Мускаври Некрасов ячӗллӗ вулавӑшра «СӑмахКун» чӑвашла калаҫу клубӗ ӗҫлет. Кун пирки Ахполат Турхан тӗнче тетелӗнчи халӑх ушкӑнӗсенчен пӗринче пӗлтернӗ.

Мускаври хастарсем хальхинче ӑна ҫӗнӗ форматпа йӗркеленӗ.

«Паян пирӗн патра хӑна пулчӗ, Сантӑр Савкилта (Александр Савельев) ӑсчах- чӗлхеҫӗ. Вӑл чӑваш халӑхӗпе чӑваш чӗлхин кун-ҫулӗ пирки каласа пачӗ. Zoomра та трансляци пулчӗ. Кӑсӑклӑ лекци хыҫҫӑн ыйтусем ҫине хуравларӗ», – тесе пӗлтернӗ Ахполат Турхан.

chuvashia.sledcom.ru сӑнӳкерчӗкӗ

Шупашкар хулинче пурӑнакан 19 ҫулти ҫамрӑкӑн салтака кайма ят тухнӑ. Анчах унӑн салтак аттине тӑхӑнас килмен.

Пӗлтӗрхи раштав уйӑхӗнче ӑна повестка тыттарнӑ. Хутра кӑтартнӑ кун каччӑ призыв пунктне пыман. Ҫар комиссариачӗн ӗҫченӗсем ӑна тупса илсе пынӑ. Анчах вӑл унтан тухса тарнӑ.

Тепӗр кунне каччӑна килӗнче асӑрханӑ, ӑна каллех ҫарӗҫ комиссариачӗн ӗҫченӗсем илсе кайнӑ. Ун чухне каччӑ документсем патне тесе килне кайса килме ирӗк ыйтнӑ, ҫар ӗҫченӗсем ҫамрӑкпа пӗрле ҫула тухнӑ. Каччӑ хваттере кӗрсе кайсан хайхискер чӳречерен (иккӗмӗш хутран) сикнӗ.

Ҫартан тарса ҫӳрекен каччӑ тӗлӗшпе халӗ пуҫиле ӗҫ пуҫарнӑ.

«Ҫыхӑнура» форумран илнӗ сӑнӳкерчӗк

Нарӑс уйӑхӗн 12-мӗшӗнче каҫ пуласпа Шупашкарта, Чӑваш патшалӑх культурӑпа ӳнер институчӗн общежитийӗнче пушар тухнине Чӑваш халӑх сайчӗ пӗлтернӗччӗ.

Халӗ пушар сӑлтавне уҫӑмлатнӑ. Малтанласа пӗтӗмлетнӗ тӑрӑх, инкек электрооборудованипе усӑ курнӑ чух правилӑна пӑснӑ. Пушар зарядка хатӗрӗнчен тухнӑ.

Пушар вӑхӑтӗнче общежитире 40 студентпа преподаватель пулнӑ. Вӗсенчен никам та шар курман.

Тӑкак виҫине малтанласа шутласа кӑларнӑ. Общежитие юсаса ҫӗнетме хыснаран укҫа уйӑрма тивӗ.

"Про Город" сайтӗнчи сӑн

Нарӑс уйӑхӗн 12-мӗшӗнче кӑнтӑрлахи 12 сехетре Патӑрьел районӗн ҫыннисем тӳпере ҫар вертолечӗсем вӗҫсе иртнине курнӑ. Вӗсем каланӑ тӑрӑх, тӳпере 7 вертолет пулнӑ. Кун пирки вӗсем "Про Город" хаҫата пӗлтернӗ.

Ҫав кун кӑнтӑрла вертолетсене Улатӑр районӗнче те курнӑ. Пӗр хӗрарӑм каласа кӑтартнӑ тӑрӑх, ку районта вӑл 30 вертолет вӗҫнине шутланӑ.

Ҫар вертолечӗсене Пӑрачкав районӗнче те курнӑ.

cap.ru сайтри сӑн

Кӑшӑвируспа чирлисем валли хатӗрленӗ койкӑсем сахаллансах пыраҫҫӗ. ЧР сывлӑх сыхлавӗн министрӗ Владимир Степанов ковид-госпитальсене ытларах камсем лекнине пӗлтернӗ.

Пульницӑна ытларах вӑраха кайнӑ чирсемпе нушаланакансем лекеҫҫӗ. Унашкал пациентсем 60-тан кӑна мар, 70-тен те иртнисем. Чылайӑшӗн ӳпкин 60-70 проценчӗ сиенленнӗ. Министр каланӑ тӑрӑх, халӗ те, унчченхи пекех, пульницӑна лекнисен 99 проценчӗ вакцинациленмен.

Паян стопкоронавирус.рф сайт пӗлтернӗ тӑрӑх, юлашки талӑкра 1104 ҫын кӑшӑлвируспа чирленӗ. 554 ҫын сывалнӑ. 180 ҫынна пульницӑна вырттарнӑ.

Cap.ru сӑнӳкерчӗкӗ

Вӑрнарти «Химик-Август» футбол клубӗ хӑйӗн командине ҫитес сезонта Раҫҫейӗн Олимп-первенствин Профессилле футбол лигин II дивизионне кӗртесшӗн.

Вӑрнарти хутӑш препаратсен завочӗн директорӗ Владимир Свешников республикӑн спорт министрӗпе тӗл пулсан каланӑ тӑрӑх, иккӗмӗш футбол лигине кӗме тӗрлӗ услови тивӗҫтермелле, ҫав шутра «Химик» стадиона модернизацилемелле. «Химик-Август» команда халӗ шӑпах ҫавӑнта спортри хӑйӗн ӑсталӑхне туптать. Халӗ стадионта нумай пӗлтерӗшлӗ ҫурт тӑваҫҫӗ, унӑн пӗрремӗш хутӗнче салтӑнса тӑхӑнмалли пӳлӗм, медицина кабинечӗ, иккӗмӗшӗнче тӳресем, допинг тӗрӗслевӗн пӳлӗмӗ тата ыттисем пулӗҫ. Трибунӑсене 1500 вырӑнлӑх тӑвӗҫ. Стадиона прожекторсемпе ҫутатӗҫ.

Футбол командин персоналӗ 11 ҫынтан (тренерсем, врач тата ыттисенчен) тӑрӗҫ.

Нарӑс уйӑхӗн 16-мӗшӗнче «Просто – душа. Живопись и графика Луизы Юманкка» курав уҫӑлӗ. Ӑна чӑваш халӑх поэтне Генннадий Айхие (1934-2006) халаллӗҫ.

Экспозици хӑй тӗллӗн вӗреннӗ художникӑн, Луиза Лисинан (1937-2021) ӗҫӗсенчен тӑрӗ. Вӑл Юманкка псевдонимпа усӑ курнӑ. Луиза Николаевна – Генннадий Айхин йӑмӑкӗ.

Луиза мӗн ачаран пӗрремӗш ушкӑнри инвалид пулнӑ. Пиччӗшӗ ӑна питӗ юратнӑ, йӑмӑкне халалласа сӑвӑсем ҫырнӑ. Чӑвашла та, вырӑсла та. 2002 ҫулта вӑл ун пирки: «просто – «душа»! — будто что-то имея от нас / внутренне-зрящее –», – тесе ҫырнӑ.

Луиза Юманкка иртнӗ ӗмӗрӗн 80-мӗш ҫулӗсенче ӳкерме тытӑннӑ. Импресси-ӳкерчӗкӗсене вӑл малтанласа тӑванӗсене те кӑтартман. Каярах унӑн ӗҫӗсемпе тӗрлӗ куравра паллаштарнӑ, кӗнеке те пичетлесе кӑларнӑ.

zen.yandex сайтри сӑн

Шупашкарта пурӑнакан арҫын укҫа хывса пуяс тенӗ те темӗн чухлех парӑма кӗрсе кайнӑ. Халӗ унӑн банка, пӗлӗшӗсене укҫа парса татмалла.

Йӑлтах халӑх тетелӗнче укҫа хӑвӑрт ӗҫлесе илмелли пирки хыпарланӑ пӗлтерӗве курнинчен пуҫланнӑ. Вӑл унта хӑйӗн номерне хӑварнӑ. Часах унпа суя брокерсем ҫыхӑннӑ.

Арҫын вӗсем каланипе биржа патне кӗме май пултӑр тесе телефонӗ ҫине сарӑм вырнаҫтарнӑ, счечӗ ҫине 15 пин тенкӗ хунӑ. Кун хыҫҫӑн ӑна пысӑкрах укҫапа выляма сӗннӗ. Арҫын банкран кредит илнӗ, пӗлӗшӗсенчен укҫа ыйтнӑ. Ҫапла вӑл ултавҫӑсене 2 миллион та 960 пин тенкӗ куҫарса панӑ.

Анчах арҫын укҫа-тенке каялла тавӑрайман. Ултавҫӑсен аллине лекнине ӑнлансан вӑл полицие кайса пулӑшу ыйтнӑ. Кун тӗлӗшпе йӗрке хуралҫисем пуҫиле ӗҫ пуҫарнӑ.

Нимеҫӗсем Шупашкарти тата Ҫӗнӗ Шупашкарти троллейбуссемпе тӳлевсӗрех ҫӳреме тытӑнӗҫ. Кун пирки ЧР Патшалӑх Канашӗн председателӗ тата "Эпир пӗрле" регионти штабӑн ертӳҫи Леонид Черкесов пӗлтернӗ. Ҫак хуласен троллейбус предприятийӗсемпе килӗшӳ тунӑ. Малашне ытти муниципалитетпа та калаҫса татӑласшӑн.

Нимеҫӗн транспортпа тӳлевсӗр ҫӳрес тесен бейдж, маршрут хутне тата удостоверение кӑтартмалла.

Пульницӑсенче ӗҫлекен нимеҫӗсене вӗри апатпа тивӗҫтермелле тӑвасшӑн. Ҫавӑн пекех вӗсене тӳлевсӗрех медтӗрӗслев витӗр тухма, сипленме, кирлӗ тӗк реабилитаци витӗр тухма май туса парасшӑн.

Леонид Черкесов палӑртнӑ тӑрӑх, нимеҫӗ-медиксен ординатурӑна вӗренме кӗмешкӗн, ӗҫе вырнаҫмашкӑн та ҫӑмӑллӑхсем пулмалла.

Паян, нарӑс уйӑхӗн 12-мӗшӗнче, каҫ пуласпа Шупашкарта, Чӑваш патшалӑх культурӑпа искусствӑсен институтӗнче, пушар пулнӑ.

Инкек вырӑнне темиҫе пушар машини ҫитнӗ. Васкавлӑ медпулӑшу та вырӑнтах пулнӑ. Ҫӑлавҫӑсем пушар лестниципе усӑ курнӑ. Сӑнӳкерчӗксене пӑхсан пушар общежитире 4-мӗш хутра пулнӑ.

Хальлӗхе пушар пирки урӑх информаци ҫук.