Арҫын ун патне банк ӗҫченӗсем шӑнкӑравланине ӗненнӗ те 400 пин тенкӗ ҫухатнӑ. Кун пирки ШӖМ пресс-служби пӗлтерет.
Пуш уйӑхӗн 13-мӗшӗнче Вӑрнарта арҫын полицие пынӑ. Ун патне палламан ҫын шӑнкӑравланине, хайӗнпе банк ӗҫченӗ тесе паллаштарнине пӗлтернӗ вӑл. Хайхискер лайӑх мар каланӑ: ун ячӗпе такам кредит илме хӑтланать-мӗн.
Капла ан пултӑр тесе палламан ҫын тӗрлӗ операци пурнӑҫалма ыйтнӑ. Вӑл каланине туса пырса арҫын тӗрлӗ счет ҫине 449 пин тенкӗ куҫарнӑ. Кун тӗлӗшпе пуҫиле ӗҫ пуҫарнӑ. Халӗ ҫав ҫын кам пулнине палӑртас тӗлӗшпе ӗҫлеҫҫӗ.
Ултавҫӑсем тюльпан туянма хатӗрленнӗ усламҫа шӑнман пӑр ҫине лартса янӑ. Кун тӗлӗшпе пуҫиле ӗҫ пуҫарнӑ.
Уяв умӗн 19 ҫулти хӗрарӑм усламҫӑ, Ҫӗнӗ Шупашкарта пурӑнаканскер, йӳнӗ хакпа тюльпан сутнине курнӑ. Вӑл сутуҫӑ патне ҫырса янӑ, 500 чечек туянассине пӗлтернӗ.
Хӗр патне килӗшӗвен электронлӑ вариантне ярса панӑ, укҫан пӗр пайне тӳлесе хума ыйтнӑ. Усламҫӑ сутуҫа 12 пин тенкӗ куҫарса панӑ ҫеҫ – вӑл ҫухалнӑ, пӗлтерӗве те, мессенджерти ҫырусене те хуратнӑ. Кун хыҫҫӑн хӗр ултавҫӑ аллине ҫакланнине ӑнланнӑ.
Пушӑн 6-мӗшӗнче Шупашкарта пурӑнакан42 ҫулти хӗрарӑм полицие пырса заявлени ҫырнӑ. Вӑл ултавҫӑсен аллине ҫакланнӑ.
Хайхи хӗрарӑм 2019 ҫулта брокер команийӗн счечӗ ҫине 400 пин тенкӗ куҫарнӑ, криптовалюта курсӗнчен тупӑш илме ӗмӗтленнӗ. Пӗлтӗр ҫавнашкал тепӗр фирма счечӗ ҫине 7 пин тенкӗ хунӑ. Анчах хӗрарӑм укҫана каялла тавӑрайман.
Нумаях пулмасть ун патне арҫын шӑнкӑравланӑ, хӑйӗнпе компани ӗҫченӗ тесе паллаштарнӑ. Хайхискер унта хывнӑ укҫана тавӑрма пулӑшать-мӗн. Вӑл пулӑшма шантарнӑ, анчах хывнӑ укҫан10 процентне ыйтнӗ. Хӗрарӑм килӗшнӗ. Арҫын вара ултавҫӑ пулнӑ.
Ҫав арҫынна вӑл 325 пин тенкӗ куҫарса панӑ. Лешсем ӑна унӑн счечӗ ҫинче 600 пин тенкӗ ытла пулнине ӗнентернӗ. Укҫана каялла илес тесен каллех нухрат хывмалла-мӗн. Хӗрарӑм амӑшӗнчен 250 пин тенкӗ кивҫен илнӗ. Ҫапла майпа вӑл ултавҫа 564 пин тенкӗ куҫарса панӑ.
Хӗрарӑм кун хыҫҫӑн ҫеҫ тӗнче тетелне кӗрсе ҫак компани пирки вуласа пӗлнӗ. Вара тин вӑл ултавҫӑсен аллине лекнине ӑнланнӑ. Кун тӗлӗшпе пуҫиле ӗҫ пуҫарнӑ.
Ӗнер Шупашкарти йӗрке хуралҫисенчен 28 ҫулти ҫамрӑк пулӑшу ыйтнӑ. Вӑл ултавҫӑсен капкӑнне ҫакланнӑ.
Ҫамрӑк патне палламан ҫын шӑнкӑравласа хӑйӗнпе банк ӗҫченӗ тесе паллаштарнӑ. Каччӑна вӑл такамсем ун ячӗпе кредит илесшӗн тесе ӗнентернӗ. «Банк ӗҫченӗ» каччӑна кредит илме, укҫана банк картти ҫине (номерне ултавҫӑсем хӑйсен каланӑ) куҫарма ӳкӗте кӗртнӗ. Каччӑ ултавҫӑсене ӗненнӗ. 870 пин тенке ют ҫынсене куҫарса панӑ.
Кайран ҫав ҫынсемех телефон номерне ылмаштармалли программӑпа усӑ курса йӗрке хуралҫисем евӗр шӑнкӑравланӑ, 870 пинсӗр юлни пирки полицие пӗлтерме сӗннӗ. Каччӑ шӑп та лӑп ҫавӑн чухлӗ укҫана куҫарса панӑ та.
90 ҫулти кинемейӗн юбилейне япӑх пулӑм тӗксӗмлетнӗ. Вӑл укҫасӑр тӑрса юлнӑ.
Нумаях пулмасть пӗр халӑх тетелӗнче ӑна социаллӑ тӳлев пама тивӗҫ тесе хыпарланӑ. Ку 2700 тенкӗпе танлашать-мӗн.
Анчах тӳлеве илес тесен банк карттин номерне, хыҫалти кодне, усӑ курмалли срокне калама ыйтнӑ. Кинемей япӑххи пирки шухӑшламан – йӑлтах пӗлтернӗ.
Ватӑскер тепӗр кунхине 90 ҫулхи юбилейне паллӑ тума хатӗрленнӗ. «Кӗтмен парне» уява тӗксӗмлетнӗ. Ултавҫӑсем унӑн картти ҫинчен 9 пин тенкӗ куҫарнӑ.
Паян ирхине 4 сехет ҫурӑра Шупашкарти Патрис Лумумба урамӗнче пурӑнакан 82 ҫулти хӗрарӑмӑн хваттерӗнче телефон шӑнкӑртатнӑ. Ыйхӑран вӑранса ҫитеймен кинемее ывӑлӗ шӑнкӑравланӑ пек туйӑннӑ.
Лешӗ макӑра-макӑра пулӑшма ыйтнӑ, ҫул ҫинче аварие лекнӗ-мӗн. Явап тыттарасран пӑрӑнас тесе укҫа кирлӗ имӗш.
Кинемей ҫав ҫын каласа пынипе пухса пынӑ 150 пин тенкине хутаҫа чикнӗ те пӗлтернӗ вырӑна кайса хунӑ. Хайхискер кун хыҫҫӑн тин ывӑлӗ патне шӑнкӑравлама шутланӑ. Лешӗ нимӗнле аварие те ҫакланман, сып-сывах, чип-чиперех. Анчах хутаҫа каялла илсе ӗлкӗреймен – ӑна ултавҫӑ илсе кайнӑ.
Нарӑс уйӑхӗн 4-мӗшӗнче Ҫӗнӗ Шупашкарти полици уйрӑмне арҫын пулӑшу ыйтма пынӑ. Вӑл ӑнлантарнӑ тӑрӑх, ултавҫӑсене 900 пин тенкӗ ытла куҫарса панӑ.
64-ри арҫын патне палламан хӗрарӑм шӑнкӑравланӑ. Хӑйӗнпе банк ӗҫченӗ тесе паллаштарнӑ. Хайхискер пӗлтернӗ тӑрӑх, такам арҫыннӑн харпӑр счетӑн электрон хӳтӗлевне ҫӗмӗрнӗ, ун ячӗпе 1 миллион тенкӗ кредит илнӗ имӗш.
«Банк ӗҫченӗ» пулӑшма шантарнӑ. Арҫын вӑл каласа пынине пурнӑҫласа малтан 100 пин тенкӗ куҫарса панӑ. Унтан банкран кредит илме заявка ҫырнӑ. Кивҫене ӑна панӑ. Вӑл ӑна илсе пӗчӗкшерӗн ҫав хӗрарӑм кӑтартнӑ счетсем ҫине куҫарма тытӑннӑ. Юлашкинчен лешӗ ҫыхӑнӑва тухма пӑрахнӑ, ун патне шӑнкӑрав кайман.
Шупашкарта пурӑнакан хӗрарӑм укҫа ӗҫлесе илес тенӗ те… укҫасӑр тӑрса юлнӑ. Тивӗҫлӗ канурискер ултавҫӑсене 2,5 миллион тенкӗ куҫарса панӑ.
Пӗлтӗрхи чӳк уйӑхӗнче 72 ҫулти хӗрарӑм хушма тупӑш тума сӗнекен реклама курнӑ. Унта хутшӑнас тесен акци илмелле-мӗн. Ватӑ хӗрарӑм вара унччен унашкаллисене хутшӑнса тупӑш тукаланӑ имӗш.
Хайхискер рекламӑра кӑтартнӑ каҫӑпа кайнӑ, харпӑр кабинет уҫнӑ, даннайсене кӑтартнӑ. Кайран унпа палламан ҫынсем ҫыхӑннӑ. Хӗрарӑм акци туянас тесе 50 пин тенкӗ куҫарнӑ. Харпӑр кабинетпа урӑх ҫынсем те усӑ курнине асӑрханӑ. Ара, унӑн ячӗпе 228 пин тенкӗ кредит илнӗ. Вӑл «консультантсемпе» ҫыхӑннӑ, лешсем пулӑшма шантарса каллех укҫа ыйтнӑ.
Хӗрарӑм еткерлӗхе юлнӑ хваттерне сутнӑ 2,5 миллион тенке куҫарса панӑ.
Шупашкарта пурӑнакан 43 ҫулти арҫын килте ларсах укҫа ӗҫлесе илес тенӗ те ҫур миллионсӑр тӑрса юлнӑ.
ЧР ШӖМӗ пӗлтернӗ тӑрӑх, кӑрлач уйӑхӗн 21-мӗшӗнче вӑл полицие пырса пӑтӑрмахӗ пирки каласа кӑтартнӑ. Ун патне палламан ҫын шӑнкӑравласа килте ларсах ӗҫлесе илме сӗннӗ-мӗн. Анчах малтан укҫа тӳлесе хумалла имӗш.
Тупӑш нумай тума пулать тени арҫынна илӗртнӗ. Ҫавӑнпа вӑл пӗр шухӑшламасӑрах темиҫе кун ҫав ҫын каланӑ счет ҫине укҫа куҫарса тӑнӑ. Пӗр кунхине хайхискер тупӑш хӑҫан пулассипе кӑсӑкланнӑ. Кун хыҫҫӑн укҫа ӗҫлесе илме сӗннӗ ҫыннӑн шӑрши-марши те юлман, пач ҫухалнӑ. Унччен вӑл ҫур миллион тенкӗ куҫарса ӗлкӗрнӗ. Кун тӗлӗшпе пуҫиле ӗҫ пуҫарнӑ.
Шупашкарта пурӑнакан 34 ҫулти хӗрарӑм банкри ставкӑна пӗчӗклетес тесе укҫа ҫухатнӑ. Пӗлтӗр раштав уйӑхӗнче вӑл тӗрлӗ банка онлайн заявка панӑ.
Пӗр ҫын кредитне рефинансировани тума сӗннӗ. Ун патне нумаййӑн шӑнкӑравланӑ-ха, анчах вӑл хирӗҫленӗ – процент ставки килӗшмен. Пӗри вара пӗчӗк ставка сӗннӗ. Ку хӗрарӑма кӑсӑклантарнӑ.
Лешӗ Чӑваш Енре банкӑн филиалӗ ҫуккине пӗлтернӗ, йӑлтах дистанци мелӗпе хатӗрлеме ыйтнӑ. Хӗрарӑма тӗрлӗ счет ҫине укҫа куҫарма ыйтнӑ: курьершӑн, страховка тунӑшӑн, займ налукӗ… Хӗрарӑм пӗтӗмпе 175 пин ытла тенкӗ куҫарнӑ. Пӗр пайне микрозаймра илнӗ. Кредитне рефинаснировани тума май килмен – ултавҫӑсем тӗлне лекнӗ вӑл.
+15.3 °C