cap.ru сӑнӳкерчӗкӗ

Раштав уйӑхӗн 24-мӗшӗнче «Шупашкар – ӗҫ паттӑрлӑхӗн хули» стела уҫӑлнӑ. 26 метр ҫӳллӗшскер Шупашкарти Тӗп почта умӗнче вырнаҫнӑ.

Раштавӑн 24-мӗшне ахальтен суйламан. Ҫак кун 1940 ҫулта Чапаев поселокӗ йӗркеленсе кайнӑ. Вӑл Шупашкарти В.И.Чапаев ячӗллӗ производство пӗрлешӗвӗпе тачӑ ҫыхӑннӑ. Вӑрҫӑ вӑхӑтӗнче савут фронт валли ҫар припасӗсем кӑларнӑ.

Аса илтерер: РФ Президенчӗн Владимир Путинӑн хушӑвӗпе килӗшӳллӗн кӑҫал ҫу уйӑхӗнче 20-мӗшӗнче пирӗн тӗп хуламӑра ӗҫ паттӑрлӑхӗн хулин ятне панӑ.

Ҫӗмӗрлере ангар ҫуннӑ. Шалта автомобильсем пулнӑ. Юрать-ха, вӗсене ҫӑлма ӗлкӗрнӗ.

Ку пушар раштав уйӑхӗн 24-мӗшӗнче ҫӗрле пулнӑ. Ҫур ҫӗр иртни 2 сехет те 30 минутра Ҫӗмӗрлери Кривов урамӗнче вырнаҫнӑ ангар ҫунма пуҫланине пӗлтернӗ. Ҫулӑм 288 тӑваткал метр ҫинче алхаснӑ.

Пушарнӑйсем тӑватӑ техникӑпа ҫитнӗ. Ҫулӑмпа 5 сехет кӗрешнӗ. Шалта ларнӑ 3 ҫӑмӑл машинӑа тат аавтопогрузчике кӑларнӑ, вӗсем сиенленмен.

Ӗнер ЧР Элтеперӗ Олег Николаев тӳрӗ лини ирттернӗ. Ҫынсем панӑ ыйтусенчен пӗри – шкулсен строительстви.

Элтепер пӗлтернӗ тӑрӑх, ҫитес ҫул 4 шкул тума пуҫлӗҫ. 2023 ҫулхи авӑнӑн 1-мӗшӗ тӗлне Шупашкарти «Университет» микрорайонта шкул уҫӑлмалла.

Ҫавӑн пекех ҫитес ҫул тӗп хулари «Лента», «Акварель» тата «Ҫӗнӗ хула» микрорайонсенче пӗлӳ ҫурчӗсем тума тытӑнӗҫ. «Радужный» тата «Солнечный» микрорайонсенче ку тӗлӗшпе йывӑртарах. Элтепер пӗлтернӗ тӑрӑх, «Радужный» микрорайонта шкул валли уйӑрнӑ лаптӑк лайӑхах мар. «Солнечный» микрорайонта та ҫӗр лаптӑкӗ тӗлӗшпе ыйтусем пур.

Ҫитес вӑхӑтра Ҫӗмӗрле патӗнчи пӑр ҫийӗн каҫмалли кӗпер ӗҫлесе каймалла. Кун пирки вырӑнти администраци хыпарланӑ.

Кӗпер тӑвас ӗҫе пуҫланӑ. Ӑна тунтикун уҫма палӑртнӑ. Хальлӗхе ун урлӑ каҫмашкӑн мӗн хак пулнине палӑртман.

Аса илтерер: Сӑр урлӑ хывнӑ кӗпер Ҫӗмӗрле районне Чулхулари Пильна районӗпе ҫыхӑнтарать. Ҫуркуннерен пуҫласа кӗркеннеччен унта пантон кӗпер ӗҫлет. Хӗлле вара пӑр ҫийӗн каҫмаллине тӑваҫҫӗ. Сӑмах май, пӗлтӗр хӗллехи кӗпер раштавӑн 11-мӗшӗнчен пуҫласа акан 3-мӗшӗччен ӗҫленӗ.

diecast43.livejournal.com сайтри сӑн

Мускав облаҫӗнчн Чӗмпӗр тӑрӑхне кайма тухнӑ ҫемьене Чӑваш Ен полицейскийӗ пулӑшнӑ. Ҫул ҫинче вӗсен хӗрне япӑх пулса кайнӑ. Ют тӑрӑхри ҫынсем вара Шупашкарти ҫулсене лайӑх пӗлмен, йӗрке хуралҫисенчен пулӑшу ыйтнӑ.

Раштавӑн 23-мӗшӗнче ҫул-йӗрпе патруль службин ӗҫченӗ Сергей Салмин умӗнче «Мазда» чарӑннӑ. Водитель пӗчӗк хӗрне япӑх пулнине, вӑл сывлӑш ҫитменнипе аптӑраса ӳнине пӗлтернӗ. Ачан шӑнӑр туртма пуҫланӑ.

Полицейски вӗсене Шупашкарти пульница таран леҫсе янӑ. Унта 1 ҫул та 9 уйӑхри хӗрачана тухтӑрсем пулӑшнӑ. Шурӑ халатлисем ӑнлантарнӑ тӑрӑх, ачан ӳт температури пысӑк пулнипе шӑнӑр туртнӑ.

@hypar1906 сӑнӳкерчӗкӗ

Маргарита Гартфельдер «Раҫҫей Федерацийӗн тава тивӗҫлӗ журналисчӗ» ята тивӗҫнӗ. Ҫавӑн ҫинчен калакан Указа Раҫҫей Президенчӗ чӳк уйӑхӗн 18-мӗшӗнчех алӑ пуснӑ иккен. Ку пирки «Хыпар» издательство ҫурчӗ халӗ пӗлтернӗ.

Асӑннӑ МИХ хыпарланӑ тӑрӑх, Маргарита Гартфельдер – Чӑваш Енри опытлӑ тележурналистсенчен пӗри. Телевиденире ҫав хӗрарӑм 1992 ҫулта ӗҫлеме тытӑннӑ. Чӑваш Енӗн телевиденийӗнче «Местное время» кӑларӑма ертсе пынӑ, «Час президента» программа ертӳҫи те пулнӑ, «Эрне» информаципе аналитика программин те, «Прямая речь» культурӑпа ҫӳтӗҫ программин те. 2001–2010 ҫулсенче «Чебоксары-ТВ» студие ертсе пынӑ. Нацителерадиокомпанин пӗрремӗш директорӗ пулнӑ.

«КУРАКАНСЕНЕ ХИСЕПЛЕС ПУЛАТЬ!» Ҫапла кӑшкӑру палли лартсах ят панӑ Леонид Агаков писатель, театровед 1959-мӗш ҫулхи ҫу уйӑхӗн 13-мӗшӗнче «Коммунизм ялавӗ» хаҫатра К.В. Иванов ячӗллӗ Чӑваш патшалӑх академи драма театрӗ лартнӑ спектакльсене пахаласа ҫырнӑ хӑй статйине. Леонид Яковлевич Агаков писатель, 1935-мӗш ҫулта Мускаври патшалӑх театр институтӗнчи театроведени факультетӗнчен вӗренсе тухнӑскер, Чӑваш театрӗн спектаклӗсем пирки статьясем ҫырсах тӑнӑ, тӗрӗс тата вӑхӑтра критиклеме тӑрӑшнӑ, кирлӗ чух театр коллективне хавхалантарма та пултарнӑ. Вӑл вӑхӑтра пирӗн республикӑра Наукӑпа тӗпчев институтӗнче театроведени уйрӑмӗ уҫӑлайман-ха. Вӑл уйрӑм каярах, 1966-мӗш ҫулта тин кун ҫути курса майӗпен аталанма пуҫлать. Ҫавна кура та чылай писатель, поэт чӑваш театрӗн сцени ҫине тухакан спектакльсем ҫинчен, театр проблемисемпе ун аталанӑвӗ ҫинчен ҫырас миссине хӑй ҫине илнӗ, мӗншӗн тесен вӑл вӑхӑтра Чӑваш театрӗ чӑвашсемшӗн ТӖП ТЕАТР шутланнӑ. «Чӑваш театрӗ аталанса пырсан, ӑна кура ытти театрсен аталанӑвӗпе шайӗ те ҫӳлелле ҫӗкленсе пырӗ», — ҫапла шутланӑ ҫыравҫӑсем.

Малалла...

Шупашкарти аэропортра ӗнер, раштав уйӑхӗн 23-мӗшӗнче, 450-мӗш пассажира регистрациленӗ. Аэропортшӑн ку вӑл — рекордла кӑтарту.

Юбилейлӑ пассажир — Шупашкарти Лариса Николаева. Вӑл каланӑ тӑрӑх, аэропорт пулӑшӑвӗпе вӑл час-часах усӑ курать. Ӗнер хӗрарӑм Мускава «Победа» авиакомпани самолечӗпе вӗҫсе кайнӑ. Ӑна авиапассажирсене кӗтсе лармалли хӑтлӑ залпа усӑ курма сертификат панӑ.

Танлаштарма: 2017 ҫулта Шупашкарти аэропорт пулӑшӑвӗпе 251 пин пассажир усӑ курнӑ. Кӑҫал, ав, — 450 пин ҫын.Тепӗр майлӑ каласан, Шупашкартан тӗрлӗ хулана самолётпа вӗҫекен йышӗ ҫулсерен ӳссе пырать.

Раштав уйӑхн 23-мӗшӗнче Чӑваш Енри оперативлӑ штабӑн ларӑвӗ иртнӗ. Ӑна Федерацин хӑрушсӑрлӑх службин Чӑваш Енри управленийӗн пуҫлӑхӗ Альберт Савинцев ертсе пынӑ.

Мероприятие Федерацин хӑрушсӑрлӑх службин управленийӗн, Шалти ӗҫсен министерствин, Инкеклӗ ӗҫсен министерствин управленийӗн, Следстви комитечӗн управленийӗн, Федерацин айӑплава пурнӑҫа кӗртекен службин, Федерацин хурал службин, Росгвардин, ҫар комиссариачӗн, патшалӑх органӗсен ӗҫченӗсем хутшӑннӑ.

Унта кӑҫалхи ӗҫне пӗтӗмлетнӗ, терроризмпа кӗрешес ыйтусене тишкернӗ.

Чӗмпӗр хулинче Чӑваш алфавичӗн палӑкӗ уҫмалла нимелле укҫа пухнине унччен Чӑваш халӑх сайчӗ пӗлтернӗччӗ-ха. Унта уйрӑм ҫынсем те, ӗҫ коллективӗсем те хутшӑнаҫҫӗ. Акцие Чӑваш Енӗн Элтеперӗ Олег Николаев та хутшӑннӑччӗ.

Аса илтерер: палӑкӑн пӗтӗмӗшле хакӗ 1,8 млн тенкӗпе танлашать. Пушкӑртстанра тухса тӑракан «Урал сасси» хаҫат калашле, «пархатарлӑ ӗҫе» Ульяновск облаҫӗнчи чӑвашсен наципе культура автономийӗ (ертӳҫи – Олег Мустаев) йӗркелесе пырать. Хальхи вӑхӑт тӗлне илсен, нухратӑн ҫуррине пухнӑ.

«Урал сасси» хаҫатӑн ӗҫченӗсем те ятарлӑ счет ҫине пурӗ 10 пин тенкӗ куҫарса панӑ. Ыркӑмӑллӑх акцине маларах Пушкӑртстанри чӑвашсен канашӗн ертӳҫи Людмила Мурманская та хутшӑннӑ.