Паян Шупашкара Ҫӗнтерӳ пуйӑсӗ ҫитнӗ. Вӑл кунта нумаях пулмӗ, паянах, 16 сехетре, тапранса малалла кайӗ.

«Ҫӗнтерӳ пуйӑсӗ» сайтра пӗлтернӗ тӑрӑх, Хусанта, Шупашкарта тата Муромра куҫса ҫӳрекен музея шкул ачисем тата студентсем ҫеҫ кӗме пултарни пирки пӗлтернӗ. Ушкӑнсене вӗренӳ тата ҫамрӑксен политикин управленийӗн органӗсен йӗркелемелле.

Паян экспозиципе ЧР Элтеперӗ Олег Николаев та паллашнӑ. Унпа пӗрле транспорт министрӗ Владимир Осипов, журналистсем пулнӑ. Паян пуйӑс патӗнче черет пулнӑ. Ушкӑнсене 12-шер ҫын кӗртнӗ.

Пуйӑса лекес тесен маларах ҫырӑнмалла пулнӑ.

gorodche.ru сайтри сӑн

Ака уйӑхӗн 26-мӗшӗнче Шупашкарти Гагарин урамӗнчи 22-мӗш ҫурт ҫывӑхӗнче «Киа Рио» машина 11 ҫулти хӗрачана ҫапса хӑварнӑ. Водитель вырӑнтан тарнӑ.

Хӗрача «зебра» патӗнче ҫул урлӑ каҫнӑ. Ҫав вӑхӑтра ун ҫине машина пырса кӗнӗ. Водитель ачан сывлӑхӗ пирки ыйтса пӗлес тесе самантлӑха чарӑннӑ. Кайран малалла кайнӑ.

Каярахпа ашшӗ-амӑшӗ хӗрачана пульницӑна илсе кайнӑ. Унӑн чӗркуҫҫи кӑштах аманнӑ. Инкек хыҫҫӑн темиҫе сехетренех ҪҪХПИ инспекторӗсем руль умӗнче ларнӑ хӗрарӑма шыраса тупнӑ. 32 ҫултискер тӗлӗшпе административлӑ протокол ҫырнӑ.

Хула администрацийӗ тунӑ сӑн

Шупашкарта 5-мӗш хутран ӳкнӗ арҫын ачана тытса ӗлкӗрнӗ Вениамин Егорова Шупашкар хула администрацийӗ чысланӑ. Аса илтерер: ака уйӑхӗн 15-мӗшӗнче Мир проспектӗнче чӳречерен ӳкнӗ 5 ҫулти арҫын ача ӑна пула чӗрӗ юлнӑ, вӑйлах суранланман.

Хула администрацийӗн пуҫлӑхӗ Алексей Ладыков тата хула пуҫлӑхӗ Алексей Кортунов арҫын паттӑр пулнине палӑртнӑ. Ӑна тав ҫырӑвӗпе, парнесемпе чысланӑ. Ҫав йышра – хула сӑнне ӳкернӗ картина.

Вениамин Егоров хӑй те ача ашшӗ, унӑн ывӑл ӳсет. Вӑл ашшӗ-амӑшне тимлӗрех пулма сӗннӗ, пӗччен хӑвармалла марри пирки асӑрхаттарнӑ.

nekrasovka.mos.ru сайтри сӑн

Шупашкарти килсӗр-ҫуртсӑр арҫын, 57 ҫултискер, ача кӳмине вӑрланӑ та унпа усӑ курнӑ. Ҫук, унӑн ача пулман. Вӑл унпа ӑпӑр-тапӑр турттарнӑ.

Суд ҫак арҫын айӑплӑ тесе йышӑннӑ. Следстви уҫӑмлатнӑ, суд палӑртнӑ тӑрӑх, вӑл ӑна ҫурла уйӑхӗн 19-мӗшӗнче Сапожников урамӗнчи пӗр ҫурт тамбурӗнчен вӑрланӑ. Кӳме 20 пин тенкӗ тӑнӑскер пулнӑ.

Темиҫе кунран вӑрра тытса чарнӑ, анчах кӳмене тупайман. Арҫын йӑлтах каласа кӑтартнӑ: вӑл унпа урапа евӗр усӑ курнӑ, ҫӳп-ҫап контейнерӗнче тимӗр-тӑмӑр тупнӑ та кӳме ҫине хурса килнӗ.

Арҫыннӑн 1 ҫул патшалӑхшӑн ӗҫлеме тивӗ. Ӗҫ укҫин 10 процентне тытса юлӗҫ.

"Лиза Алерт" архивӗнчи сӑн

Шупашкарта пурӑнакан хӗрарӑм пӗр эрне ӗнтӗ киле килсе курӑнман. Ӑна тӑванӗсем шыраҫҫӗ. Кун пирки вӗсем полицие пӗлтернӗ.

ЧР ШӖМӗ пӗлтернӗ тӑрӑх, 38 ҫулти Тимофеева Светлана Геннадьевна ака уйӑхӗн 18-мӗшӗнче килтен тухса кайнӑ та таврӑнман. Халӗ полици вӑл ӑҫта пулма пултарнине палӑртать.

Хӗрарӑм 165 сантиметр ҫӳллӗш, вӑтам кӗлеткеллӗ, ҫӳҫӗ тӗттӗмрех, куҫӗ хӑмӑр. Килтен тухса кайнӑ чухне вӑл тӗттӗм хӗрлӗ тӗслӗ куртка, хура шӑлавар, хура кроссовка тӑхӑннӑ пулнӑ.

Светлана Тимофеева пирки мӗн те пулин пӗлетӗр пулсан ҫак номерсемпе шӑнкӑравлӑр: 88007005452 е 112

Шупашкар хула администрацийӗн пуҫлӑхӗ Алексей Ладыков кадр улшӑнӑвӗ пирки пӗлтернӗ. Кун пирки вӑл Инстаграмра паян ирпе ҫырнӑ.

Хула администрацийӗн физкультурӑпа спорт управленийӗн пуҫлӑхӗ пулма Сергей Худаева ҫирӗплетнӗ.

Сергей Алексеевич — Чӑваш Республикин физкультурӑпа спортӑн тава тивӗҫлӗ ӗҫченӗ, И.Я. Яковлев ячӗллӗ Чӑваш патшалӑх педагогика университечӗн физкультура факультечӗн доценчӗ, педагогикӑри унӑн стажӗ 30 ҫула яхӑн.

2000 ҫултанпа Сергей Худаев — Чӑваш Республикин баскетбол федерацийӗн президенчӗ, 2014 ҫултанпа — «Чебоксарские ястребы» баскетбол клубӗн тӗп тренерӗ.

geekville.ru сайтри сӑн

Шупашкарта пурӑнакан 29 ҫулти хӗрарӑм такам унӑн ячӗпе кредит илет тесе ӗненнӗ те шӑнкӑравланӑ палламан ҫын каланине йӑлтах пурнӑҫланӑ. Ҫапла вӑл ҫур миллион тенкӗсӗр тӑрса юлнӑ. Укҫи хӑйӗн мар, кредит илнӗскер пулнӑ.

Палламан ҫын каласа пынӑ операцисене пӗр терминал патӗнче пурнӑҫланӑ, унтан лавккари патне куҫнӑ. Темӗнле номерсем ҫине 25 хутчен куҫарса панӑ хыҫҫӑн лавккари ӗҫченсем ун патне пырса мӗн пулнипе кӑсӑкланнӑ. Шӑпах вӗсенчен ҫак хӗрарӑм такамсене 595 пин тенкӗ куҫарса панине ӑнланнӑ. Кун хыҫҫӑн полицие кайса пулӑшасси ҫеҫ юлнӑ.

Шупашкарта пурӑнакан 56 ҫулти хӗрарӑм та ун ячӗпе кредит илнӗ тесе ултавҫа 550 ытла пин тенкӗ куҫарса панӑ.

cheboksari.bezformata.com сайтри сӑн

Шупашкар хула администрацийӗ тӗлӗшпе Арбитраж судне тавӑҫ ҫитнӗ. ЧР Арбитраж сучӗн сайтӗнчи документа ӗненес тӗк, пӗр организаци унран сахал мар укҫа шыраса илесшӗн: 19 миллион тенкӗ.

Тавӑҫа «Ҫурт-йӗр строительствин центрӗ» организаци панӑ. Вӑл Чӑваш Енрех регистрациленнӗ. Организаци Шупашкар хула администрацийӗнчен 19 миллион та 620 пин тенкӗ шыраса илесшӗн. Заявление икӗ кун каялла, ака уйӑхӗн 20-мӗшӗнче, регистрациленӗ.

Тӳре-шара строительство компанийӗпе мӗн пайлайман? Ҫакна кӑтартман.

Ӗнер Шупашкарти Мир проспектӗнчи 96-мӗш ҫуртра пурӑнакан старик патне палламан ҫынсем килсе вентиляци тасатса пама сӗннӗ. Анчах ку – укҫалла.

Пӗри вентиляцие тасатнӑ вӑхӑтра теприсем, хӗрпе каччӑ, ватӑ ҫынпа килӗшӳ тунӑ. Унта палӑртнӑ тӑрӑх, хуҫи Ихметзянов И.И., пӗлтӗр раштав уйӑхӗн 30-мӗшӗнче Пушкӑртстанри Пелепейре регистрациленнӗскер.

Вентиляцие тасатнисӗр пуҫне вӗсем таракансене дезинфекциленӗ имӗш, ку тӗллевпе шӑршӑ пӗтерекен хатӗрпе усӑ курнӑ.

Ӗҫшӗн 8 пин тенкӗ ыйтнӑ. Анчах старик алӑ айӗнче ҫуккине пӗлтернӗ. Лешсем унӑн телефонне илсе укҫана карта ҫине куҫарнӑ.

Паллӑ ӗнтӗ: кусем ултавҫӑсем пулнӑ. Полицие заявлени панӑ ӗнтӗ.

Шупашкар хулинче Ҫӗнтерӳ парадне ҫине тӑрсах хатӗрленеҫҫӗ. Асӑннӑ мероприяти вӑрҫӑ ветеранӗсемсӗр иртӗ, мӗншӗн тесен вӗсене халӑх йышлӑ ҫӗре пухса чирлеттересрен шикленеҫҫӗ. Ҫапах та хисеплӗ ҫынсене уяв туса памаллах. Ҫитменнине, ӑна тӳрӗ эфирта трансляцилеме шантараҫҫӗ.

Ака уйӑхӗн 22, 27-мӗшӗсенче тата ҫу уйӑхӗн 5-мӗшӗнче Республика лапамӗнче парад репетицийӗ иртӗ. Ҫав кунсенче 13 сехет хыҫҫӑн хулари транспорта, ҫав шутра троллейбуссене те, урӑх ҫулпа ҫӳретӗҫ. Ку йӗрке репетици вӗҫлениччен пырӗ.

7, 15, 41, 44, 45, 54-мӗш маршрутпа хутлакан автобуссем Энгельс тата Ярославль урамӗсемпе ҫӳрӗҫ. 4-мӗш троллейбус Президент бульварӗпе Гладков урамне ҫити кайӗ. 1-мӗш троллейбус хулан Ҫурҫӗр-Хӗвеланӑҫ районӗнчен килнӗ чух Калинин урамӗпе, Мир тата Яковлев проспекчӗсемпе кайӗ. Ҫӗнӗ Кӑнтӑр районӗнчен таврӑннӑ чух Гагарин тата Фучик урамӗсемпе, Никольский проспекчӗпе, Гузовский урамӗпе ҫул тытӗ.