Синоптиксем пӗлтернӗ тӑрӑх, юр ҫӑвиччен ҫанталӑк ылтӑн кӗркуннехи илемлӗ те уяр ҫанталӑкпа савӑнтарӗ. Каҫсерен сывлӑш 5 градус таран сивӗнӗ, кӑнтӑрла вара 6-11 градус ӑшӑ пулӗ.

Анчах ҫитес эрне варринче каллех пӗлӗтленӗ, ҫумӑр ҫукалӗ. Юпан 16-мӗшӗнчен термометр «минус» кӑтартма тытӑнӗ. Апла пӗрремӗш юр та ҫума пултарать.

Водительсене вара кустӑрма шинисене хӗллехи ҫине улӑштарма сӗнеҫҫӗ.

Чӑваш Енре 2023 ҫултанпа тин ҫуралнӑ ачасене парне параҫҫӗ. Ку таранччен унта тӗрленӗ пододеяльник, простынь, наволочка, ал шӑлли, «Чӑваш Енри халӑхсен юмахӗсем» кӗнеке тата саламлӑ открытка кӗнӗ.

Юпа уйӑхӗнчен вара комплекта ҫӗнӗ япаласем кӗнӗ: тетте-погремушка тата медицина термометрӗ.

Сӑмах май, паянхи кун тӗлне 239 комплект парне панӑ.

capella21.ru сӑнӳкерчӗкӗ

Паян, юпа уйӑхӗн 11-мӗшӗнче, Чӑваш патшалӑх филармонийӗнче «Ентешсен ҫӑлтӑрӗ» пӗтӗм тӗнчери V фестивалӗ уҫӑлӗ.

Эстрадӑпа джаз музыкин «Джаз ТОНиКа» оркестрӗ куракансемшӗн чӑн-чӑн парне вырӑнне пулӗ. Дирижёрӗ — Чӑваш Республикин искусствӑсен тава тивӗҫлӗ ӗҫченӗ Наталья Яклашкина.

Оркестр программӑна икӗ уйрӑмран хатерленӗ. Малтанхи пайӗнче Джордж Гершвин, Майкл Мэссер, Билли Холидей, Бритни Спирс тата ыттисен музыкипе киленме май килӗ, иккӗмӗшӗнче Юрий Антонов, Сергей Трофимов, Михаил Танич, Юрий Саульский тата хамӑр ҫӗршыври ытти композитор хайлавӗ янӑрӗ.

Программӑна Чӑваш Республикин тава тивӗҫлӗ артисчӗ Андрей Макаров, пӗтӗм тӗнчери конкурссен лауреачӗ Наталья Ильц тата килнӗ хӑнасем: Павел Васильев (Мускав), Дарья Кузьмичева (Мускав), Инга Долгова-Зиновьева (Мускав), TANINA L’Odore (Питӗр) — илем кӳрӗҫ.

rutube.ru сайтри сӑн

Шупашкарта ватӑ хӗрарӑм ултавҫӑсене ӗненсе 1 миллион тенке ҫухатнӑ. Укҫине вӑл Мускавах кайса панӑ.

Унпа палламан ҫын мессенджерта ҫыхӑннӑ. Вӑл ӗҫленӗ пульницӑра даннӑйсене такамсем илнӗ-мӗн. Кайран хӗрарӑмпа «ФСБ» ӗҫченӗ ҫыхӑннӑ, хушнине итлемесен явап тыттарассипе хӑратнӑ.

Ватӑскер палламан ҫын хушнине итлесе пуйӑса ларма билет туяннӑ, Мускава ҫитнӗ те темӗнле курьера 1 миллион тенкӗ тыттарнӑ. Киле таврӑнсан пиччӗшӗпе калаҫҫан тин вӑл ултавҫӑсен серепине лекнине ӑнланнӑ.

www.cheboksary.ru сӑнӳкерчӗкӗ

«Чӑваш Ен Элтеперӗн кубокӗ» пӗтӗм Раҫҫейри ӑмӑртура Павел Миронов тата Арина Павлова 2 наградӑна тивӗҫнӗ.

Ӑмӑрту иртнӗ эрнере иртнӗ.

Арҫын ачапа хӗрача – «Дуэт» спорт клубӗн воспитанникӗсем. Вӗсем 7-11 ҫулсенчи ачасен хушшинче икӗ хутчен ҫӗнтернӗ. Латин Америкин ташшипе ылтӑн медале тивӗҫнӗ, тепӗр ташӑпа – бронзӑна.

Ӑмӑртӑва ҫӗршыври 19 регионти 600 ытла спортсмен хутшӑннӑ.

Ачасен тренерӗсем – Сергей Яруткин тата Дмитрий Жаров.

Вера Иванова ӳкернӗ видеоран илнӗ скриншот

К.В.Иванов ячӗллӗ Чӑваш патшалӑх академи драма театрӗнче 63 ҫул тӑрӑшнӑ Нина Григорьева ӗҫлеме пӑрахнӑ.

Ҫӗрпӳ районӗнче ҫуралнӑ Нина Ильинична ачаранпах театра юратнӑ. Мускаври театр институтӗнчен вӗренсе килсен Чӑваш патшалӑх академи драма театрӗнче тимлеме тытӑннӑ та тӳрех халӑх юратакан артист пулса тӑнӑ.

Пулас мӑшӑрӗпе, тӑван район каччипе, хӑйӗнчен пӗр ҫул кӗҫӗнрех Николай Даниловичпа, театр институтӗнче паллашнӑ. Унта вӗсене Ромеопа Джульеттӑна выляттарнӑ. Ҫавӑн пек туслашса кайнӑ та чипер хӗрпе хитре каччӑ.

Иртнӗ эрнере Нина Ильинична театртан пӑрахма заявлени ҫырса панӑ. Николай Данилович вара ӗҫӗнчен (вӑл пулас актёрсене сцена ӑсталӑхне вӗрентсе пурӑннӑ) ҫур ҫул каярах кайнӑ.

"Чеб.ру" сайтри сӑн

Шупашкарти педагогика колледжӗн студенчӗсем ырантан дистанци мелӗпе вӗренӗҫ. Унта халӗ те ӑшӑ паман.

Колледжра ӑшӑ системине улӑштараҫҫӗ. Ҫанталӑк вара малашне сивӗтсе пырать. Ӑшӑ паманнипе студентсене вӗренме сивӗ.

Палӑртмалла: Шупашкарта юпа уйӑхӗн 3-мӗшӗнче ӑшӑ пама тытӑннӑ.

commons.m.wikimedia.org сайтри сӑн

Республикӑра юлашки 10 ҫулта пӗрремӗш хут ҫын кӑмпа ҫисе вилнӗ тӗслӗх пулнӑ. Тӑванӗсем каланӑ тӑрӑх, ҫулла вӗҫӗнче арҫын кӑмпана кайсан чӗрӗллех ҫисе пӑхнӑ. Киле килсен, паллах, вӑл кӑмпана пӗҫерсе, ӑшаласа пӗчченех ҫинӗ.

Тепӗр кунхине унӑн вар витти пуҫланнӑ, хӑсма тытӑннӑ. Арҫын хӑй те, тӑванӗсем те ҫакӑ кӑмпа ҫинипе тесе шутламан. Виҫҫӗмӗш кунхине вӑл хӑйне лайӑхрах туйнӑ. Тӑваттӑмӗш кунхине каллех ҫав симптомсем пуҫланнӑ, хырӑмӗ те ыратнӑ.

Ӑна Васкавла медпулӑшу пульницине илсе ҫитернӗ. Шел те, тухтӑрсем темле тӑрӑшсан та арҫынна ҫӑлса хӑварайман.

Владимир Викторов страницинчен илнӗ сӑнӳкерчӗк

Паян Шупашкар районӗнчи тӗп пульницӑра ӗҫлекен Лариса Прокопьева 70 ҫул тултарнӑ. Лариса Семёновна — психиатр-тухтӑр. Юратнӑ ӗҫӗнче вӑл 40 ҫула яхӑн тӑрӑшать. Юбилейпа тухтӑра Владимир Викторов тӗп тухтӑр саламланӑ.

Лариса Семёновна пысӑк квалифициллӗ врач ҫеҫ мар, ыттисемшӗн ырӑ тӗслӗх. Вӑл ырӑ кӑмӑллӑ та тимлӗ пулнӑран ӑна ӗҫтешӗсем те, пациентсем те хисеплеҫҫӗ.

mintrud.cap.ru сӑнӳкерчӗкӗ

«Ватлӑх савӑнма» ыркӑмӑллӑх фончӗ Чӑваш Енри ватӑсене вутӑпа тӳлевсӗр тивӗҫтерет.

Фонд пӗччен пурӑнакан, пӗчӗк пенси илекен ватӑсене хӗрхенсе пулӑшать. Тӑвай тӑрӑхӗнче, сӑмахран, 28 ватта 280 ытла куб метр вутӑ кӳрсе панӑ.

Фонд пулӑшӑвне ватӑсем чунтан савӑнса йышӑнаҫҫӗ, кӑмӑлтан тав тӑваҫҫӗ. Ҫитес кунсенче унти тата тепӗр 13 ватӑна вутӑпа тивӗҫтерме палӑртнӑ.