«Лиза Алерт» шырав отрячӗн сӑнӳкерчӗкӗ

«Лиза Алерт» шырав отрячӗн республикӑри хастарӗсем Шупашкарта пурӑнакан ҫамрӑк арҫынна шыраҫҫӗ.

34 ҫулти Евгений Алексеевич Гребенкин ӑҫтине пӗлмеҫҫӗ. Вӑл утӑ уйӑхӗн 18-мӗшӗнче ҫухалнӑ.

Ҫамрӑк арҫын пирки пӗлекенсене 8 800 700-54-52 телефон номерӗпе шӑнкӑравласа систерме ыйтаҫҫӗ.

Ку эрнере палӑрмаллах уҫӑ ҫанталӑк тӑрать. Шӑматкун каҫхине тата ҫӗрле аслатиллӗ ҫумӑр ҫӑвӗ. Канмалли кунсенче те ҫил лӑпланмӗ. Кӑнтӑрласерен 19-24, ҫӗрлесерен 11-16 градус ӑшӑ пулӗ.

Вырсарникун ҫӗрле каллех аслатиллӗ ҫумӑр ҫума пултарать. Тунтикун самаях ӑшӑтӗ. Анчах ҫӗрле каллех сивӗрех пулӗ.

Ҫитес эрне тӑршшӗпех ҫумӑр ҫукалӗ. Пӗр пӗчӗк пӗлӗт татӑкӗнчен те ҫумӑр ӳкме пултарӗ. Ҫил вара лӑпланӗ. Пӗтӗмӗшле илсен, ҫанталӑк шӑрӑх мар, хӑтлӑ пек туйӑнӗ. Сунчӑк илме ҫеҫ манмалла мар.

9111.ru сайтри сӑн

Шупашкарти 51 ҫулти воспитатель ултавҫӑсене 2,3 миллион тенкӗ куҫарса панӑ.

Ун патне палламан ҫын шӑнкӑравланӑ, йӗрке хуралҫи-мӗн. Хайхискер ӑна пӗтӗм укҫине «хӑрушсӑр счет» ҫине куҫарма ӳкӗте кӗртнӗ. Хӗрарӑм ӗненнӗ, укҫи-тенкине йӑлтах темӗнле счет ҫине куҫарнӑ. Хӑйне улталанине вара кайран тин ӑнланнӑ.

Ку тӗслӗх тӗлӗшпе пуҫиле ӗҫ пуҫарнӑ.

fondgkh-nso.ru сайтри сӑн

Паян Тӗп банкӑн директорсен канашӗн ларӑвӗ иртнӗ. Унта тӗп ставкӑна пысӑклатма йышӑннӑ. Малашне вӑл 18 процентпа танлашӗ.

Палӑртмалла: директорсен канашӗн ларӑвӗ унччен пӗлтӗр раштав уйӑхӗнче иртнӗ. Ун чухне тӗп ставка 16 процент пулнине палӑртнӑ. Ҫур ҫул вӑл ҫав шайрах тӑнӑ.

Сӑмах май, директорсен канашӗн ларӑвӗ тепрехинче авӑн уйӑхӗн 13-мӗшӗнче иртӗ.

Чӑваш Енри Туризма атлантарас енӗпе ӗҫлекен агентствӑна ҫӗнӗ ҫын ертсе пырӗ. Унчченхи пуҫлӑх кайнӑранпа ҫулталӑк ҫурӑ иртнӗ. Тинех ертӳҫӗ тупӑннӑ.

Агентствӑна 43 ҫулти Ольга Седых ертсе пырӗ. Унччен вӑл Мари Элти Экспорт аталанӑвӗн агентствине ертсе пынӑ.

Сӑмах май, Туризма аталантаракан агентствӑна 2021 ҫулта туса хунӑ. Ӑна унччен «Кванториума» ертсе пынӑ Мария Гришинӑна шаннӑ. 2022 ҫулхи раштав уйӑхӗнче ӑна ӗҫрен кӑларнӑ. Ҫӗнӗ ертӳҫе ҫавӑнтанпа шыранӑ.

Италири Вальдоббьядене хулин мэрӗ, 47 ҫулти Лучано Фрегонезе, кашни эрнерех ытлашши килограмсене ҫунтарас тӗллевпе хула ҫыннисемпе пӗрле уҫӑлса ҫӳрет. Кун пирки The Guardian пӗлтерет.

Ҫӗртме уйӑхӗнче Фрегнонезене виҫҫӗмӗш хут хула мэрӗ пулма суйланӑ, вӑл хӑйӗн сывлӑхне лайӑхлатма тӑрӑшӑп тесе шантарнӑ. Хула пуҫлӑхӗ каланӑ тӑрӑх, ҫак вырӑна йышӑннӑ вӑхӑтра вӑл 50 килограмм мӑнтӑрланнӑ, халӗ 140 таять.

Чиновник мӑнтӑрланса кайнине «халӑхпа пӗрле пулма юратнипе» тата вӑрах вӑхӑт хушши ӗҫлеме тивнипе ӑнлантарать. Мэр вырӑнне йышӑннӑ хыҫҫӑн унӑн спортпа аппаланма тата хусканусем тума вӑхӑт юлман имӗш. «Тепӗр йывӑрлӑх — эпӗ тутлӑ ӗҫсе ҫиме юрататӑп, кунта вара лайӑх ҫитереҫҫӗ, ӗҫтереҫҫӗ, ҫавӑнпа та диетӑна пӑхӑнма ҫав тери йывӑр», — йышӑнать мӑнтӑрлана кайнине Фрегонезе.

Мӑнтӑрланнине пула уншӑн утма та, сывлама та йывӑр пулса кайнӑ, ҫурӑмпа чӗркуҫҫи те ыратма пуҫланӑ. Хула стени ҫинчи граффити ӳкерни юлашки тумлам пулса тӑнӑ — тахӑшӗ хула пуҫлӑхне «мӑн хырӑм» тесе йӗкӗлтесе илнӗ, сӑнӳкерчӗкӗ вара халӑх тетелӗ тӑрӑх саланнӑ.

Ҫакӑн хыҫҫӑн вӑл 90 килограмм таран начарланма шантарнӑ — мэр вырӑнне пӗрремӗш хут йышӑннӑ чухне шӑпах ҫавӑн чухлӗ вӑл тайнӑ.

Малалла...

culture.cap.ru сӑнӳкерчӗкӗ

Ӗнер, утӑ уйӑхӗн 25-мӗшӗнче, Шупашкарти Хальхи вӑхӑтри ӳнер центрӗнче «Савнӑ Шупашкар» курав уҫӑлнӑ.

Унта ятлӑ-сумлӑ сӑрӑ ӑстисен ӗҫӗсемпе пӗрлех ҫамрӑк художниксен те сумлӑ вырӑн йышӑнаҫҫӗ. Курава тӑван республикӑмӑрӑн тӗп хули 555 ҫул тултарнине халалланӑ.

Курава уҫма Чӑваш Енри художниксен союзӗн председателӗ Наталия Соловьева тата ыттисем хутшӑннӑ.

62-мӗш вӑтам шкул сайтӗнчен илнӗ сӑнӳкерчӗк

Чӑваш Енри педагогсене — тӗрлӗ конкурс ҫӗнтерӳҫисене — преми парса хавхалантарма йышӑннӑ.

150 пин тенке Ҫӗнӗ Шупашкарти 18-мӗш лицейри истори учителӗ, «Чӑваш Енри ҫулталӑк учителӗ» Артём Максимов тивӗҫнӗ. Улатӑрти «Теремок» 1-мӗш ача пахчинче воспитательте ӗҫлекен Любовь Дубровскаяна, «Чӑваш Енри ҫулталӑк воспитательне», 100 пин тенкӗ пама йышӑннӑ.

50-шар пин тенке Шупашкар муниципаллӑ округӗнчи Тренккассинчи вӑтам шкулти класс ертӳҫине Анна Степановӑна, Шупашкарти 2-мӗш вӗпенӳ центрӗн социаллӑ педагогне Дария Волковӑна, Шупашкарти 23-мӗш ача пахчинчи Анастасия Степанова педагог-психолога, Ҫӗнӗ Шупашкарти 6-мӗш гимназин директор ҫумне Александр Карпова, Шупашкарти сывлӑх енчен хавшак ачасен 2-мӗш шкулӗнчи музыка учительне Наталья Яровӑна, Сывлӑх енчен хавшак ачасен вӗренӳ центрӗн тьюторне Галина Степановӑна, Шупашкарти 59-мӗш вӑтам шкулти пуҫламӑш классен учительнеКарина Гордеевӑна, Шупашкарти 205-мӗш ача пахчин учитель-логопедне Екатерина Мурчинӑна, Шупашкарти 62-мӗш вӑтам шкулти чӑваш чӗлхи тата литературин учительне Людмила Николавӑна парӗҫ.

Шупашкарти 49-мӗш вӑтам шкул сӑнӳкерчӗкӗ

Чӑваш Енри икӗ ҫынна «Чӑваш Республики умӗнчи тава тивӗҫлӗ ӗҫсемшӗн» орден медалӗпе чыслама йышӑннӑ. Кун пек йышӑнӑва республика ертӳҫи утӑ уйӑхӗн 25-мӗшӗнче алӑ пуснӑ.

Ҫак шайри наградӑна Шупашкарти П.П. Хусанкай ячӗллӗ 49-мӗш вӑтам шкулӑн педагогне, «Донбасс доброволецӗсен союзӗ» общество организацийӗн регионти уйрӑмӗн ертӳҫи Сергей Николаев тата Чӑваш Енӗн ҫар комиссариачӗн тӗп специалистне-экспертне Артемий Репкин тивӗҫнӗ.

darminaopel.ru сайтри сӑн

Республикӑра Патшалӑхӑн пӗрлехи экзаменӗсен кӑтартӑвӗсем лайӑх. Статистика кӑтартнӑ тӑрӑх, 64 ҫамрӑк 68 экзаменра 100 балл пухнӑ.

Чи лайӑх кӑтартусем ытларах Ҫӗнӗ Шупашкарта, Канашра, Патӑрьел тата Вӑрнар муниципаллӑ округӗсенче пулни паллӑ.

Тата ҫакна палӑртмалла: шкултан вӗренсе тухакансем физикӑпа, математикӑпа, литературӑпа, акӑлчан чӗлхипе ППЭре чи пысӑк балсем тӑтӑшах илме пуҫланӑ.