Чӑваш Енре пурӑнакан пӗр арҫын Патшалӑхӑн ҫул-йӗр хӑрушсӑрлӑхӗн инспекцине ӗҫе вырнаҫма ӗмӗтленнӗ. Пули-пулми илес ҫук тесе шухӑшланӑран ултавҫӑ-хӗрарӑм капкӑнне ҫакланнӑ.
Шупашкарта пурӑнакан 32 ҫулти хӗрарӑм хӑйӗнпе паллаштарнӑ чухне автоинспекцире тӑрӑшатӑп тесе тыттарнӑ. Ҫынна пулӑшма килӗшенҫи пулнӑ вӑл.
Арҫынран вӑл 21 пин тенкӗ ыйтнӑ. Ара, тӑкӑксӑр май ҫук: судпа айӑпланманни ҫинчен справка тутармалла, медицина тӗрӗслевӗ витӗр тухмалла, ӗҫре кирлӗ тумтире туянмалла, ШӖМӗн Чулхулари академийӗнче вӗренмелле.
Чӑннипе хӗрарӑм ҫынсене унччен те пӗрре кӑна мар улталаннӑ иккен. Халӗ ӑна РФ Пуҫиле кодексӗн 159-мӗш статйин 2-мӗш пайӗпе явап тыттарӗҫ. Ҫынна улталанӑшӑн 5 ҫул таран хупса хума пултараҫҫӗ.
Ҫӗрпӳ районӗнче пурӑнакан арҫын ултавҫӑсене 2,3 миллион тенкӗ укҫа куҫарса панӑ. Ҫав шутран пысӑк пайӗ — банкран илнӗ кредит. Кӳрше те кивҫен патне каҫнӑ. Ултав серепине ҫакланнӑ 52 ҫулти арҫын ултавҫӑсене тӗрлӗ суммӑна икӗ уйӑх хушшинче пӗчӗкшерӗн куҫарса панӑ.
Пӑтӑрмах виртуаллӑ суту-илӳ лапамне инвестици хывса укҫа-тенкӗ ӗҫлесе май пур тесе ҫырнӑ пӗлтерӗве асӑрханинчен пуҫланнӑ. Ҫавна ӗненсе вӑл ятарлӑ каҫӑпа иртнӗ, ун хыҫҫӑн банк картти ҫинчи 25 пин тенкӗ йӗп пек ҫухалнӑ. Кӑштахран арҫын патне пӗри шӑнкӑравласа укҫана тупӑш илмелле хума пулать тесе ӗнентернӗ. Савӑннӑ арҫын 1, 5 миллиона яхӑн тенкӗ кредит илсе тӗрлӗ телефон номерӗ ҫине куҫарса панӑ. Кайран хайхи укҫана каялла илес тенӗ. Апла тӑвас тесен 650 пин тенкӗ комисси тӳлемелле тенӗрен машинӑна салука хывса тата кредит илнӗ. Каштахран хӑйӗн кредит картти ҫинчи 132 пин тенке илнӗ, унтан кӳршӗрен 50 пин тенкӗ ыйтнӑ. Икӗ уйӑхра арҫын ултавҫӑсене 2,3 миллион тенкӗ куҫарса панӑ.
Чӑваш Енри 17 ҫулти каччӑ ҫынсене улталаса пурӑннӑ. Ӑна нумаях пулмасть тытса чарнӑ. Кун пирки Тутарстанри ШӖМ пӗлтерет.
Кӳршӗ республикӑра Лениногорск хулинче пурӑнакан 20 ҫулти каччӑ полицие пырса хӑй ултавҫӑсен аллине ҫакланни пирки каласа кӑтартнӑ. Вӑл пӗлтернӗ тӑрӑх, укҫа ӗҫлесе илес тенӗ, мессенджерта ушкӑн та тупнӑ.
Ун патне тӳрех «консультант» ҫырнӑ. Хайхискер ӑна питӗ ӑннине, вӑл укҫа выляса илме пултарнине пӗлтернӗ.
20-ри каччӑ сумма пирки илтсен йӑлтах манса кайнӑ тейӗн, ҫав шутра -вӑл нимӗнле лотерейӑна, конкурса хутшӑнманни пирки те. Анчах ӑна 5 пин комисси тӳлемеллине пӗлтернӗ. Тӳлесен вара, паллах, нимӗнле укҫа та выляса илмен вӑл.
Ҫак ӗҫе Чӑваш Енри 17 ҫулти каччӑ тунӑ тесе шутлаҫҫӗ, ӑна тытса чарнӑ, ун тӗлӗшпе пуҫиле ӗҫ пуҫарнӑ.
ШӖМ пӗлтернӗ тӑрӑх, тепӗр хӗрарӑм ултавҫӑсен аллине ҫакланса вӗсене самаях пысӑк укҫа куҫарса панӑ
Ҫу уйӑхӗн 19-мӗшӗнче тивӗҫлӗ канури хӗрарӑм полицие пырса пулӑшу ыйтнӑ. Вӑл каланӑ тӑрӑх, ун патне палламан ҫын шӑнкӑравланӑ та хӑйӗнпе полицейски тесе паллаштарнӑ. Вӑл хӗрарӑмӑн пухӑннӑ укҫине хурахсенчен хӳтӗлемелли пирки каланӑ. Ку вара ӑна ӗненнӗ.
Ватӑ хӗрарӑм ҫав ҫынна 700 пин ытла тенкӗ куҫарса панӑ. Кун тӗлӗшпе пуҫиле ӗҫ пуҫарнӑ. Халӗ ултавҫӑ кам пулнине палӑртаҫҫӗ.
Шупашкарта пурӑнакан 45 ҫулти хӗрарам онлайн майпа билет туянас тесе укҫи-тенкине ултавҫӑсене куҫарса панӑ. Кун пирки ШӖМ пӗлтерет.
Ӗнер, ҫу уйӑхӗн 9-мӗшӗнче, ҫак хӗрарӑм полицие пулӑшу ыйтма пынӑ. Вӑл пӗр сайтра авиабилет туянас тенӗ те унӑн банк картти ҫинчен 35 пин тенкӗ ҫухалнӑ.
Кун тӗлӗшпе пуҫиле ӗҫ пуҫарнӑ. Халӗ полицейскисем ҫав ултавҫӑ кам пулнине палӑртас тӗллевпе ӗҫлеҫҫӗ.
Шупашкарта пурӑнакан 40 ҫулти хӗрарӑм ултавҫӑсене 2 миллион ытла тенкӗ куҫарса панӑ. Кун тӗлӗше пуҫиле ӗҫ пуҫарнӑ.
Ҫу уйӑхӗн 6-мӗшӗнче хӗрарӑм полицие пырса пулӑшу ыйтнӑ. Вӑл каласа кӑтартнӑ тӑрӑх, тӗнче тетелӗнче пӗлтерӳ курнӑ, унта инвестици платформи пирки каланӑ. Хайхискер унта кӑтартнӑ каҫӑпа кайса регистрациленнӗ, унтан ун патне «сайт менеджерӗ» шӑнкӑравланӑ та ку ӗҫпе пулӑшма шантарнӑ.
Ҫав хӗрарӑм каласа пынипе вӑл темиҫе кунра тӗрлӗ счет ҫине укҫа куҫарнӑ. Тепӗр эрнерен хайхискер пӑшӑрханса ӳкнӗ те сайтран укҫине кӑларма шутланӑ. Анчах ку ӗҫе вӑл пурнӑҫлайман. Ҫапла вӑл ултавҫӑсене 2 миллион та 175 пин тенкӗ куҫарса панӑ.
Шупашкарта пурӑнакан 29 ҫулти хӗрарӑм такам унӑн ячӗпе кредит илет тесе ӗненнӗ те шӑнкӑравланӑ палламан ҫын каланине йӑлтах пурнӑҫланӑ. Ҫапла вӑл ҫур миллион тенкӗсӗр тӑрса юлнӑ. Укҫи хӑйӗн мар, кредит илнӗскер пулнӑ.
Палламан ҫын каласа пынӑ операцисене пӗр терминал патӗнче пурнӑҫланӑ, унтан лавккари патне куҫнӑ. Темӗнле номерсем ҫине 25 хутчен куҫарса панӑ хыҫҫӑн лавккари ӗҫченсем ун патне пырса мӗн пулнипе кӑсӑкланнӑ. Шӑпах вӗсенчен ҫак хӗрарӑм такамсене 595 пин тенкӗ куҫарса панине ӑнланнӑ. Кун хыҫҫӑн полицие кайса пулӑшасси ҫеҫ юлнӑ.
Шупашкарта пурӑнакан 56 ҫулти хӗрарӑм та ун ячӗпе кредит илнӗ тесе ултавҫа 550 ытла пин тенкӗ куҫарса панӑ.
Ака уйӑхӗн 20-мӗшӗнче Шупашкар районӗнчи агрофирма ертӳҫи полицие пырса нуши пирки каласа кӑтартнӑ. 32 ҫулти арҫын пӗлтернӗ тӑрӑх, ӑна ултавҫӑсем шӑнман пӑр ҫине лартса янӑ.
Вӑл тӗнче тетелӗнче сӗлӗ сутнине курнӑ, ӑна туянас тесе сутуҫӑ патне шӑнкӑравланӑ та калаҫса татӑлнӑ хыҫҫӑн 165 пин тенкӗ куҫарса панӑ. Анчах кун хыҫҫӑн вӑл тавара кӗтсе илеймен.
Ҫакӑн хыҫҫӑн ҫеҫ вӑл улталаннине чухланӑ, полицие кайнӑ. Ку тӗслӗх тӗлӗшпе пуҫиле ӗҫ пуҫарнӑ. Йӗрке хуралҫисем ҫав ҫын кам пулнине палӑртас тӗллевпе ӗҫлеҫҫӗ.
Ӗнер Шупашкарти Мир проспектӗнчи 96-мӗш ҫуртра пурӑнакан старик патне палламан ҫынсем килсе вентиляци тасатса пама сӗннӗ. Анчах ку – укҫалла.
Пӗри вентиляцие тасатнӑ вӑхӑтра теприсем, хӗрпе каччӑ, ватӑ ҫынпа килӗшӳ тунӑ. Унта палӑртнӑ тӑрӑх, хуҫи Ихметзянов И.И., пӗлтӗр раштав уйӑхӗн 30-мӗшӗнче Пушкӑртстанри Пелепейре регистрациленнӗскер.
Вентиляцие тасатнисӗр пуҫне вӗсем таракансене дезинфекциленӗ имӗш, ку тӗллевпе шӑршӑ пӗтерекен хатӗрпе усӑ курнӑ.
Ӗҫшӗн 8 пин тенкӗ ыйтнӑ. Анчах старик алӑ айӗнче ҫуккине пӗлтернӗ. Лешсем унӑн телефонне илсе укҫана карта ҫине куҫарнӑ.
Паллӑ ӗнтӗ: кусем ултавҫӑсем пулнӑ. Полицие заявлени панӑ ӗнтӗ.
Шупашкарта пурӑнакан икӗ хӗрарӑм ӑратлӑ йытӑ ҫури туянас тесе ултавҫӑсен аллине ҫакланнӑ. Ҫак икӗ тӗслӗх тӗлӗшпе пуҫиле ӗҫ пуҫарнӑ.
20 ҫулти хӗр шпиц ӑратӗнчи йытӑ ҫури туянас тенӗ. Пӗлтерӗве тӗнче тетелӗнче курнӑ. Сутуҫӑ ӑна укҫана сайтрах тӳлеме ыйтнӑ, каҫӑ ярса панӑ. Хӗр ҫав каҫӑ ҫине пусса картта реквизичӗсене кӑтартнӑ, хыҫал енче ҫырнӑ 3 хисеплӗ кода та ҫырнӑ. Кун хыҫҫӑн ун счечӗ ҫинчен 27 пин тенкӗ ҫухалнӑ.
33-ри хӗрарӑм вара ытларах укҫа ҫухатнӑ. Вӑл та ӑратлӑ йытӑ ҫури туянас тесе ҫапла майпа картта реквизичӗсене кӑтартнӑ. Унӑн 36 пин тенки ҫухалнӑ.
+15.3 °C