chuvbook.ru сӑнӳкерчӗкӗ

Ӗнер, ҫурла уйӑхӗн 3-мӗшӗнче, Шупашкарти Константин Иванов ячӗллӗ Литература музейӗнче Альберт Канаш поэт ҫуралнӑранпа 95 ҫул ҫитнине халалланӑ литературӑпа музыка уявӗ иртнӗ.

Мероприятие писательсемпе журналистсем, вӗрентекенсемпе шкул ачисем пуҫтарӑннӑ. Музейра поэтӑн сӑнӳкерчӗкӗсемпе тата кӗнекисемпе паллаштаракан «Эпир – аптрамансем» курав йӗркеленӗ.

«Мероприятие Литература музейӗн наука ӗҫченӗ Галина Еливанова ертсе пычӗ. Уява «Надежда» халӑх ансамблӗ «Чечексем, чечексем» юрӑпа уҫрӗ. Сӑввин авторӗ, паллах, – Альпӑрт Канаш. Унӑн лирикӑллӑ хайлавӗсемпе композиторсем чылай юрӑ кӗвӗленӗ.

Ҫӗрпӳ районне кӗрекен Чурачӑк шкулӗнчи чӑваш чӗлхи вӗрентекенӗ Венера Иванова Литература музейне пӗччен мар, мӑнукӗсемпе пӗрле килнӗ – Шупашкарти 30-мӗш шкулта ӑс пухакан Артемпа Арина Парусовсем А. Канашӑн сӑввисене пӑхмасӑр каларӗҫ», — хыпарланӑ Чӑваш кӗнеке издательствинче.

chuvbook.ru сӑнӳкерчӗкӗ

Мӗн тарӑн чӑваш халӑхӗ ӑҫта кӑна сапаланса пӗтмен-ши, тӗнчен тата ҫӗршывӑн хӑш кӗтесӗнче кӑна тӗпленмен-ши?! Бурят Республикинче те пурӑнать чӑваш. Унти йӑхташӑмӑрсен ентешлӗхне Надежда Колесникова (Надежда Аякри) ертсе пырать.

Надежда Николаевна ҫинчен ҫак йӗркесен авторӗ маларах темиҫе хутчен те ҫырнӑччӗ, вӑл хӑйсен республикине пырса курма та йыхравланӑччӗ.

Надежда Колесникова Тутарстанри Аксу ялӗнчен куҫса кайнӑ чӑвашсен ҫемйинче 1968 ҫулта ҫуралнӑ. Нумаях пулмасть вӑл Чӑваш кӗнеке издательствинче «Вдали от Родины» кӗнеке пичетлесе кӑларнӑ.

Кӑларӑмра иртнӗ ӗмӗрӗн 50-мӗш ҫулӗсенче тутар чӑвашӗсем мӗншӗн Бурят Республикине куҫса кайни ҫинчен ҫырса кӑтартнӑ. Ҫерем ватакансем лайӑх шӑпа шырани тӳрре тухнӑ-и-ха? Кун пирки кӗнекене вуласан ӑнланса илме май килӗ.

chuvbook.ru сӑнӳкерчӗкӗ

Шупашкар хулин кунӗ тӗлне «Чувашия: вехи истории и современность» кӗнеке-альбом пичетленсе тухӗ. Ӑна Чӑваш кӗнеке издательствинче хатӗрлеҫҫӗ.

Издательствӑра пӗлтернӗ тӑрӑх, кӑларӑм истори материалӗсемпе тата сӑнӳкерчӗксемпе пуян пулӗ. Кӗнеке аваллӑхран пуҫласа паян кунчченхи тапхӑра уҫса парӗ.

Кӗнекене пухса хатӗрлекенӗсем тата авторӗсем — Е.В. Касимов, С.Н. Кодыбайкин, Ф.Н. Козлов историк-ученӑйсем.

cap.ru сӑнӳкерчӗкӗ

Шупашкарта фермермен мини-пасарӗсем татах пулӗҫ. Ҫапла пӗлтернӗ Шупашкар хула администрацийӗн пуҫлӑхӗ Денис Спирин.

Мини-пасарсем ҫӗнӗ кӑнтӑр тата кӑнтӑр-хӗвеланӑҫ районӗсенче, комбинатра пулӗҫ. Пӗлтӗр ҫакнашкал мини-пасар ҫурҫӗр-хӗвеланӑҫ районӗнче уҫӑлнӑ. Унта унччен те пулнӑ-ха. Ҫав вырӑна ҫӗнетнӗ. Ҫӗнӗ Шупашкарта та фермерсен хӑйсен продукцине сутмалли вырӑн пур. Пӗлтӗр ӑна та ҫӗнетнӗ.

ЧР Ял хуҫалӑх министерстви кун пек мини-пасарсене ытти хулапа муниципалитетра та уҫма палӑртнӑ.

cap.ru сӑнӳкерчӗкӗ

Елчӗк районӗнче Тӑван ҫӗршывӑн Аслӑ вӑрҫине хутшӑннӑ пӗртен-пӗр ветеран юлнӑ. Вӑл - Чӑваш Тӑрӑмӗнче пурӑнакан Илья Волков.

Ҫурла уйӑхӗн 1-мӗшӗнче Илья Степанович 102-мӗш ҫуралнӑ кунне паллӑ тунӑ. Вӑл фронта кайнӑ чухне 20-ре пулнӑ. Вӑрҫӑра икӗ хутчен аманнӑ. Тӑван тӑрӑхне 1946 ҫулта таврӑннӑ. Ҫулталӑкран Илья Волков авланнӑ, мӑшӑрӗпе 6 ача ҫуратса ӳстернӗ.

Инкелӗ лару-тӑру министерстви тунӑ сӑн

Паян ҫӗрле Канаш хулинчи Ӗҫ урамӗнчи 4-мӗш ҫуртра пушар пулнӑ. Юрать-ха, ку инкек никамӑн пурнӑҫне те татман.

Пушар тухни пирки ҫур ҫӗр иртни 1 сехет те 55 минутра пӗлтернӗ. Инкеклӗ лару-тӑру министерствин ӗҫченӗсем икӗ пӳлӗмлӗ хваттертен 32 ҫулти хӗрарӑма, унӑн 6-ри ачине тата пӗрле пурӑнакан 29-ти арҫынна пусмапа илсе тухнӑ. Виҫҫӗшӗ те сӗрӗмпе наркӑмӑшланнӑ, вӗсене Канашри тата Шупашкарти пульницӑсене илсе ҫитернӗ.

Пушара 40 минутран сӳнтернӗ. Малтанлӑха пӗлтернӗ тӑрӑх, ҫулӑм пирус асӑрханмасӑр туртнӑран тухнӑ.

cap.ru сӑнӳкерчӗкӗ

ЧР Элтеперӗ ҫумӗнче йӗркеленӗ Ваттисен канашӗнчен виҫӗ ҫынна, вилнӗскерсене, кӑларма хатӗрленеҫҫӗ. Йышӑну проекчӗ те пур.

Ҫак йышран кӑлармаллисен хушшинче - Лев Кураков (2020 ҫулхи раштав уйӑхӗнче вилнӗ, 2016 ҫулта канаш председателӗ пулнӑ), Петр Ивантаев (2020 ҫулхи авӑн уйӑхӗнче пурнӑҫран уйрӑлнӑ, канаш председателӗн ҫумӗ пулнӑ)тата Леонид Шимин (2021 ҫулхи утӑ уйӑхӗнче вилнӗ).

Палӑртмалла: Ваттисен канашне 2015 ҫул вӗҫӗнче ун чухне ЧР Элтеперӗ пулнӑ Михаил Игнатьев хушӑвӗпе туса хунӑ. Хальхи вӑхӑтра унта 18 ҫын.

Шупашкар ҫуралнӑ кунне паллӑ тума хатӗрленет. Кӑҫал халӑха мӗнпе савӑнтарӗҫ?

Яланхи пекех концерт пулӗ. Шупашкара Раҫсей шайӗнчи ҫӑлтӑрсем килӗҫ. Ҫурлан 19-мӗшӗнче, шӑматкун, «Леприконсы» ушкӑн юрлӗ. Ӑна халӑх «Хали-гали, паратрупер» юрӑпа пӗлет.

Ҫав кунах Хӗрлӗ тӳремре Людмила Зыкина ячӗллӗ «Россия» вырӑс халӑх ансамблӗ концерт лартӗ. Вӑл «Тӗрленӗ Раҫҫей» проектпа килӗшӳллӗн пулӗ.

Вырсарникун, ҫурлан 20-мӗшӗнче, Хӗрлӗ тӳремри сцена ҫине «Новые самоцветы» ушкӑн тухӗ.

22 сехетре яланхи пекех салют пулӗ.

ҪҪХПИ тунӑ сӑн

Сире ҫӗрле мотоцикл сасси ҫывӑрма чӑрмантармасть-и? Каҫхине "тимӗр ута" кӗрлеттерсе чупаҫҫӗ ҫав. Унашкаллисем Шупашкарта пайтах.

ШӖМ пӗлтернӗ тӑрӑх, мотоциклистсем чылай чухне вӑйлӑ шавлаҫҫӗ, ҫул-йӗр правилисене тӑтӑшах пӑсаҫҫӗ. ҪҪХПИ ӗҫченӗсем вӗсене кулленех тӗрӗслеҫҫӗ. Ҫынсене те шавлакан мотоциклистсем пирки пӗлтерме ыйтаҫҫӗ. Ку ыйтупа 102 телефон номерӗпе шӑнкӑравламалла.

Палӑртса хӑвармалла: кӑҫал 7 уйӑхра мотоциклистсемпе ҫыхӑннӑ 47 авари пулнӑ. Вӗсенче 53 ҫын шар курнӑ.

Следстви комитечӗ тунӑ сӑн

Утӑ уйӑхӗн 29-мӗшӗнче пулнӑ ҫил-тӑвӑл вӑхӑтӗнче Атӑлта тепӗр ҫын вилнӗ. Вӑл - сапбордист.

Ҫил-тӑвӑл вӑхӑтӗнче вӑл тӗп пляжра сапбордпа ярӑннӑ. Шӑпах ун чухне ҫак 31 ҫулти арҫын ҫухалнӑ.

Унӑн виллине ҫурла уйӑхӗн 2-мӗшӗнче юханшыв портӗнчен инҫех мар тупнӑ.

Малтанлӑха пӗлтернӗ тӑрах, вӑл ҫӑлав жилечӗ пулманнипе путса вилнӗ. Сапбордпа ярӑннӑ чухне вара жилет пулмаллах.

Вырӑнта следовательсем ӗҫленӗ. Тӗрӗслев хыҫҫӑн тивӗҫлӗ йышӑну тӑвӗҫ.