Ҫӗмӗрлери ҫурт-йӗрпе коммуналлӑ хуҫалӑх предприятийӗн сӑнӳкерчӗкӗ

Чӑваш Республикин Строительство, архитектура тата ҫурт-йӗрпе коммуналлӑ хуҫалӑх министерствин «Чувашгаз» (чӑв. Чӑвашгаз) унитарлӑ предриятин директорне Сергей Варлашкина ӗҫрен кӑларнине эпир унччен пӗлтернӗччӗ.

Ҫурла уйӑхӗн 30-мӗшӗнче республика ертӳҫи Олег Николаев ҫӗнӗ йышӑну кӑларнӑ. Унпа килӗшӳллӗн предприяти пуҫлӑхӗ пулма Эдуард Никифорова шаннӑ.

«Чӑвашгаз» патшалӑхӑн унитарлӑ предприятине Шупашкарта 2001 ҫулта регистрациленӗ. Предприятин устав капиталӗ 13,7 млн тенкӗпе танлашать.

Сӑмах май каласан, паянхи кун тӗлне пирӗн республикӑра 900 киле патшалӑх шучӗпе газ кӗртме заявка пухӑннӑ. Аса илтерер: патшалӑх кӑвак ҫулӑма кил патне илсе ҫитерес тӑкака хӑй ҫине илӗ, киле кӗртнишӗн — ҫурт-йӗр хуҫисем хӑйсем.

"Про Город" сайтран илнӗ сӑн

Паян Чулхула облаҫӗнче тепӗр «Валдая» шыв ҫине антарнӑ. Вӑл Чӑваш Ене ҫитӗ. Кун пирки ЧР экономика аталанӑвӗн министрӗ Дмитрий Краснов Инстаграмра хӑйӗн страницинче пӗлтернӗ.

Ку Чӑваш Ен валли – виҫҫӗмӗш «Валдай». Ӑна Чкаловск ҫывӑхӗнче Алексеев ячӗллӗ конструктор бюровӗн верфийӗ ҫинче антарнӑ.

Пӗр карапа паллӑ прашютистка, тӗнчен пилӗк хутчен чемпионкин Мая Костинӑн ятне парӗҫ. 1966 ҫулта вӑл Чӑваш Енрен пӗрремӗш хутчен тӗнче чемпионки пулса тӑнӑ. Спортсменка хӑй те савӑнӑҫлӑ уява хутшӑнӗ.

Сӑмах май, «Валдая» 45 ҫын лараять, вӑл сехетре 65 ҫухрӑм кайма пултарать.

ШӖМ тунӑ видео скринӗ

Пӗр шӑрӑх кун Шупашкарти маршруткӑра пӗчӗк хӗрачана япӑх пулса кайнӑ. 1 ҫул та 8 уйӑхри ача тӑнне ҫухатнӑ. Водитель чарӑннӑ. Амӑшӗ ӑна йӑтса уҫӑ сывлӑша тухнӑ. Кун пирки ЧР ШӖМӗ пӗлтерет.

Хӗрарӑм инҫех мар полицейски тӑнине асӑрханӑ, ун патне чупса пынӑ та пулӑшма ыйтнӑ. Юрий Зайцев капитан тӳрех вӗсене хӑйӗн машинине лартнӑ, маяксене ҫутса Республикӑри ача-пӑча клиника пульницине илсе ҫитернӗ. Тухтӑрсем ачана вӑхӑтра пулӑшнӑ, ҫапла унӑн пурнӑҫне ҫӑлнӑ.

cap.ru сӑнӳкерчӗкӗ

Иртнӗ канмалли кунсенче республикӑна «Спутник Лайт» вакцинӑн 20 пин ытла дози килнӗ. Ку вакцинӑпа ытларах чухне кӑшӑлвирусран ревакцинаци тӑваҫҫӗ. Прививка тунӑ хыҫҫӑн ҫур ҫул ытларах иртнӗ тӗк ревакцинаци тума юрать.

Ҫавӑн пекех ҫак кунсенче республикӑна гриппран прививка тумалли вакцинӑсем ҫитнӗ: «Флю-М» тата «Совигрипп». Тухтӑрсем каланӑ тӑрах, кӑшӑлвирусран хӳтӗлекен прививкӑн юлашки компонентне тунӑ хыҫҫӑн 1 уйӑх иртсен гриппран вакцинациленме юрать. Ку вӑхӑт антителӑсене пулса ҫитмешкӗн кирлӗ.

Ҫитес ҫул Шупашкарта Пӗтӗм тӗнчери кинофестиваль хӑҫан иртессине палӑртнӑ. Вӑл ҫӗртме уйӑхӗн 2-7-мӗшӗсенче пулӗ. Хушӑва ЧР Элтеперӗ Олег Николаев алӑ пуснӑ.

Палӑртмалла: кинофестиваль пӗрремӗш хутчен 2008 ҫулта ҫӗртме уйӑхӗнче иртнӗ. Ун чухне ют ҫӗршыври актерсемпе кинорежиссерсене чӗннӗ. Тепӗр ҫулхине республика влаҫӗ кинофестиваль ирттерессине йӑлана кӗртме йышӑннӑ. Ҫакна РФ Культура министерстви те ырланӑ.

Ку таранччен кинофестивале пин-пин ҫын ҫитсе курнӑ. Йӑлана кӗнӗ тӑрӑх, фильмсене унта тӳлевсӗрех кӑтартаҫҫӗ.

ҪҪХПИ тунӑ сӑн

Ҫурла уйӑхӗн 27-мӗшӗнче Канаш районӗнче мотоциклист аварире вилнӗ. Кун пирки ҪҪХПИ Инстаграмри страницинче пӗлтернӗ.

Авари Крамами выҫҫӑлкки ҫывӑхӗнче, Энӗш ҫул ҫинче, пулнӑ. Ведомство пӗлтернӗ тӑрӑх, мотоциклпа пыракан ҫын тепӗр транспортран иртсе кайнӑ чухне тепӗр машинӑна ҫул паман. Лешӗ ун ҫине пырса кӗнӗ.

Шел те, мотоциклист ҫав вырӑнтах вилнӗ. Халӗ авари мӗнле майпа пулнине тӗпчеҫҫӗ.

Кӑҫалтан пирӗн ҫӗршыври ачасем «Пушкин карттипе» усӑ курма пуҫлӗҫ. Аса илтерер: ӑна ҫӗршыв ертӳҫи сӗннипе хатӗрленӗ. Асӑннӑ карттӑпа ачасем культура тата ӳнер учрежденийӗсене тӳлевсӗр ҫӳрейӗҫ. Карттӑпа авӑн уйӑхӗн 1-мӗшӗнчен усӑ курма май килӗ. Ун ҫинче 3 пин тенкӗ пулӗ. Ӑна 14-22 ҫулсенчи ачасемпе ҫамрӑксем илейӗҫ.

Пирӗн республикӑри учрежденисенчен 12-шӗ «PRO.Культура.РФ» порталта модераци тухайнӑ. Ҫав шутра 6 театр: Оперӑпа балет театрӗ, Чӑвашдрамтеатр, Вырӑс драма театрӗ, Ҫамрӑксен театрӗ, Пукане театрӗ, Сӑнавлӑ театр; виҫӗ концерт учрежденийӗ: Чӑваш патшалӑх филармонийӗ, Чӑваш патшалӑх юрӑпа ташӑ ансамблӗ, Симфони капелли; 3 музей: Чӑваш наци музейӗ, Ӳнер музейӗ, СССР летчик-космонавчӗн А.Г. Николаевӑн Шуршӑлти мемориал комплексӗ.

Светлана Асамат. https://www.facebook.com/groups/1745274839035767/permalink/3104237909806113/ сӑнӳкерчӗкӗ

Чӑваш Енри тата тепӗр пултаруллӑ сӑвӑҫ халӑх поэчӗ ялта тивӗҫнӗ.

Хальхинче ҫак ята Чӑваш Енри профессионал ҫыравҫӑсен союзӗн пайташне Светлана Асамата (Смирновӑна) пама йышӑннӑ.

Светлана Васильевна – сӑвӑҫ та, композитор та. Вӑл юрлама та ӑста.

Светлана Асамата чӑваш литературине тата культурине аталантарас, ӑна халӑхра сарас ӗҫре пысӑк тӳпе хывнӑшӑн тата пултарулӑх енӗпе нумай ҫул тухӑҫлӑ ӗҫленӗшӗн «Чӑваш халӑх поэчӗ» хисеплӗ ята парасси ҫинчен калакан хушӑва республика Элтеперӗ Олег Николаев ӗнер, ҫурла уйӑхӗн 30-мӗшӗнче, алӑ пуснӑ.

i3vestno.ru сайтри сӑн

Нарӑс уйӑхӗнче кашни кун 10-12 ҫын кӑшӑлвирусран вилетчӗ. Халӗ те кӑтарту ун чухнехи патнех таврӑннӑ. Юлашки талӑкра 12 ҫын пурнӑҫран уйрӑлнӑ. Ку таранччен каварлӑ вирус 2001 ҫыннӑн пурнӑҫне татнӑ.

Паянхи кун тӗлне республикӑра 31610 ҫын кӑшӑлвируспа чирленӗ, вӗсенчен 28689-шӗ сывалнӑ. Юлашки талӑкра 75 ҫын инфекциленнине палӑртнӑ. 66 ҫын чире парӑнтарнӑ.

Паянхи куна илес тӗк, стационарта тата килте амбулатори мелӗпе 920 пациент кӑшӑлвирусран сипленет.

penza-post.ru сайтри сӑн

Авиабилет туяннӑ чухне асӑрхануллӑ пулмалла. Суя сайтсем те пулма пултараҫҫӗ. Шупашкарта пурӑнакан 61 ҫулти арҫын Питӗре вӗҫме билет туянас тесе ултавҫӑсен тӗлне лекнӗ.

ШӖМ пӗлтернӗ тӑрӑх, арҫын Питӗре вӗҫме палӑртнӑ, сайта кӗрсе билет туяннӑ. Хайхискер заявка ҫырнӑ, банк карттин реквизичӗсене кӑтартнӑ. Счечӗ ҫинчен 13 пине яхӑн тенкӗ илнӗ. Анчах электрон билет ун патне ҫитмен.

Кайран ҫакӑ палӑрнӑ: арҫын билета ултавҫӑсем йӗркеленӗ суя сайтра илнӗ. Кун тӗлӗшпе пуҫиле ӗҫ пуҫарнӑ.