Следстви комитечӗ тунӑ сӑн

Патӑрьел округӗнчи Ҫӗнӗ Ахпӳрт ялӗнче пурӑнакан арҫын савнине кӗвӗҫнипе чутах ҫунтарса яман. Ку пӑтӑрмах ҫу уйӑхӗн 7-мӗшӗнче пулнӑ.

Ҫав кун арҫын 39 ҫулти савнийӗпе гаражра вӑрҫӑнса кайнӑ. Вӑл ӑна кӗвӗҫнӗ. Тарӑхса кайнӑскер ӑна бензин сапнӑ, шӑрпӑк чӗртсе вӗлерессипе хӑратнӑ.

Телее, хӗрарӑм унӑн аллинчен вӗҫерӗнче тарма пултарнӑ. Палӑртмалла: нарӑс уйӑхӗнче вӑл савнийӗ патӗнче Патӑрьелте хваттерне вӑйпах кӗнӗ.

Арҫынна тытса чарнӑ. Ун тӗлӗшпе пуҫиле ӗҫ пуҫарнӑ.

Анна Штурман тунӑ сӑн

Чӑваш Енри маттур ача Архип Морозов шахмат енӗпе иртнӗ Раҫҫей ӑмӑртӑвӗнче ылтӑн медаль ҫӗнсе илнӗ. Вӑл 9 ҫул тултарман ачасемпе вӑй виҫнӗ.

Ӑмӑрту Кострома хулинче иртнӗ. Унта ҫӗршыври 50 ытла ҫамрӑк шахматист хутшӑннӑ. Пирӗн Архип Морозов 11 турта 9,5 очко пухса Приморье крайӗнчи Богдан Калининран иртсе кайнӑ. Виҫҫӗмӗш вырӑна Ӗренпур облаҫӗнчи Федор Бондарев йышӑннӑ.

Архип Морозов ҫитес ҫул Раҫҫей ӑмӑртӑвӗнче 11 ҫул тултарман ачасемпе вӑй виҫӗ.

Кӑҫал ака уйӑхӗнче Ҫӗмӗрле вӑрманӗнче хыр тункатине асӑрханӑ. Унӑн диаметрӗ 28 сантиметр пулнӑ.

Йывӑҫа кам каснӑ? Ҫав ҫынна инҫех мар вырнаҫнӑ ялта тупнӑ. Хайхи арҫын документсемсӗрех хӑрӑк йывӑҫсем касса вутӑ хатӗрленӗ. Типнӗ хыра касса вӑл ӑна киле илсе килнӗ.

Арҫынна административлӑ майпа явап тыттарнӑ. Суд ӑна штраф тӳлеттерме йышӑннӑ. Ҫавӑн пекех унӑн вӑрман фондне кӳнӗ тӑкака саплаштармалла.

21.fsin.gov.ru сайтри сӑн

Куславккари юсанмалли 5-мӗш колонире ларакан хӗрарӑм ятарлӑ ҫар операцине хутшӑнакан савнийӗпе пӗрлешнӗ.

Вӗсем пӗр-пӗрне тахҫанах килӗштернӗ-мӗн. Пӗр-пӗринчен аякра чухне вара ҫакна тата лайӑхрах ӑнланнӑ. Арҫын отпуска килсен вӗсем пӗрлешнӗ.

Туй туй пекех иртнӗ: хӗр шурӑ кӗпе тӑхӑннӑ, пӳрнисене ылтӑн ҫӗрӗ тӑхантартнӑ, Мендельсон маршӗ янӑранӑ. Колоние чӗнсе илнӗ ЗАГС ӗҫченӗ мӑшӑра ҫырӑнтарнӑ.

Ольга Иванова страницинчен илнӗ сӑнӳкерчӗк

Ҫу уйӑхӗн 28-мӗшӗнче Чӑваш Енӗн Наци вулавӑшӗнче «Варкӑш» литература клубӗн черетлӗ тӗлпулӑвӗ иртнӗ. Чӑваш кӗнеке издательствин редакторӗ тата ҫыравҫӑ Ольга Иванова «Контактра» халӑх тетелӗнчи страницинче пӗлтернӗ тӑрӑх, пӗлтӗр кун ҫути курнӑ «Чӗре тӗпӗнчи туйӑм» коллективлӑ сборника сӳтсе явнӑ.

Ольга Иванова хыпарланӑ тӑрӑх, «кӑларӑма юрату темипе ҫырнӑ калавсемпе повесть кӗнӗ. Авторӗсем – паянхи чӑваш ҫыравҫисем: Константин Малышев, Татьяна Ишмуратова, Оля Рубцова, Дмитрий Моисеев, Ольга Австрийская, Владислав Николаев, Владимир Степанов, Ольга Васильева. Произведенисенчи тӗп сӑнарсем – юрату авӑрне кӗрсе ӳкнӗ яшсемпе хӗрсем».

Хӑтлава хутшӑннӑ Людмила Сачкова прозаик кӗнекене туллин тишкернӗ, кашнин ҫинче уйрӑммӑн чарӑнса тӑнӑ.

«Ольга Австрийскаян чӗлхи сӑнарлӑ, пуян, ҫыравҫӑ детальсемпе вырӑнлӑ усӑ курать, сюжета тирпейлӗ йӗркелет», – тенӗ, сӑмахран, калем ӑсти.

cap.ru сӑнӳкерчӗкӗ

Чӑваш патшалӑх аграри университечӗн экономика факультечӗн 3-мӗш курс студенчӗ Александр Константинов кире пуканӗн спорчӗпе иртнӗ Ази ӑмӑртӑвӗнче ылтӑн медаль ҫӗнсе илнӗ. Тупӑшу Тайваньре иртнӗ.

Конкуренци пысӑк пулсан та пирӗн ентеш ыттисене парӑнтарса пьедесталӑн пӗрремӗш картлашки ҫине хӑпарнӑ. Александр 95 килограмран ытларах таяканнисен ушкӑнӗнче кӗрешсе кире пуканне 64 хут йӑтнӑ.

t.me/mintrud_21 сӑнӳкерчӗкӗ

Ҫӗмӗрлере пурӑнакансем ташша пуҫтарӑннӑ. «60-мӗш ҫулсенчи ретро дискотека» каҫа вырӑнти халӑхӑн социаллӑ ыйтӑвӗсене тивӗҫтерекен центр йӗркеленӗ.

«Паян эпир питех те савӑнтӑмӑр! Эпир совет саманине аса илтӗмӗр, вӑл вӑхӑтри юрӑсене юрларӑмӑр, пионер пулнине аса илтӗмӗр. Хамӑн пӗрремӗш галстука ҫу уйӑхӗн 7-мӗшӗнче ҫыхнине астӑватӑп. Ҫанталӑк сулхӑнччӗ: ҫумӑрччӗ тата вӑйлӑ ҫилччӗ», — тесе палӑртнӑ Ираида Кандюкина.

chuvdram.ru сӑнӳкерчӗкӗ

Ҫу уйӑхӗн 27-мӗшӗнче Чӑваш патшалӑх драма театрӗ умӗнчи К. Иванов палӑкӗ умне чечек хунӑ. Ҫав кун вилӗмсӗр «Нарспи» поэма авторӗ ҫуралнӑранпа 134 ҫул ҫитрӗ.

Чечек хунӑ ҫӗре республикӑн культура министрӗ Светлана Каликова, Чӑваш Енри профессионал писательсен союзӗн председателӗ Ольга Куликова (Улькка Эльмен), Чӑваш академи драма театрӗн ертӳҫисемпе артисчӗсем, писательсемпе поэтсем хутшӑннӑ.

«Чӑваш литературинче сыпӑк илемӗпе, сӑнарсемпе Константин Ивановӑн «Нарспи» поэминчен иртекен ӗҫсем ҫук. Вӑл хайлав пире те. культура учрежденийӗсене те хавхалантарса тӑрать», – тенӗ министр. Палӑк умӗнче сӑмах каланӑ ытти сумлӑ ҫын та Константин Иванов пултарулӑхне пысӑка хурса хакланӑ.

Ҫӗртме уйӑхӗн 5-мӗшӗнче Чӑваш патшалӑх академи симфони капелли «Арҫын тата хӗрарӑм» концерт кӑтартӗ. Ӑна юратӑва халалланӑ.

«Innocence» Kenny G ҫемӗн пӗрремӗш аккорчех арҫынпа хӗрарӑм хушшинчи ҫепӗс туйӑмсен авӑрне илсе кӗртсе кайӗ. Кашни нота, кашни аккорд ытарайми илемлӗ те черчен.

Концерт программине М. Легранӑн «Буду ждать тебя», К. Гарделӗн «Танго» хайлавне кӗртнӗ. Д. Ластӑн «Одинокий пастух», Ф. Лейӑн «Мужчина и женщина» классикӑлла хайлавӗсем те чуна витереҫҫӗ.

culture.cap.ru сайтран илнӗ сӑнӳкерчӗк

Ҫитес кунсенче Чӑваш патшалӑх пукане театрӗн коллективӗ Ҫӗпӗре тухса кайӗ. Пултарулӑх ушкӑнӗ Красноярск хулинче «Сибирь. TERRA MAGICA» фестиваль-конкурса хутшӑнӗ.

Регионсем хушшинчи пултарулӑх ӑмӑртӑвне Урал, Ҫӗпӗр тата Инҫет Хӗвелтухӑҫӗнчи Пукане театрӗсем хутшӑнӗҫ.

Фестиваль программине экспертсен канашӗ йӗркелет. Программа тӗп, вӗренӳ тата хушма (off-программа) пайсенчен тӑрать.

Чӑваш пукане театрӗ фествиалӗ «Король Лир» спектакльпе off-программӑна хутшӑнӗ. Ӑна ҫӗртме уйӑхӗн 5-мӗшӗнче 15 сехет те 30 минутра тата 18 сехетре Красноярскри музыка театрӗнче кӑтартӗҫ.