«На связи» форумри сӑн

Шупашкарти кӳлмекре чӑваш кӗпине тӑхӑннӑ хӗрӗн мини-скульптури вырӑн тупнӑ. Хула 555 тултарнине халалласа ултӑ кӳлепе вырнаҫтарма палӑртнӑ. Ку – вӗсенчен пӗри.

Статуэтка тӗп пляж ҫывӑхӗнче ларать. Ӑна бетон карта ҫумне ҫирӗплетнӗ. Вӑл «Чиперук Пӑлаки» (вырӑсла «Красавица Плаги») ятлӑ. Ун ҫумӗнче QR-код пур, ун ҫине телефон камерипе тӗллесен вӑл чӑваш юмахӗнчи сӑнар пулнине пӗлме май пур.

Кӳлмекре мини-статуэткӑсем татах пур: Уйӑх ҫинчи хӗр, Нарспи тата Сетнер, Тилӗ.

"Подслушано Новый город" пабликири сӑн

Ӗнер, авӑн уйӑхӗн 17-мӗшӗнче, Шупашкарти «Ҫӗнӗ хула» микрорайонта хӗр 15-мӗш хутран ӳкнӗ. Шел те, 16 ҫултискер вилнӗ.

Ку инкек Шупашкар проспектӗнчи 17-мӗш ҫуртӑн 1-мӗш корпусӗнче каҫхи 10 сехетре пулнӑ.

Халӗ ӗҫ-пуҫа уҫӑмлатаҫҫӗ.

cap.ru сӑнӳкерчӗкӗ

Етӗрнере пурӑнакан ветеран Надежда Танина 100 ҫул тултарнӑ. 18 ҫул тултарсанах ӑна Хӗрлӗ Ҫара илнӗ, хӗр зенитчицӑна вӗреннӗ хыҫҫӑн Мускаври фронта лекнӗ. Вӑрҫӑ пӗтсен кӑна киле таврӑннӑ вӑл.

Унӑн мӑшӑрӗ те Федор Танин Тӑван ҫӗршывӑн Аслӑ вӑрҫине хутшӑннӑ, Берлина ҫитнӗ. Вӗсем вӑрҫӑ хыҫҫӑн пӗрлешнӗ, икӗ хӗр ҫуратса ӳстернӗ.

Надежда Танина II степень Тӑван ҫӗршыв вӑрҫин орденне, «Германие ҫӗнтернӗшӗн» медале тивӗҫнӗ.

Росгварди тунӑ сӑн

Атӑл леш енче Сосновка поселокӗпе юнашар вӑрманта тутӑхнӑ виҫӗ мина тупнӑ. Кун пирки Росгвардин дежурнӑй чаҫне авӑнӑн 13-мӗшӗнче шӑнкӑравласа пӗлтернӗ.

Вырӑна ОМОН тухнӑ. Вӗсем кусем 82 миллиметрлӑ миномет минисем пулнине палӑртнӑ. Минӑсем тутӑхнӑ.

Йӗрке хуралҫисемпе пӗрле ятарласа вӗрентнӗ йытӑпа кинолог та пулнӑ. Йытӑ сирпӗнекен хатӗр пуррине систернӗ. Росгварди ӗҫченӗсем минӑсем хӑрушлӑх кӑларса тӑратманнине палӑртнӑ.

takt-tv.ru сайтри сӑн

Шупашкарти косметолог Патшалӑх пулашӑвӗсен порталӗн ӗҫченӗпе калаҫатӑп тесе ӗненнӗ. Ҫапла вӑл пысӑк укҫа ҫухатнӑ.

Хайхискер 50-ри хӗрарӑма страхлав полисне пластикпа ылмаштарма сӗннӗ. Калаҫнӑ вӑхӑтра Шупашкар хӗрарӑмӗ телефон ҫине килнӗ кода пӗлтернӗ, ҫапла ултавҫӑ порталти унӑн харпӑр кабинетне кӗнӗ.

Кайран ӑна ултавҫӑсем унӑн счетне хапсӑннине, кредит илме хатӗрленнине пӗлтернӗ. Хӗрарӑма пухнӑ укҫине йӑлтах «хӑрушсӑр счет» ҫине куҫарма хушнӑ. Ҫапла туса вӑл 7,5 миллион тенкӗ ҫухатнӑ.

"Контактри" сӑн

Чӑваш Енӗн парабадминтон енӗпе пӗрлештернӗ команди Пӗтӗм Раҫҫейри ӑмӑртусенче палӑрнӑ. Вӑл Пермь хулинче хусканупа тӗрев енчен сусӑр спорсменсен хушшинче иртнӗ.

Татьяна Гуреева уйрӑмах палӑрнӑ. Вӑл тӳрех виҫӗ ылтӑн медаль ҫӗнсе илнӗ. Павел Попов кӗмӗл тата пӑхӑр медальсене тивӗҫнӗ.

Антон Иванов – кӗмӗл медаль, Илья Прагеев ылтӑн медаль илнӗ. Вита Вимба та икӗ медальлӗ пулнӑ: ылтӑн тата пӑхӑр ҫӗнсе илнӗ

ШӖМ тунӑ сӑн

Шупашкарта полицейскисен служба йытти велосипед вӑррине тытса чарма пулӑшнӑ. Йытӑ Порш-Кайен ятлӑ.

Алексей Пятаков кинолог унпа велосипед ҫухалнӑ вырӑна килнӗ. Йытӑ варӑ йӗрӗ ҫине ӳксе преступление тума пултарнӑ ҫыннӑн автомобилӗ чарӑннӑ ҫӗре илсе ҫитернӗ.

Вӑрра тытнӑ. Вӑл – Чӗмпӗрте пурӑнакан 52 ҫулти арҫын. Вӑл Шупашкара пӗлӗшӗ патне пахчара пулӑшма килнӗ. Велосипеда ҫул укҫине саплаштарас тесе вӑрланӑ-мӗн.

Музей эскизн

Шупашкарта Хӗрлӗ тӳремре Раҫҫейӗн тӗрленӗ карттине тума 52 миллиона яхӑн тенкӗ уйӑрма хатӗр. Аукционра малтанхи хака палӑртнӑ: 51 миллион та 934,9 пин тенкӗ.

Саккас параканни - Чӑваш наци музейӗ. Аукционра ҫӗнтернӗ подрядчикӑн музея чӳк уйӑхӗн 10-мӗшӗччен туса пӗтермелле. Унӑн лаптӑкӗ 250 тӑваткал метр пулӗ.

Сӑмах май, чӳкӗн 26-мӗшӗнче республикӑра Чӑваш тӗррин кунне паллӑ тӑваҫҫӗ.

63valentina.ru сайтри сӑн

Паян ирхине Шупашкарти Алькеш поселокӗнче ҫӑлавҫӑсем хӑйӗн пахчинче ҫухалса кайнӑ ватӑ арҫынна пулӑшнӑ. Унӑн куҫӗ япӑх курнӑ.

112 номерпе 1942 ҫулта ҫуралнӑ арҫын килтен тухса кайнӑ чухне пӳртне питӗрни пирки пӗлтернӗ. Хӑй килелле ҫул тупайман.

Ватӑскер уҫҫине ҫухатнӑ, анкартинче килелле ҫул тупаймасӑр аташса ҫӳренӗ. Ҫӑлавҫӑсем ӑна тупнӑ, киле илсе ҫитернӗ. Пӳрт алӑкне вара «Умелец» пулӑшнипе уҫнӑ.

Синоптиксем пӗлтернӗ тарӑх, ӑшӑ кунсем шутлӑ кӑна юлчӗҫ. Юнкунччен хӗвеллӗ те ӑшӑ ҫанталӑк тӑрӗ, ҫил тӳлек вӗрӗ. Кӑнтӑрласерен 22-24 градус пулӗ, ҫӗрлесерен – 10-12 градус.

Кӗҫнерникун пӗлӗтленӗ, каҫ енне вырӑнӑн-вырӑнӑн ҫумӑр ҫӑвӗ. Эрнекун ҫил вӑйланӗ. Ҫак кунран термометр 20 градусран ытларах хӑпармӗ. Вырсарникун сывлӑш температури климат норминчен пӗчӗкрех пулӗ.

Ҫитес эрне пуҫламӑшӗнче шӑнтма тытӑнӗ. Пӗтӗмӗшле илсен, уйӑх вӗҫӗччен ҫанталӑк аван пек туйӑнӗ, кӗрхи ҫумӑрсем хальлӗхе ҫук.