яхӑн хыр тата лиственница хунавӗсене лартса тухнӑ.

Халӗ унта 5 рет хунав ешерет. Пӗтӗмпе 580 метр тӑршшӗнче ӳсеҫҫӗ вӗсем. Малашне вӗсем автоҫула хӗлле юр хӳсе лартасран хӳтӗлӗҫ.