Авӑн уйӑхӗн 30-мӗшӗнче Ҫатракасси ялӗнчи кивӗ шкулӗнче ваттисене уяв ячӗпе саламларӗҫ. Хӑш-пӗрисем Лапсар ял тӑрӑхӗн пуҫлӑхӗнчен парнесем илчӗҫ.

Юлашкинчен ваттисене валли пӗчӗк концерт кӑтартрӗҫ. Ҫавӑн пекех хӑш-пӗрисем те юрласа кӑтартрӗҫ.

Шупашкарпа Ҫӗнӗ Шупашкар хулисенче «Кӗр парнисем» ятлӑ ял хуҫалӑх ҫимӗҫӗсен пасарӗ малалла пырать. Хула пуҫлӑхӗсем пасарсем валли Шупашкарта 51, Ҫӗнӗ Шупашкарта 12 вырӑн уйӑрнӑ пулсан та ытларах 13-15 вырӑнта суту-илӳ тӑваҫҫӗ. Елена Таланова пӗлтернӗ тӑрӑх ку вӑл республикӑри ял ҫыннисем ку вӑхӑтра ҫӗрулмине пуҫтарса кӗртнипе ҫыхӑннӑ. Ял ӗҫченӗсем самай ӗҫлеҫҫӗ те ҫавӑнпа та хулана ҫитме вӗсен вӑхӑчӗ ҫук.

Иртнӗ эрнесем хушшинче пурӗ 81 тонна ҫӗрулми, 65 тонна ытти пахча-ҫимӗҫе сутнӑ. Сутнӑ ҫимӗҫӗн хакӗ пурӗ 690 пинпе танлашать.

Пахча ҫимӗҫе ҫак хаксемпе сутаҫҫӗ: ҫӗрулми — 4,5 тенкӗ, ҫарӑк — 5 тенкӗ, кишӗр — 5 тенкӗ, сухан — 11 тенкӗ, купӑста — 3 тенкӗ, ыхра — 40 тенкӗ, панулмисем — 5 тенкӗ, тырӑ — 5 тенкӗ.

Хыпар ҫӑлкуҫӗ

Ҫӗрпӳ районӗнче ҫурт ытларах хӑпартма пуҫланӑ. 2002 ҫулта 12,2 пин м₂ хӑпартнӑ, 2003 ҫулта ҫурт хӑпартас ӗҫ малалла пысӑкланнӑ, пурӗ 12,8 пин м₂ хута кӗртнӗ. 2004 ҫулта 15,2 пин м₂ таран ҫитернӗ, 2005 ҫулта вара 17,5 пин м₂ хута кӗртнӗ.

2006 ҫулта пурӗ 20,5 пин м₂ хута кӗртесшӗн. Паянхи куна Ҫӗрпӳ хулинче 75 хваттерлӗ ҫурта хута кӗртнӗ, тата ку ҫул 74 хватерлӗ ҫурта кӗртме ӗлкересшӗн.

Хыпар ҫӑлкуҫӗ

Авӑн уйӑхӗн 11-мӗшӗнче 71-мӗш ҫулта Козлов Михаил Алексеевич профессор вӑхатсӑр ҫӗре кӗнӗ.

Михаил Алексеевич 1936 ҫулхи ака уйӑхӗн 12-мӗшӗнче Шӑмӑршӑ районӗнчи Асанкасси ялӗнче ҫуралнӑ. Ачаранпах вӑл ҫутҫанталӑкпа кӑсӑкланма пуҫланӑ. Ҫавӑнпа та 1955 ҫулта шкул пӗтернӗ хыҫҫӑн Чӑваш патшалӑх педагогика институчӗн биологипе хими факультетне веренме кӗнӗ. Пӗрремӗш курсра вӗреннӗ чухнех вӑл И.М. Олигер ертсе пынипе энтомологи тӗпчевӗсемпе ӗҫлеме пуҫланӑ. 1959 ҫулта ӑна Ленинград университечӗн биологипе тӑпра факультетне куҫарнӑ. Вӑл университета вӑл 1961 ҫулта лайӑх вӗренсе пӗтернӗ.

Хӑйӗн пурнӑҫӗнче вӑл биологи пӗлӗвне сарассипе нумай ӗҫленӗ. Унӑн кӗнекисем тӑрӑх нумай вӗренекен вӗреннӗ, "Соты жизни" (1976), "Кольцо жизни" (1980), "Не просто букашки" (1991) кӗнекисемпе темиҫе ӑру вӗреннӗ. Илемлӗ кенекесем те ҫырнӑ, вӗсен шутӗнче «Кашни утӑмрах тӗлӗнтермӗш» (1989), «Пингвин ҫулҫӳревҫӗ» (1991), «Тупсӑмне тупасшӑн» (1993) кӗнекесем.

Chuvash.ru сайта влаҫсем хупман, вӑл ҫухални сайт вырнаҫнӑ серверта юсав ӗҫӗсем пынипе ҫыхӑннӑ. Сайта хастингланакан фирма пӗлтернӗ тӑрӑх, ку ӗҫсем 2-3 кунтан ытла пымалла мар.

Ҫӗнӗ вӗренӳ ҫӳлӗ валли халлӗхе 3 шкул хатӗр мар: иккӗшӗ вӗсенчен ҫӗнӗ шкулсем: Куславккари иккӗмеш вӑтам шкулӗ (336 вырӑнлӑ) тата Элӗк районӗнчи Юнтапа вӑтам шкулӗ (196 вырӑнлӑ). Вӗсене иккӗшне Авӑн уйӑхӗн 1-мӗшӗнче хута кӗртесшӗн.

Пӗлсе тӑма: пурӗ Республикӑра 1062 вӗренӳ заведенийӗ. Вӗсен шутӗнче 430 шкул ҫулне ҫитмен ачасем валли, 564 шкул, 16 интернат шкулӗ, 4 ача ҫурчӗ, 27 професси училищи, 32 вӑтам пӗлӳллӗ професси илмелли заведени, 21 аслӑ вӗренӳ заведенийӗ.

Темиҫе кун маларах Чӑваш кӗнеке издательствинче чӑваш чӗлхине тӗпчекен ӑсчахсем ҫинчен «Исследователи чувашского языка» кӗнеке пичетленсе тухрӗ. Ку кӗнекере XIX, XX ӗмӗрсенче пурӑннӑ, тата халӗ те вӑл тӗлӗшре ӗҫлекен 80 тӗпчевҫе кӗртнӗ. Кӗнекене чикӗ леш енчи тӗпчевҫӗсем ҫинчен те пӗлме пулать. ВУлавӑш марериалсене пухма пулӑшнӑшӑн Г.А. Дегтярёва, Л.П. Сергеева, А.П. Хузангая, Э. Фомина пысӑк тав тӑвать.

Енчен те эсир ку кӗнекене туянас теетӗр пулсан (8352) 62-38-12 телефонпа шӑнкӑравлама, а Чӑваш наци вулавӗшӗн маркетинг уйрӑмӗнче ыйтма пултаратӑр.

Хыпар ҫӑлкуҫӗ

Ҫурла уйӑхӗн 22-мӗшӗнче Википедин чӑваш уйрӑмӗ статьясен шучӗпе Тутар уйрӑмне хӑваласа иртсе кайнӑ. Ҫав енченех статьясен шучӗ 4 пине яхӑн пулса тӑнӑ. Халӗ Чӑваш Википедийӗнче 4107 статья, вӑл 229 чӗлхе уйрӑмӗсен хушшинче 69-мӗш вырӑн йышӑнать. Ҫавна каласа хӑвармалла, нумай пулмасть Вырӑс уйрӑмӗ 100 000 статья шутне иртсе кайрӗ.

Википеди — ирӗклӗ энциклопеди. Паянхи куна Википедире 200 ытла чӗлхе уйрӑмӗ пур! Википедири статьясене пурте улӑштарма, анлӑлатма, сӳтсе явса тӳрлетме, вулама, ҫӗннисене кӗртме пултараҫҫӗ.

2004 ҫулхи раштав уйӑхӗнче Чӑваш чӗлхеллӗ уйрӑм уҫӑлнӑ. Вӑл унтанпа пурӗ тӑватӑ пин ытла статьяпа тулнӑ! Унта эсир халӗ Чӑваш Республикӑн паллӑ ҫынсен пурнӑҫӗсемпе, ялсен историйӗпе, тата ытти тӗрлӗ информаципе паллашма пултаратӑр.

Чӑваш чӗлхине пӗлекенсем, чӑваш халӑхӗн культуришӗн ҫунакансем, нумай пӗлме тӑрӑшакансем — сире пурне те Википедине хутшанма сӗнетпӗр!

Малалла...

Кубӑри пултарулах ушкӑнӗ ҫурла уйӑхӗн 19-мӗшӗнче (19:00) Шупашкара 500 ҫул ҫитнӗ майпа хывнӑ паркра, ҫурла уйӑхӗн 20-мешӗнче кӑнтарла каллех Шупашкара 500 ҫул ҫитнӗ майпа хывнӑ паркра, тата Шупашкар Арбатӗнче 15 сехетре хӑйсен пултарулахне кӑтартӗҫ.

Ҫурла уйӑхӗн 23-мӗшӗнче вӗсем Ҫӗнӗ Шупашкар хулара пурӑнакансем умӗнче («Химик» КК) тухса хӑйсен пултарулӑхне кӑтартӗҫ.

Хыпар ҫӑлкуҫӗ