Шупашкарта социаллӑ ӗсчен пулса тӑрӑшакан Галина Кузьмина: «Манӑн платник та, повар та пулма тивет», — тесе калать.
Шупашкар хулинчи халӑхӑн социалла ыйтӑвӗсене тивӗҫтерекен комплекслӑ центрта пӗлтернӗ тӑрӑх, ватӑ ҫынсене пӑхасси пӗртте ҫӑмӑл ӗҫ мар. Утнӑ ҫӗрте утса, чупнӑ ҫӗрте чупса ҫӳресе ӗҫлеҫҫӗ социалла ӗҫченсем.
Галина Кузьмина социаллӑ сферӑра 6 ҫул ӗҫлет. Паян вӑл 9 ватта пӑхать. Хӑшӗсем патне кунне иккӗ ҫӳрет, хӑшӗсем патне — эрнере темиҫе хутчен. Вӗсем самай ҫулланнӑскерсем, 94 ҫултан пуҫласа 95 ҫулчченхи ҫынсем. Вырӑнпа выртакансем те пур. Ӳрӗк те вӑр-вар хӗрарӑм пурне те юрама тӑрӑшать. Ӗҫпе те, сӑмахпа та.
Шупашкар округӗнчи Аркасси ялӗнче ҫуралса ӳснӗ Серафима Филипповна Алексеева 100 ҫул тултарнӑ. Ӑна саламлама вырӑнти тӳре-шара та ҫитнӗ. Вӗсем юбиляра парнесем, РФ Президенчӗн Владимир Путинӑн саламлӑ открыткине панӑ.
Серафима Филипповна мӗн ачаран тухтӑр пулма ӗмӗтленнӗ. Амӑшӗ чирлени, вӑрҫӑ вӑхӑтӗнче аманнӑ салтаксене пулӑшас килни ҫак туртӑма тата вӑйлатнӑ. Шупашкарта медсестрасен курсне уҫсан вӑл тӳрех унта ҫырӑннӑ.
Вӑрҫӑ хыҫҫӑн ҫамрӑк медсестра стоматологи пӳлӗмӗнче ӗҫленӗ, унтан эндокринологи диспансерне куҫнӑ. Унта аслӑ медсестра пулнӑ.
Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр 87 ҫулти хӗрарӑма ҫуралнӑ кунпа саламланӑ.
Зинаида Кудряшовӑна асӑннӑ учрежденин социаллӑ ӗҫченӗ пӑхса тӑрать.
Хӗрарӑм ӗҫ ветеранӗ шутланать. Вӑл 40 ҫул ытла хулари «АККОНД» фабрикӑа ӗҫленӗ. Упӑшкипе Владимир Сергеевичпа икӗ ача ҫуратса ӳстернӗ, паян мӑнукӗсемпе савӑнса пурӑнаҫҫӗ.
Кинемее комплекслӑ центрӑн специалисчӗ Татьяна Васильева саламланӑ.
Шупашкарта пурӑнакан 75 ҫулти арҫынна тухтӑрсем 54 хутчен пулӑшнӑ.
20 ҫул каялла арҫын пӗрене ҫӗкленӗ хыҫҫӑн радикулитпа чирлесе ӳкнӗ, унтан эмеле пула аллерги пуҫланнӑ, кайран инфекци ҫакланнӑ. Арҫыннӑн хырӑмӗ калама ҫук япӑхса кайнӑ, хытӑ апат ҫисенех ун юн кайма тапранса каять.
«Мана кунта 54 хутчен йӗркеллӗ пурнӑҫпа пурӑнма тытӑнма пулӑшрӗҫ!» — тет иккен арҫын. Вӑл каланӑ иккен, Васкавлӑ медицина пулӑшӑвӗн пульницин хирургри уйрӑмӗн врачӗсемпе медсестирисем уншӑн тахҫанах ҫывӑх ҫынсем пулса тӑнӑ. Нумай пулмасть арҫын хурлӑхан ҫинӗ хыҫҫӑн тухтӑрсем патне лекнӗ.
Чӑваш Енре кӗмӗл волонтёрсен конкурсӗ иртет. Ӑна республикӑн Ӗҫ тата социаллӑ хӳтлӗх министерстви йӗркеленӗ.
«Ҫӗнтерӳ волонтёрӗ» номинацие Раҫҫей ҫарне пулӑшакан, гуманитари пулӑшӑвӗ кӳрекен ватӑсем хутшӑнма пултараҫҫӗ.
«Волонтёр-наставник» номинацие — ачасене пӑхса пулӑшакансем, ватӑсене пулӑшу кӳрекенсем; «Эко-волонтёр» номинацие — ҫутҫанталӑка хӳтӗлессипе тӑрӑшакансем; «Социаллӑ экспреса» — тӗрлӗ мероприятие хастар хутшӑнакансем.
Документсене mintrud@cap.ru электрон адреспа ярса памалла. Вӗсене авӑн уйӑхӗн 23-мӗшӗччен йышӑнӗҫ.
Ҫӗнтерӳҫӗсене «Кӗмӗл Чун» республикӑри форумра чыслӗҫ.
Испанире тӗнчери чи ватӑ ҫын пурнӑҫран уйрӑлнӑ. Мария Браньяс Морера 118 ҫула кайнӑ пулнӑ.
Хӑй Мария мӗнле майпа ҫавӑн чухлӗ ҫул пурӑннине ӑнланман та. Вӑл каланӑ тӑрӑх, лӑпкӑ пурӑннӑ, кӑмӑллах мар ҫынсемпе калаҫма тӑрӑшман. Андрей Кондрахин кардиолог вара ҫапла ӑнлантарать: ҫын нумай пурӑнассин 85 проценчӗ генсенчен килет.
Мария Браньяс АПШра ҫуралнӑ, вӑл 8 ҫулта чухне ҫемйи Испание куҫса килнӗ. Кинемей хӑй ӗмӗтленнӗ пекех пурнӑҫран уйрӑлнӑ: ҫывӑрнӑ чухне лӑпкӑн, пӗр асапланмасӑр.
Красноармейски районӗнче ашшӗпе ывӑлӗ ватӑ ҫынна ҫаратма шут тытнӑ.
Ҫӗньял Шетмӗ ялӗнче пурӑнакан 41 ҫулти арҫын усал ӗҫе хӑйӗн 15-ри ывӑлне явӑҫтарнӑ.
Ырӑ мар шухӑш тытнӑ ҫак ҫемье ялта пӗччен пурӑнакан 88 ҫулти кинемейӗн укҫа пурах тесе шухӑшланӑ. Ҫавна май вӗсем ватӑ патне кӑҫалхи ака уйӑхӗн 14-мӗшӗнче каҫхи тӑхӑр сехет иртсен кайнӑ. Алӑка ватса кӗрсе кинемее тапӑннӑ, унӑн 200 пин тенкине илсе тухса кайнӑ.
Пӑтӑрмах пирки кинемей кӑштах пурӑнсан ҫеҫ кӳршисене каласа панӑ, леш йӗрке хуралҫисене пӗлтернӗ. Хайхи пуҫтахсем ватта тавӑрассипе хӑратнӑ иккен, вӑл ҫавӑнпа каласа кӑтартма шикленнӗ.
Етӗрнери тӳрӗ-шара Валентина Максимова ӗҫ ветеранне юбилейпа саламланӑ.
Валентина Васильевна 1934 ҫулхи ҫурла уйӑхӗн 19-мӗшӗнче нумай ачаллӑ ҫемьере ҫуралнӑ. Кил-йышра 6 ача пулнӑ. Вӑрҫӑ ҫулӗсем Валентинӑшӑн йывӑр килнӗ. Ашшӗ, пиччӗшӗпе аппӑшӗ фронта тухса кайнӑ, кӗҫӗннисен нумай ӗҫлеме тивнӗ. Вӑрҫӑран ашшӗпе аппӑшӗ ҫеҫ таврӑннӑ.
Валентина Васильевна Етӗрнери вӑтам шкултан вӗренсе тухсан Шупашкарти планпа экономика техникумне вӗренме кӗнӗ. Етӗрнери АТПра бухгалтерта тӑрӑшнӑ, пенсие тухас умӗн склад заведующийӗ пулнӑ.
Чӑваш Енре шыравҫӑсем 92 ҫулти кинемее шыраҫҫӗ. Роза Афанасьевна Андреева (Борисова) ятлӑ ватӑ Шупашкара пурӑннӑ. Анчах пӗр кунхине вӑл килӗнчен тухса кайса ҫухалнӑ.
Ватӑ ҫын ӑҫтине ҫывӑх ҫыннисем авӑн уйӑхӗн 13-мӗшӗнченпе пӗлеҫҫӗ.
Кинемей ҫӗтни пирки «Лиза Алерт» шырав отрячӗн халӑх тетелӗнчи страницинче ҫӗркаҫ пӗлтернӗ.
Ҫурла уйӑхӗн 2-мӗшнче Шупашкарта пурӑнакан 85 ҫулти кинемей палламан ҫынна пулӑшма ыйтса улталаннӑ.
Ватӑ ҫын банк картти ҫинчен мӑнукне укҫа куҫарса парас тенӗ. Ҫакна тума пӗлмен енне хӑйӗн ҫурчӗ умӗнчи подъезд патӗнче пӗр арҫынран пулӑшу ыйтнӑ. Лешӗ ют ҫын картти ҫинчен малтан хӑйне 40 пин тенкӗ куҫарса янӑ, кайран — кинемейӗн мӑнукӗ патне.
Кинемей укҫа ҫухалнине сиссен йӗрке хуралҫисене пӗлтернӗ. Ватӑ ҫынна улталанӑ этем унччен судпа темиҫе хутчен те айӑпланнӑ 43 ҫулти арҫын пулнӑ иккен. Вӑрланӑ укҫана вӑл ҫав каҫах пӗтернӗ.
Арҫын тӗлӗшпе пуҫиле ӗҫс пуҫарнӑ.
+11.3 °C