Вӑрнар районӗнчи Кӳлхӗрри ялӗнче арҫын пӑр айне анса кайса вилнӗ. Кун пирки Республикӑри ҫӑлавпа шырав службин пресс-служби пӗлтерет.
Чӳк уйӑхӗн 22-мӗшӗнче арҫын пулла кайнӑ. Пӑр ҫӳхе пулнӑ, ун йывӑрӑшне чӑтайман. Пулӑҫ пӑр айне анса кайсан каялла тухайман.
Ҫӑлавҫӑсене кун пирки чӳк уйӑхӗн 23-мӗшӗнче 10 сехетре пӗлтернӗ. Вырӑна 5 ҫӑлавҫӑ ҫитнӗ. Вӗсем 63 ҫулти арҫыннӑн виллине шыв тӗпӗнче тупса кӑларнӑ.
Аса илтетер: нумаях пулмасть Йӗпреҫ районӗнче пулӑҫ пӑр айне кайса вилнӗччӗ.
Ӗнер пулӑҫсем Атӑла пулӑ тытма кайнӑ та ҫӑлавҫӑсенчен пулӑшу ыйтнӑ. Вӗсен моторсӑр резина кимми юханшыв тӑрӑх ишсе кайнӑ. Пулӑҫсем ӑна ҫыран хӗрринче кӑкарма манса кайнӑ-мӗн.
Вӗсем кимӗ патне хӑйсем тӗллӗн ишме шикленнӗ, ҫавӑнпа 15 сехет те 15 минутра «Куславкка» ҫӑлав станцине шӑнкӑравланӑ.
Ҫӑлавҫӑсем вырӑна килсе кимме хӑваласа ҫитнӗ, ӑна тимсӗр пулӑҫсем патне илсе ҫитернӗ.
Ӗнер 10 сехет ҫурӑра Канашра Тӑвай ҫулӗнчи 1-мӗш ҫуртра пушар алхаснӑ. Вӑл – общежити.
Ҫулӑм виҫҫӗмӗш хутри кухньӑра тухнӑ. Пушарта сӗтел-пукан ҫунса кайнӑ, маччапа стенасем хӑрӑмланса ларнӑ. Общежитире пурӑнакан тӑватӑ ҫынна ҫӑлавҫӑсен пулӑшӑвӗ кирлӗ пулнӑ. Пӗри сӗрӗмпе наркӑмӑшланнӑ, ӑна пульницӑна илсе кайнӑ.
Малтанлӑха пӗлтернӗ тӑрӑх, пушар пирус асӑрханмасӑр туртнӑран тухнӑ.
Шупашкартан инҫех мар вырнаҫнӑ «Солнечный берег» (чӑв. Хӗвеллӗ ҫыран) кану бази ҫывӑхӗнче пӗрисем инкеке лекнӗ. Вӗсем асӑннӑ база ҫывӑхӗнчи «Смоленский» утрав ҫинче пулнӑ. Унта ҫемье пӗчӗк ачапа вӗрсе карӑнтармалли кимӗпе кайнӑ. Каялла килме тӑрсан вӗсен кӗсменӗ хуҫӑлса кайнӑ.
Аптӑранӑ ҫемье Республикӑн ҫӑлавпа шырав службине 16 сехет иртсен шӑнкӑравланӑ. Ҫӑлавҫӑсене вӗсем утрав ҫитсе кӗтсе илнӗ. Анчах утрав тӗлӗнче Атӑлта ӑшӑх вырӑн пулнӑран ҫӑлавҫӑсем караппа унта ишсе пырайман. Ҫуран утса кайса малтан ачана йӑтса каҫарнӑ, унтан ачан ашшӗпе амӑшне пулӑшнӑ. Шупашкара ҫемье 19 сехет тӗлӗнче ҫитсе пӗтнӗ.
Юпа уйӑхӗн 12-мӗшӗнче 19 сехетре полицирен ҫӑлав службине шӑнкӑрав килнӗ, Атӑл варринчи пулӑҫа ҫыран хӗррине илсе тухмашкӑн пулӑшма ыйтнӑ.
Унта акӑ мӗн пулса иртнӗ. Икӗ тус пулла кайма хатӗрленнӗ. Пӗри лавккана кӗнӗ, тепри кимӗре кӗтсе ларнӑ. Ӳсӗрскер ҫывӑрса кайнӑ та кимӗ шалалла та шалалла кӗнине сисмен. Атӑл варрине ҫитсен тин тӑна кӗнӗ. Вӑл тӳрех асне килнӗ номерпе – полицие – шӑнкӑравланӑ.
Ӳсӗр пулӑҫ кимӗрен тухса ӳкнӗ. Кӗҫех ҫӑлавҫӑсем ҫитнӗ, арҫынна ҫыран хӗррине илсе тухнӑ. Пулӑҫ каланӑ тӑрӑх, сивӗ шывра унӑн ури ним туйми пулнӑ.
Хӗрлӗ Чутай районӗнче арҫынпа хӗрарӑм кӑмпа татма кайсан каялла килмелли ҫула ҫухатнӑ. Ку юпа уйӑхӗн 2-мӗшӗнче пулнӑ.
Инкеклӗ лару-тӑру министерстви пӗлтернӗ тӑрӑх, арҫынпа хӗрарӑм Ҫӗнӗ Туканаш ялне хӑнана килнӗ. Кӑнтӑрла вӗсем кӑмпана кайма шутланӑ. Анчах хайхискерсем вӑрманта ҫухалса кайнӑ. Вӗсен ҫӑлавҫӑсенчен пулӑшу ыйтма тивнӗ.
Арҫынпа хӗрарӑма 15 сехет тӗлне тупнӑ. Вӗсем тӑванӗсем патне тӗрӗс-тӗкелех таврӑннӑ.
Ӗнер Ҫӗмӗрле вӑрманӗнче хӗрарӑм ҫухални пирки пӗлтернӗ. Ӑна шырама упӑшки, ывӑлӗ, ытти ҫынсем кайнӑ. Кайран ҫӑлавҫӑсене те чӗннӗ.
65 ҫулти хӗрарӑм вӑрмана упӑшкипе кайнӑ. Кӑмпа пуҫтарнӑ чухне вӑл урӑх еннелле утнӑ, мӑшӑрӗ – тепӗр еннелле. Малтан хӗрарӑм вӑрмантан хӑй тӗллӗнех тухма тӑрӑшнӑ. Анчах ҫул тупаймассине ӑнлансан тӑванӗсем патне шӑнкӑравланӑ. Вӑл пӗве патӗнче пулнине каланӑ.
Ҫур ҫӗр тӗлне хӗрарӑма тупнӑ. Ӑна вӑрмантан илсе тухсан чей ӗҫтернӗ те киле леҫнӗ. Вӑл самай шӑннӑ. Каҫхине 2 градус ҫеҫ ӑшӑ пулнӑ, хӗрарӑм вара ҫӳхерех тӑхӑннӑ.
Ҫӗмӗрле районӗнче арҫынпа хӗрарӑм кӑмпана кайсан ҫухалнӑ. Вӗсене полици, ҫӑлавҫӑсем, нимеҫӗсем шыранӑ.
Вӗсем вӑрманта ҫухални пирки ӗнер 23 сехет ҫурӑра пӗлтернӗ. 1979 тата 1982 ҫулта ҫуралнӑ арҫынпа хӗрарӑм Ҫӗмӗрле вӑрманӗнче каялла тухмалли ҫула тупайман.
Ҫур ҫӗр иртни 3 сехетре кӑмпаҫӑсене тупнӑ. Вӗсем Речной поселокӗ ҫывӑхӗнче юхӑннӑ пионер уйлӑхӗ патӗнче тупнӑ. Арҫынпа хӗрарӑм ҫӗр каҫас тесе кӑвайт чӗртнӗ. Вӗсем ҫӑлавҫӑсене курсан питӗ савӑннӑ. Ара, ҫав вӑхӑталла шӑпах ҫумӑр ҫума тытӑннӑ.
Владимир облаҫӗнче хӑрушӑ авари пулнӑ. Унта пирӗн ентеш ҫакланнӑ. Ӑна ҫӑлавҫӑсем пулӑшнӑ.
Паян ҫур ҫӗр иртни 52 минутра М-7 ҫулӑн 297-мӗш ҫухрӑмӗнче йывӑр тиевлӗ икӗ машина ҫапӑннӑ. ГАЗель водителӗ Чӑваш Енри ҫын пулнӑ. 46 ҫулти арҫынна арканса пӗтнӗ кабинӑран ҫӑлавҫӑсем кӑларнӑ.
Авари вырӑнӗнче 12 ҫын 4 техника ӗҫленӗ. Ҫав шутра Инкеклӗ лару-тӑру министерствинче ӗҫлекен 7 ҫын, 2 техника пулнӑ.
Авӑн уйӑхӗн 11-мӗшӗнче Шпуашкар хулинчи пӗр хӗрарӑм япаласене балконтан пеме тапранса кайнӑ. Пӑтӑрмах ирхи 4 сехет тӗлӗнче пулса иртнӗ.
Хӗрарӑм япаласем пенине ҫӑлавҫӑсене пӗлтерекен пулнӑ. Вӗсем хулари Энгель урамӗнче пурӑнакан хӗрарӑм патне пырса ҫитнӗ. Вӗсем «Умелец» хатӗрпе алӑка уҫса кӗнӗ.
Хӗрарӑм патне ҫӑлавҫӑсем васкавлӑ пулӑшу тухтӑрӗсене чӗнсе илнӗ. Балконтан япаласем перекен хӗрарӑм, ҫынсем шухӑшланӑ тӑрӑх, сывах мар.
+4.3 °C