Следстви комитечӗ тунӑ сӑн

Ака уйӑхӗн 17-мӗшӗнче Куславкка районӗнчи Тӗрлемес ялӗнче 49 ҫулти хӗрарӑмӑн виллине тупнӑ. Следстви комитечӗ кун тӗлӗшпе пуҫиле ӗҫ пуҫарнӑ.

Ҫак тискер ӗҫе хӗрарӑмпа пӗрле пурӑннӑ 46 ҫулти арҫын тунӑ тесе шутлаҫҫӗ. Ӑна тытса чарнӑ.

Следстви палӑртнӑ тӑрӑх, ҫав кун каҫхине арҫын ӳсӗр пулнӑ. Вӑл хӗрарӑмпа хирӗҫсе кайнӑ та ӑна кӗлеткинчен тапса-ҫапса пӗтернӗ. Лешӗ кӑштахран сывлама пӑрахнӑ.

Етӗрне районӗнче водитель ҪҪХПИ инспекторӗсем тӑнине курсан вӗсем патне ҫитмесӗрех ҫул хӗрринче чарӑннӑ. Инспекторсем кунта темӗн пулнине ӑнланнӑ та ун патне пынӑ.

Хайхи водитель права кӑтартнӑ. Анчах инспекторсем вӑл суя пулнине тӳрех ӑнланнӑ. Базӑра пач урӑх ҫыннӑн ячӗ-хушамачӗ тухнӑ.

Кӑкшӑмра пурӑнакан 34 ҫулти арҫыннӑн нихӑҫан та водитель прави пулман иккен. Кӑна вӑл тӗнче тетелӗнче укҫалла туяннӑ. Вӑл унччен судпа айӑпланни паллӑ. Халӗ те суя документпа усӑ курнӑшӑн суд сакки ҫине ларма тивӗ. Ҫитменнине, вӑл машинине те регистрацилемен..

Амӑшӗпе ачи Шупашкарти Граждан урамӗнчи 5-мӗш ҫурт ҫывӑхӗнче уҫӑлса ҫӳренӗ чухне чутах инкеке лекмен. Вӗсене пирӗштисем сыхланӑ тейӗн.

Вӗсем акан 18-мӗшӗнче каҫхине уҫӑлса ҫӳренӗ. Тӑрук вӗсенчен темиҫе сантиметрта кирпӗч катӑкӗсем ӳкнӗ. Хӗрарӑм часрах ачана подъезд тӑрри айне, хӳтте, йӑтса кайнӑ.

Ҫав ҫуртра 12-мӗш хутра специалистсем кондиционер вырнаҫтарнӑ иккен.

cap.ru сӑнӳкерчӗкӗ

Чӑваш Енри йӑрӑ та вӑр-вар ҫынсем хӑвӑрт сӳтсе ҫӑмхаламалли хӑна ҫурчӗсем тумалли конкурса хутшӑнма пултарӗҫ.

Республикӑн Экономика аталанӑвӗн тата пурлӑх хутшӑнӑвӗсен министерствинче пӗлтернӗ тӑрӑх, конкурса Раҫҫейӗн Экономика аталанӑвӗн министерстви ирттерет.

Глэмпинг, кэмпинг тата модульлӗ отельсем хӑпртса лартас ӗмӗтлисене ҫавӑн йышши хӑна ҫурчӗсен кӑшкарне туяннӑ тӑкакӑн 50 процентне патшалӑх хысна шучӗпе саплаштарӗ.

«Чӑваш чӗлхи лабораторийӗ» Hunspell валли тунӑ чӑвашла сӑмах пуххине ҫӗнетнӗ. Унчченхи версине ҫӗнетнӗренпе ҫулталӑк иртнӗрен тахҫанах ҫӗнӗ верси кӑларма вӑхӑт ҫитнӗ ӗнтӗ. Паян вара эпир ҫак ӗҫе пурнӑҫларӑмӑр.

Сӑмах пуххи пуянланса пынӑҫемӗн унӑн калӑпӑшне ӳстерме йывӑртарах ӗнтӗ. Апла пулин те пӗлтӗрхипе танлаштарсан словарь 274 сӑмахпа пуянланчӗ (пӗтӗмӗшле сӑмах йышӗ 31 775-е ҫитнӗ). Унсӑр пуҫне тӗрлӗ йӑнӑшсене юсанӑ, сӑмах формисене хатӗрлекен правилӑсене тӳрлетнӗ. Ҫапла май ҫӗнӗ словарь мӗнпур чӑваш сӑмахӗсене палласа илме вӗренеймен пулин те унашкал сӑмахсен йышӗ пӗчӗкленнӗ.

Hunspell хатӗрпе Mozilla Firefox браузерта, LibreOffice офис пакетӗнче тата ытти хӑш-пӗр программӑсенче чӑвашла ҫырнӑ текстсенчи орфографине тӗрӗслеме май пур. Паллах, мӗнпур опечаткӑна вӑл кӑтартаймӗ (сӑмахран, «вал» та «вӑл» та уйрӑммӑн илсен тӗрӗсех, контексне кура кӑна йӑнӑш пуррине палӑртма пулать), анчах йӑнӑшсене ҫавах сахаллатма пулӑшӗ.

Mozilla Firefox браузер валли, LibreOffice офис пакечӗ валли ятарлӑ хушӑмсене «Hunspell чӑвашла» сайтран уҫласа илме пултаратӑр.

Малалла...

culture.cap.ru сӑнӳкерчӗкӗ

Чӑваш Республикин Ача-пӑчапа ҫамрӑксен вулавӑшӗ Ижевск хулинче Наци ача-пӑча литературин регионсем хушшинчи кунне ирттерӗ.

«Народы дружат книгами. Халӑх туслӑхӗ – кӗнекере. Книга пыр калыкъёс эшъясько» ят панӑ мероприяти Удмрут Республикин тӗп хулинче ыран, ака уйӑхӗн 21-мӗшӗнче, иртӗ. Унта библиотека ӗсченӗсем, писательсем, художник-иллюстраторсем, кӗнеке кӑларакансем хутшӑнмалла. Вӗсем наци ача-пӑча литературине сарас ыйтӑва сӳтсе явӗҫ.

msk.kprf.ru сайтри сӑн

Шупашкар районӗнчи пӗр ял тӑрӑхӗн пуҫлӑхӗ ӗҫ машинипе харпӑр хӑйӗн тӗллевӗпе усӑ курнӑ. Ҫакна прокуратура тӗрӗслев ирттерсен тупса палӑртнӑ.

Йӗркене пӑснӑ пуҫлӑх тӗлӗшпе административлӑ ӗҫ пуҫарнӑ. Ӑна штраф тӳлеттернӗ. Сӑмах май, куншӑн нумайран та 500 пин тенкӗх штраф хураҫҫӗ. Текех унашкалли ан пултӑр тесе Шупашкар район администрацийӗн пуҫлӑхӗ тӗлӗшпе те представлени ҫырнӑ.

Нина Михеева страницинчен илнӗ сӑнӳкерчӗксем

Чӑваш Енри ачасем аслӑ вӗрентекенӗмӗр Иван Яковлев ҫуралнӑранпа 175 ҫул ҫитнине халалланӑ олимпиадӑна хутшӑннӑ. Ӑна И.Я. Яковлев ячӗллӗ Чӑваш патшалӑх педагогика университечӗн вырӑс тата чӑваш филологийӗе тата культурологийӗн кафедри ирттернӗ.

«Наследие Ивана Яковлева» (чӑв. Иван Яковлевӑн эткерлӗхӗ) олимпиада ака уйӑхӗн 18-мӗшӗнче инҫет ҫыхӑну мелӗпе пулса иртнӗ. Унта хутшӑннисене сертификатсем парса хавхалантарнӑ. Олимпиадӑна, сӑмахран, Шупашкарти 61-мӗш шкулта вӗренекенсем те хутшӑннӑ.

chgtrk.ru видеовӗнчен илнӗ скриншот

Патӑрьелти ӳнер шкулӗнче Анатолий Кокель художник ӗҫӗсен куравӗ уҫӑлнӑ. Чӑваш Енӗн патшалӑх телерадиокомпанийӗ хыпарланӑ тӑрӑх, «тахҫанах тӗп хулара тӗпленнине пӑхмасӑр, унӑн картинисем хӑй ӳснӗ Шурутпа Турхан тӑрӑхне илсе ҫитереҫҫӗ. Тӑван тавралӑхпа ҫывӑх пулнине вӑл пир урлӑ кӑтартса пама тӑрӑшать. Пӗве хӗрринчи хур-кӑвакал, ҫарансемпе вӑрмансем ҫулталӑкӑн тӗрлӗ тапхӑрӗнче — пурте асамлӑ ачалӑх аса илӗвне путараҫҫӗ».

Ӳнерҫӗ мӗн пӗчӗкрен пейзажсем ӳкерме юратнӑ та ҫав туртӑма манӑҫа кӑларман.

А Кириллова сӑнӳкерчӗкӗ

И.Я. Яковлев ячӗллӗ Чӑваш патшалӑх педагогика университетӗнче «Яковлевские чтения: патриотизм, гражданственность, духовность в аспекте современных социокультурных процессов» (чӑв. Яковлев вулавӗсем: хальхи вӑхӑтри социокультура улшӑнӑвӗсен саманинче патриотизм, ҫынлӑх тата ӑс-хакӑл) пӗтӗм тӗнчери ӑслӑлӑхпа практика конфренцийӗ иртӗ. Вӑл ака уйӑхӗн 25-27-мӗшӗсенче пулӗ.

Ӑслӑлӑх конференцине Раҫҫейри, Беларуҫ Республикинчи (Максим Танк ячӗллӗ патшалӑх педагогика университечӗ), Кӑркӑстанри (Ош патшалӑх университечӗ), Узбекистанри (Андижан патшалӑх пединститучӗ), Шри-Ланкӑри (Гампаха Викрамараччи халӑх медицина университечӗ), Китайри (Баодин университечӗ, Гуйчжоу педагогика университечӗ) ӑсчахсемпе педагог-практиксем хутшӑнӗҫ.