culture.cap.ru сӑнӳкерчӗкӗ

Пуш уйӑхӗн 25-мӗшӗнче пуҫласа Чӑваш наци музейӗ «Ялан янӑра, чӑваш чӗлхи!» ятпа чӑваш чӗлхи уйӑхлӑхне ирттерме палӑртса хунӑ. Вӑл шӑп та лӑп пӗр уйӑха тӑсӑлӗ.

Уйӑхлӑх вӑхӑтӗнче тӗрлӗ темӑпа экскурсисем, занятисемпе ӑсталӑх лаҫҫисем ӗҫлӗҫ. Вӗсем культура епле йӗркеленнипе, ҫырулӑхпа чӑваш литератури епле пуҫланса кайнипе паллаштарӗҫ.

Наци музейӗн ӗҫченӗсем руна паллисем ҫинчен каласа кӑтартӗҫ, «Уяв» тата «Киремет карти», «Чӑваш Енӗн асамлӑ ҫырӑвӗсем» интерактивлӑ занятисем, «Вупӑр» вӑйӑ ирттерӗҫ.

Ҫеҫпӗл Мишши музейӗ, Литература музейӗ, Чӑваш тӗррин музейӗ те кӑсӑклӑ программӑсем хатӗрлесе хунӑ.

порталтан илнӗ сӑнӳкерчӗк

Чӑваш Ене Узбекистанпа Португалирен 1,7 миллион штук чӑх ҫӑмарти кӳрсе килнӗ.

Иртнӗ ҫул вӗҫӗнче пирӗн ҫӗршывра чӑх ҫӑмартин хакӗ кӗтмен ҫӗртмен ӳссе кайнӑччӗ. Ҫынсем кун пирки Владимир Путин Президента та пӗлтернӗччӗ. Сивӗ чухне чӑх ҫӑмарта тӑвасшӑнах маррине ял ҫыннисем аван пӗлеҫҫӗ. Ҫавна май кайӑк-кӗшӗк фабрикисем лавккасене хӑйсен ҫав продукцине хаклӑрахпа ӑсатма тытӑннӑ.

Хальхи вӑхӑтра пирӗн республикӑна ют ҫӗршыври ҫӑмартана кӳрсе килнӗ. Пӗтӗмпе 6 парти.

t.me/chuvashia_sledcome сӑнӳкерчӗкӗ

Ҫӗнӗ Шупашкарта ватӑ арҫын хӗрарӑма пусмӑрлама тӑнӑ. Пӑтӑрмах иртнӗ ҫулхи чӳк уйӑхӗн 16-мӗшӗнче каҫхине пулса иртнӗ. Хулари ҫуртсен картишӗсенчен пӗринче никам та пулманнипе усӑ курса вӑл пӗр хӗрарӑма тапӑннӑ. Анчах ҫав вӑхӑтра пӗр машина иртсе пынӑ. Водитель машинӑна чарнӑ, йӗрке хуралҫисене пӗлтересси пирки асӑрхаттарнӑ.

Хӑраса ӳкнӗ арҫын пӑтӑрмах вырӑнӗнчен тарнӑ. Анчах йӗрке хуралҫисем ӑна татса чарнӑ.

Хальхи вӑхӑтра пуҫиле ӗҫе тӗпчевҫӗсем суда ярса панӑ. Ҫав вӑхӑтрах вӑл этем ытти ҫавӑн йышши преступлени туман-ши тесе шухӑшлаҫҫӗ.

nvkz-tub.ru сӑнӳкерчӗкӗ

Элӗк муниципаллӑ округӗнче пурӑнакан пӗр хӗрарӑм кӗвӗҫнипе тепӗр хӗрарӑмӑн сутана шӑммине хуҫса янӑ.

Пӗлтӗрхи ҫӗртме уйӑхӗн 23-мӗшӗнче Мӑн Этмен ялӗнчи 60 ҫулти хӗрарӑм хӑйӗн пахчинче пӗр ялта пурӑнакан хӗрарӑмпа вӑрҫма тапранса кайнӑ. Вӑл ӑна икӗ хутран кая мар урапа тапнӑ. Икӗ хӗрарӑм хушшинчи ӑнланмалӑх кӗвӗҫӳпе ҫыхӑннӑ иккен. 60 ҫулти кӗвӗҫ хӗрарӑм кайран йывӑҫ патак ярса илсе икӗ хутран кая мар ҫапнӑ. Шар курнин сутана шӑмми хуҫӑлнӑ.

Пӑтӑрмах пуҫиле ӗҫ пуҫарнипе вӗҫленнӗ. Судра хӗрарӑм хӗненине йышӑнман, вӑл хӑй ӳкрӗ тесе суйнӑ.

Ҫапӑҫакан хӗрарӑма суд тӗрмене хупса хумасӑр 1 ҫул та 6 уйӑхлӑха ирӗкрен хӑтарма йышӑннӑ, сӑнав вӑхӑтне ҫулталӑклӑха палӑртнӑ.

Павловсен архивӗнчи сӑн

Ҫӗнӗ Шупашкарта пурӑнакан Лариса Павлова «Амӑшӗ героиня» ята тивӗҫнӗ. Лариса Леонидовнӑпа Герман Германович 10 ача ӳстереҫҫӗ: 4 ывӑл та 6 хӗр. Чи асли 23 ҫулта, кӗҫӗнни 6 ҫул тултарнӑ.

Павловсем питӗ хастар: пултарулӑх конкурсӗсене хутшӑнса лауреат ятне пӗрре мар тивӗҫнӗ.

Аса илтерер: «Амӑшӗ героиня» ята 10 ача амӑшне кӗҫӗнни 1 ҫул тултарсан параҫҫӗ, ытти ачин чӗрӗ пулмалла. Ҫак сумлӑ ята тивӗҫсен 1 миллион тенкӗ тата «Амӑшӗ героиня» орден параҫҫӗ.

mnogoblock.ru сӑнӳкерчӗкӗ

Шупашкарта пурӑнакан ҫамрӑк хӗарӑм хӑйӗн ӑс-тӑнне тӗнче тетелӗ урлӑ тӗрӗслес тенӗ. Кӑтартӑва пӗлес тесен 33 тенкӗ тӳлемелле тесе ӗнентернӗ. Хӗрарӑмӑн укҫи пулманран вӑл упӑшкин банк карттипе усӑ курнӑ.

Интернет-тест ирттерекенсем 33 тенкӗ вырӑннӗ банк картти ҫинчи 2 533 тенке илсе кайнӑ.

Пӑтӑрмах тӗлӗшпе пуҫиле ӗҫ пуҫарнӑ.

Йӗрке хуралҫисем вара ҫынсене банк реквизичӗсене пули-пулми пӗлтерме юраманни пирки тепӗр хутчен аса илтереҫҫӗ.

prisursky.ru сайтри сӑн ӳкерчӗк

Сӑварсем тухни ҫуркунне чӑнах та ҫитнине систерет. Пуш уйӑхӗн 19-мӗшӗнче Патӑрьел муниципаллӑ округӗнче ҫак чӗрчунсен уҫӑ шӑтӑкне асӑрханӑ. Специалистсем вӗсем унтан пуш уйӑхӗн 18-мӗшӗнче тухнӑ тесе палӑртнӑ.

Сӑвӑрсем хӗл ыйхинчен вӑрансан юр айӗнче ҫимелли, курӑк, шырама тытӑнаҫҫӗ. Вӗсем пӗлтӗрхи курӑка тата унӑн тымарне ҫиеҫҫӗ, хӗл ыйхинче пулнӑ чухне организмран ҫухатнӑ шыва саплаштараҫҫӗ, ҫавӑнпа юр ҫиеҫҫӗ.

«Сӑрҫи» заповедникре сӑнанӑ тӑрӑх, сӑвӑрсем хӗл ыйхинчен вӑтамран пуш уйӑхӗн 18-30-мӗшӗсенче вӑранаҫҫӗ. Ҫак чӗрчунсем вӑтамран шӑтӑкран 12 кунра тухса пӗтеҫҫӗ.

rutube.ru сайтри сӑн

20 ҫулти студент, Мускаври аслӑ шкулта вӗренекенскер, Чӑваш Ене килсен ултавҫӑсен серепине ҫакланнӑ.

Пуш уйӑхӗн 14-мӗшӗнче ун патне хӑйӗнпе «йӗрке хуралӗн ӗҫченӗ» тесе паллаштарнӑ ҫын шӑнкӑравланӑ. Хайхискер каланӑ тӑрӑх, такам ун ячӗпе кредит илесшӗн имӗш. Палламан ҫын кредитне унран маларах илмеллине, укҫана «хӑрушсӑр счет» ҫине куҫармаллине каланӑ.

Каччӑ темиҫе кунра ултавҫӑсене 1 миллион та 180 пин тенкӗ куҫарса панӑ. Ку йӑлтах тенӗ пек – кредит, 20 пин тенки кӑна хӑйӗн пулнӑ. Палламан ҫынсем татах шӑнкӑравласа ҫине тӑрса укҫа ыйтма пуҫласан кӑна вӑл ултаҫӑсен аллине лекнине ӑнланнӑ.

com-business.ru сайтри сӑн

Пӗлтӗр Шупашкарта мӑшӑрсем, пӗрлешнипе танлаштарсан, сахалрах уйрӑлнӑ. Вырӑнти администраци пӗлтернӗ тӑрӑх, ят улӑштаракан та нумайрах пулнӑ.

Пӗлтӗр 3235 мӑшӑр пӗрлешнӗ. 2022 ҫулта ку кӑтарту 151 мӑшӑр сахалрах пулнӑ. 2023 ҫулта, 2022 ҫулпа танлаштарсан, уйрӑлакан сахалрах пулнӑ: пӗлтӗр 2023 ҫемье арканнӑ.

Пӗлтӗр 430 ҫын ятне улӑштарнӑ. Унчченхи ҫул вара кун пеккисем 334 ҫын пулнӑ.

"Чӑваш Ен" ПТРК видео скринӗ

77 ҫулти Светлана Васильева кӑрлач уйӑхӗн варринче картишре юр тасатма шутланӑ. Анчах ӑнсӑртран чӗри тӗлӗнче ыратнине туйнӑ. Кӳрши ӑна хӑйӗн машинипе Шупашкара леҫнӗ, мӗншӗн тесен васкавлӑ медпулӑшӑва юр нумай ҫунине пула унта ҫитме йывӑр пулнӑ.

Кардиодиспансерта ӑна часрах операци сӗтелӗ ҫине вырттарнӑ. Чӗрине стент лартнӑ, анчах кайран миокард ҫурӑлса кайнӑ та хӗрарӑмӑн сывлӑхӗ пушшех те начарланнӑ.

Тухтӑрсем Мускаври специалистсемпе канашланӑ. Ҫулӗсем пур та, хӗрарӑма федераци центрне илсе кайяман. Ҫапла тухтӑрсем йывӑр операцие хӑйсемех тума йышӑннӑ. Бригадӑна Вадим Бабокин ертсе пынӑ. Операци 5 сехете тӑсӑлнӑ. Телее, ватӑ хӗрарӑм ӑна лайӑхах чӑтса ирттернӗ, унӑн халӗ реабилитаци тапхӑрӗ пырать.