Хула администрацийӗн экс-пуҫлӑхӗ рашчара ӗҫлет. Иртнӗ уйӑхӑн 21-мӗшӗнчен Ҫӗнӗ Шупашкарти «Ельниковская роща» (чӑв. Ельниково рашчи) автономи учрежденине Валерий Андреев ертсе пыма тытӑннӑ. «Ҫыхӑнура» порталта хыпарланӑ тӑрӑх, хальлӗхе — пуҫлӑх тивӗҫне пурнӑҫлакан пулса.

Валерий Викентьевич Ельниково рашчинче пуҫлӑх пулса унччен ӗҫленӗ. Унпа контракта 2019 ҫулхи ҫӗртме уйӑхӗнче татнӑ. Эпир маларах асӑннӑ ҫӑлкуҫ пӗлтернӗ тӑрӑх, ӗҫ килӗшӗвне пӑрахӑҫланин официаллӑ майпа ҫирӗплетмен сӑлтавӗ — йывӑҫсене каснӑ пирки прокуратура тӗрӗслев пуҫарни.

Андреев Ҫӗнӗ Шупашкар хула администрацийӗн пуҫлӑхӗ пулса та тӑрӑшнӑ. Ҫав лава 2002 ҫулхи нарӑс уйӑхӗнчен тытӑнса 2008 ҫулхи пуш уйӑхӗччен туртнӑ. Халӑхра ҫӳрекен сӑмах-юмаха ӗненсен, Валерий Андреев отставкӑна кайнин сӑлтавӗ — Шупашкарпа Ҫӗнӗ Шупашкара пӗрлештерессипе ирттернӗ референдума тивӗҫлипе йӗркелеме пултарайманни.

Аса илтерер: 2008 ҫулхи референдумра Шупашкар ҫыннисен 75 проценчӗ спутник-хулапа пӗрлешес тенӗ, Ҫӗнӗ Шупашкар ҫыннисен 61 проценчӗ хирӗҫ сасӑланӑ. Вӑл вӑхӑтра Чӑваш Ене Николай Федоров ертсе пынӑ.

Кайран Валерий Андреев тӗлӗшпе сӗтев илнӗ, улталанӑ, ӗҫ вырӑнӗпе усӑ курнӑ тесе пуҫиле ӗҫ пуҫарнӑ.

Малалла...

Шупашкарта Снежанна Князевӑна шыраҫҫӗ. Вӑл 20 ҫулта. Хӗр ҫурла уйӑхӗн 17-мӗшӗнче каҫхине килтен тухса кайнӑ та таврӑнман.

Хӗре «Лиза Алерт» шыравпа ҫӑлав отрячӗн хастарӗсем шыраҫҫӗ. Вӗсем каҫхине пухӑнаҫҫӗ. Ҫак адреспа пымалла: Хӗвеллӗ бульвар, 6-мӗш ҫурт. Вӑрманта ҫӳремелли тум тӑхӑнмалла. Ку ӗҫре ытти ҫынсем те айккинче юлмасса, пулӑшасса шанаҫҫӗ.

Снежанна 165 сантиметр ҫӳллӗш, ҫӳҫӗ ҫырӑ, куҫӗ симӗс тӗслӗ. Ӑна курнӑ тӑк ҫак номерсемпе шӑнкӑравлама ыйтаҫҫӗ: 8 (800) 700-54-52 е 112.

izh.kp.ru сӑнӳкерчӗкӗ

Шупашкар хулинчи К. Маркс урамӗнче пурӑнакан пӗр мӑшӑр эрех ӗҫме, сыпса лартсан шавлама юратнӑ. Кӳрши тарӑхса ҫитнӗ курӑнать — йӗрке хуралҫисене евитленӗ. Ҫакӑншӑн лешсем хытах кӳренсе лартнӑ, тавӑрма шухӑшланӑ.

46 тата 40 ҫулти упӑшкипе арӑмӗ полицие пӗлтерекене нумай хваттерлӗ ҫурт домофонӗ витӗр тата кил хуҫин хваттер алӑкӗ патне пырса усал сӑмах каласа вӑрҫнӑ. Кил хуҫи арҫынни ҫухалса кайман — диктофон ҫине ҫырса илнӗ.

Кайран арҫын прокуратурӑран пулӑшу ыйтнӑ. Прокуратура тӗрӗслевӗ тӑрӑх арӑмӗпе упӑшки тӗлӗшпе административлӑ ӗҫ пуҫарнӑ, суд вӗсене 3-шер пин тенкӗшер штраф хурса панӑ.

Ҫӗртме уйӑхӗн 30-мӗшӗнче ирхи 2 сехет те 27 минут та 20 ҫеккунтра «Байконур» космодромран чӑваш элемӗллӗ ракета тӗнче уҫлӑхне ҫӗкленнине эпир ҫав кунах пӗлтернӗччӗ. Аса илтерер: «Союз-2» ракета-носитель тиев турттаракан «Прогресс МС-17» транспорт космос карапӗпе тӗнче уҫлӑхне хӑпарнӑ. Ракета ҫине Чӑваш Ен элемне тата Совет Союзӗн икӗ хут Геройне Андриян Николаева ӳкерсе хунӑ.

Шупашкар хулин кунӗ тӗлне вара республикӑн тӗп хулинче ракетӑн копине вырнаҫтарнӑ. Пилӗк метрлӑ тӑршшӗ, вӗрсе карӑнтарса тунӑ «Союз-2» ракетӑна Николаев ячӗллӗ паркра вырнаҫтарнӑ.

cap.ru сӑнӳкерчӗкӗ

Ирина тата Евгений мӑшӑрлану керменне чаплӑ машинӑпа мар, урӑх транспортпа килнӗ. Вӗсем тусӗсемпе пӗрле мотоцикл ҫине ларса хут уйӑрттарма ҫитнӗ. Кун пирки Шупашкарти Мускав районӗн администрацийӗ пӗлтерет.

Хӑйне евӗр туй ҫурла уйӑхӗн 11-мӗшӗнче пулнӑ. Иринӑпа Евгений мӑшӑрлану керменне кӗрсе хут уйӑрттарнӑ та шлем тӑхӑнса уява малалла паллӑ тума мотоциклпа вӗҫтернӗ. Тусӗсем те вӗсем хыҫҫӑнах мотоциклпа кайнӑ.

news.myseldon.com сайтри сӑн

Шупашкарта пурӑнакан хӗрарӑм прокуратурӑна ҫӑхав ҫырнӑ. Вӑл каланӑ тӑрӑх, унӑн 9 ҫулти хӗрне Хулари 1-мӗш ача-пӑча клиника пульницин поликлиникинче эмел вӑхӑтра паман.

Ачана «Пульмозим» илмешкӗн рецепт вӑхӑтра ҫырса паман. Ҫавӑн пекех ЧР Сывлӑх сыхлавӗн министерстви ӑна питӗ кирлӗ препарата – «Урсофальк» ятлӑскере – памашкӑн заявка тӑратман.

Прокуратура пульницӑн тӗп тухтӑрӗ тӗлӗшпе представлени ҫырнӑ. Халӗ ҫитменлӗхсене пӗтернӗ, ачана кирлӗ эмелсемпе тивӗҫтернӗ, айӑплӑ ҫынна явап тыттарнӑ.

rv-ryazan.ru сайтри сӑн

Юрату мӗн патне илсе ҫитерет? Ӑна пула укҫасӑр кӑна мар, акцисемсер те тӑрса юлма пулать.

ШӖМ пӗлтернӗ тӑрӑх, Шупашкарта пурӑнакан 52 ҫулти арҫын Мускав хӗрарӑмӗпе кӑрлач уйӑхӗнче паллашнӑ. Арҫын каланӑ тӑрӑх, вӗсем пӗр-пӗрне питӗ шаннӑ. Вӑл хӗрарӑма пӗрре мар кивҫен панӑ.

Арҫын пӗтӗмпе ӑна 1 миллион та 300 пин тенкӗ ытла куҫарса панӑ. Кун валли вӑл пысӑк предприятири акцисене те сутнӑ. Хӗрарӑм Шупашкара таврӑнсан парӑма татма шантарнӑ. Анчах кӗҫех вӑл телефона тытма пӑрахнӑ. Ҫапла арҫын шӑнман пӑр ҫинче ларса юлнӑ.

kurieronline.ru сайтри сӑн

Ҫак кунсенче Шупашкарти «Рябинка» микрорайонта ҫынсем арҫын ача тӗлӗшпе ясар шухӑшне пурнӑҫлама тӑнине курнӑ. Кун хыҫҫӑнах ӑна тытса чарнӑ.

Педофил тӗлӗшпе пуҫиле ӗҫ пуҫарнӑ. Кунсӑр пуҫне следователь ыйтнипе следстви вӑхӑтӗнче ирӗксӗр хӑварнӑ. Халӗ ӗҫ-пуҫа уҫӑмлатаҫҫӗ.

Шупашкарта унашкал тӗслӗхсем татах та пулнӑччӗ. Ҫавӑнпа ашшӗ-амӑшӗн асӑрханмалла, ачисене кун пирки ыйтмалла.

Паян ирхи 6 сехет те 30 минут тӗлӗнче Шупашкарта троллейбус микроавтобуспа ҫапӑннӑ.

Чӑваш Енӗн Шалти ӗҫсен министерствинче пӗлтернӗ тӑрӑх, инкек Энгельс тата Гагарин урамӗсем хӗресленнӗ вырӑнта пулса иртнӗ. Пассажирсене 15-мӗш маршрутпа турттаракан троллейбус светофор тӗлӗнче чарӑннӑ микроавтобус ҫине пырса кӗнӗ. Асӑннӑ транспорт пассажирсене Шупашкартан Ҫӗнӗ Шупашкара 234-мӗш маршрутпа турттарать.

Троллейбуса руль умӗнче 27 ҫул ларакан водитель тытса пынӑ. Вӑл ӑнлантарнӑ тӑрӑх, транспортӑн тормозӗ ӗҫлеме пӑрахнӑ. Салонта 10 ҫын пулнӑ, ҫавӑн чухлех ҫын — маршрут микроавтобусӗнче. 46-64 ҫулсенчи икӗ хӗрарӑм-пассажир кӑштах суранланнӑ, вӗсем тухтӑрсенчен пулӑшу ыйтнӑ.

Водительсем иккӗшӗ те урӑ пулнӑ.

zvezdagukovo.ru сайтри сӑн

Икӗ ҫамрӑк аслашшӗн /е кукашшӗн/ банк картти ҫинчен укҫа вӑрланӑ. Сахал мар – 244 пин тенкӗ. Вӗсен тӗлӗшпе пуҫарнӑ пуҫиле ӗҫе кӗҫех Ҫӗнӗ Шупашкар хулин сучӗ пӑхса тухӗ.

Хӗрпе каччӑ 15-ре тата 16-ра. Вӗсем аслашшӗн карточкине сӑн ӳкернӗ те сарӑмпа усӑ куса счет ҫинчен тепӗр карта ҫине укҫа куҫарнӑ та куҫарнӑ. Ака уйӑхӗн 1-мӗшӗнчен тытӑнса ҫу уйӑхӗн 9-мӗшӗччен вӗсем 244 пин тенкӗ ытла йӑкӑртнӑ. Укҫана хӑйсем пӗлнӗ пек тӑкакланӑ.

Ватӑ ҫын укҫа ҫухалнине курсан полицие кайнӑ. Вӑрӑсене часах тупнӑ.